Troa Xome La Ita Ne Thup Celë e 14 Febuare Me Wiike Cili
Nyima 99 Me 109
Drei La Ketre Joxu Hna Acil Hnei Uati Hmitrötr Thatraqa Së!
“Troa të hui nyidë la Uati Iehova.”—IS. 11:2.
1. Nemene la itre xaa jole ka traqa kowe la fen, nge hna ithanatane hnene la itre xaa atr?
“HAPEU, atreine jë kö tro la atr a mel elanyi koi itre xaa macatre ka 100, nge gomegome pe la fen ngöne la götrane la politik, nge thatreine kö ce mele me itre xan, nge ngazo mina fe la ihnadro?” Celë hi trenge ithanata lai hna qaja hnene la ketre atr ka inamacan ngöne lo macatre 2006. Easë mina fe a e ngöne la ketre igötrane ne la ketre zonal ka tru, ka hape: “Thaa ie ju kö la itre hna kuca matre troa apaatrene la ketre jole ka tru, ene la pë ewekë, nge ketre thaa axulune pena kö së la tingeting e cailo fen. Ngo kösë hne së pena ha hna nyi xane la itre jole ka eje hë the së. Ase hë së tupath asë la nöjei pengöne huliwa: qaane ju hi la musi communisme uti hë la musi capitalisme; goi acile fe së la ketre organizasio (ene lo Société des Nations) uti fe hë la xome së la itre jiane isi ka tru, ka tune lo boob atomik. Hne së mina fe hna mekune laka, atreine hi së troa apaatrene la isi hnei isi, celë hi kepin matre nyimutre catre la itre isi hne së hna hane lö hnin.”
2. Nemene la aqane tro Iehova elanyi a amaman kowe la fene hnengödrai asë, ka hape, Nyidrëti hmekuj hi la ka ijije troa mus?
2 Thaa sesëkötre kö la itre hlue i Iehova la angatr a dreng la itre ithuemacany ka tune caha. Kola qaja hnei Tusi Hmitrötr, ka hape, thaa hna xupe kö la atr troa sipu mus. (Iere. 10:23) Iehova hmekuje hi la ka ijije troa musinë së. Celë hi kepin matre meköti tro Nyidrëti a hamëne la itre trepene meköti thatraqa së me köjane koi së la nyipi aliene la mel, me eatrongë së kow. Ketre, easenyi hë tro Nyidrëti a xome hmaca la mus matre apaatrene la itre ethanyine la musi ne la atr. Tro mina fe Iehova elanyi a apaatren asë la itre ka icilekeu memine la musi cile i Nyidrë, nge ka ukune la atr troa lapa fene la musi ne la ngazo memine la musi ne la “haze ne la fen,” ene Satana lo Diabolo.—2 Kor. 4:4.
3. Nemene la hnei Iehova hna perofetan göne lo Mesia?
3 Ame ngöne la fene ka hnyipixe elany hna troa aparadraison, tro la Baselaia ne la Mesia a amamane la elolone la aqane musi Iehova. (Dan. 7:13, 14) Hnei Isaia hna perofetane hë ekö göne la Joxu ne la Baselaia cili, ka hape: “Troa xulu la xölene ngöne la ine i Iese, nge troa cia la zine ngöne la iwane i angeic. Nge troa të hui nyidë la Uati Iehova, ua ne inamacane me trotrohnin, ua ne wangate hmekune me qoue Iehova.” (Is. 11:1, 2) Nemene la aqane huliwaane Akötresieti la uati hmitrötr matre ini Iesu Keriso jë hnei Nyidrë troa mus, ene lo “xölene [ka xulu qa] ngöne la ine i Iese”? Nemene la itre manathithi ka troa xulu qa ngöne la musi nyidrë? Nge nemene la nyine tro sa kuca matre tro sa hane kapa la itre manathithi cili?
Hna Ini Nyidrë Hnei Akötresie Troa Mus
4-6. Nemene wanga atrehmekune ka sisitria la ka aijijë Iesu troa xom la hnëqa ne Joxu, me Atre Huuj ka sisitria me Atre Amekötin ka inamacane me ka ihnim?
4 Ame la aja i Iehova, tre, ene la tro la ketre atr ka nyipi inamacane me ka tru ihnimin a Joxu, me cilëne fe la hnëqa ne Atre Huuj ka Sisitria me Atre Amekötin, nge tro fe nyidrëti a eatrongëne la itre atr, uti hë la pexeje hnyawa ha angatr. Celë hi kepin matre hnei Akötresieti hna ië Iesu Keriso, me xatua nyidrë jëne la uati hmitrötr, matre tro nyidrëti a atreine cilëne la itre hnëqa ka tru cili. Tro sa pane ce wange la itre kepin ka upi së troa mekune, ka hape, Iesu hnyawa hi la ka ijij troa cilëne hnyawa la itre hnëqa hnei Akötresieti hna ahnithe koi nyidrë.
5 Iesu la ka atrepengöi Akötresieti hnyawa. Pëkö ka atre hnyawa la Tretretro hune la Hupuna, ke, itre miliare lao macatre ne ce mele nyidro. Celë hi itre macatre ne pane inine Iesu troa atrepengöi Iehova hnyawa; ene pe qeje nyidrëti jë hi hnei Tusi Hmitrötr, ka hape, “hnaiji Akötesie ka tha mama kö.” (Kol. 1:15) Hnei Iesu kö hna ketre qeje nyidrëti ka hape: “Ame la ate goeë ni, angeice fe a goeëne la Tetetro.”—Ioane 14:9.
6 Thupe i Iehova, Iesu la ka atrepengöne hnyawa la nöjei hna xup asë, ene mina fe la atr. Easa e ngöne la tusi Kolose 1:16, 17 ka hape: “Hnei nyidëti [lo Nekö i Akötresie] hna xupe la nöjei ewekë asëjëihë, nöjei ewekë e hnengödrai, me e celë fen, nöjei ewekë ka mama me ka tha mama kö . . . nge hnapa i nyidëti, nge pine pe la nöjei ewekë asëjëihë, nge cile huti la nöjei ewekë asëjëihë hnei nyidë.” Pane hane jë nyipunieti mekun: Iesu la “ate xup,” a kola ce xup me Akötresie la nöjei ewekë. Celë hi kepin matre trotrohnine hnyawa hi nyidrëti la pengöne la nöjei ewekë hna xup ngöne la hnengödrai me fene hnengödrai asë, qaane ju hi la ewekë ka co catr ka thaa mama kö koi lue mek, uti hë la itre ewekë hne së hna hain, tune la atuati ne la atr. Nyipici, Keriso hnyawa hi la inamacan hna nyi atrën!—Ite edomë 8:12, 22, 30, 31.
7, 8. Nemene la aqane xatua Iesu hnene la uati hmitrötre i Akötresie, ngöne lo ijine nyidrëti a xom la huliwa ne cainöj?
7 Hna sië Iesu hnene la uati hmitrötre i Akötresie. Hnei Iesu hna qaja ekö, ka hape, “Eje hunge la Uati Iehova qa ngöne la hnei nyidëti hna ujë ni troa cainöjëne la maca ka loi koi ite pë ewekë; me upi ni troa aloine la itete thë fë hni, me troa thinge mele koi ite po, me ahlëne la ite timek, me nue angate hna hutratulup.” (Luka 4:18, 19) Ame ngöne lo ijine bapataiso i Iesu, hnene la uati hmitrötre hna amekunë nyidrëti hmaca la nöjei ewekë hna inine koi nyidrë, qëmekene tro nyidrëti a traqa e celë fen; tune la aja i Akötresie, laka tro Iesu a xome la huliwa ne Mesia, ene la troa cainöj e celë fen.—E jë la Isaia 42:1; Luka 3:21, 22; Ioane 12:50.
8 Pine laka uati hmitrötr la ka aijijë Iesu troa hetre men, nge ketre pexeje fe la mekune me ngönetrei nyidrë, haawe kola mama laka, thaa Iesu hmekuje kö la atr ka tru ne la fene hnengödrai ngo nyidrëti fe la Atre Ini ka Sisitria. Nge “hna haine atraqate la nöjei ate ka ala nyimu ngöne la ini nyidë.” (Mat. 7:28) Nyipici, atre hi Iesu la qaane la itre jole ne la itre atr, ene la pengö i angatr, itre atr ka ngazo nge ka thaa pexeje kö, nge ketre ka thatre Akötresieti pena kö. Ketre, pine laka atrepengöne hnyawa hi Iesu la hni ne la itre atr, haawe, atre hnyawa kö nyidrëti la aqane troa ujë koi angatr.—Mat. 9:4; Ioane 1:47.
9. Maine tro sa mekune la itre aqane ujë i Iesu ekö e celë fen, tro lai a acatrene tune kaa la mejiune së kowe la aqane musi nyidrë?
9 Hnei Iesu hna mele ceitu me atr. Hnei Iesu hna inine la aqane tro nyidrëti a joxu hnene la hna hane mele ceitu me atr, me ce mele memine la itre atr ka thaa pexeje kö. Kola cinyihane ekö hnei Paulo aposetolo ka hape: Hna “celohmë [Iesu] tune la ite tejine me nyidë ngöne la nöjei ewekë asëjëihë, mate tro nyidëti a ate huje ka sisitia ka ihnimi me nyipici ngöne la nöjei ewekë i Akötesie, mate troa huje pine la nöjei ngazo ne la nöj. Ijijë hë nyidëti troa xatua angate hna tupath, ke hnei nyidëti hna xome la aköte ngöne la itupath.” (Heb. 2:17, 18) Pine laka, hnei Iesu hna hane mele “ngöne la itupath,” drenge hi nyidrëti la akötre ne la itre atr ka melëne la itre itupath. Kola mama la utipine i Iesu ngöne la nyidrëti a cainöj ekö e celë fen. Ame lo atr ka trene mec, me sin atr, memine la itre hna methinëne me itre nekönatr, tre, thaa cile hnö kö angatr troa easenyi nyidrë. (Mar. 5:22-24, 38-42; 10:14-16) Ketre, ame la atr ka ipië memine la atr ka mecijin ngöne la götrane ua, tre, angatr a thele troa easenyi nyidrë. Ame pena la atr ka pi tru, me ka pi mama, memine la itre atr ka “tha hetenyi kö la aja koi Akötesie” tre, hnei angatr hna methinë Iesu, me icilekeu me nyidrë.—Ioane 5:40-42; 11:47-53.
10. Nemene la hnei Iesu hna kuca nge ka amamane la etrune la ihnimi nyidrëti koi së?
10 Hnei Iesu hna nue la mele i nyidrëti thatraqa së. Maine jë, ame la ewekë ka anyipicine hnyawa laka, ijiji Iesu troa mus, tre, ene la aqane hmalahnine nyidrëti troa meci thatraqa së. (E jë la Salamo 40:6-10.) Hnei Keriso hna qaja, ka hape, “E tro kete ate a hamëne la mele i angeice thatraqane la ite sine i angeic, pëkö ihnimi ka sisitia hune lai.” (Ioane 15:13) Thaa ceitui Iesu kö memine la itretre musi e celë fen, laka, itre ka thele tro la itre atr a hamë mo koi angatr, ngo ame pena ha Iesu, tre, hnei nyidrëti hna nue asë la mele i nyidrë kowe la itre atr.—Mat. 20:28.
Hna Hamë Nyidrëti La Men Matre Troa Eatrëne La Itre Thangane La Thupene Mel
11. Pine nemene matre pexeje hnyawa la mejiune së kowe la Atre Itö Mele së, ene Iesu?
11 Meköti e tro Iesu a cilëne la hnëqa ne Atre Huuje ka Sisitria, ene la troa axulune la itre manathith jëne la thupene mele i nyidrë. Ase hë nyidrëti amaman ekö ngöne lo nyidrëti a cainöj e celë fen, la hnei nyidrëti hna troa kuca ngöne la ijine tro nyidrëti a musi koi Caa Thauzane Macatre. Itre manathithi elanyi lai hne së hna troa hane kapa e tro sa mele nyipici. Hnei nyidrëti hna aloine la itre ka trene mec me itre sin atr, me amelene la itre ka mec, me ithuane fe la itre ka ala nyim, me musinëne la itre ewekë ka traqa kowe la fen, tune la wene. (Mat. 8:26; 14:14-21; Luka 7:14, 15) Thaa hnei nyidrëti kö hna kuca la itre ewekë cili matre tro la itre atr a goeëne laka, ka trene hnëqa nyidrë maine ka trene mene pena; ohea, hnei nyidrëti pe hna thele troa amamane koi angatr la ihnimi me utipine i nyidrë. Hnei nyidrëti hna qaja ngöne la ketre ijin kowe la ka lepera nge ka sipone troa aloine la meci angeic, ka hape, “Ini a ajan.” (Mar. 1:40, 41) Tro hmaca kö Iesu elanyi a amamane la utipine i nyidrë ngöne la nyidrëti a troa musi koi Caa Thauzane Macatre; ngo ame e cili, tre, troa mama la utipine i nyidrëti e cailo fen asë.
12. Tro ha eatre tune kaa la hna qaja hnene la tusi Isaia 11:9?
12 Tro mina fe Keriso elany me itretre ce musi me nyidrëti a sisedrëne la porogarame ne ini ngöne la ua, lo hna nyiqaane hë ekö hnei Iesu, a 2 000 macatre hë enehila. Ame hë e cili, tro ha eatre la itre trenge ewekë ka eje ngöne la tusi Isaia 11:9, kola hape: “Troa tiqa la fene hnengödrai hnene la ate hmekunyi Iehova, tune la hnagejë a hetëne la tepen’ ej.” Ame la ini cili hna acile hnei Akötresie, tre, kola troa amamane koi së la aqane tro sa nyi hnyawane la ihnadro me thupëne la nöjei ewekë hna xup, tune la aqane ahnithe Iehova ekö koi Adamu troa kuca. Ame hë elanyi la kola traqa kowe la pune la 1 000 lao macatre, tre, tro hnyawa ha eatr lo aja i Akötresieti hnapan, lo hna qaja ngöne Genese 1:28, nge tro ha pexeje hnyawa la huliwa hna kuca jëne la thupene mel.
Hna Hamë Nyidrëti La Men Matre Troa Amekötin La Itre Atr
13. Hnei Iesu hna amamane tune kaa laka ka hnine nyidrëti la thiina ka meköt?
13 Keriso la “iana i Akötesie nyine ate hnyingëne la ite ka mele me ite ka mec.” (Ite hu. 10:42) Drei la easa madrine troa atre laka, ka epine palua Iesu, nge kösë otrene hni nyidrëti la meköt, nge otrene gö i nyidrëti la nyipici! (Is. 11:5) Hnei Iesu hna amamane laka, methi nyidrëti la meciune me aqane ujë ka thoi, memine fe kö la itre xaa thiina ka ngazo; hnei nyidrëti fe hna jelengazone la itre atr ka thaa hane kö hnime la itre atr ka akötr. (Mat. 23:1-8, 25-28; Mar. 3:5) Ketre, hnei nyidrëti mina fe hna amamane laka, thatreine kö troa iaö nyidrëti hnene la ka mama koi lue meke i atr, “ke nyidëti a ate hmekuatine la nöjei ewekë e kuhu hni ate.”—Ioane 2:25.
14. Nemene la aqane amamane Iesu enehila, laka, nyidrëti a hnine la meköt, nge nemene la hne së hna troa isa hnyingën?
14 Iesu pala hi a hnine la meköt, pine laka nyidrëti a elemekene la huliwa ka tru ngöne la fene hnengödrai asë, ene la troa cainöje me inine la itre atr. Thatreine kö tro la atr, me musi atr, me ketre ua ka ngazo a apëne la huliwa celë, nge thaa hna mekune petre kö hnei Akötresie troa umuthe la huliwa. Haawe, ijije hi tro sa mejiune hnyawa laka, tro ha jilapane elanyi la fen hnene la meköti Akötresie, thupe i Amagedo. (E jë la Isaia 11:4; Mataio 16:27.) Loi e tro sa isa hnyinge, ka hape: ‘Hapeu, eni kö a xom la aqane ujë i Iesu kowe la itre atr, ngöne la eni a cainöj? Eni fe kö a hane hamën asë koi Iehova la hnenge hna atrein, ngacama hna xomacone la meleng hnene la ketre sine mec maine hnepe kucakuca pena?’
15. Nemene mekune la ka troa xatua së troa hamën asë la hne së hna atreine koi Akötresie?
15 Tro hë sa catre huliwa i Akötresie hnene la hni së ka pexej e tro sa lapa mekune laka, huliwa i Nyidrëti la huliwa ne cainöj. Nyidrëti la ka acile la huliwa ne cainöj, me elemekene la huliwa cili jëne la Hupuna i Nyidrë; nge Nyidrëti fe a upe la uati hmitrötre i Nyidrëti kowe la itre ka hane sine la huliwa cili, matre hetre trenge catre i angatre jë. Ngo hapeu, nyipiine kö nyipunie la hnëqa cili ka tru, ene la troa ce huliwa me Akötresie cememine la Hupuna i Nyidrë, lo hna eatrongëne hnene la uati hmitrötr? Drei e trö i Iehova la ka atreine ea la 7 milio lao atr nge sin, laka, itre ka “tha ’te tus, me tha hna inin,” ngo itre ka tro fë pe la maca ne Baselaia ngöne la 236 lao nöj?—Ite hu. 4:13.
Epi Troa Amanathithi Nyipunie Jëne Keriso!
16. Nemene la aliene la hna qaja ngöne Genese 22:18?
16 Hnei Iehova hna qaja ekö koi Aberahama, ka hape: “Tro ha manathithi qa thene la matra i ’ö la nöjei nöje asëjëihë e celë fen; qa ngöne la hnei ’ö hna denge thenge la tenge ewekëng.” (Gen. 22:18) Ame kowe la itre ka kapa madrine troa nyihlue i Akötresieti me Iesu, tre, celë hi ketre ithuemacanyi lai ka acatrene hnyawa thei angatre la mejiune laka, troa xulu la itre manathith jëne la Mesia, ene lo Matran. Nge ame enehila, tre, angatr a catre huliwa me lapa mekune la itre manathithi cili hna troa kapa elany.
17, 18. Nemene la hnei Iehova hna thingehnaeane ngöne Deuteronomi 28:2, nge nemene la aliene la itre trenge ewekë i Nyidrëti koi së?
17 Hnei Akötresieti hna qaja ngöne la ketre ijin kowe la matra i Aberahama ngöne la götrane la ngönetrei, ka hape: “Troa traqa asë koi ’ö la ite manathithi celë, me xome cilë eö, e denge thenge hnei ’ö la aqane ula i Iehova Akötesi ’ö.” (Deu. 28:2) Ame la itre trenge ewekë celë, tre, thatraqane mina fe la itre hlue i Akötresieti enehila. Maine nyipunieti a hane ajane troa kapa la itre manathithi qaathei Iehova, nyipi ewekë tro nyipunieti a “denge thenge” pala hi la hnei Nyidrëti hna qaja. Nge thupene lai, troa ‘traqa koi nyipunie la ite manathithi celë me xome cilë nyipunie.’ Ngo kola hapeue la troa “denge thenge” Nyidrë?
18 Ame la atre dreng, tre, angeic a nyipiine la itre mekune hna qaja hnene la Wesi Ula i Akötresie, memine la göxeni ngöne la ua hnei Nyidrëti hna hamëne koi angeic. (Mat. 24:45) Loi e tro mina fe angeic a drenge thenge Akötresie, memine la Hupuna i Nyidrë. Hnei Iesu ekö hna qaja, ka hape: “Tha angat’ asë kö angete qeje ni ka hape, Joxue, joxue, ka troa hane lö kowe la baselaia ne hnengödrai; ngo loi la ate kuca la hanengë i Angakaka e hnengödrai.” (Mat. 7:21) Nge ame la aqane troa drei Akötresie, tre, ene la troa metrötrëne la aqane eköthe Nyidrëti la ekalesia i Keresiano, tune la itre “ahnahna kowe la nöjei ate,” ene lo itre qatre thupe hna acil.—Efe. 4:8.
19. Nemene la nyine tro sa kuca, matre ijije fe tro sa hane kepe manathith?
19 Kola hane e thene la itre “ahnahna kowe la nöjei ate” la itre atre ne la Lapa Ne Xomi Meköt; angatre hi lo itre ka axecië mekun thatraqane la itre ekalesia i Keresiano asë. (Ite hu. 15:2, 6) Thaa tro kö sa thëthëhmine laka, tro ha ameköti së elany, hmekune la akötr atraqatr, thenge la aqane ujë së enehila kowe la itre trejine me Keriso ngöne la ua. (Mat. 25:34-40) Celë hi kepin matre ame la ketre jëne manathithi koi së, tre, ene la troa catre ce huliwa memine la itre hnei Akötresieti hna iën.
20. (a) Nemene la ketre hnëqa ka tru hna cilëne hnene la itre “ahnahna kowe la nöjei ate”? (b) Nemene la aqane tro sa amamane laka, easa nyipiine la itre trejine me easë cili?
20 Ame la itre xaa “ahnahna kowe la nöjei ate,” tre, ene lo itre atrene la Kometr ne la itre bethela, me itre atre thup ka iwai trootro, memine fe la itre qatre thupe ne la itre ekalesia; angatre la itre hna acil hnene la uati hmitrötr. (Ite hu. 20:28) Ame la hnëqa hnapan ne la itre trejine cili, tre, ene la troa xatuane la nöje i Akötresieti troa kökötr “uti hë la traqa asë hë shë kowe la ce hni ngöne la lapaun, me wangate hmekune la Hupuna i Akötesie, me kowe la inamacan, me kowe la tulu ne la etrune la tiqa i Keriso.” (Efe. 4:13) Nyipici, ceitui angatre hi me easë asë, laka, itre atr ka ngazo. Ngo tro sa kepe manathith e tro sa drengethenge me hetre hni ne ole kowe la itretre thupë së.—Heb. 13:7, 17.
21. Pine nemene matre nyipi ewekë catre tro sa drengethenge la Hupuna i Akötresie?
21 Easenyi hë tro Keriso a apaatrene la fene i Satana ka ngazo. Ame ngöne la ijine cili, qanyi Iesu pëhë amekötine göne la mele së, pine laka, nyidrëti la hnei Akötresieti hna nue matre troa eatrongëne lo “ka ala nyimu atraqat” hna thingehnaean; nyidrëti la ka troa e angatr kowe la “timi ka mele ka qeqe.” (Hna ama. 7:9, 16, 17) Qa ngöne lai, catre pi së enehila drengethenge la Joxu hna eatrongëne hnene la ua i Iehova, nge epi tro fe sa hetre hni ne ole koi nyidrë.
Nemene Hë La Ini Hnei Nyipunieti Hna Kapa Qa Ngöne La Tusi . . .
• Isaia 11:1-5?
• Ite Huliwa 10:42?
• Genese 22:18?