Troa Xome La Ita Ne Thup Celë e 12 Eiperem Me Wiike Cili
“Öni Ua Me Tepu I Iesu, Ka Hape, Trohemi!”
“Nge öni Ua me tepu i Iesu, ka hape, Trohemi . . . Nge ame la ate pi iji, trohemi. Nge ame la ate ajan, xome gufane jë la timi ka mel.”—HNA AMA. 22:17.
1, 2. Nemene la götran hna xom hnene la itre huliwa ne la Baselaia ngöne la mele së, nge pine nemen?
EKA la göhnen la itre huliwa ne la Baselaia ngöne la mele i nyipunie? Hnei Iesu hna upe la itre hlue i nyidrë troa ‘pane thele la Baselaia i Akötresie;’ nge hnei nyidrë hna qaja xeciëne koi angatr, ka hape, maine tro angatr a ujë tune lai, ‘tro ha hamëne koi angatr la nöjei ewekë cili.’ (Mat. 6:33) Hnei nyidrëti hna aceitunëne la Baselaia i Akötresie memine la ketre penina ka tru alameken; ame la kola öhne lai penina cili hnene la ketre atre salem, ene pe hnei angeice hna “itöne [salemëne] la ite ewekë i angeice asë nyine thupen’ ej.” (Mat. 13:45, 46) Hapeu, easë kö a wanga atrune hnyawa la huliwa ne cainöjëne la Baselaia me inine la itre atr?
2 Tune lo hne së hna ce wange hë ngöne lo lue hna cinyihan hnapan, kola mama ngöne la aqane catre cainöje së me ngöne la aqane maca së troa xome la Wesi Ula i Akötresie laka, uati hmitrötre i Nyidrë a eatrongë së. Ketre, ka sisitria la hnëqa ne la ua cili ngöne la easa cainöjëne lapaane la Baselaia. Hanawange la nyine anyipicin.
Drei La Ketre Ihë Hna Hamën Kowe La Nöjei Atr!
3. Nemene la pengöne tim hna upe la itre atr troa ‘xom’?
3 Kola hëne la nöjei atr asë hnene la uati hmitrötr. (E jë la Hna Amamane 22:17.) Kola hape, “trohemi” matre troa iji la ketre tim ka ketrepengöne kö. Thaa kolo kö a qaja lo timi hne së hna majemine xom. Ngacama ka nyipi ewekë catr la tim kowe la mele së e celë fen, ngo ketre pengöne timi kö la hnei Iesu hna mekun ngöne lo nyidrëti a qaja kowe la ketre föe ne Samaria, ka hape: “Ame la ate iji la ani hnenge hna troa hamë angeic, te, the pi iji hmaca kö epine palua; ngo ame la an hnenge hna troa hamë angeic, tro ha eje e kuhu hni angeice la an ka qeqe kowe la mele ka tha ase palua kö.” (Ioane 4:14) Ame la timi cili ka ketre pengön, lo hna upe la itre atr troa ij, tre, ej a hamë mele ka thaa ase palua kö.
4. Hnauëne laka nyipi ewekë jë la timi ka mel, nge nemene la hna nyihatrene hnene la timi cili?
4 Kola mama la enyipiewekëne la timi ka mele cili ngöne lo Adamu me Eva lo lue pane atr, a xele ma drengethenge lo Atre Xupi nyidro, ene Iehova Akötresie. (Gen. 2:16, 17; 3:1-6) Hna helë nyidro qa ngöne lo lai hlapa i nyidro, “wanga li ime pi [Adamu], me xome fe qa ngöne la sinöe hna melen, me xen, mate mele epine palua.” (Gen. 3:22) Adamu la keme ne la nöjei atr, ene pe angeice hi la ka axulune la meci ngöne la fene hnengödrai asë. (Rom. 5:12) Ame lai timi ka mel, tre, ej a nyihatrene la nöjei hna hnëkën hnei Akötresie, matre troa xome trije la ngazo me mec qaathene la itre atr ka drengethenge, me hamëne koi angatr la mele ka pë pun me ka pexej ngöne la Paradraiso e celë fen. Ame la trepene la itre hna hnëkëne cili, tre, ene la mele hna huujëne hnei Iesu nyine thupene mel.—Mat. 20:28; Ioane 3:16; 1 Ioane 4:9, 10.
5. Drei la Qaane la ihë troa traqa me “xome gufane la timi ka mel”? Qeje pengöne jë.
5 Drei la ka ihë troa traqa me “xome gufane la timi ka mel”? Ame fene la Musi Keriso Ka Caa Thauzane Lao Macatre, tro la itre atr a kepe thangane hnyawa jëne Iesu, lo nöjei hna hnëkën thatraqane la mel. Hna qeje pengöne itre ej ceitu me ketre “hneopegejë timi ne mel, ka lualai kösë thulu.” Kola mama la hneopegejë a “di qa ngöne la therone i Akötesie memine la Arenio.” (Hna ama. 22:1) Qa ngöne lai, Iehova lo Atre Hamëne La Mel, Nyidrëti hi la Qeqene lo lai timi ka iamele. (Sal. 36:9) Nyidrëti hi la Atre hamëne la timi cili jëne la “Arenio,” ene Iesu Keriso. (Ioane 1:29) Ame lai hneopegejë, tre, ej a nyihatrene la itre ewekë hnei Iehova hna hnëkën, matre troa apëne la nöjei akötr, hna xeni pun hnene la itre atr qa ngöne la hna thaa idrei hnei Adamu. Nyipici, Iehova Akötresie la Qaane la ihë celë, hna hape, “Trohemi.”
6. Eue la kola nyiqaane di la “hneopegejë timi ne mel”?
6 Maine nyipici laka tro ha di hnyawa elany la “hneopegejë timi ne mel” ngöne la Musi Keriso Ka Caa Thauzane lao Macatre, ngo ej a nyiqaane neni ngöne “la drai Joxu,” qaane lo kola acile “la Arenio” troa musi e koho hnengödrai ngöne lo macatre 1914. (Hna ama. 1:10) Haawe, hetre itre xaa hna hnëkën thatraqane la mel hna kepe thangane hë hnei itre atr thupene la ijine cili. Kolo lai a qaja la Wesi Ula i Akötresie ene la Tusi Hmitrötr, ke kola qaja la maca e hnine ej ceitu me “tim.” (Efe. 5:26) Ame la ihë troa xome la timi ne mel, ene la troa dreng me kapa la maca ka loi ne la Baselaia, tre, hna hamëne kowe la nöjei atr asë. Ngo drei enehila la ka ihë ngöne la hneijine ne la Joxu?
Önine “La Tepu i Iesu,” Ka Hape, “Trohemi”
7. Drei la itre atr ka pane tro fë trootro la ihë ngöne “la drai Joxu,” nge kola tro fë lai koi drei?
7 Kolo itre atrene la lapa ne la tepu i Iesu, ene lo itre Keresiano hna iën, la itre atr ka pane tro fë trootro la ihë cili, ka hape, “Trohemi.” Kola tro fë koi drei? Eje hi laka, thaa tepu kö a ketre sipu qaja koi angeice kö, ka hape, “Trohemi.” Ngo kolo pe a hëne la itre atr ka mejiune troa kapa la mele ka thaa ase palua kö e celë fen, thupene “la ishi ngöne la drai atraqate i Akötesie Kapucatinasë.”—E jë la Hna Amamane 16:14, 16.
8. Qaane lo macatre 1918, nemene la ka amamane, ka hape, hnene lo itre Keresiano hna iën, hna tro fë trootro la ihë i Iehova?
8 Hnene lo itre hlue i Keriso hna iën, hna tro fë trootro lai ihë cili qaane lo macatre 1918. Ame ngöne lo macatre cili, hna cile fë la ketre cainöj hna hape, “Thaa Tro Kö a Mec La Itre Milio Lao Atr Enehila;” eje a thue mejiune kowe la itre atr ka nyimutre, ene laka thupene la isi Amagedo, ijije tro angatr a hane mele elany ngöne la ketre paradraiso e celë fen. Ame ngöne lo macatre 1922, hna hamëne mina fe la ketre cainöj ngöne la Kovasio ne lo Itretre Inine la Tusi Hmitrötr e Cedar Point, Ohio e Etazini; eje a upe la itre ka dreng troa ‘ithuemacanyine la Joxu me Baselaia i nyidrë.’ Hnene la ihë cili hna xatuane la itre thelene la lapa ne la tepu troa ketr la itre xaa atr ka nyimutre pala kö. Ame ngöne lo 1929, eje e hnine la zonal La Tour de Garde ne 15 Maac, la ketre hna cinyihane hna hape, “Ketre Ihë Ka Lolo,” nge hna nyitrepene ej hnene la tusi Hna Amamane 22:17. Kola qaja ngöne la hna cinyihane cili, ka hape: “Kola cengöne hë hnene la thelene la lapa ka nyipici cememine [la Ka Sisitria] me qaja, ka hape, ‘Trohemi.’ Nyipi ewekë troa cainöjëne la maca cili kowe la itre atr ka hetre hni ka ajan kowe la thiina ka meköt me kowe la nyipici. Loi e troa eatrëne lai ngöne la hneijine së enehila.” Ame enehila, kolo pala hi a tro fë trootro la ihë cili hnene la lapa ne la tepu.
“Nge Loi e Hapejë La Ate Denge, Trohemi”
9, 10. Hnene la itre ka dreng hna kapa tune kaa la ihë, hna hape, “Trohemi”?
9 Tune kaa fe kowe la itre atr ka drenge la ihë, hna hape, “Trohemi”? Kolo mina fe a hë angatr matre troa hane qaja, ka hape, “Trohemi.” Drei la ketre ceitun, hna cinyihane ngöne la zonal La Tour de Garde qene Papale ne 1 Ogas 1932, ngöne la götrane 232, ka hape: “Epi tro la itre hna iën a ithuecatre kowe la nöjei atr ka troa hetre hni ne ajan troa catre cainöjëne la maca ka loi ne la Baselaia. Thaa nyipi ewekë kö tro angatr a itre hna iën hnei Joxu, matre troa tro fë la maca i nyidrë. Drei la kola akeukawane la hni ne la Itretre Anyipicine i Iehova troa atre enehila, laka, ijiji angatre troa hane tro fë la itre timi ne mel kowe la ketre lapa ne atr ka ijij troa mele pe e Amagedo, me hetrenyi la mele ka thaa ase palua kö e celë fen.”
10 Ame ngöne la kola köjane la hnëqa ne la itre atr ka drenge la ihë, troa qaja, ka hape, “Trohemi,” önine la zonal La Tour de Garde qene Papale ne 15 Ogas 1934 götrane 249, ka hape: “Nyipi ewekë tro la itre atrene la lapa i Ionadaba a ce tro memine la lapa i Iehu enehila, ene lo itre hna iën, me tro fë la maca ne la baselaia, ngacama ame angatr, tre, thaa Itretre Anyipicine i Iehova kö hna iën.” Ame lo macatre 1935, kolo ha mama hnyawa la pengöne la “ka ala nyimu atraqat” hna qaja ngöne Hna Amamane 7:9-17. Celë hi ewekë lai ka akökötrene hnyawa la huliwa ne tro fë la ihë i Akötresie. Qaane ju hi lai, kolo pala hi a elë la etrune la ka ala nyimu atraqatr ka kapa la ihë cili; traqa ha koi ala sevene milio nge sin. Hnene laka hnei angatre hna drenge hnyawa la maca, ene pe hnei angatre hna sa xepu koi Akötresie me xome la bapataiso, me ce tro memine la lapa ne la tepu matre troa hëne la itre xaa atr troa ‘xome gufane me iji la timi ne mel.’
Öni “Ua,” Ka Hape, “Trohemi”
11. Ame ngöne lo hneijine i Iesu, hna mama tune kaa la thangane la uati hmitrötr ngöne la huliwa ne cainöj?
11 Ame ngöne lo Iesu a cainöj hnine la sunago e Nazaretha, hnei nyidrëti hna seluthe la tusi Isaia perofeta me e, ka hape: “Eje hunge la Uati [Iehova], qa ngöne la hnei nyidëti hna ujë ni troa cainöjëne la maca ka loi koi ite pë ewekë; me upi ni troa aloine la itete thë fë hni, me troa thinge mele koi ite po, me ahlëne la ite timek, me nue angate hna hutratulup, troa cainöjëne la macate ne madi i [Iehova].” Thupene lai, hnei Iesu hna ketre sipu eatrëne la trenge ewekë cili, me hape: “Eatë hë ngöne la drai celë la hna cinyihane celë ngöne la ite hnangenyë i nyipunie.” (Luka 4:17-21) Qëmekene tro Iesu a elë hnengödrai eë, hnei nyidrëti hna qaja kowe la itretre drei nyidrë, ka hape: “Tro nyipunie a hete mene e hlepëtipi la Uati Hmitöte koi nyipunie; nge tro nyipunie a anyipici ni . . . uti hë la cane la fene hnengödrai.” (Ite hu. 1:8) Ame ngöne lo hneijine i Iesu, sisitria catre la hnëqa ne la uati hmitrötr ngöne la huliwa ne cainöj.
12. Kola mama tune kaa enehila la thangane la uati hmitrötre i Akötresie ngöne la huliwa ne ihë trootro?
12 Kola mama tune kaa enehila la thangane la uati hmitrötre i Akötresie ngöne la huliwa ne ihë trootro? Iehova la Atrekë Ewekëne la uati hmitrötr. Nyidrëti a xome la ua cili matre troa fe la itre hni me itre mekun ne la lapa ne la tepu, matre tro angatr a trotrohnine hnyawa la Wesi Ula i Nyidrë, ene la Tusi Hmitrötr. Kolo mina fe a uku angatr hnene la ua cili, troa ihë trootro me qeje pengöne la itre nyipici qa hnine la itre Hna Cinyihan kowe la itre atr ka mejiune troa mele epine palua ngöne la Paradraiso e celë fen. Hapeue la itre atr ka kapa la ihë, nge ka xötrethenge Iesu Keriso, me tro fë trootro la ihë cili kowe la itre xan? Hetre thangane fe la uati hmitrötr thei angatr. Ame ngöne la kola bapataiso angatr ‘kowe la atresiwa ne la uati hmitrötr,’ angatr a mele thenge la ua, me mejiune kowe la ixatua qaathene ej. (Mat. 28:19) Pane mekune jë fe së la maca hna cainöjëne hnene la itre hna iën memine la ka ala nyimu atraqatr. Eje a xulu qa hnine la Tusi Hmitrötr, ene la tusi hna cinyihan qaathene la ua i Akötresie. Haawe, kola kökötre la ihë cili hnene la uati hmitrötr. Eje hi lai laka, hna eatrongë së hnene la ua cili. Kolo lai a ketr tune kaa la aqane ihë së?
“Öni Ua me tepu i Iesu, ka hape, Trohemi”
13. Nemene la hna amamane hnene la kola hape, “öni[ne pala hi] la Ua me tepu i Iesu, ka hape, Trohemi”?
13 Thaa kolo kö a aca qaja hi hnene la “Ua me tepu i Iesu,” ka hape, “Trohemi.” Ame la hnepe hnaewekë ngöne la qaan hna ujëne hnene la hnëewekë hna hape “öni,” tre, ej a amamane la ketre huliwa hna kuca lapaan. Celë hi kepin matre kola wanga atrune lai ngöne la Traduction du monde nouveau; kola hape: Kola qaja lapaane hnene “la Ua me tepu i Iesu, ka hape, Trohemi.” Kolo hi lai a amamane la ewekë hnei angatre hna tro fë lapaan, ene la ihë i Akötresie. Hapeue la itre atr ka dreng me kapa la ihë cili? Angatre mina fe a hane qaja, ka hape, “Trohemi.” Kola qaja la itre nyipi hlue i Akötresie, ene la ka ala nyimu atraqatr, laka, angatr a ‘nyihlue i Nyidrë a lai me jidr ngöne la ēnē i Nyidrë.’ (Hna ama. 7:9, 15) Nemene la aliene la kola hape, angatr a ‘nyihlu a lai me jidr?’ (E jë la Luka 2:36, 37; Ite Huliwa 20:31; 2 Thesalonika 3:8.) Kola mama ngöne la itre tulu hna amë hnei Ana qatr ketre perofeta föe me Paulo aposetolo, laka, ame la kola ‘nyihlue a lai me jidr,’ tre, kola hape, kola catre pala hi ngöne la huliwa ne cainöj.
14, 15. Hnei Daniela hna amamane tune kaa la enyipiewekëne la troa hmi pala hi koi Akötresie?
14 Hnei Daniela perofeta hna hane amamane mina fe la enyipiewekëne la troa hmi pala hi koi Akötresie. (E jë la Daniela 6:4-10, 16.) Thaa hnei angeice kö hna saze la itre ewekë hnei angeic hna majemine kuca ngöne la götrane la ua, tune la troa thithi koi Akötresie “a isa a köni a sa watingöneca nyidë o drai . . . tune lo hna majemine pala kö,” uti fe hë la caa treu, ngacama ame la pune la aqane ujë cili, tre, troa kuiën kowe la ope liona. Drei la kola mama hnyawa koi itre atr ka goeëne jëne la itre aqane ujë i angeic, laka, pëkö ketre ewekë ka sisitria catr koi angeic hune la troa hmi o drai koi Iehova!—Mat. 5:16.
15 Thupene la ca jidri ne lapa Daniela hnine la ope liona, hnene la joxu hna ketre sipu tro kowe la hnaop me hë treij, ka hape: “Daniela, zinemunë i Akötesie ka shewengönieti fe, hape u, ateine la Akötesi ’ö lo hnei ’ö hna nyi hlue kow’ o drai troa amele eö qa thene la ite liona?” Ame hnei Daniela hna canga sa, ka hape: “Joxu, epi mele kö cilie epine palua. Hnei Akötesingö hna upe la angela i nyidë, me ahumune la ite qe ite liona, mate tha angazo ni, qa ngöne laka hna öhne hnei nyidë a pë ethange xajawa i nyidë, nge kete pëkö ngazonge qëmeke i cilie joxu.” Hnei Iehova hna amanathithi Daniela, ke, hnei angeice hna nyihlue i Nyidrë “o drai.”—Dan. 6:19-22.
16. Jëne la tulu i Daniela, ene la aqane hmi lapaa angeic koi Iehova, nemene la itre hnyinge nyine tro sa isa wanga atrune ngöne la aqane cainöje së?
16 Pi tro kö Daniela a mec hune la troa wange sixane la itre ewekë hnei angeice hna majemine kuca ngöne la götrane la ua. Tune kaa fe së? Nemene la itre ewekë hne së hna huujën maine hne së pena hna ajane troa huujën, matre troa cainöjëne lapaane la maca ka loi ne la Baselaia i Akötresie? Haawe, thaa tro kö sa nue la caa treu nge thaa hne së kö hna qeje Iehova kowe la itre xan! Maine ijij, hapeu matre tro sa catre cainöje ngöne la nöjei wiik? Ngacama ka kucakuca ha së ngöne la götrane la ngönetrei, nge ijije hi tro sa kuca la 15 menetr ngöne la treu, haawe, loi e tro sa sija la hnepe menetre cili ngöne la rapor ne hna cainöje së. Pine nemen? Pine laka easa ajane troa cengöne qaja pala hi memine la ua me tepu i Iesu, ka hape, “Trohemi.” Nyipici, eje the së la ajan troa kuca la hne së hna atrein, matre tro pala hi sa itretre cainöjëne la Baselaia.
17. Eue la itre ijine ka ijije tro sa tro fë la ihë i Iehova?
17 Loi e tro pala hi sa thele la nöjei ijine ka ijije matre troa tro fë la ihë i Iehova; thaa tro hmekuje kö sa treqene la ijine easa cainöj matre troa tro fë la ihë cili. Drei la ketre manathithi ka tru troa hëne ngöne la itre xaa ijin la itre atr ka pi ij, troa ‘xome gufane la timi ka mel;’ tune la itre ijine easa itö me ngenu me mano, maine ngöne pena la easa tro troa ini! E maine troa wathebone la huliwa ne cainöj hnene la itre mus, loi e tro pala hi sa tro fë acone la maca ka loi; maine jë tro hi sa fenafena la itre xaa qëhnelö ngöne la caa drai, nge kuca pë hë la itre xan e ketre drai, maine pena troa catre akökötrene la aqane cainöje së ngöne la nöjei ijine ka ijij.
Catre Jë Së Troa Qaja, Ka Hape, “Trohemi”
18, 19. Tro sa amamane tune kaa la enyipiewekëne la manathithi hne së hna kapa, ene la troa itretre ce huliwa me Akötresie?
18 Traqa ha enehila koi 90 lao macatre nge sin, nge kolo pala hi a hape, “Trohemi,” hnene la ua memine la tepu i Iesu kowe la itre atr ka pi iji la timi ne mel. Hane kö epuni dreng la ihë ka sisitria cili? Haawe, tro lai a upi epuni troa hëne pena la itre xan.
19 Thatre kö së, ka hape, uti hë eue la tro sa tro fë la ihë ka lolo i Iehova, ngo ame la aqane kapa së lai ihë cili, me hane qaja fe, ka hape, “Trohemi,” tre, kolo lai a aijijë së troa itretre ce huliwa me Akötresie. (1 Kor. 3:6, 9) Drei la ketre manathithi ka tru! Epi tro pala hi sa amamane la enyipiewekëne la manathithi cili, me “hamëne pala hi la huje ne atrunyi Akötesie” jëne la hna catre pala hi cainöj. (Heb. 13:15) Catre pi së, easë itre ka mejiune troa mele e celë fen, troa cengöne qaja pala hi memine la lapa ne la tepu, ka hape, “Trohemi.” Nge epi tro la itre atr ka nyimutre a xome gufane la timi ne mel!
Nemene La Hnei Epuni Hna Inin?
• Kola tro fë koi drei la ihë, hna hape, “Trohemi”?
• Pine nemen matre ijij tro sa qaja, ka hape, qaathei Iehova la ihë cili, ka hape, “Trohemi”?
• Nemene la hnëqa ne la uati hmitrötr ngöne la huliwa ne ihë, hna hape, “Trohemi”?
• Pine nemene matre loi e tro pala hi sa catre troa cainöj?