Ita Ne Thup göi 9 DISEBA
Nyima 9 me 16 Qene Drehu
Loi E Tro Sa Drengethenge La Mekuthethewe Së
“Ka wië la nöjei ewekë asë koi angete hni ka wië ; ngo ame angete hni ka dro, me tha lapaun, te, pëkö kete ewekë ka wië koi angat.”—TITO 1:15.
1. Nemene la hnei Paulo hna kuca kowe la itre ekalesia ne Kerete?
THUPENE la hnei Paulo aposetolo hna afenesine la köni trongene cainöje i nyidrë ceitu me mesinare, hna othi nyidrë me upi nyidrë a tro Roma, nge hna akalabusi nyidrë e cili a lue macatre. Nemene la hnei nyidrëti hna kuca ngöne la kola nue nyidrë qaa kalabus? Tro ju fe kö Paulo troa wange la hnapeti ne Kerete ceme Tito; hnei nyidrë hna cinyihane koi Tito, ka hape: “Hnenge hna ami’ö e Kerete, mate tro eö a apexejene la nöjei ewekë tha hna umuthe pete kö.” (Tito 1:5) Nemene la aqane eatrëne Tito la hnëqa i angeic? Kola troa ahlën hnei Tito la mekuthethewe ne la itre sine ce huliwa i nyidrë ne Kerete.
2. Nemene la jol hna troa cile kow hnei Tito ngöne la hnapeti e Kerete?
2 Hnei Paulo hna hamëne la itre eamo koi Tito göne la itre hna amekötine thatraqane la itre qatre thup ne la ekalesia, nge thupene lai, hnei nyidrëti hna amamane hnyawa laka, “ala nyimu angete ena; me qaja la tenge tha nyipi ewekë, me iaö.” Angatre hi lo itre ka “ujëne la ite xa lapa, me inine la nöjei ewekë ka tha ijije kö.” Tito a troa “haji [angatr].” (Tito 1:10-14; 1 Timoteo 4:7) Hnei Paulo hna qaja ka hape, ame la itre mekuna i angatr memine la itre mekuthethewe i angatr, tre, ka “dro,” kola ceitune memine la ketre iheetr ka mingöming ngo hna adrone hnene la ketre han. (Tito 1:15) Ame itre xaa thupëtresij, tre, itretre Iudra angatr, ke ‘hna peritomo angatr,’ nge angatre a catre fë lai. Ame la itre ekalesia enehila, tre, thaa hna ajojezine kö itre eje hnene la itre thupëtresij ka mekune ka hape, troa peritomone la itre ka nyihlue i Akötresie; ngo ijije pala hi tro sa atrepengöne la mekuthethewe së jëne la eamo hna hamëne hnei Paulo koi Tito.
Ame Itre Xan Tre Hna Adrone La Mekuthethewe i Angatr
3. Nemene la hnei Paulo hna cinyihane koi Tito göne la mekuthethew?
3 Drei la aqane qaja Paulo la pengöne la mekuthethew. “Ka wië la nöjei ewekë asë koi angete hni ka wië ; ngo ame angete hni ka dro, me tha lapaun, te, pëkö kete ewekë ka wië koi angat ; ke dro la ite hni angat, memine fe la mekuthethewe i angat. Angete hape, ate Akötesieti hë angat ; ngo kelikelë nyidëti pe hnene la ite huliwa i angat.” Kola mama hnyawa laka, ame itre xan, tre, nyipi ewekë koi angatre troa saze matre troa “cate kowe la lapaun.” (Tito 1:13, 15, 16) Jole koi angatre troa atrehmekune la ewekë ka loi qa ngöne la ewekë ka ngazo, nge kolo hi lai a amamane la pengöne la mekuthethewe i angatr.
4, 5. Nemene la ngazo ne la itre xan e hnine la itre ekalesia, nge nemene la ethanyine lai koi angatr?
4 Ame petre kö lo itre macatre ka ase hë, tre, hnene la lapa ne xomi meköt hna axeciëne ka hape, thaa nyipi ewekë hmaca kö troa peritomon matre troa ketre nyipi hlue i Akötresie, nge hnei angatr hna thuemacane tune lai la itre ekalesia. (Ite Huliwa 15:1, 2, 19-29) Ngo ame petre kö la itre xan e Kerete, tre, angatre pala kö a ‘catre peritomone la itre atr.’ Thaa kapa fe kö angatr la hna amekötine hnene la lapa ne xomi meköt, nge kola “inine la nöjei ewekë ka tha ijije kö.” (Tito 1:10, 11) Qa ngöne laka, tria la itre mekuna i angatr, ene pe angatr a catre fë la itre hna amekötine e hnine la Trenge Wathebo göi xen me itre aqane troa porop. Hnei angatre hna atrune menune pala ha la hna qaja hnene la Trenge Wathebo, tune lo hna kuca panëne hë hnene la itre sinexöle i angatr ngöne la hneijine i Iesu; tune mina fe la aqane akökötrene la itre ifejicatre ne la itretre Iudra memine la itre hna ahnithe hnei itre atr.—Mareko 7:2, 3, 5, 15; 1 Timoteo 4:3.
5 Hetre ethane la itre mekune cili ngöne la aqane waiewekë me aqane mekune i angatr, ene la mekuthethewe i angatr. Hnei Paulo hna cinyihane ka hape: “Ame kowe la itre atr ne fen me itre atr ka thaa lapaune kö, tre, pëkö ewekë ka pë ethan.” Hnene laka ngazo catre hë la nine ula qaa kuhu hni angatr, ene la mekuthethewe i angatr, matre thatreine hmaca kö tro ej a eatrongë angatre hnyawa troa kuca la itre huliwa me aqane waiewekë ka loi. Ketre, angatr a thele troa amekötine la itre trejine Keresiano ngöne la itre ewekë, laka, isa qanyine kö troa isa axecië mekun; maine jë troa isapengöne la lue aqane troa ië ewekë. Haawe, kolo pena ha jelengazone hnene la itretre Kerete celë la ketre huliwa maine ketre mekun ka hape ka ngazo, ngo ame pe, tre, kola mama laka thaa ka ngazo kö. (Roma 14:17; Kolose 2:16) Matre angatr a qaja ka hape atre Akötresieti hi hnei angatr, ngo thaa mama pe hnene la itre aqane huliwa i angatr.—Tito 1:16.
“Ka Wië La Nöjei Ewekë Asë Koi Angete Hni Ka Wië”
6. Hna qaja hnei Paulo la lue pengöne atr?
6 Nemene la aqane tro sa kepe thangane la hnei Paulo hna cinyihane koi Tito? Tro sa pane goeëne la isapengöne ewekë ngöne la xötre celë, kola hape: “Ka wië la nöjei ewekë asë koi angete hni ka wië ; ngo ame angete hni ka dro, me tha lapaun, te, pëkö kete ewekë ka wië koi angat ; ke dro la ite hni angat, memine fe la mekuthethewe i angat.” (Tito 1:15) Eje hi laka, thaa Paulo kö a qaja ka hape, ame kowe la ketre Keresiano ka thiina ka wië, tre, ka wië asë hi la nöjei ewekë nge nyine tro asë hi a kapa. Thaa sihngödre kö koi së la ewekë cili, pine laka, ame ngöne la ketre tusi nyidrë, hnei Paulo hna amamane hnyawa ka hape, ame la itre atr ka kuci ngazo, me thili koi idrola, me kuci haze, me itre xane ju kö, tre, “thaa tro kö [angatr] a hetenyi la baselaia i Akötesie.” (Galatia 5:19-21) Haawe, ijije hi tro sa qaja ka hape, Paulo lai a qaja la ketre nyipici ngöne la lue pengöne atr, ene lo itre ka thiina ka wië me pë ethane ngöne la götrane la ua, memine lo itre atr ka thaa mele tune kö lai.
7. Nemene la hna wathebone ngöne Heberu 13:4? Ngo nemene la hnyinge hna troa xejë?
7 Ngo eje hi lai laka, ame la itre ewekë nyine troa thipetrije hnene la ketre Keresiano ka thiina ka nyipici, tre, thaa eje hmekuje kö ngöne lo itre hnei Tusi Hmitrötr hna wathebon. Hanawange la ketre ceitun ngöne la xötre celë: “Loi e tro nöjei ate asë a nyipine la troa luetefën, memine la göhnë ka pë ethan ; ke tro Akötesieti a ahnëjinë angate nyi xetë me angete kuci ngazo.” (Heberu 13:4) Goi ame fe la atr ka thaa hmi Keresiano kö maine ka thatre pengöne kö la Tusi Hmitrötr, tre, thaa tro kö a jole koi angeic troa trotrohnine la xötr ka wathebone la nyi xetë. Kola mama hnyawa jëne la xötre celë memine la itre xaa xötr ne la Tusi Hmitrötr laka, Akötresieti a ahnëjinëne la trahmanyi maine föe ka faipoipo hë, nge ka kuci ngazo memine la ifëkë föen, maine ifëkë trahmanyine pena. Ngo tune kaa fe e kola huliwane menune hnene la lue atr ka thaa faipoipo kö la itre ka hmitrötre i nyidro hnene la ineqë? Nyimutre la itre thöth ka mekune ka hape, thaa ka ngazo menu kö, pine laka thaa kolo kö a ce meköle trefën. Hapeu, ijije kö tro la ketre Keresiano a xome la aqane huliwa cili ceitune me ketre ewekë ka pë ethan nge ka wië?
8. Tune kaa la aqane goeëne la itre Keresiano la itre aqane huliwane menune la itre kahmitrötr hnene la ineqë, ewekë hna kapa hnene la itre atr ka alanyim e cailo fen?
8 Kola amamane hnyawa ngöne Heberu 13:4 me 1 Korinito 6:9, laka, methi Akötresieti la troa nyi xetë memine la troa kuci ngazo (Ame qene Heleni, tre, por·neiʹa). Nemene la kuci ngazo? Ame la qene Heleni, tre, ej a qaja la kola kucahmëne me huliwane menune la itre kahmitrötr, laka triane hë lo aqane troa sipu huliwaane itre ej, sisi pena ha la aqane huliwaan. Kolo fe lai a hane qaja fe la itre aqane kuca menune la itre kahmitrötr e tröne la faipoipo hna amekötin hnei Akötresie. Haawe, kola qaja fe la troa huliwane la itre ka hmitrötre memine la ineqë, ngacama tru ju hë la itre thöth e cailo fen ka xele kö ma kapa la mekune cili, maine angatr a isa mekune ka hape, thaa ka ngazo kö e troa huliwa tune lai. Ame itre nyipi Keresiano, tre, thaa angatre kö a nue la itre huliwa memine la itre aqane mekune ne la angetre qaja “la tenge tha nyipi ewekë, me iaö” troa ajojezine la mekune i angatr maine qaja pena la nyine tro angatr a kuca. (Tito 1:10) Angatr a fedre catre kowe la itre wathebo ka draië qa hnine la Tusi Hmitrötr. Loi e tro pe angatr a trotrohnine hnyawa laka, ame la troa huliwane la itre kahmitrötr memine la ineqë, tre kolo hi lai a kuci ngazo, ene lo hna hape, pornéïa; ketre, angatre lai a inine la mekuthethewe i angatr matre troa thipetrije la thiina cili, ngo thaa tro kö a thele kepine troa kuca lai thiina ka sisi cili.a—Ite Huliwa 21:25; 1 Korinito 6:18; Efeso 5:3.
Itre Pengöne Mekuthethew, Me Itre Aqane Axecië Mekun Ka Ketre Pengön
9. Maine nyipici laka “ka wië asë hi la itre ewekë,” ngo nemen la qa ne la mekuthethew?
9 Nemene la mekune i Paulo ngöne la nyidrëti a cinyihane ka hape, “ka wië la nöjei ewekë asë koi angete hni ka wië”? Paulo a mekune lo itre Keresiano ka eköthe la itre mekuna i angatr me itre thiina i angatr hune la itre trepene meköti Akötresie, itre trepene meköti ka eje e hnine la Wesi Ula i Nyidrë. Kola kapa hnene la itre Keresiano cili laka, nyimutre la itre ewekë thaa hnei Iehova kö hna wathebone mekötin, matre thaa caa mekune kö hna axeciën hnene la itretre lapaune koi Nyidrë. Thaa angatre kö a goeëne angazone la nöjei ewekë, ngo angatre pe a atrehmekune laka “ka wië” la itre ewekë thaa hna jelengazone hnei Akötresie. Atre hnyawa hi angatre laka, thaa tro kö la itre xan a mekune tui angatr, ngöne lo itre götranene la mel kola mama laka, thaa Tusi Hmitrötre kö a köjane mekötine la itre nyine troa kuca. Tro sa ce wange la itre xaa ceitun.
10. Nemene la jole hna cile kow ngöne la kola faipoipo maine keleme pena la ketre sipu sinee?
10 Hetrenyi la itre fami ka nyimutre laka, ame la ketre e nyidro lue trefën tre, thaa ka hmi kö. (1 Peteru 3:1; 4:3) Hetrenyi la itre jol hna troa cile kow hnei nyidro; maine kola troa faipoipo maine keleme pena la ketre sinee së. Tro sa pane xome la pengöne la ketre trejine föe, laka, thaa ka ce hmi kö me eahlo la föi eahlo. Kola troa faipoipo hnene la ketre atrene la fami trahmany, nge kola troa hmi hnei lue trefën e hnine la uma ne hmi. (Maine pena, meci pena ha la keme maine thine i angeic, nge kola troa hmine la wezipo e hnine la uma ne hmi.) Hna könëne la lue trefën, nge trahmanyi a ajane troa ce tro me angeic hnene la föi angeic. Nemene la aqane troa huliwa la mekuthethewe ne la trejine föe Keresiano? Nemene la mekune hnei eahlo hna troa axeciën? Pane mekune ju la lue jëne mekune celë.
11. Qeje pengöne jë la itre mekune hna troa xome hnene la ketre Keresiano föe ka faipoipo hna könëne troa hane sine la ketre faipoipo e hnine la uma ne hmi, nge nemene la mekune hnei eahlo hna axeciën?
11 Kola mekune hnei Lili la hna amekötine ka nyipi ewekë catr, ene la troa ‘lö qa hnine la Babulona Atraqatr,’ lo hmi ka thoi ka musi e cailo fen. (Hna Amamane 18:2, 4) Ka hmi eahlo ekö ngöne lai uma ne hmi hna troa acile la lue trefën; atre hi eahlo ka hape, ame ngöne la ijine kola hmi, tre, kola sipone kowe la itre atr troa kuca la itre hna majemine ngöne la ijine cili, ene la troa thith, nyima maine itre xaa ewekë ju kö. Xecie hnyawa koi Lili laka thaa tro kö eahlo a hane kuca la itre ewekë cili, nge thaa ajane kö eahlo troa hane sine lai hmi wanga troa uku eahlo troa ena la itre hna amekötine hnei Iehova. Kola metrötrëne hnei Lili la föi eahlo, nge eahlo a ajane troa ce huliwa me nyidrë, pine laka Tusi Hmitrötr a ahnithe ka hape, ame la he i föe, trahmany; ngo ame pe, tre, thaa ajane kö Lili troa ena la itre trepene meköti qa hnine la Tusi Hmitrötr. (Ite Huliwa 5:29) Qa ngöne lai, eahlo a qeje pengöne cememine la hni ka menyik kowe la föi eahlo ka hape, maine tro nyidrëti a tro elanyi troa hane sine la ijine faipoipo, ngo ame eahlo, tre, thaa ijije pë hë. Maine jë tro fe eahlo a qaja ka hape, maine tro eahlo elany a hane sine lai hmi nge thaa kuca pe la itre hna majemine kuca ngöne la ijine cili, eje hi lai laka, tro ha nango ahmahmanyi nyidrë, celë hi matre ka loi hi tro nyidrëti a tro caas. Hnene la aqane axecië mekune i Lili, matre thaa huliwa kö la mekuthethewe i eahlo.
12. Nemene hmaca fe la ketre aqane troa mekune me ujë ne la ketre atr hna hane hëne kowe la uma ne hmi hnë troa acile la ketre faipoipo?
12 Kösë kola nango ceitu la jole hna cile kow hnei Lili me Rutha. Rutha a metrötrëne la föi eahlo, xecie hnyawa koi eahlo troa mele nyipici koi Akötresie, nge eahlo a drenge la la mekuthethewe i eahlo hna inine hnei Tusi Hmitrötr. Thupene la hnei eahlo hna hane mekune tui Lili, eahlo a pane thithi ju me mekune lo hna cinyihan hna hape, “Questions des lecteurs,” kola mama ngöne lo zonal La Tour de Garde ne 15 Mei 2002. Mekune hi eahlo lo köni thupëtresiji ne Heberu ka metrötrëne la hna amekötine hnene la joxu, ene la troa tro kowe la ketre götran nge e cili kola troa kuci idrola; ngo kola mama laka thaa hnei angatre kö hna hane thili kowe la hnasaatr. (Daniela 3:15-18) Kola axeciëne hnei Rutha troa ce tro memine la föi eahlo, ngo thaa tro pë hë a hane kuca la ketre ewekë ka itretrengekeu memine la hmi; haawe, eahlo hi lai a ujë thenge la mekuthethewe i eahlo. Ene pe eahlo a qeje pengöne hnyawa jë cememine la metrötr kowe la föi eahlo, la hnene la mekuthethewe i eahlo hna aijijë eahlo troa kuca maine nyine thaa tro pena kuca. Kola mejiune hnei Rutha tro la föi eahlo a hane öhne la eisapengönene la nyipi hmi qa ngöne la hmi ka thoi.—Ite Huliwa 24:16.
13. Pine nemen matre thaa nyine tro kö a hnehengazone menune la kola isa pengöne la aqane axecië mekune hnene la lue Keresiano?
13 Ame la kola isapengöne la lue aqane ië ewekë ne la lue Keresiano, tre, kolo lai a hape, thaa nyipi ewekë kö la mekune hnei nyidroti hna axeciën, maine ka nango kucakuca pena la mekuthethewe ne la ketre e nyidro? Ohea. Pine laka itre ewekë hnei eahlo hna melëne hë ekö ngöne la pengöne la miuzik me itre hna majemine ka itretrengekeu me hmi, haawe, drenge hi eahlo laka troa hetre ethane elanyi koi eahlo e troa ce tro memine la föi eahlo. Maine jë tro mina fe la itre huliwa ne la hmi hna xome ekö hnei eahlo me föi eahlo, a ajojezine la mekuthethewe i eahlo. Haawe, xecie hnyawa koi eahlo laka, sisitria koi eahlo la mekune hnei eahlo hna xom.
14. Nemene la itre ewekë nyine troa mekune hnyawa hnene la itre Keresiano göne la itre mekune nyine tro sa isa axeciën easë isa ala caas?
14 Hapeu, ka ngazo la mekune hna axeciën hnei Rutha? Thaa qanyi ketre kö me ketre troa qaja. Thaa tro kö a jelengazo eahlo xöjetriji eahlo pine la hnei eahlo hna iëne troa sin la faipoipo hnine la uma ne hmi ngo thaa hna hane pë hë xome la itre hna majemine kuca hnei hmi. Mekune hnyawa kö së lo eamo hna hamën hnei Paulo göne la troa iëne troa xen maine thaa tro pena a xen la itre xaa göxen: “The tro kö la ate xeni wetë a amenyi kowe la ate tha hane xeni wetë; nge the tro kö angeic’ ate tha hane xeni wetë a meku hni angeic’ ate xeni wetë . . . E cili huti angeic, nge kei pena, te, qâ i tixe i angeice kö. Nge tro ha acile huti angeic, ke ateine Joxu troa acile huti angeic.” (Roma 14:3, 4) Pëkö ketre Keresiano a troa ukune la ketre troa xele ma drenge la hna qaja hnene la mekuthethewe i angeic; maine thaa tro kö angeic a trongën la hna qaja hnene la mekuthethewe i angeic, haawe, angeice hi lai a thinge la lue hnangenyë i angeic matre thaa tro kö a dreng la ketre nine ula ka aijijë troa kapa la ketre maca ne iamele.
15. Pine nemene matre nyipi ewekë catr troa hane wanga atrune la mekuthethewe memine la itre aliene hni ne la itre xan?
15 Tro sa sisedrëne memine la ceitune celë. Tro la lue trejine föe a wanga atrune hnyawa la itre xaa götran, ene lo thangane elanyi kowe la itre xan la mekune hnei nyidroti hna troa axeciën. Hnei Paulo hna eamo së me hape: “Eatehnineju la ewekë celë laka the tro kö kete ate a amë la nyine athixötën, me kete ewekë nyine ajolene la kete tejin.” (Roma 14:13) Maine jë atre hi Lili laka, hetrenyi la itre jole ka tune lai ka athixötrëne la ekalesia maine fami i angeice pena, nge ame la hnei angeice hna kuca, tre, ijije hi troa hetre thangane ej thene la itre nekö i angeic. Ame koi Rutha, tre, maine jë atre angeice laka, hnene hë la itre xane hna axecië mekune tui angeic, nge thaa hna ajojezine kö la ekalesia maine itre atrene la nöje i angeice pena. Nyipi ewekë catre tro nyidroti a atrehmekune hnyawa, me easë asë laka, ame itre ka inine hnyawa la mekuthethewe i angatr, tre, angatr a wanga atrune mina fe la thangane kowe la itre xan. Hnei Iesu hna qaja ka hape: “Ame la ate nyi zöne la kete ne la ite ka co celë ka lapaune koi ni, te, loi koi angeice troa fena ngöne nyinawa i angeice la etë nyine amudromudron, me troa lö sai angeic’ e kuhu hnagejë ga ju.” (Mataio 18:6) Ame la atr ka meku angeice hi nge thaa hane kö hnehengazone la itre xan e kei pi angatre elanyi hnene la aqane ujë i angeic, eje hi lai laka, canga tro hi elanyi a ngazo la mekuthethewe i angeic, tune lo itre xaa Keresiano ne Kerete.
16. Nemene la itre ewekë ka saze hne së hna troa öhne thene la ketre Keresiano ngöne la kola tro la itre drai?
16 Tune la Keresiano ka catre kökötre pala hi ngöne la götrane la ua, haawe, loi e tro mina fe angeic a catre xöle pala hi la mekuthethewe i angeic me thele troa canga drenge pala hi la ej a ithanata. Tro sa ce wange la pengöne la ketre atr ka xötrei bapataiso; tro sa ati ëje i angeic ka hape Mareko. Kola huliwa la mekuthethewe i angeic me upi angeic troa thipetrije la itre xaa ewekë hna jelengazone hnei Tusi Hmitrötr, nge hnei angeice hna kapa ekö; tune la troa kuci idrola maine troa huliwane menune la madra. (Itre Huliwa 21:25) Eje hi lai laka, angeice a neëne hnyawa la nöjei ewekë, ngacama ka nango ceitune memine la hnei Akötresieti hna wathebon. Ame ngöne la ketre götran, tre, thaa trotrohnine kö angeic la kepine matre itre xane a thipetrije la itre xaa ewekë, nge angeice pena a kapa itre ej, tune la itre xaa hna goeën ngöne televizio.
17. Amamane jë hnene la ketre ceitun la aqane kökötre trootro la mekuthethew, memine fe la aqane kökötre ngöne la götrane la ua.
17 Kola tro la itre drai nge kola kökötre trootro la atrehmekune i Mareko ngöne la Tusi Hmitrötr, nge kola ketre kökötre mina fe la aqane imelekeu i angeic me Akötresie. (Kolose 1:9, 10) Nemene la thangan? Kola kökötre lolo me huliwa hnyawa la mekuthethewe i angeic. Ame enehila, tre, kola hmala hnei Mareko troa drenge la mekuthethewe i angeic me mekune thenge la itre trepene meköti ne la Tusi Hmitrötr. Kola atrehmekune hnyawa hnei angeic enehila, laka, ame la itre xaa ewekë ka mama laka “kösë ka nango ceitu memine la hnei Akötresieti hna wathebon,” nge hnei angeic hna thipetrij, tre, thaa ka isazikeu kö memine la mekuna i Akötresie. Ketre, pine laka canga kapa hi angeice la itre trepene meköti ne la Tusi Hmitrötr, me ajane troa drenge la mekuthethewe i angeic hna inine hnyawa, haawe, ame hë enehila, tre, thaa hane hmaca kö Mareko goeëne la itre porogarame ne televizio hnei angeic hna mekune ekö ka hape ka loi nge pëkö engazon. Eje hi, kolo ha maca me huliwa hnyawa la mekuthethewe i angeic.—Salamo 37:31.
18. Pine nemene matre nyine madrine koi së la troa hetrenyi la itre trejine ka macaje ngöne la ua?
18 Eje hnine la itre ekalesia la itre Keresiano ka isa kökötr ngöne la götrane la ua, thaa ceitune kö la ketre memine la ketre. Ame itre xan, ka xötrei atre angatre la nyipici. Maine jë ame ngöne la itre xaa götran, tre, ka lapa thaup la mekuthethewe i angatr, nge ame pena ngöne la itre xan, tre, ej a huliwa. Maine jë nyipi ewekë troa nue ijine koi angatr me ixatua matre tro angatre a majemi kowe la aqane ee angatre hnei Iehova me drenge la sipu mekuthethewe i angatr hna inin. (Efeso 4:14, 15) Eloine pe, hetrenyi e hnine la itre ekalesia cili la itre Keresiano, laka, atraqatre la atrehmekune i angatr ngöne la Tusi Hmitrötr, nge ka majemine angatre troa trongëne la itre trepene meköt, nge hetrenyi angatr la mekuthethewe ka ihmeku memine la mekuna i Akötresie. Ketre madrine ka tru e troa xötreithi së hnene la itre Keresiano ka “wië” ngöne la götrane la thiina me ngöne la ua, nge hna kapa hnene la Joxu nge atre amekötin! (Efeso 5:10) Epi tro asë hi së a eköthe amë la ajane troa kökötre tune lai matre troa macaj me troa cepunikë la mekuthethewe së memine la nyipi atrehmekune ne la nyipici memine la troa fedre catre koi Akötresie.—Tito 1:1.
[Ithueamacany]
a Zonal, La Tour de Garde ne 15 Maac 1983, götrane 30-1, hamëne jë fe la itre mekune thatraqane la itre ka faipoipo.
Troa Sa Tune Kaa?
• Pïne nemene matre kola ngazo la mekuthethewe ne la itre xaa Keresiano ne Kerete?
• Hna tune kaa matre isapengöne kö la aqane axecië mekun hnene la lue Keresiano, ngo hna inine hnyawa pe la mekuthethewe i nyidro?
• Kola tro la itre drai, nge tune kaa fe la aqane kökötre ne la mekuthethewe së, nge nemene la hna traqa kow?