Iehova a Amelene La Itre Hna Akötrën
“Nyimu aköte ne la ite ka meköt; ngo hna amele angeice qa ngön’it’eje asë hnei Iehova.”—SALAMO 34:19.
1, 2. Nemene la jol hna cile kow hnene la ketre Keresiano, nge pine nemene matre troa hane traqa tune koi së la ewekë cili elany?
KEIKOa la ketre föe hmae, truedre hë lao macatre ne eahlo a Anyipici Iehova. Hnei eahlo hna pane pionie lapa (hna tro fë pala hi la maca ne Baselaia) ngöne la itre xaa macatre. Hnei eahlo hna wanga atrune hnyawa la huliwa cili ka ketrepengöne kö. Ngo thaa qea ju kö nge kolo ha traqa la pë mejiune koi Keiko; eahlo fe hë a nyiqaane lapa caas. Öni eahlo ka hape: “eni pala hi a treij”. Hnei Keiko hna catre ami ijine troa inine la Tusi Hmitrötr, matre troa lepe trije la itre mekune ka ngazo ka ajojezine la mele i eahlo. Öni eahlo ka hape: “Goi thaa pi saze fe la mekunang. Qa ngöne laka kucakuca catre pala ha la mekunang, ene pe eni ha pi hnöjua.
2 Hane kö kucakuca la hni nyipunie tui Keiko? Pine laka atre Anyipici Iehova nyipunie, haawe, nyimu kepin ka amadrinë epun, qa ngöne laka, ame la troa kuca la aja i Iehova, ke, ka “hete hna thingehnaeane thatraqane la mele enehila, memine la mele epin.” (1 Timoteo 4:8) Ame enehila, nyipunieti e hnine la ketre paradraiso ngöne la götrane la ua! Ngo, hapeu, tro ha paatre la nöjei itupathi asë? Ohea! Öni Tusi Hmitrötr, ka hape: “Nyimu aköte ne la ite ka meköt.” (Salamo 34:19) Thaa sesëkötre kö së, pine laka “fene hnengödrai asëjëihë a meköle thene la atre ka ngazo,” ene Satana lo Diabolo. (1 Ioane 5:19) Ame ngöne la itre xaa götran, alanyimu the së la itre ka mele ngöne la fen hna musinën hnei Satana. Efeso 6:12.
Itre Thangane la Akötr
3. Hamene jë la itre xaa ceitun hna xome qa hnine la Tusi Hmitrötre ka amamane la aqane melëne hnene la itre hlue i Akötresieti ekö la itre akötr ka tru.
3 E qea pala ha la hace hni thene la atr, eje hi lai laka, tro ha hajihaji la aqane troa goeën hnei angeic la itre drai elany. (Ite Edömë 15:15) Tro sa ce wang la aqane thiina ka meköti Iobu. E hnine la ketre akötr atraqatr, öni Iobu ka hape: “Ame la ate hna hnahone hnei fö, te, xalaithe hi la ite drai, nge atraqate la gomegome i angeic.” (Iobu 14:1) Paatrë hë la madrine i Iobu. Kola mekune hnei angeic, laka, hnei Iehova hna nuetriji angeic. (Iobu 29:1-5) Thaa Iobu caasi kö la hlue i Akötresie ka meci fë hni ka hlohlo. Tusi Hmitrötr a qaja koi së la pengöi Hana, laka kola “aköt la hni” nyiidro, pine laka pë fe kö nekö i nyiidro (1 Samuela 1:9-11). Hnei Rebeka mina fe hna hnehengazon pine la ketre jol ka eje e hnine la hnepe lapa i eahlo, öni eahlo ka hape: “Hace hë la hning.” (Genese 27:46) Ame ngöne la Davita a mekune hmaca lo itre ngazo i angeic, öni angeice jë hi ka hape:”Hnenge hna teije trotro o drai.” (Salamo 38:6) Kola amamane hnyawa hnene la itre ceitune celë, la aqane xoue Akötresieti ekö hnene la itre föe me trahmanyi ka mele qëmekene troa traqa hnei Keriso, nge ka xomihnin la itre akötr atraqatr.
4. Pine nemen matre thaa sesëkötre kö së, enehila laka hetre Keresiano ka “hni ka ewë”?
4 Nge tune kaa fe la itre Keresiano? Hnei Paulo aposetolo hna öhne la enyipiewekëne troa upi angetre Thesalonika troa “haji angete hni ka ewë.” (1 Thesalonika 5:14) Önine la ketre itus ka hape ame la aqane ujëne qene heleni la mekune celë “hni ka ewë,” ke, kola qaja la itre atr “hna nango lapa trane hnene la itre jol e nöjei drai.” Kola amamane hnene la itre trengewekë i Paulo laka, hetrenyi hnine la ekalesia ne Thesalonika la itre xaa hna iën ka kucakuca. Ketre tune mina fe enehila, hetrenyi la itre xaa Keresiano ka kucakuca. Ngo pine nemene matre angatr a kucakuca? Tro sa ce wang la köni kepine matre kola kucakuca.
Ijije Hi Tro Sa Akötr Pine La Itre Ngazo Së
5, 6. Nemene la itre mekune ka akeukawanyi së ngöne Roma 7:22-25?
5 Kola akötr la itre nyipi Keresiano pine laka itre atr ka ngazo angatr; thaa ceitui angatre kö memine lo itre atr ka kuca la ngazo, laka “tha hmahma hmaca kö.” (Efeso 4:19) Ma ce mekune i angatre hi me Paulo ngöne lo nyidrëti a cinyihane ka hape: “Ke ini a madine la wathebo i Akötesie thenge la ate e kuhu hning; ngo öhnë hë ni la ketre wathebo ngöne la ite hnepe ngöneteing, kola ishi memine la wathebo e kuhu hning, me aponyi ni kowe la wathebo ne la ngazo ate lapane la ite hnepe ngöneteing.” Öni Paulo fe e qaja draië ka hape: “Ekölö, ngazo hë ni!” Roma 7:22-24.
6 Hapeu, ce mekune i nyipunieti fe kö me Paulo? Thaa ka ngazo kö e tro nyipunie a atrehmekune hnyawa laka itre atr ka ngazo nyipunie, göne hi matre thaa tro kö a sasaithi tulu e troa goeëne la etrune la ngazo, nge troa hetre trenge catre i nyipunie troa neëne la thiina ka ngazo. Thaa nyipi ewekë kö troa hnehengazone menune pala ha la itre engazo i nyipunie. Thupene la hnei Paulo hna qaja amamane la akötr ka eje thei angeic, öni angeice jë hi ka hape: “Ini a ole koi Akötesie jëne Iesu Keriso Joxu shë!” (Roma 7:25) Nyipici, ka lapaune Paulo laka, ijije hi tro la madra i Iesu hna anenin, a thepe angeic qa ngöne la ngazo. Roma 5:18.
7. Nemene la ka troa xatuane la ketre atr matre thaa tro kö angeic a hnehengazo menu pine la itre aqane ujë i angeic ka ngazo?
7 Maine kola nango ajolën la mekuna së pine laka itre atr ka ngazo së, haawe, loi e troa akeukawan la itre mekuna së hnene la hna cinyihan hnei Ioane, kola hape: “Maine kuca la ngazo hnei kete ate, hetenyi hë shë la ate xëwe fë koi Tretretro, ene Iesu Keriso ka meköt; nge nyidëti la huje pine la nöjei ngazo shë; nge tha pi eëshë hmekuje kö, ngo pine fe la fene hnengödrai asëjëihë.” (1 Ioane 2:1,2) Maine nyipunieti a hace hni pine la itre aqane ujë i nyipunie ka ngazo, tro pala hi a mekune hmaca laka hnei Iesu hna meci hmekuje hi kowe la itre atr ka ngazo, ngo thaa kowe kö la itre atr ka pexej. Nyipici laka “ngazo asë hë la nöjei ate, me tha traqa kowe la lolo i Akötesie.” Roma 3:23.
8, 9. Pine nemene matre thaa tro pi kö sa sipu upe zö së kö, maine sipu jele ngazo së pena?
8 Ngo, maine hnei nyipunie hna kuca la ketre ngazo ka tru ngöne la ketre ijine ka ase hë, maine jë hnei nyipunieti hë hna hane amexeje ej ngöne la itre ijine epuni a thithi koi Iehova. Nyipunie a hane kapa la ixatua ngöne la götrane la ua, qaathene la itre qatre thup. (Iakobo 5:14 ,15) Nyipunie a ietra e kuhu itre hni nyipunie, celë hi matre nyipunieti pala hi a lapa hnine la ekalesia. Maine jë hnei nyipunie hna pane nuetrij la organizasio i Akötresie, ngo thupene lai hnei nyipunie hna ietra me trongëne hmaca la ketre aqane ujë ka meköt. Ketre pena, kolo hmaca ha fetra lo itre thiina ka ngazo ekö me nyi ehacene la itre hni nyipunie. Nyipici laka, maine troa traqa la ewekë cili, the thëthëhmine kö së laka Iehova a “nyipi köle tij’asë” la itre ngazo ne la itre atr ka ietra. (Isaia 55:7) Ketre, thaa ajane kö Nyidrë tro nyipunie a hace me hnëjine pine lai. Ame la ka ajan tro nyipunieti a mekune tuun, tre, Satana; angeic a ajane troa thapa la lapaune i nyipunie. (2 Korinito 2:7, 10, 11) Atre hi Diabolo laka troa apaatrenyi angeic, celë hi matre angeic a ajan tro fe sa hane mekune laka, ka tro fe sa hane paatr. (Hna amamane 20:10) Thaa tro kö sa nue Satana troa ajojezine la lapaune së. (Efeso 6:11) Ngo, “thipe tiji nyëne pi”, ngöne la götrane cili me ngöne mina fe la itre xaa götran ne la mele së. 1 Peteru 5:9.
9 Ame ngöne Hna Amamane 12:10, hna hë Satana ka hape “ate nyi ewekëne la ite tejine me eëshë”, ene la itre Keresiano hna iën. Angeic a “nyi ewekë angate e lai me jid” qëmeke i Akötresie. Maine tro nyipunieti a mekune hnyawa la xötre cili, ke, ijije hi troa xatua nyipunie troa trotrohnine laka madrine catre Satana, lo atre sili ewekë, e tro nyipunie a hnehengazo me jele ngazo nyipunieti kö; Thaa ceitui Satana kö me Iehova, Akötresie ka thaa ijelengazo kö me iahnëjinë. (1 Ioane 3:19-22) Pine nemen matre epuni a hnehengazone menune pala ha la itre ngazo i epun, uti hë la traqa la mekune koi epuni ka hape ase hë nuetriji epun? The nue Satana kö troa angazone la aqane imelekeu i nyipunieti me Akötresie. Pë pi kö troa nue Diabolo troa uku nyipunie troa wangacone la pengöi Iehova, ene laka “ate utipine me ka ihnim, ate xomihni ahoean, nge ka tru loi” Nyidrë.—Esodo 34:6.
Ijije Hi Troa Ananazijë Së Hnene La Itre Ifego Së
10. Tune kaa la aqane ananajizë së pine laka hna nyi fegone la itre hne së atreine troa kuca?
10 Kola kucakuca hnene la itre xaa Keresiano pine laka hna nyi ifegone la mele i angatr troa kuca la aja Akötresie. Hapeue fe nyipunie? Maine jë hna tithi së hnene la ketre meci ka ngazo, maine kolo ha uti ipië trootro la mel, maine hnene pena la ketre ewekë ka hnöthi nyipunie troa cainöj tune ekö lo kola tru la itre hawa hna nue thatraqane la huliwa cili. Eje hi laka, hna ithuecatre kowe la itre Keresiano troa catre kuca la huliwa i Akötresie. (Efeso 5:15,16) Ngo maine hna nyi ifegone la mele i nyipunie, nge kola sewe nyipunie troa tru la hna kuca ngöne la huliwa ne cainöj, hapeu, tro kö nyipunieti a nanazije pine lai?
11. Nemene la aqane tro sa kepe thangane lo eamo i Paulo hna hamën ngöne Galatia 6:4?
11 Tusi Hmitrötr a ithuecatre koi së ka hape thaa tro kö sa geny, ngo loi e tro pe sa “xötre thenge angat’angete hetrenyi la nöjei hna thinge hnaean, thenge la lapaun me xomihnin.” (Heberu 6:12) Atreine hi së troa kuca tun, e hne së hna goeëne hnyawa la tulu i angatr ka lolo me catre thele troa xötrethenge la lapaune i angatr. Ngo, maine hne së hna aceitunë së pena ha memine la itre xan me mekune menune ka hape thaa ijije kö la hne së hna kuca, ke, pëkö troa hetre thangane ka loi. Celë hi matre, loi e tro sa trongëne la eamo i Paulo, kola hape: “Loi la nöjei ate troa isa tupa huliwan, ame hna hetrenyi angate la nyine amadine qa thei angate kö, ngo tha qa thei kete kö.”—Galatia 6:4.
12. Pine nemene matre ijije hi tro sa madrine ngöne la huliwa hne së hna troa kuca koi Iehova?
12 Ngacama kola nyi ifegone la mele ne la itre Keresiano hnene la itre mec ka ngazo, ngo hetre kepine ka aijijë angatr troa madrin. Tusi Hmitrötr a qaja xeciën ka hape: “Tha thina ka thaa meköti kö Akötesie mate troa thëthëhmine la huliwa i nyipunie, memine la ihnimi hnei nyipunie hna amamane kowe la atesiwa i nyidë.” (Heberu 6:10) Maine jë hnene la itre aqane mele i epun matre thatreine hmaca kö nge jole hë koi epuni troa hane catre kuca la huliwa i Iehova tune ekö lo. Ngo, hnene la ixatua i Iehova matre ijije jë troa tru la hnei nyipunieti hna kuca ngöne la itre xaa hnepe götrane ne la huliwa i itre Keresiano, tune la troa cainöj jëne la telefone maine jëne la hna cinyanyi tus. Loi e troa xecie koi nyipunieti laka tro Iehova Akötresie a amanathithi nyipunie, ke, hnei nyipunieti hna huliwa cememine la hni ka pexej memine la ihnim hnei nyipunieti hna amamane koi Nyidrë me kowe la itre ka lapa easenyi nyipunie. Mataio 22:36-40.
Ijije Hi Tro Sa Kucakuca Hnene La “Nöjei Ijine Ka Aköt”
13, 14. (a) Tune kaa la aqane akötrë së hnene la “nöjei ijine ka aköt”? (b) Tune kaa la aqane mama laka kola ae trootro la ihnimi enehila?
13 Ngacama easa ajan troa mele ngöne la nöj ka hnyipixe me ka meköti Akötresie, ngo enehila, easa mel ngöne la “nöjei ijine ka aköt.” (2 Timoteo 3:1) Loi pe, troa akeukawane la itre hni së ngöne la easa atre laka, ame la itre ewekë ka ngazo ka traqa enehila, tre, kolo hi lai a amamane hnyawa laka, easenyi hë la iamele koi së. Ngo eje hi lai laka, tro pala kö sa akötr hnene la itre ewekë ka xötreithi së. Hanawang la ketre ceitun: Tune kaa e pë ju hi huliwa i nyipunie e ketre ijin, nge kola mama laka pë trootro hë huliwa. Maine jë kola tro la itre treu, nge nyipunieti a hnyingëne thel ka hape, öhne jë kö Iehova la hace ka eje thei nyipunie, nge drenge jë kö Nyidrëti la itre thithi nyipunie. Ketre pena, hna qaja angazo nyipunie me jele trehnyiwa nyipunie pine la hane ngönetrei i nyipunie, maine troa akötrë nyipunieti pena hnene la itre xaa aqane ujë ka thaa meköti kö. Ketre maine tro pena nyipunieti a e nyimenyimëne lo itre hna cinyihane atrune ngöne zonal, tro fe a traqa koi nyipunie lo aqane mekune i Lota, lo atre thiina ka meköt, hna “ahace hnine” (“kucakuca,” Young’s Literal Translation of the Holy Bible) hnene la qene tratraije ne la itre ka mele xötreithi angeic.— 2 Peteru 2:7.
14 Hetrenyi la ketre hnepe götrane ne la itre drai tixenuë, thaa tro pi kö sa sixan. Öni Tusi Hmitrötr ka hape ala nyimu la itre ka “tha hnimi sinen.” (2 Timoteo 3:3). Kola ae trootro la ihnimi ne la itre atrene la fami, hnine la itre hnalapa ka nyimutre. Önine la ketre itus La violence au foyer (isi ngöne la hnalapa) ka hape: “Kola mama hnyawa laka, tru catre kö la itre ethan la kola humuthe la ketre atr me lepe angazonyi angeic, maine kucahmën me xöleuthe hmaca kö hnene la ketre atrene la fami. Ame hi lo lai göhnë hna mekune ka hape gaa hetre ihnimi nge hnapo ka lolo kowe la itre xaa ka tru me kowe la itre xaa nekönatr, ke, kösë ketre göhnë ka ngazo catre pena ha koi angatr.” Ame la itre ka mel e hnine la ketre hnalapa gaa iangazo, ke, troa qea la itre macatre ne tro angatr a hace hni me qou. Hapeu, hna traqa tune fe kö lai koi nyipunie?
15. Pine nemen matre kola qaja ka hape ka draië catre kö la ihnimi Iehova hune la ihnimi ne la atr?
15 Öni Davita, atre cinyihane la Salamo e nyima me hape: “Ke hna nue tiji ni hnei kakati me nenë, ngo tro Iehova a wepengë nie.” (Salamo 27:10) Keukawa la itre hni së troa atre laka sisitria catre kö la ihnimi Iehova hune la itre kem me thin! Ngacama hna thipetriji së, hna axösisi së, maine hna nuetriji së hnene la ketre sinee së, nyipici troa akötre catre koi së, ngo ame pe, tru catre pala kö la ixatua koi së hnene la aqane kukehni së hnei Iehova. (Roma 8:38,39) Thaa tro pi kö sa thëthëhmine laka Akötresieti a ea koi Nyidrë lo itre hnei Nyidrëti hna hnim. (Ioane 3:16; 6:44) Maine ngazo la aqane akötrë nyipunieti hnene la itre atr, ngo ame pe, ame Iehova, Nyidrëti a hnimi nyipunie!
Itre Ewekë Ka Troa Axapone La Ite Hni Së Ka Akötr
16, 17. Ame lo itre ijine easa hace hni, ke, nemene la nyine tro sa kuca matre troa thupëne la trenge catre së ngöne la götrane la ua?
16 Ijije hi tro nyipunieti a thele la itre nyine troa kuca ka lolo, matre troa egöcatre hmaca ngöne la götrane la ua. Tro sa ce wang la ketre ceitun: Tro sa trongëne la ketre porogarame ka loi göi troa xome hnyawa la huliwa thatraqane la itre Keresiano. E öhne hë së laka tru catre mina ha la kucakuca së, loi e troa mekune thele ngöne la Wesi Ula i Akötresie. Önine lo atre cinyihane la Salamo e nyimane ka hape: “Maine öning, ka hape, ‘kola ela la cange, te, ihnimi cilie’, Iehova fe, la ate e ni draië. Ngöne la nyimu mekun’e kuhu hning, kola akeukawane la hninge hnene la ite nyine aupune qa thei cilie.” (Salamo 94:18, 19) Maine tro sa e lapaane la Tusi Hmitrötr, tre, tro hë së a nyialiene la itre he së hnene la itre mekune ka troa aupune me akeukawane la mele së.
17 Nyipi ewekë catre mina fe troa thith. Nge maine thaa ijiji nyipunieti kö troa qaja asë la ejuine la itre mekune ka eje ekuhu itre hni nyipunie, ngo atre kö Iehova la hnei nyipunie hna thel troa qaja. (Roma 8: 26,27) Kola hamë së la nyine thue catr celë hnene la atre cinyihane la Salamo, ka hape: “Nuepi koi Iehova la hnei nyidëti hna hamë eö; nge tro nyidëti a sajuë eö; tha tro palua kö nyidëti a nue la ka meköti wanga enijën.”—Salamo 55:22.
18. Nemene la nyine troa kuca hnene la ketre atr ka hace hni?
18 Itre xan a kucakuca qa ngöne laka itre ka meci ne he me hace hni angatr.b Maine hna tithi nyipunieti fe hnene la meci cili, loi e tro nyipunie a catre mekune lo nöj ka hnyipixe i Akötresie memine lo itre ijine “tha tro kö a qaja hnene la ate lapan’eje, ka hape, ‘ini a mec’ ” (Isaia 33:24). Maine kola traqa tretr la itre mekune ka ngazo nge kola nyi ehacene la itre hni nyipunie, ka loi e troa pane thele ixatua thene la itre droketre ka atrepengöne hnyawa la meci cili. (Mataio 9:12) Nyipi ewekë fe tro sa thupëne la mele së ngöne la götrane la ngönetrei. Ketre ixatua koi së la troa tuluth la aqane xeni së nge loi e troa enijëne pala hi la ngönetrei, maine troa nango tro maine nyenyape pena. Nyipi ewekë mina fe la tro sa pune mano hnyawa pala hi. Thaa ka loi kö la troa meköle qëmekene televizio me elone la itre elo ka saqe hi ameijëne la itre mekune së me agenyine la ngönetrei së. Ame la ka nyipi ewekë, tre, troa enij ngöne la huliwa i Akötresie! Ngacama thaa ijine tro pala kö Iehova a “köle tije la nöjei tenge timida asëjëihë,” ngo Nyidrëti pe a xatua së troa xomihni ahoean. Hna Amamane 21,4; 1 Korinito 10:13.
Loi e Tro Sa Lapa “Fene La Ime Ka Mene i Akötresie”
19. Nemene la hnei Iehova hna thingehnaeane kowe la itre ka hace hni?
19 Tusi Hmitrötr a ithuecatre koi së laka, ngacama nyimutre la itre akötr ne la atre thiina ka meköt, ngo ame pe, tre, “hna amele angeice qa ngön’it’eje asë hnei Iehova.” (Salamo 34:19) Tune kaa la aqane tro Akötresieti a kuca? Ame la Paulo aposetolo a anyimua xëwe koi Iehova matre troa thepe angeic qa ngöne la “ka ithinyine ngöne la ngönetei,” öni Iehova jë hi e qaja koi angeic ka hape: “Ijiji’ö la ihnimi gufang; ka pexeje la menenge ngöne la kucakuca.” (2 Korinito 12:7-9) Nemene la hnei Iehova hna thingehnaean koi Paulo, nge nemene la hna qaja hnaean hnei Nyidrëti koi nyipunie? Thaa hnei Nyidrëti kö hna thingehnaean koi enehila la ketre nyin la itre meci së, ngo Nyidrëti pe a hamëne la trenge catre nyine troa xatua së troa xomihni ahoeane itre ej.
20. Ngacama kola tupathi së, ngo nemene la ithuecatre hna hamëne koi së ngöne 1 Peteru 5:6,7?
20 Hnei aposetolo Peteru hna cinyihane ka hape: “Aipië nyipunieti ju kö fene la ime ka mene i Akötesie, mate tro nyidëti a adraië nyipunie e ijin; nuepi koi nyidëti la kuke hnine asëjëihë i nyipunie, ke nyidëti a meku nyipunie.” (1 Peteru 5:6,7) Pine laka Iehova a kukehni nyipunie, thaa tro pi kö Nyidrëti a nuetriji nyipunie. Ngacama kola tupathi nyipunie, ngo Nyidrëti a sajuë nyipunie. Thaa tro kö sa thëthëhmine laka, ame la itre Keresiano ka cile hut, ke, angatr a lapa “fene la ime ka mene i Akötesie.” Pine laka easa nyi hlue i Iehova, Nyidrëti a hamë së la trenge catr matre tro sa atreine xomihni ahoean. E tro sa lapa qale koi Nyidrë, thaa tro jë kö a cile huti la itre akötr ka traqa koi së ngöne la götrane la ua. Qa ngöne lai, epi tro sa catre nyipici pala hi koi Iehova, matre tro sa hane kapa la mele ka thaa ase palua kö elanyi ngöne lo fene ka hnyipixe hnei Nyidrëti hna thingehnaean, me öhne lo ijine tro Nyidrëti a apaatren epine palua la itre akötr ne la itre atr!
[Ithueamacany]
a Hna saze la ëjene la atr.
b Ame la hace hni, ke, thaa kolo kö a kucakuca hmekuje hi ngo ketre hleuhleu ka catrehnin me ka hut. Maine nyipunie a aja itre xaa ithuemacanyi, loi e troa wang la Ita Ne Thup ne 15 Okotropa 1988, götrane 25-9, 15 Nofeba 1988, götrane 21-4, me 1 Semitrepa 1996, götrane 30-1.
Mekune Hi Nyipunieti Lo Itre Ini?
• Pine nemene matre kolo fe a ketr la itre hlue i Iehova hnene la itre akötr?
• Nemene la itre xaa ewekë ka ketr la itre atre i Akötresie, ene pe kola akötrën me ahacen la itre hni angatr?
• Tune kaa la aqane xatua së hnei Iehova matre troa cile kowe la itre ewekë hne së hna kukehnin?
• Nemene la aqane tro sa lapa “fene la ime ka mene i Akötresie”?