Troa Atrehmekune La Hnëqa i Keriso

“HNEI Akötesie hna xupe la hnengödrai memine la fene hnengödrai ngöne la qan,” nge “nyipi loi” la nöjei ewekë asë hnei Nyidrëti hna kuca. (Gen. 1:1, 31) Ame la Iehova a xupe la atr, hnei Nyidrëti hna hnëkëne thatraqai angeic la ketre mele ka lolo catr elany. Ngo hna pane ajolëne la mekune ka lolo cili hnene la icilekeu ekö e Edena. Ngo ame pe, tre, tha saze kö la aja i Iehova kowe la ihnadro me kowe la itre atr. Hnei Nyidrëti hna qaja amë ka hape, tro ha hetre iamele kowe la itre matra i Adamu ka idrengethenge. Troa acile hmaca la nyipi hmi, nge tro Akötresie a apatrenyi Diabolo memine la nöjei huliwa i angeic asë ka ngazo. (Gen. 3:15) Tro hmaca Nyidrëti a kuca matre “nyipi loi” hmaca jë la itre ewekë, jëne la Hupuna i Nyidrë Iesu Keriso. (1 Ioane 3:8) Qa ngöne lai, nyipiewekë catr troa atrehmekune hnyawa la hnëqa hnei Akötresie hna hamëne koi Keriso.—Ite hu. 4:12; Fil. 2:9, 11.

HNËQA I KERISO

² Ame ngöne la easa mekune hnyawa la hnëqa hnei Akötresieti hna hamëne koi Keriso, easa atrehmekune laka, ka nyimu götrane la hnëqa cili. Iesu la Atre itö mele ne la itre atr, Atre Huuj Ka Sisitria, Tane la ekalesia i Keresiano, nge enehila Joxu ne la Baselaia. Ame ngöne la easa thele mekune ngöne la nöjei pengöne götrane hnëqa celë, ene pe kola kökötre catre fe la hni ne ole së kowe la itre hna hnëkëne hnei Akötresie, memine la ihnimi së koi Keriso Iesu. Tusi Hmitrötr a qejepengöne la itre götrane ka nyimutre ne la hnëqa i nyidrë.

³ Ame ngöne lo Iesu a cainöj e celë fen, mama hnyawa pi hi laka, hna jëne nyidrë matre troa iloi hmaca me Akötresie la itre atr ka idrengethenge. (Ioane 14:6) Nyidrëti hi la Atre itö mele ne la itre atr, ke hnei nyidrëti hna ketre sipu huujëne la mele i nyidrë nyine thupene mele ne la itre atr ka alanyim. (Mat. 20:28) Haawe, ame la hnëqa i nyidrë, tre, tha ene hmekuje kö la troa hamëne la tulu göi aqane troa mele thenge la aja i Akötresie. Ngo, Iesu hi lo atre ka sisitria matre eatrëne jë la aja i Akötresieti kowe la itre atr. Iesu hmekuje hi la jëne tro sa iloi me Akötresie. (Ite hu. 5:31; 2 Kor. 5:18, 19) Hnene la mele hnei nyidrëti hna huujën memine fe la mele hmaca i nyidrë, hna fe la gojenyi kowe la itre atr ka drengethenge; ene pe ijiji angatre hë troa hane kapa la itre manathithi ka epine palua fene la musi ne la Baselaia i Akötresie.

⁴ Iesu fe la Atre Huuje Ka Sisitria matre nyidrëti a hane “aköte ngöne la itre kucakuca shë.” Ketre, ijije hi tro nyidrëti a hane senge la itre ngazo ne la itretre drei nyidrë e celë fen. Hnei Paulo hna amamane, ka hape: “Tha hetenyi kö shë la ate huje ka sisitia ka tha hane kö aköte ngöne la ite kucakuca shë; ngo hna tupathi nyidë ngöne la nöjei ewekë asëjëihë tui eëshë, ngo pë pe ngazo i nyidë.” Thupene lai, Paulo a ithuecatre jë kowe la itre ka lapaune koi Iesu Keriso, matre tro angatr a kepe thangane la hna iloi me Akötresie. Öni nyidrë ngöne la xötre 16: “Qa ngöne lai tro sha tro catre kowe la therone ne ihnimi gufa, matre troa hnimi shë, nge troa öhne la ihnimi gufa nyine ixatua ngöne la ijine ka [ijij].”—Heb. 4:14-16; 1 Ioane 2:2.

⁵ Iesu mina fe la Tane la ekalesia i Keresiano. Ceitu së hi memine lo itretre dreng ngöne lo hneijine i Iesu ekö, laka tha nyipiewekë kö troa xomiujine la mele së enehila hnene la ketre atr. Iesu la ka eatrongë së jëne la uati hmitrötr, me jëne fe la itretre thupë mamoe ka maca, nge ka huliwa fene la musi Keriso. Hnëqa i angatre troa thupëne la hna axö mamoe i Akötresie ke, tro angatr a isa qeje gelen qëmeke i Iesu me Keme i nyidrë. (Heb. 13:17; 1 Pet. 5:2, 3) Iehova a qeje Iesu me perofetane ka hape: “Hana wang, ase hë ni acilë nyidë nyine ate anyipicine kowe la nöj ; nge mekene me ate musi kowe la nöj.” (Is. 55:4) Kola eatre lai lo Iesu a qaja mekötin kowe la itretre drei nyidrëti ka hape: “The tro kö a hë nyipunie, ite meken ; ke casi hi la mekene i nyipunie, ene Keriso.”—Mat. 23:10.

⁶ Kola mama ngöne la ihë i Iesu la sipu pengöi nyidrë me hni ne aja i nyidrë troa xatua së. Öni nyidrë: “Trohemi koi ni, nyipunieti asë ange ka huliwa me hace, nge tro ni a amanonyi nyipunie. Xomejë la nyine isilikeunge hui nyipunie me inine theng ; ke menyike ni, nge ipië la hning ; nge tro nyipunieti a öhne la hna mano thatraqane la ite u i nyipunie. Ke uqa la nyine isilikeung, nge maloe la ehnefeng.” (Mat. 11:28-30) Kola mama jëne la aqane xomiujin Iesu Keriso la itre huliwa ne la ekalesia laka, “ketre atre thupë mamoe ka lolo” nyidrë, a kola tune la Tretretro i nyidrë e koho hnengödrai, ene Iehova Akötresie. Hnei nyidrëti hna huliwa cememine la menyik, nge celë hi ka akeukawane la itre u së.—Ioane 10:11; Is. 40:11.

⁷ Ame ngöne la pane tusi Paulo koi angetre Korinito, hnei angeic hna qaja amamane la ketre götrane ne la hnëqa i Iesu Keriso, öni angeic: “Ijiji nyidëti troa musi uti hë e ase hë amë fene la lue ca i nyidë la nöjei ithupëjia asëjëihë. Nge e ase hë aipiëne la nöjei ewekë asëjëihë fe i nyidë, ame hnei Hupuna hna ipië koi nyidëti ate aipiëne la nöjei ewekë asëjëihë fe i nyidë, mate Akötesieti la ka sisitia cate hun’ asë.” (1 Kor. 15:25, 28) Qëmekene tro nyidrëti a uti a tro celë fen, ce nyidrëti ekö e koho hnengödrai me Akötresie; Nyidrëti hi lo hna pane xup, nge “ka atreine huliwa.” (Ite edomë 8:22-31, MN) Ame lo Akötresieti a upi nyidrëti a tro celë fen, hnei nyidrëti palahi hna kuca la aja ne la Keme i nyidrë. Hnei nyidrëti fe hna xomihnine la itupathi ka tru, me mele nyipici koi Iehova uti hë mec. (Ioane 4:34; 15:10) Hna amanathithi nyidrë qa ngöne la hnei nyidrëti hna cile huti uti hë la mec. Hnei Akötresieti hna amele nyidrëti hmaca, me aijijë nyidrë troa Joxu ne la Baselaia e koho hnengödrai. (Ite hu. 2:32-36) Qa ngöne lai, ketre hnëqa ka tru hnei Iesu hna kapa qaathei Akötresie, la troa elemekene la trongene la itre angela ka tru menen göi troa apatrene la musi ne la atr, me lepetrije la iakötrë qa la fen. (Ite edomë 2:21, 22; 2 Thes. 1:6-9; Hna ama. 19:11-21; 20:1-3). Ame hë e cili, Baselaia i Akötresie hmekuje hi, lo hna cilëne hnei Iesu, la ka troa musi hune la fene hnengödrai asë.—Hna ama. 11:15.

ALIENE LA TROA ATREHMEKUNE LA HNËQA I NYIDRË

⁸ Ka pexeje Iesu Keriso lo Tulu së. Hna upi nyidrë troa thupë së. Matre, e aja së troa kapa la itre eloine la hna thupë së hnei Iesu, loi e tro sa mele nyipici koi Iehova me ce tro palahi memine la organizasio i Nyidrë, ka tha cile kö.

⁹ Ame ngöne lo hneijine la itre pane keresiano, hnene la itretre dreng hna atrehmekune hnyawa la hnëqa hnei Akötresieti hna hamëne koi Keriso. Hnei angatr hna amamane lai ngöne la angatr a ce huliwa me cas fene la musi Keriso, me nue nyidrëti troa eatrongë angatr jëne la uati hmitrötr. (Ite hu. 15:12-21) Hnei Paulo aposetolo hna qaja la casi ne la itre Keresiano hna iën, ngöne lo nyidrëti a qaja ka hape: “Loi pe shë troa thina ka nyipici ngöne la ihnim, mate trujë koi anganyidë ngöne la nöjei ewekë asë, ene lo hen, [ene] Keriso ; qa thei nyidrëti la ngönetrei asë hna itratraunekeune hnyawa, nge hna itöne hnyawa, hnene la nöjei enone itön’ asë, thenge la huliwa ngöne la tulu ne la itre götrane ngönetrei, nge kola trujë la ngönetrei matre adraiëne ngöne la ihnim.”—Efe. 4:15, 16.

¹⁰ Ame la lapa ne la itre hna iën me “ite xa mamoe” tre, hna aceitunëne memine la ngönetrei ne la atr laka, nyimu götrane ne ej. Ame ngöne la kola ce mele la itre atrene asë ne la ekalesia, nge kolo asë hi a ce huliwa fene la musi Keriso, ene pe kola kökötre la ekalesia, nge hetrenyi e hnin, la hni ne keukawa me hni ne ihnim, ene lo “otene ka nyipi loi.”—Ioane 10:16; Kol. 3:14; 1 Kor. 12:14-26.

¹¹ Ame la itre ewekë ka traqa kowe la fen, nge ka eatrëne la itre hna thingehnaeane hnei Tusi Hmitrötr, tre, itre ej a amamane hnyawa laka, ase hë nue koi Iesu troa musi hune la Baselaia ngöne lo macatre 1914. Nyidrëti hë enehila a musi e nyipine la itre ithupëjia me nyidrë. (Sal. 2:1-12; 110:1, 2) Nemene la aliene lai kowe la itre atr ka mele ngöne la fen enehila? Easenyi hë matre mama pi ka hape, nyidrë la Tixe ne la nöjei tixen me Joxu ne la nöjei joxu, ngöne la ijine tro nyidrëti a axulune hui angatre la iameköti i Akötresie. (Hna ama. 11:15; 12:10; 19:16) Nge ame hë e cili, ame lo iamele hna qaja hnei Iehova ngöne la qaane la icilekeu ne la atr tre, tro ha eatr kowe la itre ka lapa ngöne la götrane maca i Keriso, ene la itre hna kapa hnei Akötresie. (Mat. 25:34) Drei la etrune la madrine së troa atrehmekune la hnëqa i Keriso! Catre pi së troa casi me ce kuca lo huliwa ne cainöje e cailo fen ngöne la itre drai tixenuë celë fene la musi Keriso.