Saze Mel Hnei Trenamo Me Lazaro

Hnei Iesu hna hamë eamo ka lolo koi itretre drei nyidrë göi aqane troa huliwa mani. Ngo tha itretre dreng hmekuje kö la ka dreng. Hetre itre Faresaio fe, nge ka loi e tro angatr a nyipiewekëne la eamo cili. Hnauën? Ke itre ka “hni koi mani” angatr. Matre ame la angatr a drenge la hna qaja hnei Iesu, angatr a “nyiqaane hnyimasai nyidrëti jë.”—Luka 15:2; 16:13, 14.

Ngo tha xou Iesu fe. Öni nyidrëti pe: “Nyipunie la itre ka sipu jelemeköti nyipunie qëmekei atr, ngo atre kö Akötresieti la aliene hni nyipunie. Nge ame la itre ka tru kowe la itre atr, tre celë hi hna sisin hnei Akötresie.”—Luka 16:15.

Qaane hë ekö, hna goeë itre Faresaio kösë “itre ka tru,” ngo tro ha saze enehila. Eje hi, tro ha thaipiëne la itre trenamo, me itre ka mama ngöne politik me hmi. Nge tro pë hë a adraiëne la itre atr ka atrehmekune laka, nyipiewekë Akötresie koi angatr. Iesu a acatrene jë la mekune cili me hape:

“Qaane lo Trenge Wathebo me itre perofeta uti hë Ioane, hna cainöjëne la maca ka loi ne la Baselaia i Akötresie, nge nöjei pengön atr a isine troa hane lö kow. Nge nyipici, ijije hi troa patr la hnengödrai memine la fen, ngo ame göi Trenge Wathebo, tha tro pi kö a hane patre la ketre neköi mataitus, e tha hna pane eatr asë kö.” (Luka 3:18; 16:16, 17) Kola mama tune kaa ngöne la trengewekë i Iesu ka hape, troa hetre ewekë ka saze?

Itre hene ne hmi i angetre Iudra a catre fë la Trenge Wathebo i Mose. Pane mekune jë lo Iesu a ase fe la luemeke ne la timek e Ierusalema, hnene la itre Faresaio hna catre fë ka hape: “Itretre drei Mose hun. Atre hi huni laka, hnei Akötresie hna ithanata koi Mose.” (Ioane 9:13, 28, 29) Ngo ame la ketre kepin matre hamëne jë la Trenge Wathebo, tre troa troxome la itre atre ka ipië kowe la Mesia, ene Iesu. Hnei Ioane Bapataiso hna qeje Iesu ka hape, Neköi Mamoe i Akötresie. (Ioane 1:29-34) Matre, qaane lo Ioane a xejë la huliwa ne cainöje i angeic, hnene la angetre Iudra ka ipië, ene la itre ka pë ewekë, hna nyiqaane drei mejene la “Baselaia i Akötresie.” Eje hi, “maca ka loi” lai koi nöjei atr ka ajane troa itre jini ne la Baselaia, me kepe thangan qa ngön.

Tha tria kö la Trenge Wathebo, hnen ej hna itroxom kowe la Mesia. Ngo tha nyipiewekë hmaca kö troa trongën. Ame ekö, Trenge Wathebo a aijijë itre atr troa sei hna cil menu, ngo enehila, Iesu a amekötine ka hape, “ame la atre sei hna cil me föe hmunë, me faipoipo me ketre, angeice hi lai a nyixetë, nge ame la atre faipoipo me ketre föe ka sei hna cil, tre kola nyixetë.” (Luka 16:18) Drei la kola amejëne la trengehni ne la itre Faresaio ka majemine acili Wathebo menu!

Iesu enehila a hamëne la ketre ceitun, matre troa amamane la aqane tro la itre ewekë a saze. Kola qaja la lue atr—tro la lue aqane mele i nyidro a saze. Ame la eö a drenge la ceitune celë, lapa mekune ju laka, hetreny e cili la itre Faresaio ka hnimi mani me pi mama.

Öni Iesu: “Hanawange la ketre trenamo ka majemine heetrë iheetr ka maea ngön, me lino. Nge o drai pala hi, angeic a mele nyipine la itre mo, me itre nyine iamadrinë. Nge hetre atre sipo nge ka si ixelek, Lazaro la ëjen, nge hna tro sai angeice lapa kowe la qëhnelö ne lai trenamo. Nge pi tro fe angeic a hane xeni la itre wanane xen ka malamala qa ngöne la laulau ne la trenamo. Nge itre kuli fe a traqa troa hadrume la itre ixeleke i angeic.”—Luka 16:19-21.

Pine laka, ka hnimi mani la itre Faresaio, tha nyipiewekë kö troa qaja ka hape, drei la trenamo ne la ceitun. Aja ne la itre hene ne hmi i angetre Iudra troa heetrë iheetr ka tru thupen. Eje hi, itre trenamo angatr, nge kösë hna amanathithi angatr hnei Akötresie. Ngöne la ceitun, Iesu a amamane jëne la iheetr ne joxu ka maea ngön, la aqane pi mama i angatr. Nge ame la lino, ej a nyi hatren la aqane nyi ka meköt i angatr.—Daniela 5:7.

Tune kaa la aqane goeën angatr la itre atr, lo itre ka pë ewekë? Angatr a methinëne la itre atr cili, me jele atrene dro (‛am ha·’aʹrets), itre ka thatre la Wathebo, nge ka tha ijije troa hane kapa la itre ini. (Ioane 7:49) Ceitu hi memine lo “atre sipo, Lazaro la ëjen.” Goi pi xeni fe angeic la “itre wanane xen ka malamala qa ngöne la laulau ne la trenamo.” Tui Lazaro ka si ixelek, hna wangacone la itre atr, kösë hna xele angatr hnei Akötresie.

Ekö hë mele tune la itre atr, ngo atre hi Iesu ka hape, ijine hë troa saze la aqane melene la itre hna aceitunën me trenamo, me itre hna aceitunën me Lazaro.

SAZE MEL

Iesu a qejepengöne la ewekë ka saze, öni nyidrë: “Itre hnepe ijine thupen, meci ju hi lo atre sipo, ame hna xomi angeic hnene la itre angela koi Aberahama. Nge meci ju fe hi lo trenamo, ame hna kelemi angeice ju. Nge e hnine la hua, angeic a gala jë draië ke jole hë angeic, ame hnei angeice hna öhnyi Aberahama qa gaa nany, nge Lazaro ezi nyidrë.”—Luka 16:22, 23.

Atre hi itre ka dreng ka hape, meci tro hë Aberahama, nge ekö hë kelemi angeic. Nge Tusi hmitrötr a amamane hnyawa ka hape, thatreine kö la itre ka meköl hnine hua a goe me ithanata. (Ate Cainöj 9:5, 10) Tune kaa la aqane trotrohnine itre hene ne hmi la ceitune i Iesu? Nemene la aliene la itre trengewekë i nyidrë göi itre atr, me itre hene ne hmi ka hnimi mani?

Iesu a qaja la ewekë ka saze lo öni nyidrë ka hape, ka eje la “Trenge Wathebo me itre perofeta uti hë Ioane,” ngo qaane la ijine cili, kola ha “cainöjëne la maca ka loi ne la Baselaia i Akötresie.” Haawe, qaane lo Ioane me Iesu a cainöj, meci hë Lazaro nge meci fe hë lo trenamo, ene lo pengö i nyidro hnapan. Nge ketre pengöne hë la aqane imelekeu i nyidro me Akötresie.

Qaan ekö, hna majemine cipane koi itre ka pë ewekë me ka ipië, la itre ini qaathei Akötresie. Ngo enehila, angatr a kepe ixatua, nge angatr a kapa madrine la maca ne la Baselaia, lo hna pane cainöjën hnei Ioane Bapataiso, nge e thupen, Iesu. Ekö, angatr hi a xome la itre hnepe ini ka “malamala qa ngöne la laulau” ne la itre hene ne hmi. Ngo enehila, kola ameji angatr hnei itre ini ka tru, ene la itre hnei Iesu hna qejepengön. Kösë angatre hë a lapane la itre göhnë ka draië qëmeke i Akötresie.

Tha hna tune kö hnei itre hene ne hmi ka trene mani, ke xele kö angatr ma kapa la maca ne Baselaia, hna tro fë trongën hnei Ioane me Iesu. (Mataio 3:1, 2; 4:17) Angatre a jol me elëhni pine la maca cili, ke tro angatr a xeni pune la elëhni Akötresie. (Mataio 3:7-12) Nge aja i angatr tro Iesu me itretre drei nyidrë a nue la huliwa ne cainöj. Itre hene ne hmi a tune la trenamo ka qaja ka hape: “Kakati Aberahama fe, utipi ni ju, nge upi Lazaro jë troa hnea la he ne wanakoime i angeic ngöne tim, matre troa amenyikene la thinemeng, ke jole hë ni la nyipine la eë ka catrehnin.”—Luka 16:24.

Ngazo pe, ala nyimu la itre hene ne hmi ka tha saze. Xele kö angatre ma ‘drei Mose me itre Perofeta.’ Maine ju, tro la itre hnei angatr hna cinyihan a ukune la itre hene ne hmi troa kapa laka, Iesu la Joxu me Mesia i Akötresie. (Luka 16:29, 31; Galatia 3:24) Nge goi xele fe angatr ma ipië, me hane xomi ini thene la itre ka pë ewekë nge ka kepe Iesu, itre hna wangaloine hnei Akötresie. Nge ame pena itretre drei Iesu, xele kö angatr ma saze, maine nyinyiköne la maca i Akötresie, göne hi matre amadrinë itre hene ne hmi, maine aupunyi angatr. Iesu a amamane lai jëne la itre trengewekë i Aberahama kowe la trenamo. Öni nyidrë:

“Neköng, mekune jë lo itre ewekë ka lolo hnei hmunë hna hetrenyi ngöne lo mele hmunë, ngo ame Lazaro, angeice pe hi lo a kapa la itre ewekë ka ngazo. Haawe, enehila, kola aupunyi angeic e celë, nge hmunë pena ha a hleuhleu. Nge ketre, hetre hnathup atraqatr hna amë nyipi së, matre tha ijiji kö tro la itre atr the huni a tro koi nyipunie, nge ketre tha ijiji fe kö kowe la itre atr thei nyipunie troa tro koi hun.”—Luka 16:25, 26.

Meköti hi la aqane saze la mele i nyidro! Kola nyihatrene hnene la aqane thaipië itre hene ne hmi, me aqane adraië itre ka ipië, itretre thu la ehnefe i Iesu, nge itre hna akeukawan, me thuan hnene la itre ini qaathei Akötresie. (Mataio 11:28-30) Tro lai a mama cile hnyawa ngöne la itre treu thupen. Tro ha nyihnane la isisinyikeu hnapan hnene la ka hnyipixe. (Ieremia 31:31-33; Kolose 2:14; Heberu 8:7-13) Nge ngöne la Penetekos 33 M.K., kola mama cil laka, Akötresieti a kepe itretre drei Iesu hmekuj, ke hna nenge la uati hmitrötr hui angatr.