La Gojeny, Me Nyipici, Me Mel

Ma aja i eö fe troa drenge la itre maca ka lolo. Nge eje hi, hetre maca ka lolo hna hnëkëne koi eö me fami eö.

Hna qatrenge la itre maca cili hnine la Tusi Hmitrötr, ketre itus hna hnëkën hnei Iehova Atre Xup, a itre macatre hë enehila. Ngöne la itusi celë, tro eö a waipengöne hnyawa la itre xa itus ne la Tusi Hmitrötr, itre itusi ka hetre eloin koi së asë. Hna ati ëjene la itre itus celë, thenge la ëjene la itre ka cinyihan—Mataio, Mareko, Luka, me Ioane.

Ala nyimu la itre ka hëne la foa lao tusi ka hape, Evangelia. Angatr a isa qaja la maca ka loi hna tro fë hnei Iesu, me amamane laka, nyidrë la jë ne iamele, me Joxu ne la Baselaia ne hnengödrai. Nge tro fe Iesu a axulune la itre manathith ka pë pun koi itre ka lapaune koi nyidrë.—Mareko 10:17, 30; 13:13.

HNAUËNE LA FOA LAO EVANGELIA?

Ma eö jë a hnyinge ka hape, hnauëne la foa lao Evangelia troa qaja la mele ne la ca atr me itre ini i nyidrë?

Ngo hetre eloin. Pane mekune jë: Maine tro la foa lao trahmany a ini thene la ketre atre ka inamacan, me cinyihan la hnei nyidrëti hna qaja me kuca, tha tro kö a ceitu la aqane tro angatr a qejepengön. Ke ame la atre lapa qëmek, atre hle mani angeic, nge ame la ka lapa ngöne götrane maca, droketre angeic. Nge ame la ka lapa ngöne götrane mi, atre nyi ie angeic, nge sinee ne la atre hamë ini. Nge ame pena la hnaafoan ka lapa hutrö, angeic a goeë angatr asë nge xötre ka co angeic. Haawe, ngacama itre trahmanyi ka huliwa nyipici angatr, ngo isa pengöne kö la itre aja i angatr, matre isapengöne fe la hnei angatre hna cinyihan. Ngo ame la easa e, kösë ketre a nyixan la hna qaja hnei ketre, matre pexej la aqane qejepengöne angatr la itre huliwa ne la atre hamë ini. Haawe, ceitune hi lai memine la Evangelia, hetre eloine la kola afoa lao fejan la mele ne la Atre Hamë Ini Ka Sisitria.

Ketre, ame la atre hle mani, angeic a ithanata kowe la angetre Iudra, matre angeic a qejepengöne la itre huliwa i Iesu ka troa ketre la hni angatr. Nge ame la droketre, angeic a qaja atrune la kola aloine la itre mec, matre tha qaja asë kö angeic la itre ewekë hna fejan hnene lo ka hle mani. Nge ame la sinee i Iesu, hnei angeic hna qaja atrune la itre aliene hni, me thiina ka lolo i nyidrë. Nge ame pena lo ka co, tha hnei angeice kö hna qejepengön atrun, matre co hi hnei tusi angeic. Ngo ka meköt asë hi la itre hnei angatr hna cinyihan. Kolo hi a amamane koi së la eloine la foa lao itusi celë. Kola xatua së troa trotrohnine la itre huliwa i Iesu, me aqane troa nyitipu nyidrë ngöne la itre huliwa së, me aqane cainöj, me thiina së.

Itre atr a qaja ka hape, ‘Evangelia i Mataio,’ maine ‘Evangelia i Ioane,’ nge tha ka ngazo kö lai, ke itre ej asë a qatrenge la ‘maca ka loi i Iesu Keriso.’ (Mareko 1:1) Ngo eje hi laka, casi hi la maca ka loi, maine evangelia hna tro fë hnei Iesu. Hna fejane la evangelia cili ngöne la foa lao itus.

Ala nyimu la itre ka inine la Trengewekë i Akötresie, me waipengöne hnyawa la itre hna cinyihane ngöne Mataio, me Mareko, me Luka, me Ioane. Tatian hi la ketre, atre Suria angeic nge ka cinyianyi tus. Ame lo 170 M.K., hnei angeic hna nyiqane kuca la huliwa cili. Thupene lai, öni angeic ka hape, ka meköti la foa lao itusi celë, nge hna cinyihan jëne la ua i Akötresie. Angeic a acasine jë la foa lao tus me hëne ka hape, Diatessaron.

Nge celë fe hi hna kuca hnene la itus, Iesu La Gojeny, Me Nyipici, Me Mel. Ngo ka pexeje kö me meköti la itusi celë. Easë a qaja tun, ke trotrohnine hnyawa ha së la aqane eatr la itre hna perofetan hnei Iesu, me itre ceitune i nyidrë. Nge hetre aliene hë la itre trengewekë me huliwa i Iesu. Ketre, atre hë së la aqane trongene la itre ewekë cili. Nge hnene la itre archéologue, hna öhn la itre ewekë ka xatua së troa trotrohnine la aqane waiewekë ne la itre ka fejane la evangelia. Ngo eje hi laka, pëkö ka atreine qaja ka hape, trotrohnin asë hi angeic. Nge ngöne la itus, Iesu La Gojeny, Me Nyipici, Me Mel, hna thel matre troa meköt la aqane qaja trongëne la mele i Iesu.

GOJENY, ME NYIPICI, ME MEL

Ame la eö a e la itusi celë, the thëthëhmine kö lo maca ka tru hna hnëkën koi eö me fami eö. Maca lai hnei Iesu hna qaja koi Toma aposetolo ka hape: “Eni hi la gojeny, me nyipici me mel. Pëkö atr ka atreine troa tro koi Kaka, e tha hna jëne ni.”—Ioane 14:6.

Tro la itusi celë a xatua eö troa trotrohnine laka, Iesu “hi la gojeny.” Tro hi sa atreine thithi koi Iehova e hne së hna jëne Iesu. Nge Iesu hi la jëne iloi, matre atreine pi së iloi me Akötresie. (Ioane 16:23; Roma 5:8) Nge Iesu casi hi la ka aijijë së troa imelekeu hnyawa me Akötresie.

Iesu fe la “nyipici.” Hnei nyidrëti hna ithanata me ujë thenge la nyipici. Nyimutre la itre hna perofetan ka eatr göi nyidrë, eje hi, “ ‘ö’ asë hë jëne Iesu.” (2 Korinito 1:20; Ioane 1:14) Itre hna perofetane lai, ka xatua së troa trotrohnine la hnëqa ka tru i nyidrë ngöne la aja i Akötesie.—Hna Amaman 19:10.

Nge Iesu fe la “mel.” Jëne la thupene mel, lo mel me madra ka pexej hnei Iesu hna huujën, hnei nyidrëti hna aijijë së troa kapa “la nyipi mel,” ene “la mele ka pë pun.” (1 Timoteo 6:12, 19; Efeso 1:7; 1 Ioane 1:7) Nyidrëti fe la “mel,” ke jëne nyidrë, tro ha amelene hmaca la itre milio lao atr hnine la Paradraiso ka pë pun.—Ioane 5:28, 29.

Nyipiewekë tro sa isa wangatrune la hnëqa i Iesu ngöne la aja i Akötresie. Epi tro fe eö a hane madrine troa atrepengöi Iesu hnyawa—“la gojeny, me nyipici me mel.”