Hna Hnëkëne Troa Kuca La Aja i Iehova,

Mekene 17

Qale Catre Jë Kowe La Organizasio i Iehova

HNA cinyihane hnei Iakobo, ka hape: “Eashenyijë koi Akötesie, nge tro nyidëti a eashenyi koi nyipunie.” (Iako. 4:8) Eje hi laka, thaa ka draië menu kö Iehova maine nanyi menu pena matre thaa drenge hë Nyidrëti la itre hne së hna qaja koi Nyidrë; nge ngacama itre atr ka ngazo së, ngo ame pe Nyidrëti a hane drei së. (Ite hu. 17:27) Maine tro sa thele la itre jëne troa easenyi Nyidrë, haawe, tro hë Nyidrëti a easenyi së. Qa ngöne lai, loi e tro pala hi sa eköthe hnyawa la itre aqane imelekeu së me Nyidrë, hnene la ejuine la itre thithi së. (Sal. 39:12) Easë mina fe a easenyi Akötresieti catr, hnene la hne së hna catre inine pala hi la Wesi Ula i Nyidrë, ene la Tusi Hmitrötr. Jëne la atrehmekune memine la nyipi trotrohnin, haawe, easa atre Iehova Akötresie, memine la itre mekuana i Nyidrë me aja i Nyidrëti koi së. (2 Tim. 3:​16, 17) Ene pe easë a inine troa hnimi Iehova me catre metrötr me neëne troa triane la itre hnei Nyidrëti hna amekötin.​—Sal. 25:14.

Ngo eje hi lai laka, easa atreine easenyi koi Iehova, jëne Iesu hmekuj lo Hupuna i Nyidrë. (Ioane 17:3; Rom. 5:​10) Pëkö atr ka atreine troa hamëne koi së la atrehmekune matre troa öhne hnyawa la mekun me itre aliene hni i Iehova; Iesu hmekuje hi la ka atrein. Pine laka atre hnyawa hi Nyidrëti la Tretretro i Nyidrë, öni nyidrëti ka hape: “Nge pëkö ate wangate hmekune la Hupuna, ngo Tetetroti hi ; nge pëkö ate wangate hmekune la Tetetro, ngo Hupunati hi, memine la hnei Hupunati hna ajane troa amamane kow.” (Luka 10:22) Haawe, ame la easa inine ngöne la itre Evangelia la itre mekun me itre aliene hni Iesu, easë fe hi lai a atre hnyawa la itre mekun me itre aliene hni Iehova. Kola aijijë së hnene la atrehmekune cili troa easenyi kowe la Akötresi së.

Fene la musi ne la Hupuna i Akötresie, easa akökötrene la aqane imelekeu së me Iehova hnene la hna fedre catre pala hi kowe la jiane huliwa ka mamacile hnei Nyidrëti hna xome enehila matre troa ini së troa kuca la aja i Nyidrë. Tune la hna ahnithe hë ngöne Mataio 24:​45-​47, hnene la Maseta, Iesu Keriso hna acile la “hlue ka nyipici me ka inamacan,” ene lo itre Keresiano hna iën e celë fen, matre troa thewe “xen ngöne la nyipi ijin” kowe la lapa ka lapaun. Ame enehila, kola hamëne koi së hnene la “hlue” celë la xeni ka mana ngöne la götrane la ua, hna jëne la itre itus nyine inine la Tusi Hmitrötr. Jëne la jiane huliwa cili, Iehova a eamo së troa e la Wesi Ula i Nyidrë ngöne la nöjei drai, me troa sine pala hi la itre icasikeu i Keresiano, me troa catre cainöjëne la “maca ka loi ne la Baselaia.” (Mat. 24:14; 28:​19, 20; Ios. 1:8; Sal. 1:​1-3) Thaa tro pi kö sa goeëne la jiane huliwa i Akötresie ceitune me aqane waiewekë i atr, wanga tro sa thëthëhmine laka Iehova la ka eatrongëne la organizasio i Nyidrë, nge tro pena ha së a thipetrije la itre hnei Nyidrëti hna kuca matre troa huli së koi Nyidrë. Loi e tro pe sa thele troa easenyi catre kowe la organizasio i Iehova e celë fen, me lapa fene la musi ne ej. Tro hë së a easenyi kowe la Akötresi së, ene Iehova; tro hë së a cile catr ngöne la lapaun, nge tro ha thupë së qa ngöne la itre itupath.

KEPIN MATRE KOLA ELË LA ITRE ITUPATH

Maine nyimutre hë la itre macatre i epuni ngöne la nyipici, maine jë atre hë epuni la aliene la hna hape, troa xomihniahoeane lo itre itupath ka ajolëne la aqane mele nyipici epun. Ngo ngacama ka hnyipixe hi epuni hane atre Iehova, nge epuni fe hë a hane ce tro memine la nöje i Nyidrë, haawe, ijiji epuni fe troa hane anyipicine ka hape, Satana lo Diabolo a icilekeu memine la itre ka lapa fene la musi cile i Iehova. (2 Tim. 3:​12) Ngo eje hi lai laka, ngacama ka he cili hi maine ka hekö pena ha epuni ngöne la nyipici, ngo thaa tro kö epuni a xou maine nanazije pena; Iehova a qaja xeciëne laka tro Nyidrëti a xatua epuni me amanathithine la aqane xomihniahoeane i epun, hnene la hna thepe epuni me hamëne koi epuni la mele ka thaa ase palua kö.​—Heb. 13:​5, 6; Hna ama. 2:​10.

Maine jë tro asë hi së a qëmeke kowe la itre itupathi ka jole catre ngöne la itre drai tixenuë ne la fene i Satana. Qaane ju hi lo isi ekö e koho hnengödrai me thupene lo kola acile lo Baselaia i Akötresie ngöne lo macatre 1914, thaa hna nue Satana hmaca kö troa tro koho hnengödrai thei Akötresie. Hna upetriji angeic a tro celë fen, nge hne i angeice pë hë lai memine lo itre angela ka ngazo i angeic. Ame pë hë la hleuhleu enehila e celë fen qaane lo lai ijine cili, tune la aqane catre icilekeu enehila memine la itre hlue i Iehova, tre, celë hi thangane la elëhni Satana; nge kolo mina fe lai a nyihatrene laka, easa melëne hnyawa la itre drai tixenuë ne la musi angeic ka ngazo hune la itre atr.​—Hna ama. 12:​1-​12.

Atre hi Satana laka hna e pe hi la itre drai angeic, nge kola aelëhni angeic hnene la hna thaipië angeic. Haawe, kola xatua angeic hnene la itre dremoni matre troa sawa la huliwa ne cainöje trootro me ini hna xome hnene la itre hlue i Iehova, me troa thë la caasi angatr. Celë hi matre itre hlue i Iehova a cile troa isi me Satana me itre Dremoni angeic a cile wengë troa isi ngöne la götrane la ua; celë hi isi lai hna qaja ngöne Efeso 6:​12 ceitune me “ikuë me atr, ngo ite joxu pe, me itete mus, me ite tane la jid e celë fen, me ite u ka ngazo ngöne la ite hnë e hnengödrai.” Celë hi isi lai hna troa sisedrëne hnene lo akötr atraqatr elany laka calemi catre hë. Maine easa ajane troa hane ce memine la itre ka hun, ene lo itre ka ce me Iehova, thaa tro pi kö sa nue troa ngaa së, ngo tro pe sa catre xetrëne hnyawa lo ixetr ne isi së ngöne la götrane la ua. Ketre, tro fe sa catre xome la isi me cile kowe la itre nyinyithiina i Satana. (Efe. 6:​10-​17) Nyipi ewekë tro sa xomihniahoean ngöne la easa catre troa eatrëne la huliwa ne cainöj hna upi së troa kuca hnei Akötresie. Ngo nemene la aliene la kola hape troa xomihniahoean, nge tune kaa la aqane tro sa atreine xomihnine la itre itupath?

CATRE PI SË TROA XOMIHNIAHOEANY

Ame la troa xomihni tre, kola hape troa “atreine troa cile kowe la kucakuca ne la ngönetrei maine mekun, maine akötre pena.” Ame ngöne la götrane la ua, tre, kola qaja hnene la hnëewekë celë la thiina, ene la troa catre ngöne la troa kuca la loi ngacama tru la itre jol, me icilekeu, me iakötrë, maine itre xaa ewekë ju kö ka sewe së troa mele nyipici koi Akötresie. Ame la xomihni ne la Keresiano, tre, thaa ka xulu xane kö, loi e troa tru la trenge catre me traeme hna xome troa eëne la thiina cili. Ame la easa kökötre trootro ngöne la götrane la ua, ketre, easë fe hi lai a xomihni catr. Maine ame ngöne lo easa xötrei atre la nyipici, tre, easa xomihnine ahoeane la itre itupathi ka co nge easë fe a trongëne lo hne së hna isisinyikeu me Akötresie troa nyihlue i Nyidrë, haawe, tro hë së lai a catr, ene pe ijiji së hë troa hane xomihnine ahoeane la itre itupathi ka tru ka troa traqa elanyi koi së. Thaa tro kö a treqene elanyi troa traqa la itre itupathi ka tru, troa mekune troa cile catre ngöne la lapaun. Loi e tro sa canga mekun qëmekene troa traqa la itre itupath. Hnei aposetolo Peteru hna amamane laka loi e troa ce eëne la xomihniahoeany memine la itre xaa thiina i Akötresie. Hnei nyidrë hna cinyihane ka hape: “Nyi thina ka loi xane la lapaune i nyipunie, nge nyi inamacane xane la thina ka loi ; nge nyi xom’ acone xane la inamacan ; nge nyi xomi hni xane la xom’ acone ; nge nyi thina ka ijiji Akötresie xane la xomi hni ; nge nyi ihnimi tejine xane la thina ka ijiji Akötesie ; nge nyi ihnimi xane la ihnimi tejin.”​—2 Pet. 1:​5-7; 1 Tim. 6:​11.

Hnei Iakobo hna amamane la enyipiewekëne troa xomihniahoeany; hnei angeic hna cinyihane ka hape: “Ange tejine me ini fe, loi e tro nyipunie a mekune, laka nyine amadin’ atraqat’ e traqa koi nyipunie la nöjei itupathi ka nyimu pengön ; ke ate hë nyipunie, laka ate aciane la xomi hni la kola tupathe la lapaune i nyipunie. Loi e huliwa apexejene la xomi hni, mate pexeje me meköti nyipunie, nge pëkö ewekë ka pat.” (Iako. 1:​2-4) Hnei Iakobo hna qaja ka hape ame la itre Keresiano, tre, loi e tro angatr a kapa la itre itupath me madrin, pine laka, itre ej a xatua angatr troa xomihniahoeany. Hapeu, epuni kö a hane goeëne tune lai la itre itupath? Thupene lai Iakobo a amamane laka ame la xomihniahoeany, tre, hetre hnene ej hna troa kuca: ene la troa apexejene la thiina ne Keresiano së, nge matre tro sa nyipi lolo xajawa i Akötresie. Haawe, ame la easa qëmeke me cile kowe la itre itupath, ka co ju hë maine ka tru, eje hi lai laka easa atreine xomihni ahoeany. Ame pena ha xomihniahoeanyi, tre, ej a aciane la itre xaa thiina ka lolo ka nyipi ewekë kowe la mele së. Maine tro sa nango kötrene la itre itupathi ka co, eje hi laka, troa jole nge thatreine kö së elanyi troa hane cile kowe la itre itupathi ka tru catr.​—Luka 16:10.

Atraqatre la madrine i Iehova la easa xomihniahoeany; tro ej a upi Akötresieti troa amanathithi së hnene la mele ka thaa ase palua kö. Öni Iakobo ka hape: “Manathithi la ate xomi hnine la itupath, ke e ase hë tupath, tro angeic a hetenyi la korona ne mel, lo hnei Joxu hna thinge hnaeane koi angete hni nyidë.” (Iako. 1:​12) Haawe, hnene laka easa mekune la mel matre easa xomihnine la itre itupath. Maine jole tro sa xomihniahoeany, tre, eje hi lai laka, thatreine kö së troa lapa huti ngöne la nyipici. Maine troa ajojezi së hnene la fene celë, canga bëeke hmaca së troa nyi sineene la fen. Maine pëkö xomihniahoeany, thatreine kö tro sa hetrenyi la uati hmitrötre i Iehova, nge thatreine hmaca kö troa hetre wene ne ej ngöne la mele së.

Maine easa ajane troa xomihnine ahoeane la itre itupath ngöne la itre hneijine ka jole celë, nyipi ewekë tro së itre Keresiano a eköthe la aqane tro sa atrehmekune hnyawa la itre akötr hne së hna cile kow. Mekune hnyawa ju lo hna cinyihane hnei Iakobo, ka hape: “Nyine madrin atraqatr.” Maine jë thaa ka hmaloi kö troa trongëne la eamo celë, ke, ame itre xaa itupath, tre, kola akötrëne la ngönetrei memine la mekun; ngo thaa tro pi kö epuni a thëthëhmine laka epuni a qëmeke kowe la mele ka calemi, itupathi ka tru lai kowe la mele i epuni elany. Tro sa trotrohnine hnyawa la aqane tro sa madrin ngöne la itre akötr, e hne së hna pane wanga atrune la ewekë hna melëne hnene la itre aposetolo. Hna qaja la ewekë cili ngöne la tusi Ite Huliwa, kola hape: “Nge ase hë angate hëne la nöjei aposetolo, me thaucë angat, angate pë hë a ahnithe koi angatr ka hape, The ewekë kö ngöne le ëje i Iesu, ame hna nue angate pi. Nge angat’ a tropi qa ngöne la qëmeke ne la angete ieman, me madine ngöne laka hna meku angate laka ijije troa xomi hmahma pine la atesiwa.” (Ite hu. 5:​40, 41) Hna trotrohnine hnene la itre aposetolo laka, ame la itre akötre i angatr, tre, celë hi hatrene laka, hnei angatr hna drengethenge la hna amekötine hnei Iesu nge Iehova a kepe angatr. Ame hë lo itre macatre thupen, ame la Peteru a cinyihane la pane tusi nyidrë, hnei nyidrë hna qaja la enyipiewekëne la itre akötre cili; kola akötr pine la thiina ka meköt. Pane e jë la hna cinyihane ngöne 1 Peteru 4:​12-​16.

Hanawange la ketre ewekë hna melëne hnei Paulo me Sila. Ngöne la nyidroti a cainöj e Filipi, hna upezö nyidroti ka hape, nyidroti la ka angazone la traon, me qaja la itre ewekë hna majemine ngo thaa hna nue kö troa kuca hnene la mus. Ame la pun, hna lepi nyidro me akalabusi nyidro. Kola qaja hnei Tusi Hmitrötr ka hape, nyidroti pala hi e hnine la kalabus, nge thaa hna nyinyine kö la itre eatre i nyidro, “e hnenyipa jid, Paulo me Sila a thith, me nyma koi Akötesie ; nge kola qatixenyë nyidoti hnei ange hna oth.” (Ite hu. 16:​16-​25) Ame koi Paulo me Sila, tre, ame la itre akötr hnei nyidroti hna xomihnine pi Keriso, ke, thaa nyine anyipicine hmekuje kö la aqane mele nyipici nyidroti koi Akötresie me kowe la itre atr; ngo nyine anyipicine mina fe kowe la itre ka kapa la maca ka loi. Ka nyipi ewekë catre fe kowe la mele ne la itre xan. Ame hë thupene lai, hna drei nyidroti me hane kapa la nyipici hnene la ka thup memine la lapa i angeic, me hane itretre drei Iesu. (Ite hu. 16:​26-​34) Hna mejiune hnei Paulo me Sila kowe la mene i Iehova, memine la aja ka eje thei Nyidrë troa xatua nyidro ngöne la itre akötre i nyidro. Thaa hleuhleu kö nyidro, ngo kolo pe a acatrene la mejiune i nyidro koi Iehova.

Ame mina fe enehila, tre, hnei Iehova hna hamëne la itre ka nyipi ewekë koi së matre tro sa catre ngöne la itre ijine itupath; ame la aja i Nyidrë, tre, tro sa xomihnine la itre itupathi cili. Nyidrëti a ajane tro sa xomihninahoeany. Hnei Nyidrëti hna hamëne koi së la Wesi Ula i Nyidrë matre tro sa hetrenyi la nyipi atrehmekune ngöne la itre aja i Nyidrë. Kola acatrene hnene la atrehmekune cili la lapaune së. Easa catre caas me itre sine hmi së matre troa inine la Wesi Ula i Akötresie, me kuca la huliwa i Nyidrë. Ijije mina fe koi së troa akökötrene la aqane imelekeu së me Iehova, jëne la thith. Iehova a drenge la easa atrunyi Nyidrë me sipone koi Nyidrë troa xatua së troa pë ethane la aqane mele së xajawa i Nyidrë. (Fil. 4:​13) Thaa tro pi sa thëthëhmine laka, maine tro sa catre huliwa me goeëne hnyawa pala hi la mejiune hna amë qëmeke së, haawe, tro ha eje the së la trenge catr troa nyihlue i Nyidrë.​—Mat. 24:13; Hna ama. 21:​1-4.

LOI E TRO SA XOMIHNINE AHOEANE LA ITRE ITUPATHI KA ISA PENGÖN

Ame la itre itupath hne së hna cile kow enehila, tre, ka ceitune itre ej memine la itre hna xomihnine ahoeane hnene la itretre drei Iesu Keriso ekö. Ame ngöne la hneijine së, tre, hna qaqane la Itretre Anyipici Iehova, me qanangazo angatr hnene la itre ka icilekeu ka thatre pengöi angatre hnyawa kö. Tune lo ijine i anga aposetolo, tru catre kö la hna icilekeu hnene la itre ka hmi, laka, ame la itre ini ka thoi memine la itre hna majemine ka ngazo hnei angatre hna kuca, tre, hna qaja amamane hnene la maca ka loi ne la Baselaia. (Ite hu. 17:​5-9, 13) Ame itre xaa ijin, tre, hna kapa hnene la itre musi la itre emekötine la itre hlue i Iehova (Ite hu. 22:25; 25:11). Ngo ame fe la itre xaa ijin, tre, kola wathebone hnene la itre hene musi tro sa cainöj, nge angatre fe a thele troa apën. (Sal. 2:​1-3) Ame la kola traqa la ewekë cili, easa catre xötrethenge hnyawa la tulu ne la itre aposetolo ka mele nyipici, nge easa catre troa “denge thenge Akötesie hune la at.”​—Ite hu. 5:​29.

Pine laka kola kökötre catre pala hi la aja ne troa isi pi nöj, haawe, kola troa qëmeke hnene la itretre cainöjëne la maca ka loi kowe la itre ka iakötre me sewe angatr troa cainöj, ene lo huliwa hna upi angatre troa kuca hnei Akötresie. Kola trotrohnine hnyawa hnene la itre hlue i Akötresieti asë la ithuemacanyi hna hamëne ngöne Hna Amamane 14:​9-​12 göne la troa thili kowe la “öni ka sheshe, me hnaijin’ ej.” Easa trotrohnine la aliene la itre trenge ewekë i Ioane, kola hape: “Dei lai xomi hni ne la nöjei ate ka hmitöt ; nge dei lai angete denge thenge la ite wathebo i Akötesie, memine la lapaune koi Iesu.”

Maine jë pine la itre isi, maine icilekeu maine hnene la hna wathebone pena la huliwa hnei mus, ene pe jole koi epuni troa hmi. Maine jë thaa ijijë hë troa icasikeu lapa memine la ekalesia. Maine jë thatreine kö troa thuemacane la filial, nge jole pena ha troa iwai hnene la itre qatre thup ka wange trongëne la itre ekalesia. Maine jë fe thaa kapa hë epuni la itre itusi ka hnyipixe. Matre nemene la nyine tro epuni a kuca?

Kuca asë jë la hnei epuni hna atrein matre troa catre hmi ngöne lai itre ijine holehole cili. Ijije hi tro epuni a ketre inine la Tusi Hmitrötr. Atreine hi troa eköthe la itre hnepe gurup matre troa icasikeu me inine la Tusi Hmitrötr hnine la ketre hnalapa. Tro ha xome la Tusi Hmitrötr memine lo itre itus hna ce wange hë e cili lo. The xou kö me hnehengazo menu. Kola mama laka, canga tro hi la Lapa Ne Xomi Meköt a thele la ketre jëne troa iöhnyi memine la itre trejin ka elemekene la huliwa ngöne la hnepe ijine ka xoxopatr.

Nge maine jole catre koi epuni troa iöhnyi memine la itre trejine Keresiano, ngo ame pe, tre, loi e tro sa mekune hnyawa laka, ce easë pala hi me Iehova memine la Hupuna i Nyidrë, ene Iesu Keriso. Ijije hi troa cile huti la mejiune i epun. Ame Iehova, tre, Nyidrëti pala hi a drenge la itre thithi epun me acatrene la lapaune i epun jëne la uati hmitrötre i Nyidrë. Haawe, thele jë tro Nyidrëti a eatrongë epun. The thëthëhmine kö laka, hlue i Iehova epun, nge atre drei Iesu Keriso epun; haawe, maine kola mama laka ijije hi tro epuni a cainöj, the cile pi kö troa ithanata kowe la itre xan. Tro kö Iehova a amanathithine la trenge catre hnei epuni hna kuca. Maine jë troa hane ce me epun hnene la itre xan troa hane ce hmi me epun.​—Ite hu. 4:​13-​31; 5:​27-​42; Fil. 1:​27-​30; 4:​6, 7; 2 Tim. 4:​16-​18.

Tune lo itre aposetolo memine lo itre xaa Keresiano ekö, maine troa humuthi epun, lapaune hnyawa ju kowe la “Akötesie ate amelene hmaca la ite ka mec.” (2 Kor. 1:​8-​10) Tro la lapaune i epuni kowe la melehmaca a xatua epuni troa xomihniahoeane la itre icilekeu ka tru. (Luka 21:19) Hnei Iesu Keriso hna hamëne la tulu; atre hi nyidrëti ka hape, qa ngöne la aqane mele nyipici nyidrë ngöne la itupath, tro ha hetre trenge catre ne la itretre drei nyidrë troa xomihninahoeane la itre jol. Ijiji epuni fe troa hane acatrene tune lai la lapaune ne la itre trejin.​—Ioane 16:33; Heb. 12:​2, 3; 1 Pet. 2:​21.

Maine jë thaa tro kö a hane icilekeu me sewe epuni troa cainöj, ngo tro pena epuni a hane xomihninahoeane la itre xaa ewekë ka tru. Ngacama thaa hna hane kö sawa la itre xane troa cainöj, ngo angatre a nanazij nge thaa nyihlue i Iehova hë angatr pine la hna xele ma drei angatr hnene la itre atr ne la teritoare i angatr. Ame itre xan, tre, hnei angatr hna xomihnine la itre sine meci ka traqa koi angatr, laka ketre ju hë la ngönetrei maine e kuhu hni angatre pena, me itre xaa kucakuca ne la ngönetrei ka ajolëne la mele i angatr. Hnei Paulo aposetolo hna xomihninahoeane la ketre itupath ka nango ajolë nyidrë ngöne la huliwa ne cainöje i nyidrë, maine nyi ehacene pena ngöne la itre xaa ijin. (2 Kor. 12:7) Ketre tui Epaferodito laka, angeic la ketre Keresiano ne la hneijine i Iesu; atre Filipi angeic, nge ka “hace hnine qa ngöne la [hnene la itre sinee i angeic] hna denge, laka angeice a mec.” (Fil. 2:​25-​27) Atreine hi tro la itre ngazo së memine la itre ngazo ne la itre xan, a aciane la itre xaa jol nyine troa xomihninahoean. Ijije hi tro itre ej a afetrane la itre ihmönyinyi thene la itre Keresiano ka ce huliwa. Ngo ijije fe hi troa xomihnineahoeane me hane cile kow hnene la itre atr ka xötrethenge la itre eamo qa hnine la Wesi Ula i Iehova.​—Ezek. 2:​3-5; 1 Kor. 9:​27; 13:8; Kol. 3:​12-​14; 1 Pet. 4:8.

KOLA CATRE TROA LAPAUN

Loi e tro pala hi sa fedre catre koi Iesu Keriso, lo Taane la ekalesia hnei Iehova hna acil. (Kol. 2:​18, 19) Nyipi ewekë fe tro sa ce huliwa memine la “hlue ka nyipici me ka inamacan” memine la itre hna acile troa itretre thup. (Heb. 13:​7, 17) Maine tro sa metrötrëne hnyawa la itre hna amekötine hnei Akötresie, nge maine tro sa ce huliwa memine la itre ka eatrongë së, haawe, tro hë së a caasi hnyawa troa kuca la aja i Iehova. Ketre nyipi ewekë fe tro sa catre thele troa thith. Mekune hnyawa kö epuni laka, pëkö ngöne uma ne kalabus maine ketre uma hna troa thinge qaluqalu së e hnin, ka troa sewe së troa acatrene pala hi la itre aqane imelekeu së memine la Tretretro së ka ihnimi e koho hnengödrai, maine tro pena a thë la caasi së memine la itre sine ce huliwa së Keresiano.

Loi e tro sa catr me xomihniahoeany, me kuca asë la hne së hna atrein matre troa aejëne la huliwa hna athipe koi së, ene la troa cainöj; ketre, catre pi së troa cile huti ngöne la huliwa hna upi së troa kuca hnei Iesu Keriso lo hna amelene hmaca; öni nyidrëti kowe la itretre drei nyidrëti asë ka hape: “Qa ngöne lai, trojë nyipunie a inine la nöjei nöj’ asëjëihë, me bapataiso angate kowe la atesiwa i Tetetro, me Hupuna, me Uati Hmitöt ; ini angate jë troa trongëne la nöjei ewekë asëjëihë lo hnenge hna ahnithe koi nyipunie.” (Mat. 28:​19, 20) Catre pi së tui Iesu, me xomihnineahoeane la itre itupath, nge loi e tro sa mekune hnyawa pala hi la mejiune kowe la Baselaia memine la mele ka thaa ase palua kö ka mamacile koi së. (Heb. 12:2) Pine laka itretre Keriso së hna bapataisone hë, atraqatre la madrine së troa eatrëne lo hna perofetane göne la “puatine la fewatin.” Öni nyidrë: “Tro ha cainöjëne la maca ka loi celë ne la baselaia e cailo fene nyine anyipicine kowe la nöjei nöj ; ame hna traqapi la pun.” (Mat. 24:​3, 14) Maine tro sa kuca cememine la hni ka pexej la huliwa celë ngöne la hneijine celë, haawe, tro hë së a hetrenyi la madrine troa mele epine palua ngöne la fene ka hnyipixe, me ka meköt hnei Iehova hna troa acile hmaca!