Hna Hnëkëne Troa Kuca La Aja i Iehova,
Mekene 16
Ihnim Ka Eje Thene La Itre Trejin
THUPENE la 2 000 lao macatre ne ce huliwa Iehova me Aberahama, me itre xötre nekö i angeic, hnei Nyidrëti pena hna “xöji angete ethen, troa xome qa thei angate la nöje thatraqane la atesiwa i nyidë.” (Ite hu. 15:14) Tro hë la nöje thatraqane la atresiwa i Iehova a anyipici Nyidrë, me acaasi angatre ngöne la mekun, me aqane ujë ngöne la itre götrane hnei angatre hna mele ngön. Ame lai aqane caasi cili ne la nöje thatraqane la atresiwa i Akötresie, tre, ka xulu qa ngöne la hnei angatre hna eatrëne la huliwa hnei Iesu hna upe la itretre drei nyidrë troa kuca. Öni nyidrëti ka hape: “Qa ngöne lai, trojë nyipunie a inine la nöjei nöj’ asëjëihë, me bapataiso angate kowe la atesiwa i Tetetro, me Hupuna, me Uati Hmitöt; ini angate jë troa trongëne la nöjei ewekë asëjëihë lo hnenge hna ahnithe koi nyipunie.”—Mat. 28:19, 20.
Ame la epuni a ketre sipu nue la mele i epuni koi Iehova me bapataiso epun, epuni hi lai a hane ketre atre drei Iesu Keriso, me ketre atrene la lapa ka caas ne la itre Keresiano e cailo fen, ke thaa angatre kö a nue la eisapengöne la nöje i angatr, me tribu, maine isa pengöne mele i angatre hnene la hna hetrenyi maine pë mo, troa aisa angatr. (Sal. 133:1) Ame la thangane lai, epuni a hnime me metrötrëne la itre trejine me epuni Keresiano hnine la ekalesia, ngacama isapengöne kö la itre hane kupeine ngönetrei, maine isa nöje i angatre kö. Maine jë, ame itre xaa enehmu i epun enehila ngöne la ekalesia, tre, itre atr hnei epuni hna ananyin ekö, ke, isa hane kupeine ngönetrei angatre kö me epun, me isa qene nöj, me isa ini hna kapa qaathei mus, maine isa pengöne mele i epuni hnene la hna hetrenyi maine pë mo pena. Caasi hë së, nge hetrenyi the së, itre trejine ngöne la ua, la ihnimi ka pë thoi ngön, celë hi ewekë ka eköthe la ketre otretre ka cile hut, nge ka catrecatre kö hune la aqane imelekeu së me itre atr hne së hna ce hmi memin, maine itre atr hne së hna atre pena, maine itre fami së pena.—Mar. 10:29, 30; Kol. 3:14; 1 Pet. 1:22.
TROA AMEKÖTINE LA MEKUN
Maine jole kowe la itre xan troa elë hune la hni ne edraië i angatre hune la itre xaa atr ka isa hane kupeine ngönetrei, maine isa parti politik, maine isa aqane mele kö, maine itre xaa ewekë ju kö hnei angatre hna xelen, ke loi e tro angatr a mekune la tulu ne lo itre pane Keresiano ne Iudra, laka hnei angatre hna xometrije la itre mekune ka ngazo, ene la edraiëne la hmi angatre Iudra hune la itretre ethen. Loi e tro epuni a mekune lo itre hna ahnithe koi Peteru, laka hnei Iehova hna hnëkë angeice hnyawa kowe la huliwa i angeic, ene la troa tro kowe la hnalapa ne la ketre Keneturio ne Roma, Konelio la ëjen. Kola sipone matre tro epuni a e asë la mekene 10 ne la Ite Huliwa.
Ame ngöne la hna meköle goeëne hnei Peteru, hna upi angeic troa humuthe me öni la itre xaa öni ka sisi ngöne la hmi angetre Iudra, nge thaa nyine tro fe kö a ketr. Ame la Peteru a qeje jol, qaja jë hi koi angeic hnene la nine ula qaa hnengödrai ka hape: “Ame la hnei Akötesieti hna nyihnyawan, te, the tro kö eö a hape, hmitöt.” (Ite hu. 10:15) Nyipi ewekë tro Akötresieti a ameköti Peteru me canga wenë la mekune i angeic thatraqane la huliwa hnei angeice hna kapa, ene la troa tro, me vizitëne la ketre trahmanyi ne ethen. Ngo ame la Peteru a drengethenge la kola upi angeic hnei Iehova, öni angeic e qaja kowe la itre ka traqa itronyi ka hape: “Ate hë nyipunie laka hmitöte kowe la ate Iuda troa icasikeu me iashenyi memine la ate ne la kete nöj; ngo hnei Akötesie hna amamane koi ni, ka hape, tha tro kö ni a qaja, ka hape, hmitöte me sisi la kete ate. Celë hi mate traqa ha ni, nge pëkö eohni ngöne lo ijine thei ni.” (Ite hu. 10:28, 29) Qa ngöne lai, Peteru a anyipicine la hna kepe Konelio me lapa i angeic hnei Iehova.
Ame Saulo atre Taraso, tre, ketre atr ka kapa la ini ka tru thene la itretre Faresaio, ngo hnei angeic hna ketre sipu aipië angeice kö, me caasi memine la itre hnei angeice ekö hna xele ma wang. Ketre, hnei angeice jë hna kapa la itre hna amekötin qaathei angatr. (Ite hu. 4:13; Gal. 1:13-20; Fil. 3:4-11) Pane mekune jë fe së la itre ewekë ka saze thene la itre atr tui Segio Paulo, me Dionusio, me Damari, Filemona, me Onesimo, me itre xane ju kö ngöne la angatre a kapa la maca ka loi me hane itretre drei Iesu Keriso.—Ite hu. 13:6-12; 17:22, 33, 34; Filem. 8-20.
TRO SA CATRE CAAS MEMINE LA ITRE TREJINE ME EASË E CAILO FEN
Thaa luelue kö së laka, hna huli epuni koi Iehova memine la organizasio i Nyidrë hnene la ihnimi ne la itre trejine trahmanyi me föe e hnine la ekalesia i epun. Thaa ase kö epuni hane melëne la ihnimi cili e hnine la itre xaa gurup. Hnei epuni hna goeëne la hatrene ihnim me caas ka eje thene la itretre drei Iesu Keriso, tune la hnei nyidrëti hna qaja ka hape: “Ini a hamë nyipunie la wathebo ka hnyipixe, laka tro nyipunieti a ihnimikeun; tro nyipunie a ihnimikeune tune la hnenge hna hnimi nyipunie. Celë hi mate tro nöjei ate asëjëihë a wangate hmekune laka itete dei ni nyipunie, e tro nyipunie a ihnimikeu.” (Ioane 13:34, 35) Ngo epuni pë hë a wangatrune la hnei Iehova hna kuca kowe la itre atr asë enehila, ngöne la epuni a ketre sipu öhne la ihnim ka eje e hnine la ekalesia i epun, me trotrohnine laka hatrene hi la ihnim ka eje thene la itre hlue i Iehova e cailo fen! Epuni la ketre ka anyipicine me eatrëne la hna perofetane hnei Tusi Hmitrötr, ene la kola icaasinekeune la itre atr ngöne la itre drai tixenuë, matre troa thili koi Iehova ngöne la tingeting me caas. Hapeue matre tro epuni a e la hna perofetane celë? Eje ngöne la Mika 4:1-5.
E tro sa goeëne la aqane gomegome la fene enehila, pëkö atr ka mekune laka ijije troa acaasine la itre atr “qa ngöne la ite xöte nöj’ asë, me ite tribu, me nöjei ate, me ite qene lapa”? (Hna ama. 7:9) Pane mekune jë la eisapengönene la itre atr ka mele ngöne la itre nöje hna jilapane hnei masin, memine la itre atr ka catre fedre kowe la itre qene nöje ne la tribu. Nge mekune jë fe la ikucanyi ka eje thene la itre atr ka caasi hi la hane kupeine ngönetrei, me nöje i angatr, ngo isa hmi angatre pe. Nge the qaja kö la isi pi nöj, laka kola aisane la itre atr hnene la kuci politik. Ketre mina fe, maine tro epuni a goeëne la eisapengöne aqane mele ne la itre atr hnene la hna hetrenyi maine pë mo, memine fe la itre xaa jëne gomegome me aisane la itre atr, haawe, ketre iamamanyikeu la troa acaasine la itre atr ne la nöjei nöje cili, me qa ngöne la itre gurup, me itre lapa, me qa ngöne la itre göhmeku i angatr, jëne la itre otretre ka cile hut, ene la ihnim me tingetinge hna aijijëne hmekuje hi hnene la Akötresie Ka Pucatin Asë.—Zak. 4:6.
Ngo, hna nyipi melëne la caasi cili, nge ame la epuni a nue la mele i epun, me bapataiso troa ketre Atre Anyipici Iehova, tre epuni hi lai a ketre atrene la lapa ka caasi cili ne la itre trejin. Hna aijijë epuni hnene la lapaune i epuni koi Akötresie troa hane lö hnine la paradraiso ngöne la ua. Hnene laka epuni ha kepe thangane la paradraiso cili, hetrenyi thei epuni la hnëqa troa ixatua troa thupën ej. Troa eatrëne lai e hnei epuni hna xötrethenge la trenge ithanata i Paulo ngöne Galatia 6:10: “Qa ngöne lai tro sha kuca la loi kowe la nöjei ate asëjëihë e hete ijine shë, ngo sisitia kowe la nöjei ate ne la lapa i angete lapaun.” Ame la aliene fe la troa thupëne la paradraiso ngöne la ua, tre, ene laka “the kuca kö kete ewekë thenge la ikucanyi me pi tru; ngo loi e isa mekune memine la hni ka ipië, laka sisitria angate hui angeic; the isa wai ewekëne kö, ngo loi e isa wange la ite ewekë i ite xan.” (Fil. 2:3, 4) E tro pala hi sa thele troa goeëne la itre trejine me easë trahmanyi me föe tune la aqane goeë angatre hnei Iehova, nge thaa tro kö a goeëne la ka mama koi lue mek—ene la itre engazo i angatr ka troa paatr elany—eje hi laka tro pala hi a tingetinge me madrine la aqane imelekeu së me angatr.—Efe. 4:23, 24.
TRO SA IMEKUNEKEUN
Tune la aqane qejepengöne hnei Paulo, ame la itre atrene la ekalesia, tre kösë itre hnepe ngönetrei itre xane fe, nge loi e troa ithupënekeun. (1 Kor. 12:14-26) Matre ame la kola ketr la ketre hnepe götrane ne la organizasio, tre kola ketr asë la nöje i Akötresie. Ngacama iananyi së memine la itre atrene la lapa ne la itre trejine me easë e cailo fen, ngo ame pe, easë pala hi a meku angatr. Maine kola axösisine la itre xaa trejine me easë, atraqatre la hleuhleu së, itre xaa trejin e cailo fen. Maine itre xaa trejin a aja ixatua, maine akötre fë la ketre hulö ka traqa, ene la itre di maine sa, maine isi, maine icilekeu e hnine la nöj hnene la itre ka kuci politik, haawe, kola thele jëne hnene la itre trejine e cailo fen troa iupi fë la hna ajane ngöne la ua me ngöne la ngönetrei.—2 Kor. 1:8-11.
Loi e tro asë hi së a thithi sane la itre trejine me easë e nöjei drai. Hetrenyi la itre trejine ka cile kowe la itre itupathi ka uku angatre troa kuca la ngazo. Ka hlemu la itre akötre ne la itre xaa trejine me easë, ngo ame la icilekeu hna cile kow hnei itre xan e nöjei drai, tre qaathene la itre sine huliwa, me qa hnine la fami, nge thaa mama kö. (Mat. 10:35, 36; 1 Thes. 2:14) Kola ketri së asë, ke easë la itre atrene la lapa ka caas ne la itre trejine e cailo fen. (1 Pet. 5:9) Hetrenyi mina fe la itre ka catre huliwa koi Iehova, lo itre ka elemekene la huliwa ne cainöj, me thupëne la itre ekalesia. Nge the qaja kö lo itre trejine hna acile troa xomiujine la huliwa ne cainöj e cailo fen. Nyipi ewekë catre la itre thithi së koi angatr, jëne tro hi së lai a amamane laka, easa wangatrune la itre trejine me easë, memine la ihnimi së koi angatr, ngacama pëkö ewekë ka ijije nyine tro sa kuca matre troa xatua angatr.—Efe. 1:16; 1 Thes. 1:2, 3; 5:25.
Hnene laka kola gomegome la fene ngöne itre drai tixenuë celë, me itre ethanyine qa ngöne lai, nge the qaja kö la itre hulö ka traqa, tune la itre sa, me itre di, ene pe nyipi ewekë tro la Itretre Anyipici Iehova a ixatuakeu. Ame itre xaa ijin, kolo lai a hape, atraqatre la huliwa hna kuca me hnëkëne la itre ahnahna me iupi fë itre ej. Hetrenyi la ketre tulu hna amë pe hnene la itre Keresiano ne lo hneijine i Iesu. Ame la kola jiinë xeni e Iuda, hnene la itretre drei Iesu ne la itre xaa nöj hna mekune hmaca lo eamo hnei nyidrëti hna hamën, ene pe hnei angatre hna iupi fë ahnahna kowe la itre trejine e Iuda. (Ite hu. 11:27-30; 20:35) Hnei Paulo aposetolo hna hnëkëne la itre ixatua matre troa tro loi la huliwa. (2 Kor. 9:1-15) Ame ngöne la hneijine së enehila, maine itre trejine me easë a akötre fë la itre hulö ka traqa koi angatr, nge kola aja ixatua, kola canga enij hnei organizasio me itre Keresiano, angatr isa ala caas troa hamë ixatua.
HNA KETRE AISA ANGATRE KÖ TROA KUCA LA AJA I IEHOVA
Hna eköthe la lapa ka caas ne la itre trejine me easë e cailo fen matre troa kuca la aja i Iehova. Ame ngöne la hneijine celë ka ketre pengön, aja i Nyidrëti troa cainöjëne la maca ka loi ne la Baselaia ngöne la fene asë nyine anyipicine kowe la nöjei nöje asë. (Mat. 24:14) Pine laka easa kuca la huliwa celë, aja i Iehova fe tro pala hi sa ujë thenge la itre trepene meköt i Nyidrë ka draië. (1 Pet. 1:14-16) Loi e tro asë hi së a ipië me Nyihluei ketre me ketre me ce huliwa thatraqane la maca ka loi matre troa eatrëne hnyawa la huliwa i Iehova. (Efe. 5:21) Thaa ijine tro kö së a nyinyape thele la itre sipu aja së, ngo ijine pe ka sisitria enehila troa amë panëne la Baselaia i Akötresie ngöne la mele së. (Mat. 6:33) Maine tro sa catre lapa mekune lai, me ce huliwa, me caas memine la itre trejine thatraqane la maca ka loi, tro hë sa hetrenyi la madrin enehila me aijijë së elanyi troa hane kapa la itre manathithi ka epine palua.
Ame easë Itretre Temoë i Iehova, hna aisa easë hnyawa qa ngöne la itre xaa atr, ke, easë la itre atrene la ketre nöje ka wië, nge easa catre huliwa kowe la Akötresi së. (Tito 2:14) Thaa hnene laka easa ajane troa mama koi itre atr, ene pe ketre pengöne kö së, me aisa së. Ngo, hnene pe la hmi së koi Iehova la ka aketrepengönë së. Thaa ene hmekuje kö la hne së hna ce huliwa memine la itre trejine me easë e cailo hnene la hni ka caas, ngo hnene fe laka caasi hi la qene hlapa së, ene la nyipici, me caasi fe së ngöne la easa mele thenge la nyipici hne së hna tro fë. Hna perofetane hë ekö lai ngöne la Iehova a qaja jëne la perofeta i Nyidrë, Zefania la ëjen, kola hape: “Ame hnenge pena hna troa ujëne [“la qene hlapa ne la itre nöj troa,” MN] aqane ewekë ka wië, matre tro angat’ asë a hëne la atesiwa i Iehova, me nyi hlue i nyidrë hnene la hni ka cas.”—Zef. 3:9.
Thupene lai, Iehova a upi Zefania troa qejepengöne la aqane caas, me wië la lapa ne la itre trejine e cailo fen, nge ka eatre hnyawa enehila, kola hape: “Tha tro kö la ite thelene i Isaraela a kuca la ngazo, me qaja la thoi, nge tha tro kö a öhne ngöne la qe i angate la sesepeneqë ka iaö; ke tro angat’ a xeni me meköl, nge pëkö ate troa aqounyi angat.” (Zef. 3:13) Hnene laka hetrenyi thei angatre la wangatrehmekune la Wesi Ula i Iehova, ene la nyipici, me ahnyipixene la itre hni angatr, me mele thenge la itre trepene meköt i Iehova, haawe atreine hi tro la Itretre Temoë i Iehova a ce huliwa ngöne la hni ka caas. Ame la itre huliwa hna kuca hnei angatr, tre, kösë thatreine kö troa kuca hnei atr. Nyipici laka, ka ketrepengöne kö la nöje celë, la nöje i Akötresie, ene la lapa ne la itre Keresiano e cailo fen, kola atrunyi Nyidrë ngöne la ihnadro asë.—Mika 2:12.
Kola eatrëne hnyawa hnene la lapa ne Itretre Temoë i Iehova e cailo fen la huliwa hnei Iesu hna upi angatre troa kuca, nge hnei nyidrëti hna amamane hnyawa laka celë hi huliwa lai ka troa wangatrehmekune hnyawa la itretre drei Iesu. Ame la itre ka thele troa atrepengöi Iehova, tre xecie koi angatr, nge mama hnyawa laka, nöje i Nyidrë hnene la ihnim ka eje thei angatr. Drei la madrine ka eje the së, troa hane ketre atrene la nöje i Iehova hna eköthe hnyawa, nge hna aijijëne troa xome la huliwa ne cainöj ka tru alameken ngöne la hneijine la pune celë! Maine tro sa catre xetrëne la ihnim, me wangatrehmekunyi së hnene la hatrene cili ka aketrepengönë së, haawe, tro ha xecie koi së laka nyimutre hë elanyi la itre hnëqa ka lolo hna troa aijijë së troa xom e hnine la lapa ka caas ne la itre trejine e cailo fen.