Hna Hnëkëne Troa Kuca La Aja i Iehova,
Mekene 15
Manathithi Hna Kapa Qa Ngöne La Hna Ipië Kowe La Hnei Akötresie Hna Amekötin
NYIPI ewekë catre troa ipië koi Akötresie, Atre Musi Cile kowe la hnengödrai me fene hnengödrai, e ajane së troa kuca la aja i Iehova thenge la itre ewekë hna amekötine hë. Nyipi ewekë fe tro sa atrehmekune la musi ne la Hupuna i Nyidrë kowe la Ekalesia i Keresiano. Nge nyipi ewekë mina fe tro sa trongëne la trepene meköti celë, ene la troa metrötrëne la mus hna acil, ngöne la itre xaa götrane la mele së. Hetrenyi la itre manathithi hne së isa ala caasi hna kapa qa ngöne la hna ipië kowe la itre hnei Akötresie hna amekötine celë.
Hna nyiqaane ipië hnene la atr kowe la mus hna acil, ngöne lo gaatran e Edena. Kola mama lai ngöne la trenge wathebo i Akötresie ngöne la Genese 1:28 me 2:16, 17. Tro la itre öni a lapa fene la musi ne la itre atr, nge tro Adamu me Eva a ipië kowe la aja i Akötresie me mus i Nyidrë. Troa tingetinge me tro loi la aqane mel, e hna drengethenge la musi qaathei Akötresie. Ame hë thupene lai, kola qaja atrune la trepene meköti celë, ene la troa metrötrëne la mus hna acil ngöne la 1 Korinito 11:3. Hnei Paulo aposetolo hna cinyihane ka hape: “Ajange tro nyipunie a ate laka, Keriso la he ne la nöjei trahmanyi, nge trahmanyi la he i fö; nge Akötesie la he i Keriso.” Haawe, kolo lai a amamane laka, easë asë hi a ipië kowe la ketre musi e koho hu së ngöne la aqane amekötine celë, ngo Iehova pe hi.
Ala nyimu la itre atr enehila ka thaa trongëne kö la trepene meköti celë, ene la troa metrötrëne la mus hna acil. Pine nemen? Hna nyiqaane fetra la gomegome e Edena, lo kola sipu iëne hnene la lue pane keme thine së, ene Adamu me Eva troa thipetrije la mus i Akötresie ka sisitria. (Gen. 3:4, 5) Ngo, ketre thaa öhne kö nyidro la nyipi inuamacany qa ngön. Nyidroti pe a lapa pena fene la musi ne la ketre ua ka ngazo, Satana lo Diabolo. Hnene la pane icilekeu cili hna ajeane la nöjei atr qaathei Akötresie. (Kol. 1:21) Ame la pune enehila, kola lapa la itre atr ka nyimutre fene la musi ne la atre ka ngazo.—1 Ioane 5:19.
Maine tro sa atrepengöne la nyipici qa hnine la Wesi Ula Akötresie, me ujë thenge ej, tro ha thepe së qa ngöne la mus i Satana. Tune kaa matre tro pe easë, Itretre Anyipicin hna bapataisone hë, a kapa la mus i Iehova ka sisitria ngöne la mele së? Hapeue caasi hi la mekuna së me Davita Joxu, lo ka atrehmekune laka Iehova la “ka hune la nöjei ewekë asëjëihë”? (1 A. l. ite jo. 29:11) Eje hi! Easa qaja amamane cememine la hni ka ipië ka hape: “Iehova la Akötesie; nyidëti hi la ate xupi shë, nge tha hne shë kö; eëshë la nöje i nyidë, me hnënge mamoe ne la zi nyidë.” (Sal. 100:3) Easë atrehmekune la etru i Iehova memine la enyipiewekën la troa pexeje la aqane ipië së koi Nyidrë, ke, Nyidrëti la ka xupe la nöjei ewekë. (Hna ama. 4:11) Ame easë itre hlue ne la nyipi Akötresie, easa xötrethenge Iesu Keriso, ka hamëne la tulu ka pexeje ngöne la aqane troa ipië koi Akötresie.
Nemene la ini hnei Iesu hna kapa qa ngöne la itre akötre hnei nyidrëti hna melëne e celë fen? Kola sa hnei Heberu 5:8 ka hape: “Ngaca ma Hupunati nyidë, te, hna inine hnei nyidë troa idei hnene la nöjei ewekë hnei nyidëti hna xomi hnin.” Nyipici laka, hnei Iesu hna catre nyipici, me ipië kowe la Tretretro i nyidrë e koho hnengödrai, ngacama kola traqa koi nyidrë la nöjei itupath. Ketre, pëkö ewekë hnei Iesu hna ketre kuca xanën, maine ketre sipu qaja la mekuna i nyidrë pena, maine thele pena troa sipu atrunyi nyidrë kö. (Ioane 5:19, 30; 6:38; 7:16-18) Ame ngöne la huliwa ne cainöje i nyidrë, hnei nyidrë hna öhne la elolone la troa kuca la aja ne la Tretreto i nyidrë, ngacama huliwa lai ka troa axulune la itre icilekeu me iaxösisi. (Ioane 15:20) Ngo, hnei Iesu hna drengethenge Akötresie ngöne laka, “hnei nyidëti hna aipië nyidëti kö,” uti hë la mec, ene la “meci ne satauro.” Ame la pune la ipië i Nyidrë ka pexeje koi Iehova, tre, hna amanathithine ngöne la nyimu götran, ene laka hna aijijëne la mele ka pë pun kowe la nöjei atr, nge hna adraië nyidrë, nge hna atrune la Tretretro i nyidrë.—Fil. 2:5-11; Heb. 5:9.
ITRE GÖTRANE TRO SA IPIË KOWE LA HNEI AKÖTRESIE HNA AMEKÖTIN
Pine laka Iehova la Atre Musi Cile kowe la hnengödrai me fene hnengödrai, haawe, troa pexeje la aqane tro sa ipië koi Nyidrë. (Is. 33:22) Troa mama hnyawa lai, e tro sa ce wange hnyawa pala hi la aqane mele së o drai, ene la mele ne nyi hlue i Iehova. Maine tro sa amë panë Akötresie ngöne la mele së, ene la troa kuca la aja i Nyidrë, tro Nyidrëti a köja së la gojenyi ka meköt tro sa xom. (Sal. 16:8) Kola trianyi së hnene la itre ejolene la mel, me hleuhleu ka eje thene la itre ka thipetrije la musi cile i Iehova. Ame Satana, ithupëjia me easë, tre, angeice a thele tha i angeic me thele pala hi troa akeinyi së hnene la itre hnö i angeic. Maine tro sa cile huti qëmeke i angeic, me ketre sipu aipië së kö koi Iehova, ene la troa drengethenge Nyidrë, tro hë lai a thepe së qaathene la atr ka ngazo.—Mat. 6:10, 13; 1 Pet. 5:6-9.
Hetre thangane ka loi fe kowe la aqane imelekeu së me itre xaa atr, hnene la aqane aipië së kö koi Akötresie. Easa neëne la itre jole ka traqa tretr kowe la itre ka mele thenge la aqane waiewekë i fen, ene la troa ketre sipu mele caas. Easa olene koi Akötresie, laka easa mele madrine e hnine la faipoipo së me hnine la fami së, nge lolo mina fe la aqane imelekeu së memine la itre sine huliwa së, me itre maseta së. Easa metrötrëne la itre wathebo i mus, nge lolo la mekuthetheu së qëmekene la itre mus hna acil. Ketre, ka lolo la thiina ne la itre enehmu së, ene la itre trejine me easë Keresiano.
Ame e hnine la ekalesia i Keresiano, easa atrehmekune la mus i Keriso memine la mus hnei nyidrëti hna nue kowe la hlue ka nyipici me ka inamacan. Haawe, ewekë lai ka troa ee së ngöne la itre mekuna së, me aqane ujë së kowe la ketre atr. Maine easa atrehmekune la hna amekötine hnei Akötresie ngöne la mus e hnine la ekalesia, tro hë lai a upi së troa drengethenge la Wesi Ula i Akötresie ngöne la nöjei götrane la hmi së. Kolo lai a qaja la huliwa ne cainöje së, me sine la itre icasikeu me hane qeje mekun, memine la aqane imelekeu së me itre qatre thup, me sajuëne la itre hna amekötin hnei Akötresie hnine la ekalesia.—Mat. 24:45-47; 28:19, 20; Heb. 10:24, 25; 13:7, 17.
Ame la easa ipië koi Akötresie, easa akökötrene la tingetinge me lapa xetietë e hnine la ekalesia, nge kolo fe a tro loi la itre hna amekötin hnei Akötresie e hnin ej. Kola mama hnyawa la itre thiina ka sisitria i Iehova hnene la aqane caasi ne la itre atrene la nöje i Nyidrë, nge ka amadrinë Nyidrë. (1 Kor. 14:33, 40) Hnene la hne së hna ketre sipu öhne me melëne e hnine la organizasio i Nyidrë, ene pe caasi hi la aliene hni së memine la hna qaja hnei Davita, ketre hlue i Akötresie. Thupene la hna öhne la eisapengönene la itre hlue i Iehova memine la itre atr ka ngazo, ka selëne la sipu mene i angatr, me trenga mo i angatr, Davita a qaja madrine ka hape: “Manathith la nöj’ e Iehova la Akötesi angat.”—Sal. 144:15.
Ame e hnine la faipoipo me e hnine la fami, tre, “trahmanyi la he i fö.” Ngo nyipi ewekë mina fe tro la itre trahmanyi a ipië koi Keriso, ketre, Akötresie la he i Keriso. (1 Kor. 11:3) Nyipi ewekë tro la itre föe a ipië kowe la itre föi angatr, nge tro la itre nekönatre a ipië kowe la itre keme me thine i angatr. (Efe. 5:22-24; 6:1) Kola tingetinge la fami e hna isa trongëne hnene la itre atrene ej, la trepene meköti celë, ene la troa metrötrëne la mus hna acil e hui angeic.
Qa ngöne lai, nyipi ewekë tro la itre trahmanyi a mus cememine la ihnim, me nyitipu Keriso. (Efe. 5:25-29) Maine angatre a catre xome la hnëqa i angatr, nge thaa sasaithi tulu menu kö la aqane musi angatr, haawe, troa madrine hnene la föe me itre kuku troa ipië koi angatr. Ame la hnëqa ne föe, tre, ene la troa ixatua, maine nyine troa apexejen. (Gen. 2:18) Tro la trahmanyi a kapa madrine la föe, nge kolo fe a atrunyi Akötresie hnene la aqane sajuëne me metrötrëne nyiidro la fö i nyiidro cememine la xomihni ahoeany. (1 Pet. 3:1-4) Ame la kola xötrethenge la tulu ne mus qa hnine la Tusi Hmitrötr hnene la itre trahmanyi me itre föe, tre, angatre hi lai a hamëne la tulu kowe la itre nekö i angatr ngöne la aqane troa ipië koi Akötresie.
Tro fe la aqane ipië së koi Akötresie a xatuane fe la aqane tro sa goeëne la “angete musi atraqat,” lo “[“hna nue itre ej hnei Akötresie troa cil,” MN].” (Rom. 13:1-7) Itre Keresiano la itre atrene la nöje ka hetre metrötre catr, me ka drengethenge la itre hna amekötine hnene la itre mus, ene pe angatre a nyi hotr, me “hamënepi koi Kaisara la ite ewekë i Kaisara, nge koi Akötesie la ite ewekë i Akötesie.” (Mat. 22:21) Easa ipië me drengethenge la itre mus hna acil ngöne la nöjei götran, ngo thaa tro pe itre ej a icilekeu memine la itre wathebo i Iehova ka meköt. Tro ha aijijë së troa catre me kuca la hne së hna atrein ngöne la huliwa ka nyipi ewekë catr, ene la huliwa ne cainöjëne la maca ka loi ne la Baselaia i Akötresie hna acile hë.—Mar. 13:10; Ite hu. 5:29.
Ame la kola melëne hnene la itre Keresiano la itre trepene meköti ne la Tusi Hmitrötr, tre, angatre a thele troa aloine la aqane imelekeu i angatre me itre maseta i angatr. Kola catre hnene la itre hlue i Akötresie troa mele tingetinge memine la nöjei atr, ngacama thaa ewekë ka hmaloi kö koi angatr e itre xaa ijin. Ame ngöne la huliwa i maseta, pine laka angatre pala hi a huliwa nyipici, angatre la hnei maseta hna mejiune kow. (Rom. 12:18; 1 Pet. 2:18) Qa ngöne lai, thaa angatre kö a lö hnine la itre iwesitrë, maine angazone pena la mekuthetheu i angatre hna inine hnene la Tusi Hmitrötr.
Ame la troa ipië kowe la itre hna acile hnei Akötresie, tre, kola ketr la nöjei götrane la mele së. Easa öhne hnene la itre lue meke së ne lapaun, la ijine tro la nöjei atr asë a ipië koi Iehova Akötresie. (1 Kor. 15:27, 28) Drei la manathithi me hlemu loi ka eje thene lo itre ka atrehmekune me madrine la musi cile i Iehova, nge tro pala pë hë angatre a ipië koi Nyidrë uti hë epine palua!