Hna Hnëkëne Troa Kuca La Aja i Iehova,
Mekene 14
Loi e Tro Sa Isine Matre Troa Tingetinge Me Pë Ethane La Ekalesia
AME ngöne la nöjei macatre, itre thauzane la etrune la itre atr ka tro kowe la uma i Iehova, ene la hmi ka wië, tune la hna perofetane hë hnei Tusi Hmitrötr. (Mika 4:1, 2) Drei la madrine së troa kepe angatr e hnine “la ekalesia i Akötesie”! (Ite hu. 20:28) Angatr a wanga atrune la hna aijijë angatre troa hane ce nyihlue i Iehova me easë, me troa hane ce mele me easë hnine la paradraiso ngöne la götrane la ua. Kola atreine troa ce mele tingetinge me pë ethan ngöne la götrane la ua, qa ngöne laka, hetre thangane la uati hmitrötre i Iehova, nge ketre, hnene mina fe la hna trongëne la itre eamo ka lolo qa hnine la Wesi Ula i Nyidrë, ene la Tusi Hmitrötr.—Sal. 119:105; Zak. 4:6.
Ijije hi tro sa xetrëne la itre thiina ne la Keresiano, e hne së hna trongëne la itre trepene meköti qa hnine la Tusi Hmitrötr. (Kol. 3:10) Easa kuca asë la hne së hna atrein matre troa melëne la itre wathebo ka meköti Iehova. Celë hi matre easa elë hune la itre hnepe ihmönyinyi së me itre aqane mekune ka isazikeu. Pine laka easa kapa la aqane waiewekë i Iehova, haawe, easë atreine neëne la itre jëne gomegom hne së hna öhne ngöne la fene celë; ene pe kola aijijë së troa ce mele hnine la ketre fami ka caas ngöne la fene hnengödrai, ka ce huliwa ngöne la caas memine la ihnim.—Ite hu. 10:34, 35.
Eje hi lai laka, thaa tro jë kö a paatre la itre jol ka troa athixötrëne la tingeting memine la caasi ne la ekalesia. Nemene la kepine matre kola traqa la itre jole cili? Kola lapa traqa la itre jole cili, qa ngöne laka, thaa hne së kö hna wangatrune me trongëne la itre eamo qa hnine la Tusi Hmitrötr. Tro pala kö sa isi memine la itre aja ka ngazo ka eje the së. Pëkö ketre e easë ka pë ngazone pe kö. (1 Ioane 1:10) Maine jë thaa tro kö a atrehmekune hnene la ketre atrene la ekalesia, laka, hnene la hnei angeic hna ena la ketre wathebo, ene pe hetre ethane ngöne la ngönetrei maine ngöne la ua kowe la ekalesia. Maine jë tro sa akötrëne la ketre hnene la aqane ujë së ka pëkö hni ne metrötr, maine hnene pena la aqane ithanata ka nyi tru, maine easë pena la hna akötrën hnene la hna qaja hnei ketre maine hna kuca pena. (Rom. 3:23) Ame ngöne la kola traqa la itre jole cili, nemene la nyine tro sa kuca matre troa iloi?
Easa olene atraqatre koi Iehova la hnei Nyidrëti hna mekune asë la itre ewekë cili cememine la ihnim. Kola hamëne hnene la Wesi Ula i Nyidrë la itre eamo ngöne la aqane troa ujë, e traqa ju la itre jole pine la ngazo ka eje the së maine hnene pena la itre ifego së, maine pena, hnene laka hetre ethane kowe la ekalesia la ketre ngazo hna kuca. Ijije hi tro la itretre thupë mamoe ngöne la götrane la ua ka ihnimi a isa hamëne koi së la ixatua ka ijij. Maine tro sa trongëne la itre eamo qa hnine la Tusi Hmitrötr hnei angatr hna hamën, haawe, ijije hi tro sa atreine imelekeu hnyawa memine la itre atrene la ekalesia me hlemu loi xajawa i Iehova. Nge maine hne së hna kuca la ketre ngazo nge kola mama laka, loi e troa haji së maine wenë hnei angatre la aqane ujë së, haawe, loi e troa xecie koi së laka, ame la ihaji cili, tre, celë hi hatrene la ihnimi ne la Tretretro së e koho hnengödrai, koi së isa ala caas.—Ite edomë 3:11, 12; Heb. 12:6.
AQANE TROA CILE KOWE LA ITRE HNEPE IHMÖNYINYI SË
Thaa tro kö sa sesëkötre la kola traqa la itre hnepe ihmönyinyi maine itre jole ka co thene la itre atrene la ekalesia. Loi e troa canga cile kowe la itre jole cili cememine la hni ka ihnim. (Efe. 4:26; Fil. 2:2-4; Kol. 3:12-14) Tro kö nyipunieti a isa öhne laka, ame la itre jole ka nyimutre ka xulu qa ngöne la aqane imelekeu ne la itre atrene la ekalesia, tre, ijije hi troa nyi nyine itre ej, e hna trongëne la eamo hna hamëne hnei Peteru; kola hape “tro nyipunie a ihnimikeu cat ; ke tro ha he la ite ngazo ka nyimute hnene la ihnim.” (1 Pet. 4:8) Hnene laka ka ngazo së itre atr, ene pe kola traqa la itre hnepe jole cili. Ame asë hi së, tre, ka tria asë hi së. (Iako. 3:2) Maine easë a atrehmekune laka itre atr ka ngazo së me trongëne la Wathebo Gool, ene lo troa kuca kowe la itre xan la hne së hna ajane troa kuca koi së, haawe, ijije hi tro sa elë hune la itre hnepe ngazo hna kuca koi së, hnene la hna nuetrij me thëthëhmine itre ej.—Mat. 7:12.
Ngo maine hetre ewekë ka ajojezine la itre aqane imelekeu i epuni memine la ketre atrene la ekalesia, nge drenge hi epuni laka, thaa hnepe jole ka co kö, me mekune ka hape, hetre ketre aqane tro kö a cile kowe la jole cili, haawe, ka loi e troa canga sei qene la jol, pine laka, troa angazone mina fe la aqane imelekeu epuni me Iehova. Hnei Iesu hna eamo kowe la itretre drei nyidrë, ka hape: “Qa ngöne lai maine eö a tro fë pi la ahnahna i ’ö kowe la ita ne huj, nge eö lai a hnine la tejine me eö a hete aköte göi ’ö; amëju pë hë e cili fene la ita ne huje la ahnahna i ’ö, nge trojë eö a pane iloi me tejine me eö, ame hna tropi troa hujëne la ahnahna i ’ö.” (Mat. 5:23, 24) Maine jë hna trotrohnine menune la itre trenge ithanata maine ketre aqane ujë pena. Maine eje hi lai, tre, loi e troa canga thele troa sei qene la jol hnene la hna amë panëne la caasi thene la itre Keresiano, me catre ithanatakeu. Maine tro la itre atrene la ekalesia a catre ifekeune hnyawa la itre mekune i angatr, haawe, tro ha neëne la itre hnepe jol ka xulu qa ngöne laka, hna trotrohnine menune la itre ithanata maine itre aqane ujë pena, nge ketre, canga tro hi sa thele nyin la itre jol ka fetra qa ngöne laka itre atr ka ngazo së.
TROA HAMËNE LA ITRE EAMO KA IJIJ QA HNINE LA TUSI HMITRÖTR
Ame ngöne la itre xaa ijin, nyipi ewekë kowe la itre qatre thup troa eamo kowe la ketre trejin, me thele troa wenë amekötine la aqane mekuna i angeic. Thaa ewekë ka hmaloi kö la troa hamë eamo. Hnei Paulo aposetolo hna cinyihane kowe la itre Keresiano ne Galatia, ka hape: “Ange tejine fe, maine hna xome cilë kete ate hnene la menu, qâ i nyipunie ite ate ne u, troa kapa hmaca la ate ka tune lai ngöne la hni ka menyik.”—Gal. 6:1.
Maine tro la itre qatre thup a thupëne cememine la ihnimi la hna axö mamoe, haawe, tro ha neëne la itre ethanyine la mele ngöne la ua, me hmekëne matre thaa tro kö a jilapane ej hnene la itre jole ka tru. Loi e troa thupëne hnene la itretre thupë mamoe, troa huliwa kowe la ekalesia thenge la hna thingehnaeane hnei Iehova jëne Isaia, kola hape: “Tro la ate a tune la nyine zaene la eny, me hnapo ene la wene, tune la ite di ngöne la ga qaqacile, tune la ga xapo ne la giti atraqate ngöne la nöje ka kucakuca.”—Is. 32:2.
AQANE TROA UNIJOLENE LA ITRE XAA NGAZO KA SIS
Maine ijije hi koi së troa cile me nue la itre ngazo hna kuca koi së, thaa kolo kö lai a hape, tro sa thinge la lue meke së maine easa kapa pena la ngazo hna kuca. Ohea, thatreine kö tro sa qaja ka hape ame la easa kuca la nöjei ngazo asë, tre, pine laka, itre atr ka ngazo së; ame la kola kuca hnene la ketre trejine trahmanyi la ketre ngazo ka tru, tre, thaa tro kö sa thinge la lue meke së ngöne la ewekë ka ngazo hna kuca, ke, aqane tro hi së lai a thele loi thatraqai angeic memine la ekalesia. (Lev. 19:17; Sal. 141:5) Ame ngöne la isisinyikeu ne la Trenge Wathebo, nyimu pengöne aqane troa goeëne la etrune la itre ngazo me eni wathebo. Ceitune hi lai memine la itre Keresiano.—1 Ioane 5:16, 17.
Hnei Iesu hna amamane la aqane troa kuca matre troa una la itre jole ka traqa kowe la itre Keresiano pine la itre ngazo ka tru hna kuca. Drei la itre nyine troa kuca, kola hape: “Maine tejine me eö a ngazo koi ’ö, [1] troja ithanatane acone me angeice nyipoti hmekuje hi; maine angeic’ a dei ’ö, ame hna lue tejine hmaca nyipo. Ngo maine tha denge kö angeic, [2] nyi xöle eö ju fe la ka ala casi maine ala lue, mate acatene la nöjei ewekë asë hna ce qaja hnei ala kön. Nge maine tro angeic’ a ienine me angat, [3] qaja jë kowe la ekalesia nge maine tro angeic’ a ienine memine la ekalesia fe, ame hna tui angeice koi ’ö la etheni me telona.”—Mat. 18:15-17.
Thupene lai, hnei Iesu hna hamëne la ketre ceitun hna cinyihane ngöne la Mataio 18:23-35, kola amamane la pengöne ngazo hna qaja ngöne Mataio 18:15-17; ame la itre ngazo cili, tre, kola qaja la itre jole göi manie, maine hna qene ënö pena. Hanawang la ketre ceitun, maine jë, tre, hna sipo manie hnei ketre ngo thaa ase pala kö të, maine pena ketre aqane ujë pena ka huliwa atrekënö; maine hna ixöjetriji me sili trengathoi hune la ketre trejin.
Maine hetrenyi la itre nyine jelenyipicine ka hape, hna kuca la ketre ngazo ka tru koi së hnene la ketre atrene la ekalesia, haawe, the canga nyinyape kö troa wange la itre qatre thup maine kowe pena la ketre atr matre troa thele sine xöle së. Tune la aqane eamo së hnei Iesu, loi e troa pane tro troa wange lai atr hne së hna ihmönyinyi memin. Thaa tro kö a lö hnine menune pena ha hnei itre xan, ngo loi e tro sa thele troa iloi, easë hmekuje hi memine lai atr ka ngazo koi së. Maine thaa semesinene kö hnene lai atr la easa catre thele troa iloi, haawe, pane nue pi la itre xaa hnepe ijine qëmekene troa sisedrëne me kuca lo itre hna amekötine e thaa pane drei së kö. Mekune kö së laka, thaa hnei Iesu kö hna qaja ka hape, ‘Acaa tro jë troa iloi me angeic.’ Celë hi matre, e thaa canga kapa kö hnene lai atr la ngazo i angeic me qeje menu pena, maine jë ma loi e ithanatane hmaca e thupene pë hë lai ngazo. Maine tro sa cile una tune lai la jole së, haawe, tro hë la atr ka ngazo koi së a olene laka, thaa hne së hnë kö hna iqajakeune pena ha lai ngazo kowe la itre xan, memine laka thaa hne së kö hna adrone la mele i angeic e hnine la ekalesia. Haawe, tro hë së a eatrëne lo hne së hna mekune troa traqa kow, ene la ‘iloi memine la trejine me easë.’
Maine kola kapa hnene la trejine laka ngazo la hnei angeice hna kuca, nge angeic a ajane troa qeje menu me thele troa iloi, haawe, thaa tro kö a sisedrëne lo lai itre xaa hna amekötin. Kolo hi lai a amamane ka hape ngacama ka tru la itre ngazo hna kuca, ngo ame la itre ngazo hna ithanatan, tre, hna nyi ifegone hi koi nyidro lue ka ihmönyinyi. Thaa kolo kö la a qaja lo itre ngazo ka tune la troa kuci ngazo, me nyi xetë, me ce meköle hnei lue trahmanyi maine lue föe, maine troa qaja angazo Akötresieti pena, maine troa hmi thoi, me kuci idrola, me itre xaa ngazo ju kö ka tru catr. (1 Kor. 6:9, 10; Gal. 5:19-21) Ame kowe la itre ngazo celë, tre, thaa tro hmekuje kö a thele troa qeje menu kowe la atr hna akötrën. Pine laka kola troa athixötrëne la thiina memine mele ne la ekalesia ngöne la götrane la ua, haawe, loi e troa qajaqaja la itre jole cili kowe la itre qatre thup matre tro angatr a ce wange la nyine troa kuca.—1 Kor. 5:6; Iako. 5:14, 15.
Maine thaa traqa ju kö kowe la hnei epuni hna ajan, ene la ‘ithanatane acone me angeic nyipoti hmekuje hi,’ thupene lai, ijije hë tro epuni a kuca lo hnei Iesu hna qaja ka hape, troa thele la caas maine lue trejine matre troa ce tro me epuni troa ce ithanata memine lo lai trejine hna iwesitrë memin. Ame lai itre hnei epuni hna ce tro memin, tre, loi e tro fe angatr a hane thele matre troa iloi. Ma ka loi e troa itre ka atre fe angatr lai jol ka eje thene epon; ngo maine pëkö trejine ka atre lai jole ka eje thei epon, haawe, iëne ju hi la itre xaa trejine ka troa anyipicine la epuni a troa ithanata hmaca. Maine jë ase hë angatr hane melëne la ewekë cili; haawe, ijiji angatre hi troa atrehmekune maine hetre ngazo hna kuca. Ame la itre qatre thupe hna iën hnei epuni troa anyipicin, tre, thaa angatre kö lai a nyi trenge ewekëne la ekalesia, pine laka thaa hna acili angatre kö hnene la lapa ne la itre qatre thup troa sei qene la jol.
Maine xecie hnyawa koi epuni laka, hna kuca la ngazo ka tru hnene la ketre trejine koi epun, maine ijije hi tro epuni a anyipicine lai, nge maine thaa hna sei qene kö la jol thupene la hnei epuni hna anyimua thele troa iloi—lo epuni a ithanata caasi me angeic, me bëeke me ala caas maine lue trejine—haawe, loi e tro epuni a tro fë la jole cili kowe la itre qatre thup ne la ekalesia. Thaa tro kö epuni a thëthëhmine laka, ame mina fe la aja i angatr, tre, ene la troa tingetinge me pë ethane la ekalesia. E ase hë thuemacane la itre qatre thup, haawe, ase hë epuni lai kuca asë la hnei epuni hna atrein. Nue pi pë hë tro angatr a amekötin nge lapaune ju koi Iehova tro Nyidrëti a sei qen la jole cili. The nue kö tro la aqane ujë ne la ketre trejine a athixötrë epun, maine troa thapa la madrine i epuni troa nyihlue i Iehova.—Sal. 119:165.
Maine ase hë thele ewekë hnene la itre qatre thup nge angatr a öhne hnyawa laka, hna kuca la ngazo hnene lo lai trejine koi epun, nge thaa hmala pi kö angeic troa ietra maine tro pena a thele troa kuca la itre ewekë nyine iloi hmaca me epun, haawe, maine jë ame e cili, tro la itre qatre thup a upetrije la ka kuca la ngazo nge ka thaa ietra kö. Celë hi aqane thupëne angatre lai, la hna axö mamoe, me isine matre troa pë ethane pala hi la ekalesia.—Mat. 18:17.