Hna Hnëkëne Troa Kuca La Aja i Iehova,
Mekene 13
“Kuca Asë Jë Nyine Atrunyi Akötresie”
EASË a nue la mele së matre troa nyihlue i Akötresie; ketre, easa xome la ëje i Nyidrë. Haawe, nyipi ewekë troa mama la lolo i Iehova ngöne la itre hne së hna qaja me ngöne la itre hne së hna kuca. Kola qaja hnei Paulo la ketre trepene meköt nyine xatua së ngöne la nyidrëti a cinyihane ka hape: “E tro nyipunie a xen, me ij, me kuca kete ewekë kö, kuca asë jë nyine atrunyi Akötesie.” (1 Kor. 10:31) Kolo lai a hape, tro sa fedre catre kowe la itre hna amekötine hnei Iehova, ene lo iahnuene la thiina ka pexeje i Nyidrë. (Kol. 3:10) Loi e tro sa nyitipu Akötresie me hane nyi atrene la nöje ka hmitrötre i Nyidrë.—Efe. 5:1, 2.
Hnei aposetolo Peteru hna amamane hnyawa kowe la itre Keresiano la enyipiewekëne la troa huliwa tune la, öni nyidrë: “Loi e cei tui nyipunie memine la ite ka idei, nge the cei tune kö memine la aja ka hekö i nyipunie, lo jidi pete kö; ngo tro nyipunie a hmitöte ngöne la nöjei thina i nyipunie asë, tune la aqane hmitöte nyidëti ate hë nyipunie ; ke ase hë cinyihan ka hape, “Hmitöteju nyipunie ; ke hmitöte ni.” (1 Pet. 1:14-16) Tune lo itretre Isaraela ekö, qa ne la itre atrene la ekalesia i Keresiano troa isa thupëne la ehmitrötre i angatr. Qa ngöne lai, nyipi ewekë tro angatr a wië pala hi, thaa tro kö a adronyi angatr hnene la ngazo maine hnene pena la itre aja ne la fen. Hna ketre aisa angatre kö troa nyihlue i Iehova.—Eso. 20:5.
Easë a thupëne la ehmitrötre së, e hne së hna metrötrëne hnyawa la itre wathebo memine la itre trepene meköti Iehova hna hamëne hnyawa hnine la Tusi Hmitrötr. (2 Tim. 3:16) Jëne la hna inine la Tusi Hmitrötr, easa atre Iehova memine la itre jë i Nyidrë, nge hna ee së koi Nyidrë. Ame la troa nyihlue i Nyidrë, tre, thaa ene hmekuje kö la troa bapataiso së ngöne la tim thupene la hne së hna kapa la itre xaa trepene ini. Ohea, hna upe iele së hnene la hne së hna inine la Tusi Hmitrötr troa wanga atrune hnyawa la enyipiewekëne la troa pane thele la Baselaia i Akötresie me troa kuca me amë panëne la aja i Iehova ngöne la mele së. (Mat. 6:33; Rom. 12:2) Eje hi laka, easë a atreine mele tune lai, hnene laka hne së hna thele troa xetrëne la thiina ka hnyipixe.—Efe. 4:22-24.
TROA WIË NGÖNE LA GÖTRANE LA UA ME NGÖNE LA THIINA
Thaa hmaloi kö e troa mele thenge la mele së hne së hna huujën koi Iehova, me troa fedre catre kowe la itre hnei Nyidrëti hna amekötin. Kola thele hnei Satana lo Diabolo, ithupëjia me easë, troa ajeanyi së qa ngöne la nyipici. Kola nango traqa e itre xaa ijine la itre jole koi së qa ngöne laka, hna huli së hnene la fene ka ngazo memine la itre aja së itre atr ka ngazo. Kolo lai a upi së troa catre isi ngöne la götrane la ua. Kola hmekë së hnei Tusi Hmitrötr matre thaa tro kö sa xouene la itre itupath maine itre icilekeu pena. Loi e akötre së pine la meköt. (2 Tim. 3:12) Ngo ijije hi tro sa madrin hnine la itupath, ke nyine tro lai a anyipicine laka easë a kuca la aja i Akötresie.—1 Pet. 3:14-16; 4:14-16.
Ngacama ka pexeje Iesu, ngo hnei nyidrëti hna inine troa drengethenge jëne la itre ewekë hnei nyidrëti hna akötre fë. Thaa hnei nyidrëti kö hna kei kowe la itre itupathi Satana, maine kei thenge pena la itre aqane pi mama la itre atr enehila ngöne la fen. (Mat. 4:1-11; Ioane 6:15) Thaa hna traqa kö koi nyidrëti la mekune troa lue hna hnim. Ngacama kola methinë nyidrëti hnene la fen pine la aqane mele nyipici nyidrë, ngo hnei nyidrëti pala hi hna fedre catre kowe la itre hna amekötine hnei Iehova. Qëmekene tro nyidrëti a mec, hnei nyidrëti hna thuemacane la itretre drei nyidrë, ka hape, tune la aqane methinë nyidrëti pine la hnei nyidrëti hna kötrene la fen, haawe, tro mina fe la fen a methinë angatr. Qaane ju hi lai, kola cile hnene la itretre drei Iesu Keriso kowe la itre icilekeu, ngo hnei angatr hna catr, pine laka atre hi angatr laka hnene la Hupuna i Akötresie hna ngaane la fen.—Ioane 15:19; 16:33; 17:16.
Maine easa ajane troa ngaane la fen, loi e tro sa fedre catre kowe la itre hna amekötine hnei Iehova, tune la Maseta së. Loi e tro sa thupëne matre thaa tro hmekuje kö sa lö hnine la kuci politike ne la itre atr, me isi pi hnëqa ngöne la fen, ngo troa hmekëne mina fe la aqane ngazo trootro la thiina ne la itre atr enehila. Qa ngöne lai, loi e tro sa hnine la eamo celë hna hamëne ngöne Iakobo 1:21: “Tijepi la sisi asëjëihë, memine la iangazo ka mana, nge kapaju hnene la hni ka menyike la wesi ula hna san, lo ka ateine troa amelene la ite u i nyipunie.” Maine jëne la hna inine la Tusi Hmitrötr, maine jëne la itre icasikeu, easë a catre hnehene hnyawa la Wesi Ula, thaa ngöne itre he së hmekuje kö, ngo ngöne fe la itre hni së. Haawe, tro ha catre la lapaune së ngacama easë qëmeke kowe la itre icilekeu me itre nyinyithina i Satana. Ngacama catre la aqane ihuline la fen memine la itre ewekë ne ej; ngo thaa tro pi sa nyiqaane troa piine la itre hnene ej hna troa hamëne koi së. Pine nemen? Kola hmekë së hnyawa hnei Iakobo ketre atre drenge ka hape: “Tha ’te kö nyipunie laka ithupëjia me Akötesie la kola nyi sine ne la fene hnengödrai ? qa ngöne lai ame la ate pi troa nyi sine ne la fen, te, ithupëjia ha me Akötesie.” (Iako. 4:4) Trotrohnine i nyipunieti la kepine matre kola ithuecatre hnei Tusi Hmitrötr tro sa fedre catre kowe la itre hna amekötine hnei Iehova me troa ananyine la fen?
Kola hmekë së hnene la itre eamo e hnine la Tusi Hmitrötr matre thaa tro kö sa kei kowe la itre aqane ujë nyine hmahman maine ka sisi pena. Ej a qaja ka hape, ‘thaa tro kö a kuci ngazo, me thiina ka sis maine meciun, tre thaa itre ewekë kö nyine ithanatan thei epun, ke thaa ewekë ka ijije kö lai kowe la itre ka hmitröt.’ Haawe, thaa tro kö sa nue troa lapane la he së hnene la itre mekune ka sis, me nyine hmahman maine ka ngazo menu pala ha, nge thaa tro pi kö sa porotrikëne ihnyimane la itre ewekë cili. Tro mina fe sa thupëne matre thaa tro kö a adronyi së hnene la hna goeëne la itre nyine madrine ne kuci ngazo nge ka pui ngazo. (Efe. 5:3-5) Tro hë së a amamane ka hape, ka fedre catre së kowe la itre hna wathebo ka meköti me ka pë ethane i Iehova.
TROA HMADRADRA NGÖNE LA NGÖNETREI
Maine kola nyipi ewekëne hnene la itre Keresiano la troa wië ngöne la thiina me ngöne la götrane la ua, haawe, loi e tro mina fe angatr a pë ethane ngöne la ngönetrei, ene la troa porop. Ame ngöne lo ijine i Isaraela ekö, hnene la Akötresie ka hmitrötr hna amekötine laka troa porope la hna hunuma hnene la nöje i Nyidrë. (Deu. 23:14) Loi e tro la itretre Isaraela a trongëne hnyawa la itre trenge wathebo hna hamëne hnei Iehova göi troa porop. Loi e tro fe sa majemine troa porop, matre troa ‘pë hnei Iehova hna öhne the së ka thaa meköti kö.’
Lue ewekë ka ce tro, ene la hmitrötr memine la porop e hnine la Tusi Hmitrötr. Drei la ceitun, hnei Paulo hna cinyihane ka hape: “Ange hnimina fe . . . loi e tro sha nyihnyawa shë kö qa ngöne la nöjei ka sisi asë ne la ngönetei memine la u, kola apexejene la thina ka hmitöte ngöne la qoue Akötesie.” (2 Kor. 7:1) Loi e tro la itre Keresiano a catre troa porop, me sie me waasine pala hi la itre iheetre angatr. Maine nyipici laka, isapengöne kö la itre aqane mel ngöne la itre nöj, ngo ame la itre Keresiano, itre föe me itre trahmany, tre, ijije hi tro angatr a porop pine laka hetre tim me soop; ketre ijije fe tro angatr a thupëne la itre nekö i angatr matre tro fe nyudreni a hane porop.
Kola atre easë hnyawa hnene la itre atr ne la nöje së, hnene la huliwa ne cainöje së. Ame la uma ka porop nge thaa ka zikoziko kö, tre, celë hi ketre jëne nyine anyipicine lai kowe la itre atr. Ijije hi troa ixatuanekeun hnene la fami asë ngöne la götrane cili. Tro la itre trahmany nge itre kem a thupëne hnyawa e hnine me e xötreithe la uma i angatr, me trotrohnine hnyawa laka, troa qaja aloinyi angatre hnyawa hnene la itre atr e trön, e lolo la aqane nyihnyawane la uma i angatr. Kola atrehmekune hnene la itre hene lapa laka, maine tro angatr a huliwa tune lai me eatrongëne hnyawa la lapa i angatr ngöne la götrane la ua, haawe, tro hë angatr a amamane ka hape, angatr a elemekene hnyawa la lapa i angatr. (1 Tim. 3:4, 12) Ame mina fe itre föe me itre thin, tre, hnëqa i angatr troa wange hnyawa la itre xaa ewekë, tune la hnine la uma. (Tito 2:4, 5) Tro mina fe la itre nekönatr hna hiane hnyawa a hane ixatua hnene la hna porope pala hi la ngönetrei i angatr, me nyihnyawane la hnahage i angatr. Haawe, aqane tro la itre atrene la fami a ce huliwa matre troa majemi troa porop; ketre, aqane mele hi lai elanyi fene la musi ne la Baselaia i Akötresie.
Nyimutre la itre hlue i Iehova ka xomi loto enehila göi troa icasikeu maine troa cainöje pena. Ame ngöne la itre xaa götran, nyipi ewekë troa hetre loto göi troa hane cainöje trootro. Haawe, loi e troa thupëne matre tro pala hi a porop me lolo la loto së. Loi e tro la uma së me loto së a amamane hnyawa ka hape, itre atrene së la nöje ka wië me ka hmitrötre i Iehova.
Loi e tro la hnaheetre së me aqane iseji së a ihmeku hnyawa memine la itre trepene meköti qaathei Akötresie. Thatreine jë kö tro sa wanga acone la aqane tro sa heetr, ngöne la easa tro elanyi kowe la ketre atr ka tru ne la nöj. Nge tune kaa la easa nyi trenge ewekë i Iehova ngöne la easa cainöj maine qa hune ita ne cainöj pena, tro kö sa hnehengazone catrëne la aqane tro sa heetr? Troa hetre thangane la aqane trotrohnine la itre atr la hmi Iehova, hnene la aqane iseji së me aqane heetre së. Loi e troa imeku me metrötrëne la itre xan. (Mika 6:8; 1 Kor. 10:31-33; 1 Tim. 2:9, 10) Haawe, ame la easa hnëkë matre troa hane cainöje trootro maine icasikeu pena, me asabele ne sirkoskripsio maine itre xaa asabele ka tru pena, loi e tro pala hi sa mekune hnyawa la hna qaja hnei Tusi Hmitrötr göne la troa porop memine la troa metrötr ngöne la aqane troa heetr, matre tro pala hi a atrunyi Iehova.
Troa trongëne mina fe la itre trepene meköti cili ngöne la easa hane vizitëne la Bethela. Thaa tro kö sa thëthëhmine laka ame la Bethela, tre, “Uma i Akötresie.” Haawe, caasi hi la itre hna amekötine nyine troa trongën göi isej, me heetr, me aqane ujë, ngöne la easa sine la itre icasikeu thatraqane la hmi e hnine la Uma Ne Baselaia.
ITRE NYINE MADRIN ME ITRE IJINE MANO KA HETRE THANGANE KA LOLO
Ka nyipi ewekë la troa mano me troa hane kuca la itre nyine madrin. Ame ngöne la ketre ijin, hnei Iesu hna hëne la itretre drei nyidrë troa ce tro me nyidrë kowe la ketre götrane gaa pë atr matre troa “pane mano.” (Mar. 6:31) Nyipici laka, ijije hi tro la itre ijine mano, memine la itre nyine madrine ka lolo, a aijijë së troa pane kuca la ketre ewekë ka amadrinë së, nge thupene lai kola sisedrëne hmaca la itre huliwa nge hetre egöcatre hmaca ha.
Nyimu pengöne nyine madrine ka eje enehila matre nyipi ewekë kowe la itre Keresiano troa iëne hnyawa me trongëne la inamacane qaathei Akötresie. Maine nyipici laka, ka loi la itre nyine madrine koi së, ngo ame pe, thaa celë kö la ka nyipi ewekë catre kowe la mele së. Hna hmekë së ka hape, ame ngöne la “ite drai hnapin,” tro la itre atr a “ajane la nyine amadine ngo tha ajane kö koi Akötresie.” (2 Tim. 3:1, 4) Ame enehila, nyimutre la itre nyine madrine ka thaa nyipi loi kö kowe la itre atr ka qale catre kowe la itre wathebo i Iehova.
Hnene la itre pane Keresiano hna cile kowe la itre iajojezine la fen ka hni koi madrin. Ame ngöne la itre hna elo ekö thei angetre Roma, tre, kola goeëne me madrine hnene la itre atr ka kola akötrëne la itre xan. Ame la itre ewekë ka amadrinëne la itre atr, tre, ene la kola iakötrë, me neni la madra, me kuci ngazo, ngo ame la itre pane Keresiano tre, angatr a ananyine la itre nyine madrine cili. Nyimutre mina fe la itre nyine madrin enehila ka tun, itre ej a acatrene la ngazo thene la itre atr ka piine itre ej. Qa ngöne lai, loi e tro sa ‘thupëne hnyawa la aqane tro sa tro’ me thipetrije la nöjei nyine madrine ka iathixötrë. (Efe. 5:15, 16; Sal. 11:5) Nge ngacama thaa ka ngazo ju hë la ketre nyine madrin, ngo maine easë a lapaa caas memine la itre ka thaa ce hmi kö me easë, eje hi lai laka, troa ketre ajojezi së hnei angatr nge troa hetre ethane kowe la mele së ngöne la ua.—1 Pet. 4:1-4.
Ijije hi troa xome hnene la itre Keresiano la itre nyine madrine ka lolo, ka aijijë angatr troa pane thele eny me pane mano hnyawa matre troa hetre egöcatre hmaca ngöne la ngönetrei me ngöne la mekun. Nyimutre la itre ka kepe thangane ka lolo qa ngöne la hna trongëne la itre eamo qa hnine la Tusi Hmitrötr, memine la itre mekune nyine ixatua ka lolo e hnine la itre itusi ne la Itretre Anyipici Iehova.
Ame ngöne la itre xaa ijin, tre, easa hëne la itre fami Keresiano troa ce madrine me easë. Kolo fe a hane könëne la itre trejine trahmanyi me föe kowe la ketre ijine faipoipo maine kowe pena la ketre ijine ce madrine ka tune lai. (Ioane 2:2) Eje hi lai laka, ame koi itre ka ikönë, tre, angatr la atrekë hnëqane lai itre hna troa kuca ngöne la ijine cili. Kola atrehmekune hnyawa lai hnene la itre Keresiano ka hetre wangatrehmekun, celë hi matre angatr a trotrohnine hnyawa laka, ka lolo e troa tuluthe hi la etrune la itre hna troa könën, nge troa sa la hawa ne nyipun la itre caa lapa cili. Maine hetre kahaitr, haawe, troa nue ngöne la tulu. (Fil. 4:5) Maine kola kuca asë matre troa ketre ijine ka lolo me nyine ithuecatr la itre nyine madrine cili, haawe, ame pë hë la xeni me nyine ij, tre, thaa itre ewekë kö lai nyine troa wanga atrune menune pala ha.
Eje hi lai laka, loi e troa thupëne hnyawa maine tru catr la atr ka traqa. Qa ngöne laka nango nuenue menu pala ha la aqane ujë ne la itre ka sine lai itre caa lapa cili, ene pe itre xane ha iji menu me sasaithi tulu la aqane xen; ame itre xan, tre, angatr a kuca la itre ewekë ka sis, me sasaithe la itre ifego hna amë thatraqane la itre Keresiano.
Nyipi ewekë troa ikep. (1 Pet. 4:9) Ame ngöne la easa könëne la itre atr troa xen, maine troa pane iji ka lepany, maine troa mano me ce madrin, loi e tro pala hi sa hane mekune fe lo itre atrene la ekalesia ka pë ewekë. (Luka 14:12-14) Maine hna hane könë së fe, haawe, loi e tro sa tro thenge la eamo hna hamëne ngöne Mareko 12:31. Loi e tro pala hi sa amamane la hni ne ole së kowe la hna hane meku së hnene la itre xan.
Kola madrine hnene la itre Keresiano la itre ahnahna i Akötresie ka nyimutre; atre hi angatr laka ijiji angatre hi troa ‘xen me ij, me öhne la eloine la hnei angatr hna catre huliwa.’ (Ate Cai. 3:12, 13) Angatr a thupëne hnyawa matre tro pala hi la itre hna kuca ngöne la itre ijine cili a atrunyi Akötresie, ene pe tro fe hë la itre ka ihë memine la itre hna könën a mekune hnyawa la itre caa lapa cili, a thaa tro kö a huliwa la mekuthethewe i angatre la itre ijine cili, ngo kolo pe a madrin pine laka, hna ithuecatre i angatr ngöne la götrane la ua.
INI
Hetrenyi la itre thangane ka loi qa ngöne la hna ini hnene la itre neköne la Itretre Anyipici Iehova. Angatr a thele troa inine me e me cinyanyi hnyawa. Hetrenyi la itre xaa hna ce wange ngöne la hna ini, ka troa hetre thangane catre kowe la itre thöth ngöne la angatr a thele troa eatrëne la itre aja ngöne la götrane la ua. Ame ngöne la ijine angatr a ini, angatr a ajane troa catre ‘mekune kowe la Atre xupi angatr’ me amë panëne la itre ewekë ngöne la götrane la ua.—Ate Cai. 12:1.
Maine epuni la ketre thöth Keresiano ka ini, loi e tro epuni a thupëne hnyawa. Maine kola pi tru la itre xaa thöth ne fen, thaa tro pi kö epuni a caasi me angatr. (2 Tim. 3:1, 2) Hetrenyi la itre nyine tro epuni a kuca matre thaa tro kö a ajojezi epuni hnene la itre ihuli ne la fen. Thaa Iehova kö a nuaxöji së kowe la itre hulö, nge thaa hamë së pe la itre ixatua. (Sal. 23:4; 91:1, 2) Haawe, loi e tro epuni a trongëne hnyawa la itre hna amekötin, matre tro itre ej a thupë epun.—Sal. 23:5.
Maine angatr a ajane troa lapa ananyine la fen ngöne la ijine angatr a ini, loi e tro la itre thöth Itretre Anyipici Iehova a mekune la itre ethane la troa sine lo itre elo hna kuca e tröne la hna ini. Thaa trotrohnine kö hnene la itre ka ce ini me epun memine la itre ka hamë ini, la kepine matre thaa epuni kö a hane sine la itre elo cili; ame la ka nyipi ewekë, tre, ene la troa amadrinë Akötresie. Celë hi matre, loi e tro epuni a thupëne hnyawa la mekuthethewe i epuni hna inine ngöne la Tusi Hmitrötr, me cile huti ngöne la mekune hnei epuni hna axeciën, ene la troa thupëne matre thaa tro kö kei kowe la aja ne troa pi hun ngöne la itre elo, maine tro pena a sine la itre huliwa ka icilekeu memine la itre trepene meköt, tune la troa isi pi nöj. (Gal. 5:19, 26) Maine tro epuni a drenge la itre eamo qa hnine la Tusi Hmitrötr hna hamë epun hnene la keme me thine i epun ka qale koi Akötresie, nge maine tro fe epuni a kepe thangane hnyawa la hna ce sine memine la itre ka ce hmi me epun, me kepe manathithine la itre ini hna hamën hnine la ekalesia, haawe, tro ha hmaloi koi epuni troa trongëne la itre hna amekötine hnei Iehova.
HULIWA SË ME ITRE AQANE IMELEKEU SË ME ITRE XAN
Tune la hna qaja hnei Tusi Hmitrötr, qa ne la itre tane la fami troa thele la itre ka nyipi ewekë kowe la itre atrene la hnepe lapa. (1 Tim. 5:8) Ngo pine laka, itre hlue Keresiano angatr, haawe, kola trotrohnine hnei angatr laka, troa tro pane la itre aja ne la Baselaia, ke, ka nyipi ewekë catre kö itre ej hune la huliwa i maseta. (Mat. 6:33; Rom. 11:13) Maine tro sa qale catre koi Akötresie me mejihnine ju hi la xeni me iheetr, haawe, thaa tro kö sa hnehengazo menu, nge tro hë së a neëne la itre hnö ka haöthe la fen enehila, ene la pi aja mo.—1 Tim. 6:6-10.
Loi e troa lapa mekune hnyawa la itre trepene meköti ne la Tusi Hmitrötr, hnene asë hi la itre Keresiano ka nyihlue i Akötresie, a thaa itre tane la fami hmekuje kö. Ame la troa huliwa nyipici, tre ene la troa thipetrije la itre huliwa ka thaa ihmeku kö memine la itre wathebo i Akötresie maine itre huliwa ka isazikeu memine la itre wathebo ne la nöj. (Rom. 13:1, 2; 1 Kor. 6:9, 10) Loi e tro mina fe sa catre atrehmekune la engazone la troa caas memine la itre atr ka troa ajojezine la mele së ngöne la ua. Pine laka, itre sooce i Keriso së, thaa easë kö a lö hnine la itre huliwa ne thele manie ka isazikeu memine la itre trepene meköti ne la itre Keresiano, maine ka athixötrëne pena la mele së ngöne la götrane la ua. (2 Tim. 2:4) Easë mina fe a thupëne matre thaa tro kö a hetre itretrengekeu së me “Babulona Atraqat,” lo hmi ka ithupëjia me Akötresie.—Hna ama. 18:2, 4; 2 Kor. 6:14-17.
Maine tro sa trongëne la itre hna amekötine hnei Akötresie, thaa tro hë së a ce sinee memine la itre trejine me easë göi itre sipu aja së (maine göi troa salem) maine itre xane pena. Ame ngöne la easa caas memine la itre trejine me easë ngöne la itre ijine icasikeu, maine ngöne la itre ijine asabele ne sirkoskripsio me asabele ne distrik, tre, göi tro hmekuje hi a thili koi Iehova, me göi troa ithua së ngöne la götrane la ua, me göi tro fe a ithuecatrekeu. (Rom. 1:11, 12; Heb. 10:24, 25) Loi e tro pala hi sa thupëne matre thaa tro kö sa xome la itre aqane imelekeu së memine la itre xan, nyine troa aejëne la itre sipu aja së ngöne la götrane la ngönetrei.
LOI E TRO SA CATRE CAAS ME ITRE KERESIANO
Hetrenyi la itre hna amekötine hnei Iehova kowe la itre hlue i Nyidrë, göne matre tro angatr a “xölehuje la ce hni qa thene la Ua ngöne la hna otene la iloi.” (Efe. 4:1-3) Kola isa thele hne së troa kuca la loi kowe la itre xan, ngo thaa hne së kö hna meku së ju hi. Maine jë celë hi la aqane ujë lai hne së hna öhne ngöne la easa caasi pala hi memine la ekalesia i Keresiano. Ngacama isa hane ngönetrei së kö, me nöje së maine aqane mele së, me pengöne mele së maine etrune la hne së hna ini, ngo ame pe, easë asë hi a ce trongëne la itre hna amekötine hnei Iehova. Kolo mina fe a wanga atrehmekune la aqane mele ne la nöje i Iehova hnene la itre atr e tröne la ekalesia.—1 Pet. 2:12.
Hnei Paulo hna qaja la trepene la caasi së me cinyihane ka hape: “Casi la ngönetei, nge casi la Ua, tune la hna hë nyipuni ngöne la mejiune ka casi lo hna hë nyipunieti kow ; casi la Joxu nge casi la lapaun, nge casi la bapataiso, casi Akötesie nge Tetetroti ne asë nyidëti e hun’ asë, me nyipin’ asë, me hnin’ asë.” (Efe. 4:4-6) Haawe, kola thele the së troa caasi ngöne la aqane tro sa trotrohnine la itre trepene ini ka jui qa hnine la Tusi Hmitrötr, hnene laka hetre ajane troa kuca la aja i Iehova me lapa fene la musi cile i Nyidrë. Eje hi lai laka, hnei Iehova hna hamëne la qene hlapa ka wië ne la nyipici kowe la nöje i Nyidrë, ene pe kola aijijë angatr troa ce nyihlue i Nyidrë.—Zef. 3:9.
Eje hi lai laka, ketre qeqene ithuecatre ka tru kowe la itre ka thili koi Iehova, la aqane caas me tingeting e hnine la ekalesia. Easë a melëne la kola eatre la hnei Iehova hna thingehnaean, kola hape: “Tro ni a cengöne ami angate tune la ite mamoe e Bozera, tune la hnënge öni hnine la hnahage i angat.” (Mika 2:12) Loi e tro sa catre thupëne la caasi cili memine la tingeting, hnene la hna mele ngöne la nöjei drai ceitune memine la nöje ka hmitrötr, nge ka fedre catre pala hi kowe la itre hna amekötine hnei Iehova.
Manathithi la itre hna kapa hnine la ekalesia ka wië i Iehova! Ame la troa xome la ëje i Iehova, tre, pëkö ewekë hne së hna troa huujëne ka sisitria hune la. Ame ngöne la easa thupëne hnyawa la aqane imelekeu së me Iehova, easë hi lai a thele troa qale catre kowe la itre hna amekötine i Nyidrë me ithuecatre kowe la itre xan troa hane xötrethenge itre ej.—2 Kor. 3:18.