Hna Hnëkëne Troa Kuca La Aja i Iehova,
Mekene 12
Kola Sajuëne La Huliwa Ne Cainöj Ne La Baselaia Ngöne La Nöj Me e Cailo Fen
TUNE la hna perofetane hnei Iesu ngöne la itre drai tixenuë, kola catre cainöjëne la maca ka loi hnene la Itretre Anyipici Iehova “uti hë la cane la fene hnengödrai.” (Ite hu. 1:8; Mat. 24:14) Celë hi matre angatr a nue gufane la traeme i angatr memine la trenge catre i angatr matre troa qaja kowe la itre xan la itre mekune ne la ua. Angatr a mejiune laka, Iehova a hamëne la ka nyipi ewekë kowe la mele ne la itre ka huliwa koi Nyidrë, thaa hnehengazo menu kö angatr, ngo angatre pe a catre amë panëne la Baselaia i Akötresie ngöne la mele i angatr. (Mat. 6:25-34; 1 Kor. 3:5-9) Kola amamane hnyawa hnene la itre thangane laka, Iehova a kepe angatr me amanathithi angatr.
IXATUA GÖNE LA ITRE AJA NE LA BASELAIA E CAILO FEN
Ame ngöne la kola öhne hnene la itre atr la itre aqane cainöjëne la maca ka loi hnene la Itretre Anyipici Iehova enehila, nge angatr a öhne mina fe la etrune la itre itus hna hamën nge thaa hna sipo thupene kö, ene pe kola hnyinge la itre xan me hape: “Hna tune kaa matre atreine jë troa kuca asë la itre huliwa cili?” Nyipici lai laka, nyipi ewekë troa hetre manie matre troa fejane la nyimu Tusi Hmitrötr me itre itus. Kola aja manie mina fe göi troa xupe me nyihnyawane la itre Bethela hnë troa mele hnene la itre Keresiano ka troa huliwa ngöne la itre hna feja itus, me elemekene la huliwa ne cainöj, maine ketre huliwa pena ka sajuëne la maca ka loi. Ketre, kola inine la itre mesinare me upi angatr kowe la itre nöje ka nyimutre. Ame itre xan, tre, itre pionie hut hna upe troa cainöj ngöne la itre götrane gaa nany maine ngöne pena la itre ekalesia ka co. Kolo fe a hane hamë ixatua ngöne la götrane la ngönetrei kowe la itre itretre thup ka iwai trootro nge ka xatuane la itre ekalesia matre tro angatr a kuca hnyawa la hnëqa i angatr. Mama hnyawa laka, kola aja manie matre troa xome la huliwa ne cainöj, ngöne la nöj me e cailo fen. Ka qaa kaa la manie cili?
Ngacama kola hamëne la itre itus kowe la itre atr ka nyimutre nge thaa hna sipo thupene kö, ngo nyimutre catre la itre atr ka madrine la huliwa ne cainöj ne la Itretre Anyipici Iehova, nge angatr a madrine troa hane ixatua. Ketre ame la Itretre Anyipici Iehova, tre angatr a hamëne la itre ahnahna me manie kowe la filial ne la Itre Temoë i Iehova ne la nöje i angatr. Angatr a atrehmekune laka ka nyipi ewekë catr; caasi hi la aqane ujë i angatr memine la itre hlue i Akötresieti ekö. Kola atreine xupe la itre uma ne hmi koi Iehova hnene la itre ahnahna me manie hnei angatr hna hamën. (Eso. 35:20-29; 1 A. l. ite jo. 29:9) Ame itre xan, tre angatr a hamën la itre ewekë i angatr kowe la organizasio i Iehova, ngo ame la itre ahnahna hna isa hamën hnene la itre atr, maine hnene la ekalesia me itre sirkoskripsio, tre, thaa itre trenge manie ka tru catre menu kö. Kolo hi a kökötre la huliwa ne cainöje trootro hnene la itre ahnahna cili.
Pine laka kola cainöjëne la maca ka loi hnene la Itretre Anyipici Iehova, haawe, angatr a öhne mina fe la enyipiewekëne la troa hamëne la manie i angatr memine la itre ewekë i angatr göi troa akökötrene hnyawa la huliwa ne cainöj. Hetrenyi Iesu memine la itretre drei nyidrë la ketre kees hna ami manie, göi troa xatuane la itre ka puafala me göi troa itöne la itre sipu hnei angatr hna ajan. (Ioane 12:6; 13:28, 29) Kola qaja hnei Tusi Hmitrötr la itre föe ka sajuëne ngöne la ngönetrei la huliwa ne cainöje i Iesu memine la itretre drei nyidrë. (Mar. 15:40, 41; Luka 8:3) Hna kapa hnei Paulo la ixatua ngöne la götrane la ngönetrei hna hamën, cememine la ihnim, koi angeic hnene la itre ka catre thele troa akökötrene la maca ka loi, nge ka ajane troa hane sajuëne la huliwa ne cainöje trootro. (Fil. 4:14-16; 1 Thes. 2:9) Kola xötrethenge hnene la Itretre Anyipici Iehova enehila la itre Keresiano cili, ka catre cainöjëne la maca ka loi nge ka hamë ahnahna. Qa ngöne lai ijije catre troa hane “xome gufane la timi ka mel” hnene la itre atr ka hni ka menyik, ka mele ngöne la nöjei nöj.—Hna ama. 22:17.
AHNAHNA KA NYIPI EWEKË THATRAQANE LA EKALESIA
Ame fe la itre ewekë nyine nyithupen thatraqane la ekalesia, tre, qaathene mina fe la itre ahnahna hna hamën hnene la itre atr cememine la hni ka ajan. Thaa kolo kö a hlem me athipi mani, maine sipo pena, ngo eje hnine la itre hnë icasikeu la itre kees thatraqane la itre ahnahna, ene pe kola isa hamë ahnahna “thenge la hna axeciëne e kuhu hni.”—2 Kor. 9:7.
Ame la ahnahna ene la itre manie, tre, kola xome göne la nöjei ejolene la Uma Ne Baselaia. Ijije hi troa axeciëne hnene la lapa ne la itre qatre thup troa iupi fë la ketre igötranene la itre ahnahna kowe la filial ne la Itretre Anyipici Iehova ne la nöj, matre troa nyi jiane la huliwa ne cainöj ngöne la nöj. Maine kola troa tune lai, nyipi ewekë troa pane wange la mekuna ne la ekalesia. Celë hi matre kolo pala hi a hamë ahnahna hnene la itre ekalesia ka nyimutre thatraqane la huliwa ne cainöje trootro e cailo fen. Ame ngöne la itre xaa ijin, kola mama la itre xaa aja ka nyipi ewekë, ngo maine isa atrehmekune asë hi la nöjei atrene la ekalesia la troa sajuëne la huliwa hnene la itre ahnahna, haawe, thaa nyipi ewekë kö troa lapaa ithuemacanyi göi troa hamë ahnahna.
AQANE TROA HULIWAN LA ITRE AHNAHNA
Thupene la nöjei icasikeu, tro la lue qatre thup maine drikona pena hna iën hnene la lapa ne la itre qatre thup, a hlem la manie hna amë hnine la itre kees göi ahnahna, nge nyidroti a sija la ketre pepa nyine etrune la manie hna kapa. (2 Kor. 8:20) Tro la lapa ne la itre qatre thup a xome la itre hna amekötine ka ijij göi troa xeen lai manie uti hë la kola troa iupi fë kowe la filial maine troa xome pena thatraqane la itre nyine troa kuca e hnine la ekalesia. Nyipi ewekë troa amë la manie ne la ekalesia hnine la ketre baak. Tro la trejine atrekë hnëqane la itre manie ne la ekalesia a hnëkëne ngöne la nöjei treu la ketre rapor göi troa ithuemacanyine la ekalesia, nge ame ngöne la nöjei köni treu, tro la qatre thup perezida a wang maine ase jë hë e hnyawa la mani. Hna amexeje pala hi lai hnine la Huliwa Ne Baselaia.
AQANE NYI MANIENE LA ITRE ASABELE NE SIRKOSKRIPSIO ME ASABELE KA KETRE PENGÖN KA CAA DRAIN
Ame la manie thatraqane la gufa ne la itre asabele, tre, hna hamën hnene la itre Temoë ne la isa sirkoskripsio. Eje mina fe la itre kees göi ahnahna ngöne la itre hnë asabele, tune lo itre icasikeu ne la ekalesia. Celë hi hna amekötine lai ka aijijën la itre trejine troa kuië ahnahna cememine la hni ka ajan thatraqane la sirkoskripsio. Tro la trejine hna iën hnene la atre thupëne la sirkoskripsio a cilëne la itre maniene la sirkoskripsio nge troa ce wang memine la atre thupëne la sirkoskripsio matre troa nyithupene la itre gufa.
Maine ijije hi troa cile kowe la itre ejolene la asabele hnene la manie hna kapa jëne la itre ahnahna, haawe, ka lolo catre hi lai, ame pë hë koi munëne manie, troa kuiën hnine la keesi ne la sirkoskripsio. Maine hetre gufa ngöne la pune la asabele nge atreine troa të lai gufa cili hnene la keesi ne la sirkoskripsio, haawe, thaa nyipi ewekë kö troa cinyianyi kowe la itre ekalesia. Ngo maine thaa ijije kö kowe la keesi ne la sirkoskripsio troa nyithupene la itre gufa ne la asabele maine troa nyi maniene pena la asabele ka troa xulu, tune la troa canga amë me nyiqaane nyithupene la ketre hnë troa asabele, haawe, tro la atre thupëne la sirkoskripsio a thuemacane la itre ekalesia göi troa kuië ahnahna. Tro la nöjei lapa ne la itre qatre thup a ithanatane la hnying, me qaja la etrune la itre ahnahna hna troa kuiën hnene la ekalesia i angatr hnine la keesi ne la sirkoskripsio. Thupene lai, troa ce wang me ce axeciën memine la ekalesia.
Ame ngöne la angatr a asabele, tro la itre qatre thup a xomi mekune ngöne la aqane troa huliwane la manie ka lapa pe hnine la keesi ne la sirkoskripsio. Loi e troa axecië mekun göi mani thenge la itre ejolene la asabele, göi troa itöne la itre ewekë me wange la itre jole hna cile kow hnene la itretre thupëne la sirkoskripsio ngöne la angatr a wange trongëne la itre ekalesia. Ijije hi tro sa iupi fë la ketre ahnahna thatraqane la huliwa ne cainöj, me koi Keesi Göi Xupi Uma Ne Baselaia, me koi Iuma Ne Asabele maine tro pena a nyinyin la ketre jole ka tru.
Maine hetre ketre nyine troa axeciën e tröne lo itre hna majemine kuca, haawe, loi e troa cinyihan nge troa thuemacane hnene la itre qatre thup, ke angatr la ka troa xomi mekun. Thaa tro kö a sasaith la manie hna ajan ngöne la kola xomi mekun, nge ketre, ame la nöjei kola xomi manie qa hnine la keesi ne la sirkoskripsio, haawe, loi e troa thele la mekunene la itre qatre thup. Thaa loi kö troa axeciëne la itre mekun hna kapa ha nge ka cile hut, maine itre trenge manie pena laka thatre hnyawa kö la etrun hna ajan. Ijije hi troa nue kowe la filial troa pane lapa fë lai manie uti hë la ijine kola ajane hnene la sirkoskripsio.
Tro la atre thupëne la sirkoskripsio a wang maine ase jë hë goeëne me e la itre manie ne la sirkoskripsio thupene la nöjei asabele ne sirkoskripsio me asabele ka ketre pengön ka caa drain.
TROA THUPËNE LA ITRE PUAFALA
Ame la manie hna amë hnei Iesu memine la itretre drei nyidrë hnine la ketre kees, tre, göi tro mina fe a hane xatuane la itre ka puafala. (Mar. 14:3-5; Ioane 13:29) Hnene pala hi la itre Keresiano hna xome la hnëqa celë, pine laka hnei Iesu hna qaja ka hape: “Qa ngöne laka celë pala kö thei nyipunie la ange pë ewekë.” (Mar. 14:7) Tune kaa la aqane xome enehila hnene la Itretre Anyipici Iehova la hnëqa cili?
Ame e itre xaa ijin, kola ajan hnene la itre atrene la ekalesia troa xatua angatr ngöne la götrane la ngönetrei pine laka, angatr a uti ipië trootro, maine hetre ketre sine meci pena, maine itre xaa hace pena ka traqa xane ngöne la mele i angatr. Ame la itre xaa atrene la ekalesia ka wanga atrehmekune la itre jole cili thene la itre xan, tre, angatr a thele troa trongëne la itre trenge ewekë i Ioane aposetolo, hna hape: “Ame la ate hetenyi la ite ewekë ne fen, me öhne la tejine me angeic’ a pë ewekë, nge thinge pe la hni angeic’ e angeic, kola lapa tune ka e kuhu hni angeice la aja koi Akötesie? Ange nekönate fe, the tro kö sha ihnimi hnei aqane ewekë, me thinem ; loi pe hnene la huliwa me nyipici.” (1 Ioane 3:17, 18; 2 Thes. 3:6-12) Ame la nyipi hmi, tre, ene la troa hane hnehengazone fe la itre trejine ka mele nyipici, nge ka aja ixatua ngöne la götrane la ngönetrei.—Iako. 1:27; 2:14-17.
Ame ngöne la pane tusi koi Timoteo, hnei Paulo aposetolo hna qeje pengöne la aqane troa xatuane la itre ka aja ixatua ngöne la götrane la ngönetrei. Kola mama la itre eamo i Nyidrë ngöne 1 Timoteo 5:3-21. Isa qanyine kö la itre Keresiano troa aejëne la itre aja ne la itre atrene la hnepe lapa i angatr. Tro la itre nekön, me itre api hmunë, maine itre sipu sinee pena a xatuane la itre Keresiano ka qatre hë maine ka wezipo pena ha. Ame ngöne la itre xaa ijin, tre, ijije hi troa kapa la ketre ixatua ngöne la götrane la ngönetrei thene la itre musi me itre ewekë hna eköthe hnei mus nyine ixatua. Haawe, tro la itre atrene la fami maine itre xane pena a amamane la ihnimi angatr hnene la hna xatuane la ka aja ixatua, troa kuca la itre pepa matre troa hane kapa la itre ixatua. Hetrenyi la itre xaa trejin trahmanyi me föe ka nyihlue i Akötresie a nyimu macatre hë, kola mama kowe la ekalesia laka, loi e troa pane thele la ketre aqane troa xatua nyudren. Maine pëkö sipu sinee maine fami ne lai itre trejine trahmanyi maine föe cili ka ijije troa ixatua nge thaa ijije pena kö troa hane kepe ixatua qaathei mus, haawe, tro la lapa ne la itre qatre thup a hamëne la itre eamo ka ijij matre troa hane xatua angatr. Ame kowe la itre Keresiano ka mele nyipici, ketre hnëqa me madrine ka tru la troa hamëne la itre mo i angatr kowe la itre ka aja ixatua.
Maine jë tru catre la itre trejine ka aja ixatua thupene la hna pane icilekeu me angatr, maine ketre isi, maine ketre sa, maine di pena, maine jiin maine itre hleuhleu ka traqa kowe la nöjei atr ngöne la itre ijine akötre celë. (Mat. 24:7-9) Ame e cili, maine jë pë jë kö nyine tro la itre ekalesia ne la götrane cili a ithawakeun me itre xaa trejin. Haawe, tro la Lapa Ne Xomi Meköt a elemekene la ixatua ka ijij hna troa hamën hnene la itre xaa götran. Ceitune hi lai memine lo hna kuca hnene la itre Keresiano ne Asia, laka hnei angatr hna hamë xeni kowe la itre trejine me angatr ne Iudra ngöne la kola lepe la götrane cili hnene la jiin. (1 Kor. 16:1-4; 2 Kor. 9:1-5) Maine tro sa xome la tulu i angatr, tro ha mama hnyawa laka eje the së la ihnimi së kowe la itre trejine me easë, nge tro ha mama laka easë la itre nyipi hlue i Iesu Keriso.—Ioane 13:35.
KOLA TRO FË LA ITRE ITUS
Nyipi ewekë catre la kola tro fë Tusi Hmitrötr me itus ngöne la kola cainöjëne la maca ne Baselaia. Eje hi lai laka, kola iëne hnene la lapa ne la itre qatre thup la ketre drikona matre troa xome kowe la ekalesia la itre itusi me boroshür me itre xane ju kö; kola iëne fe la ketre matre troa cilëne la itre zonal. Kola kapa la itre itusi cili hnene la itretre cainöj, nge thupene lai angatr a tro fë kowe la itre atr ka ajane troa e.
Loi e troa nyipi ewekëne la hnëqa cili hnene la itre trejin. Angatr a goeëne hnyawa la itre itusi hna xeen, me fejane la itre hna xome hnene la itretre cainöj. Qa ngöne lai, atre hnyawa hi angatre la etrune la itre itus nyine troa xom hnine la ekalesia me thele troa tro fë itre ej ngöne la ijine cainöje trootro. Pine laka ka hetre thangane catre la itre itus göi troa tro fë la maca ka loi, haawe, nyipi ewekë tro la itretre cainöj a xome itre ej ngöne la hna cainöje trootro. Kola ithuemacanyine hnene la Huliwa Ne Baselaia la itus hna troa tro fë ngöne la treu, matre troa pexeje me eköthe hnyawa la aqane troa cainöj ngöne la teritoar asë.
Pine laka itre Keresiano easë ka nue hë la mele së koi Akötresie, easë a atrehmekune laka, ame la traeme së, me egöcatre së me inamacane së, me hne së hna atreine kuca, me itre mo së memine fe la mele së, tre, celë hi itre ahnahna i Akötresieti lai hne së hna troa xome thatraqane la huliwa i Nyidrë. (Luka 17:10; 1 Kor. 4:7) Maine tro sa xome hnyawa la itre ewekë së, tro hë së a amamane la ejuine la ihnimi së memine la eloine aqane imelekeu së me Iehova. Easë a ajan troa atrunyi Iehova hnene la itre ewekë së ka tru alameken, pine laka, atre hi së laka, Nyidrëti a kapa la itre ahnahna asë hne së hna kuca koi Nyidrë nyine troa amamane la etrune la ihnimi së koi Nyidrë. (Ite edomë 3:9; Mar. 14:3-9; Luka 21:1-4; Kol. 3:23, 24) Maine troa eje the së la aqane waiewekë ka lolo ngöne la itre mo ne ngönetrei nge maine tro fe sa ham, haawe, tro hë së a melëne la itre trenge ewekë i Iesu, kola hape: “Hna kapa gufane hnei nyipunie, hamëne gufanepi.” Nge eje hi lai laka, tro ha hetrenyi the së la ketre madrine ka tru catr.—Mat. 10:8b; Ite hu. 20:35.