Hna Hnëkëne Troa Kuca La Aja i Iehova,

Mekene 11

Itre Hna Amekötine Göi Itre Hnë Hmi

HNA upe la itre nyipi hlue i Iehova troa icasikeu matre troa kapa la itre ini me ithuecatrekeu. (Deu. 31:12; Heb. 10:​23-​25) Ame la pane hnë hmi ne la nöje i Iehova hna iëne hnei Akötresie thatraqane lo angetre Isaraela, tre, ene la “uma mano,” maine “uma ne heta ne icasikeu.” (Eso. 39:​32, 40) Ame hë thupen, hnei Solomona nekö i Davita, hna xupe la ketre uma, ketre ēnē nyine atrunyi Akötresie. (1 Ite jo. 9:3) Thupene la hna apaatrene la ēnē ngöne lo macatre 607 M.P.K., hnei angetre Iudra pë hë hna traqa itronyi troa hmi koi Iehova ngöne la itre hnë icasikeu ka co hna hëne ka hape sunago. Ame hë thupen, hna xupe hmaca la ēnē, nge e cili hi la trepene la nyipi hmi. Hnei Iesu hna hamë ini hnine la itre sunago me hnine la ēnē. (Luka 4:​16; Ioane 18:20) Hnei nyidrëti fe hna kuca la ketre icasikeu hune la wetr matre troa inine la itre atr ka ala nyimu ka xötrethenge nyidrë.​—Mat. 5:​1–​7:29.

Ame hë thupen, hnene la itretre drei Iesu hna ananyine la itre atr ka uke qa ngöne la nyipici, nge hnei angatr hna icasikeu ngöne la itre gaa tru atr. (Ite hu. 19:​8, 9) Angatre mina fe a inine la Tusi Hmitrötr me thele troa ce memine la itre xaa ka ce hmi me angatr ngöne la itre hnalapa. (Rom. 16:​3, 5; Kol. 4:​15; Filem. 2) Ame ngöne la itre xaa ijin, hna icasikeu hnene la itre pane Keresiano ngöne la itre götrane gaa lapa caas, maine gaa nanyi pena matre thaa tro kö a öhne hnene la itre ka icilekeu me angatr. Eje hi lai laka, hetre hni ne ajan la itre hlue i Akötresieti ekö troa icasikeu ngöne la itre hnë hmi göi troa ‘ini angatre hnei Iehova.’​—Is. 54:13.

Ame fe enehila, kola icasikeu la itre Keresiano hnine la itre hnalapa me ngöne la itre göhnë ka tru. Hna majemine troa Ini Tusi hnine la itre hnalapa maine troa icasikeu göi cainöje trootro. Ame koi itre ka hamën la hnalapa i angatr thatraqane la itre icasikeu cili, tre, kösë ketre madrine ka tru lai koi angatr. Nyimutre la itre ka kepe manathithi jëne itre ej ngöne la götrane la ua.

UMA NE BASELAIA

Ame la Uma Ne Baselaia, tre, celë hi ketre hnë icasikeu ne la Itretre Anyipici Iehova ka tru. Ame ngöne la itre xaa götran, ka lolo kö e troa pane nyithupene ngöne la nöjei treu la ketre iuma, hune la troa itön maine xupe pena la ketre. Ngo, nyimutre la itre ekalesia ka thele troa itöne la ketre igötran me xupe la ketre Uma Ne Baselaia ka ihmeku memine la itre hna ajan hnene la ekalesia. Ame itre xan, tre, angatr a itöne la ketre iuma, nge angatre pë hë a ahnyipixene jë. Ame ngöne la lue ewekë celë, tre, loi e troa löthe lai lue uma, ngacama ka hnyipixe ketre, nge hna ahnyipixene ketre. Maine hna nango saze hi la itre götranene la Uma Ne Baselaia maine hna nango ahnyipixene pena, tre, thaa nyipi ewekë kö troa löthe eje hmaca.

Thaa tro kö a xupe nyine troa mama la Uma Ne Baselaia, me kuca pena matre troa haine hnene la itre atr. Maine isapengöne kö la itre pengöne uma thenge la götran hna xupe ngön, ngo eje hi lai laka, ame la nyipi ewekë, tre, thaa tro kö a jol e troa icasikeu hnin. (Ite hu. 17:24) Loi e troa ketre hnë hmi ka lolo, nge thaa tro kö a jol e troa hnen la itre icasikeu i Keresiano; troa ketre hnë hmi ka ihmeku memine la itre ewekë hna thele thene la itre uma ngöne la nöj.

Ame la nöjei Uma Ne Baselaia, tre, hna nyithupene hnene la itre ekalesia (maine ekalesia) ne la Itretre Anyipici Iehova ka icasikeu hnine itre ej. Thaa kolo kö a tro fë itrapetre trootro matre troa kuië manie, nge ketre thaa kolo kö a athipi mani. Hna hnëkëne la itre trengene manie matre tro la itre ka sine la itre icasikeu a isa hamën qa kuhu hni angatr la manie göi troa nyithupene la uma me itre ejolene ej. (2 Kor. 9:7) Hetrenyi la itre hna amekötine hna kapa hnene la itre qatre thup ngöne la aqane troa huliwane la Uma Ne Baselaia, itre ithuemacanyi hna hamëne jëne la Huliwa Ne Baselaia, me hnine la itre tusi qaathei filial.

Loi e tro la itre atrene la ekalesia a wanga atrune hnyawa la hnëqa, ene la troa sajuëne hnei manie la Uma Ne Baselaia me troa hane nyihnyawane ej matre troa porope pala hi nge mingöminge me lolo. Troa nyihatrene hnyawa la organizasio i Iehova, e lolo la trön memine la hnin la Uma Ne Baselaia. Hna acile la ketre qatre thup maine ketre drikona troa wang la itre nyine troa kuca ka ijij, thenge la itre ewekë hna amekötine troa kuca ngöne la nöjei wiik. Eje hi lai laka, hna amekötine tro la itre Ini Tusi ne la ekalesia a nyihnyawane la Uma Ne Baselaia, nge troa elemekene hnene la atre thupëne la Ini Tus maine hnene pena la ka ce huliwa me angeic.

Ame ngöne la kola ce thawa hnene la itre ekalesia la Uma Ne Baselaia ka caas, loi e tro la itre qatre thup a iëne la ketre komite ne thupë uma; qa ne la komite cili troa thupëne matre troa nyihnyawane hnyawa pala hi la iuma memine la götran hna hnen ej. Tro la itre lapa ne la itre qatre thup a iëne la ketre perezida ne la komite cili. Fene la itre lapa cili, tro la komite ne thupë uma a wange hnyawa matre troa nyihnyawane pala hi la uma; troa xecie hnyawa pala hi kowe la komite laka, pëkö jol nge hetrenyi pala hi la itre nyine nyihnyawa uma. Tro la komite a nue kowe la ketre qatre thup maine ketre drikona troa wang la itre jol göi uma, e maine caasi hi la ekalesia ka icasikeu ngöne la uma cili. Nyipi ewekë troa ce huliwa hne së asë.

Ame ngöne la kola ce thawa la ketre Uma Ne Baselaia hnene la nyimu ekalesia, maine easa ajan troa ithöeëne la itre hawa ne la itre icasikeu, haawe, itre qatre thupe la ka troa eköthe la porogaram thenge la itre ajane ne la itre trejine asë nge cememine la ihnimi nyipici. (Fil. 2:​2-4; 1 Pet. 3:8) Qanyine kö la itre ekalesia troa axeciëne maine tro hi a acaa saze ngöne la macatre maine thupene la itre macatre ka nyimutre. Tro kö la itre ekalesia a isa axecië mekun, thaa qanyi ketre kö troa xomi mekune thatraqane la itre xaa ekalesia. Troa saze la itre hawa ne icasikeu ngöne la pane wiike ne la macatre. Ame ngöne la kola wange la ketre ekalesia hnene la atre thupëne la sirkoskripsio, haawe, tro la itre xaa ekalesia ka icasikeu hnine la Uma Ne Baselaia ka caas a wange la itre hawa ne icasikeu i angatr ngöne la wiike cili.

Ijije hi troa xome la Uma Ne Baselaia göne la itre faipoipo maine itre kele wezipo, nge qanyine la komite ne huliwa ne cainöj ne la ekalesia troa amekötin. Loi e troa goeën hnene la itre qatre thup ka sin la komite cili, la itre sipo me axecië mekune thenge la itre hna amekötine hnene la filial.

Kola thele thene la itre hna nue troa xome la Uma Ne Baselaia göi troa faipoipo, tro angatr a hetrenyi la ketre aqane ujë ka ihmeku memine la uma hna xome thatraqane la nyipi hmi. Ame asë la itre atr ka troa traqa, tre, loi e troa xecie hnyawa koi angatr laka, thaa tro kö a kuca la ketre ewekë ka troa athixötrëne la itre trejine maine troa adrone la ëje i Iehova memine la ekalesia. (Fil. 2:​14, 15) Troa sipone mina fe hnene la filial troa xome la Uma Ne Baselaia matre thatraqane la itre xaa ewekë ngöne la götrane la ua, ene la Ini Ne Cainöjëne La Baselaia maine Ini Thatraqane La Itre Pionie.

Nyipi ewekë troa metrötrëne pala hi hnene la itre atrene la ekalesia la itre hnë icasikeu i angatr. Loi e troa mama jëne la itre hnaheetre së memine la aqane iseji së memine la aqane ujë së, laka, hetre ehmitrötrene la aqane hmi së koi Iehova. (Ate Cai. 5:1; 1 Tim. 2:​9, 10) Maine tro sa trongëne la itre eamo hna hamën thatraqane lai, tro hë së a amamane laka, easë a wanga atrune catrëne la itre icasikeu i Keresiano.

Hna acile fe la itre trejine ka macaje ngöne la götrane la ua, matre troa ikep ngöne la itre ijine icasikeu ngöne la Uma Ne Baselaia. Loi e tro pala hi angatr a hmek, me ihnim me atreine waiewekë. Ame la hnëqa i angatr, tre, ene la troa kapa la itre ka xötrei traqa, me kuca matre thaa tro kö angatr a xou, me xatuane la itre ka traqa hmitr troa thele göhnë, me e la etrune la itre ka sin la icasikeu, me thupëne matre thaa tro kö a hedredrei menu maine hnötre pena la itre atr. Ketre, nyipi ewekë catr troa thupëne matre troa tro loi la itre ijine icasikeu. Ka lolo catre kö e tro la itre nekönatr a ce lapa memine la itre keme me thine i angatr. Ame la kola enij agö la ketre nekönatr, loi e tro la trejine ka ikep a sipone cememine la hni ka menyik kowe la kem maine thine i nyën troa lö sai nyën a tro kuhu qëhnelö matre thaa tro kö a ajolëne la itre atr troa drenge hnyawa la itre ini. Ijije hi troa sipone kowe la itre keme me thine ka trene nekönatre ka co catr troa lapa ngöne la ketre götran matre thaa tro kö a iajolë e kola troa lö lapa troa aupune la treije ne la itre nekönatr maine troa nyihnyawa nyëne pena.

Pine laka kola troa qaja aloine maine angazone la ekalesia hnene la aqane ujë ne la itre nekönatr e koho hnin maine e kuhu tröne pena, haawe, loi e tro la itre trejine ka ikep a amekunëne hmaca la itre keme me thin, maine ijij, troa thupëne hnyawa la itre nekö i angatr matre thaa tro kö angatr a nyinyape e hnine la uma maine e tröne pena, qëmekene maine e thupene la itre icasikeu. Eje hi lai laka, ame la trenge catre hna kuca hnene la itre trejine ka ikep, tre, nyine loi lai kowe la itre atrene la icasikeu, ke kola aijijë angatr troa kepe thangane hnyawa la itre ini hna hamën ngöne la itre ijine icasikeu. Loi e troa athipe la hnëqa ne ikep kowe la itre drikona, ene lo itre ka xome hë la hnëqa e hnine la fami.​—1 Tim. 3:​12.

XUPI UMA NE BASELAIA

Ame ngöne la itre nöje ka nyimutre, hetrenyi e hnine la itre Uma Ne Baselaia la ketre Keesi Göi Xupi Uma Ne Baselaia. Manie lai hna troa xome kowe la itre Uma Ne Baselaia ka hnyipixe hna troa xup memine lo itre hna troa ahnyipixene hmaca. Maine paatre ju la ixatua cili, thatreine jë kö troa hetre jiane huliwa ne la itre ekalesia ka nyimutre.

Ame ngöne lo hneijine i Iesu, tre hetrenyi la itre xaa Keresiano ka trene mani; ame itre xan, pëkö. Celë hi matre hna cinyihane hnei Paulo aposetolo, ka hape: “Loi la munëne i nyipunie ngöne la ijine celë thatraqane la pë ewekë e angat, mate cei tune hi; nge ame fe la munëne i angate, te, thatraqane la pë ewekë e nyipunie, mate cei tune hi.” (2 Kor. 8:​14) Ketre tune mina fe enehila; kola xome hnene la itre xaa filial la ketre götrane ne la Keesi Göi Xupi Uma Ne Baselaia matre troa xatuane la itre ekalesia ngöne la itre nöje ka thatreine troa hane xupe la itre Uma Ne Baselaia pine laka jole göi manie. Madrine catre la organizasio i Iehova memine la itre ekalesia ka kapa la itre ahnahna, la ixatua ne la itre trejine e cailo fen.

Ame ngöne la itre nöje ka nyimutre, kola eköthe la itre Kometr Ne Xupi Uma Ngöne La Nöj matre troa elemekene la huliwa ne xupi Uma Ne Baselaia maine ahnyipixene hmaca itre ej. Hna amekötine kö kowe la itre komite troa xatuane la itre ekalesia ne la ketre götrane ne la nöj. Ame la itre qatre thup ka majemi hë huliwa ngöne la xupi uma, me e manie me itre xaa metie ju kö, tre, angatre hi lai ka troa sin lai komite; ene pe tro ha elemekene hnyawa la huliwa qaane ju hi la xötrei uti hë la pun.

Maine hetrenyi la ketre Kometr Ne Xupi Uma ngöne la nöje i angatr, haawe, loi e tro la itre qatre thup a ithuemacany qëmekene troa canga nyinyape troa xupi Uma Ne Baselaia. Ijije hi tro la kometr ne xupi uma ne la nöj, a xatuane la ekalesia troa iëne la ketre götrane ka lolo me axeciëne la itre aqane troa huliwa. Tro fe ej a eköthe hnyawa la huliwa ne la itre ka traqa troa ixatua matre thaa tro kö a isazikeu la itre hna troa kuca. Ame la itre ka ajane troa sajuëne la huliwa cili, loi e tro angatr a eatrëne la itre hna amekötin, nge troa nyialiene la ketre pepa ne sipo matre troa hane sin la huliwa; thupene lai troa hamëne kowe la Kometr Ne Huliwa Ne La Ekalesia, ke angatr la ka troa axeciën.

Ame la kola traqa la itre ewekë ngöne la nöj, troa sipone kowe la itre Kometr Ne Xupi Uma Ngöne La Nöj troa nyihnyawane hmaca la itre Uma Ne Baselaia, nge ame e itre xaa ijin, kola nyihnyawane la uma ne la itre trejin. Ijije mina fe troa sipone kowe la Kometr Ne Xupi Uma Ngöne La Nöj troa hane ixatua ngöne la itre xaa nöj, maine troa inine la itre trejine ngöne la itre nöje cili. Ame ngöne la itre xaa ijin, tro la itre kometr cili a sine la itre xupi iuma ne asabele maine itre iuma ne la filial. Hetre aja ne la itre hlue i Akötresie troa catre kuca la aja i Nyidrë; celë hi matre hetrenyi jë la itre Kometr Ne Xupi Uma Ngöne La Nöj.​—Kol. 3:​23, 24.

Kola ajan troa xupe la itre Uma Ne Baselaia, ngöne la itre nöj gaa hetre hnepe jol göi mani; celë hi la kepine matre hna eköthe la itre gurup göi xupi Uma Ne Baselaia. Ame la itre trejine ka sine la itre gurupe cili, tre, kolo itre ka nue xanë angatre kö troa tro kowe la itre xaa nöje ka tru me troa tro qa ngöne la ketre ekalesia kowe la ketre matre troa elemekene la itre huliwa ne xupi uma. Kolo lai a anyimenyimëne la huliwa ne xupi uma me aijijëne kowe la itre atrene la nöj ka hane traqa troa huliwa troa kapa la ketre ini ka lolo catre göi xupi uma.

ITRE UMA NE ASABELE

Ame lo itre pane Keresiano ekö, ke angatr a icasikeu itre hnepe gurup. Ame itre xaa ijin, kola icasikeu la “nöjei at ka ala nyimu.” (Ite hu. 11:26) Ketre tune mina fe enehila, laka, kola kuca la itre icasikeu ka tru hnene la Itretre Anyipici Iehova ngöne la itre ijine asabele ne sirkoskripsio memine la itre asabele ka caa drain. Ame ngöne la itre xaa ijin, kola pane nyithupene e nöjei treu la ketre iuma, ngo ame ngöne la itre xaa götran gaa pëkö iuma, haawe, kola thele götrane hnë troa Asabele.

Ame e itre xaa ijin, kola itöne la ketre iuma, nge kola ahnyipixene hmaca matre nyine Uma Ne Asabele. Hna majemine fe troa thele götran hnë troa xupe la ketre uma ne Asabele. Tro kö a isa xupe la itre Iuma Ne Asabele thenge la ka ijij. Ame la ka troa axeciëne troa xupe la Uma Ne Asabele, tre filial; eje hi lai laka, tro angatr a pane goeëne me mekune hnyawa la thupene ej, memine la etrune aqane troa icasikeu lapa ngön.

Kola iëne hnene la filial la ketre Kometr Ne Uma Ne Asabele matre troa thupëne la Iuma. Qa ngöne la etrune la itre iuma cili, haawe, filial a iëne la itre trejine ka troa thupëne la Iuma Ne Asabele matre troa goeëne la ite ejolene ej. Kola sipone kowe la itre sirkoskripsio troa nyidrawane me canga nyihnyawane la Iuma Ne Asabele. Ijije hi troa amekötine göi troa nyihnyawane la Iuma ngöne la nöjei sikisi lao treu. Ka lolo kö e troa sipone kowe la itre trejine ka ajan troa kuca lai hune la troa nyithupene la ketre atr troa kuca. Qa ngöne lai, kola ithuecatre kowe la itre ekalesia troa sajuëne hnyawa la itre hna amekötine cili.​—Sal. 110:3; Mal. 1:​10.

Ame ngöne la itre xaa ijin, troa xome la Iuma Ne Asabele thatraqane la itre xaa huliwa i Akötresie; tune la Ini Thatraqane La Cainöj maine itre icasikeu ka ketrepengöne pena memine la itre qatre thup ka iwai trootro. Ame la itre Iuma Ne Asabele, memine la itre Uma Ne Baselaia, tre, itre hnë hmi lai hna nue koi Iehova. Ame ngöne la easë a icasikeu hnine la Iuma Ne Asabele, tro la aqane ujë së me aqane heetre së me aqane iseji së a amamane hnyawa laka, easë a metrötrëne la aqane hmi së koi Iehova.​—Ate Cai. 5:1; 1 Tim. 2:​9, 10.

Ame la kola traqa itronyi la itre atre kowe la organizasio ngöne la itre drai hnapin enehila, tre, celë hi hatrene laka Iehova a amanathithi së. (Is. 60:​8, 10, 11, 22) Haawe, loi e tro sa sajuëne hnyawa la itre hna hnëkëne göi troa itöne me nyihnyawane la itre hnë hmi; itre hnë tro sa icasikeu matre troa ini së hnei Iehova. Maine easa ujë tune lai, tro hë së a amamane ka hape, easë a nyipine la itre Iuma cili ka aijijë së troa ithuecatrekeu, nge easë pala hi a öhne la drai Iehova laka calemi catre hë.