Hna Hnëkëne Troa Kuca La Aja i Iehova,
Mekene 9
Itre Aqane Troa Cainöjëne La Maca Ka Loi
HNEI Iesu Keriso, hlue i Iehova, hna nyipiewekëne la hnëqa i nyidrë. Hnei nyidrëti hna catre cainöjëne la maca ka loi ne la Baselaia i Akötresie, celë hi tulu ka lolo lai hnei nyidrëti hna hamëne kowe la itretre drei nyidrë. Hnei nyidrëti hna tro kowe la itre atr me ithanata me ini angatr ngöne la itre hnalapa i angatr, me ngöne la itre götrane gaa tru atr. (Mat. 9:35; Luka 8:1) Hnei nyidrëti hna ithanata memine la itre xan, angatr isa ala caas, nge hnei nyidrëti fe hna inine la itretre drei nyidrë me ithanata memine la itre atr ka ala nyimu catr. (Mat. 13:36; Mar. 4:10-13; 6:35-44; Ioane 3:2-21) Thaa hnei nyidrëti kö hna cile hnö troa ithuecatr kowe la itre ka drei nyidrë, me thuemacanyi angatr la ketre mejiune ka catr. (Luka 4:16-19) Hnei nyidrëti pala hi hna thele troa cainöj, ngacama nyidrëti a ajan troa pane mano. (Mar. 6:30-34; Ioane 4:4-34) Ame ngöne la easa e hnine la Tusi Hmitrötr la itre aqane cainöje i nyidrë, hapeu, thaa pi ajane kö së troa hane nyitipu nyidrë? Eje hi, easë a pi hane tune lo itre aposetolo.—Mat. 4:19, 20; Luka 5:27, 28; Ioane 1:43-45.
Tro sa ce wange la itre aqane tro la itre Keresiano enehila a xome la huliwa hnei Iesu Keriso hna nyiqaane ekö, kösë 2 000 hë lao macatre enehila.
CAINÖJ NGÖNE ITRE HNALAPA TROOTRO
Kola wanga atrehmekune hnene la Itretre Anyipici Iehova ne la hneijine së la enyipiewekëne la troa cainöjëne la maca ka loi ngöne la itre hnalapa trootro. Qa ngöne laka, hnei angatr hna catre tro fë tune lai la maca ne Baselaia, ene pe kola hë me atre angatre hnyawa hnene la huliwa cili. Kola mama hnene la elolone la itre thangan laka, Iehova a kapa me amanathithine la huliwa cili. Kola amamane mina fe hnene la itre thangane ka loi cili laka, jëne inamacane la aqane cainöje celë, ene la troa ketr hnyawa ngöne la ketre hnepe ijine ka xoxopatr la itre atr, itre milio la etrun. (Mat. 11:19; 24:14) Haawe, mama hnyawa ha laka, ame la troa cainöje ngöne itre hnalapa trootro, tre, celë hi ketre jëne ka loi troa amamane la ihnimi së koi Iehova me kowe la nöjei atr.—Mat. 22:34-40.
Eje hi laka, thaa itre Temoë i Iehova kö la ka eköthe la huliwa ne cainöj ngöne la itre hnalapa trootro. Ketre aqane huliwa la hna xome hë ekö ngöne la hneijine i anga aposetolo. Haawe, Paulo aposetolo a amamane laka, hnei nyidrëti hna inine la itre atr ngöne la itre hnalapa i angatr. Hnei nyidrëti hna amexeje la huliwa ne cainöje i nyidrë, me qaja kowe la itre qatre thup ne la ekalesia ne Efeso, ka hape: “Qane ngöne la drai hnapane lo traqa ni e Asia, . . . thaa hnenge hna juetëne la kete ewekë ka nyipi, ngo hna amamane koi nyipunie me ini nyipunie qëmeke ne la nöj, me ngöne la kete uma me kete uma.” Matre hnene la aqane huliwa celë me itre xaa aqane ju kö, hnei nyidrëti “hna anyipicine koi angete Iuda, me angete Heleni fe, ka hape, troa ietra koi Akötesie, me lapaune koi Joxu shë Iesu Keriso.” (Ite hu. 20:18, 20, 21) Ame ngöne la ijine cili, kola nyipi ewekë catr troa atre hnene la itre atr la maca ka loi, pine laka, kola akökötrene la thili koi idrola hnene la itre joxu ne Roma, nge atraqatre la “qou [ne la itre atr ka nyimutre] kowe la ite haze ngöne la nöjei ewekë asë.” Eje hi laka, loi e troa canga thele “la Akötesie Ate xupe la fene hnengödrai memine la nöjei ewekë asë ngön,” Nyidrë, Atre “upe enehila la nöjei ate asë e cailo troa ietra.”—Ite hu. 17:22-31.
Ka nyipi ewekë catre enehila troa cainöjëne la maca ka loi, pine laka, easenyi catre hë la pune la fene ka ngazo. Jëne mele hi lai kowe la itre atr asë. Celë hi matre, loi e tro sa nue la trenge catre së enehila, qëmekene troa traqa la pun. Pine laka easenyi catre hë la pun, easa kuca asë la hne së hna atreine troa cainöj ngöne itre hnalapa trootro; atre hnyawa hi së laka, pëkö aqane huliwa ka tun hna eköth göi troa thele la itre atr ka ajane la nyipici. Ceitune hi la thangane la aqane cainöje cili, enehila memine lo hneijine i Iesu ekö me itre aposetolo. Ketre, ka hamë madrine la aqane cainöje cili.—Mar. 13:10.
Hapeu, nyipunieti kö a hane cainöje ngöne itre hnalapa trootro, thenge la hnei epuni hna atrein? Maine tro nyipunie a xome la nöjei ijine troa cainöje tune lai, eje hi lai laka, tro hë nyipunieti a hetrenyi la ketre madrine ka tru, nge tingetinge la mekuna i epun, ke epuni a kuca la huliwa i Akötresie. (Ezek. 9:11; Ite hu. 20:35) Maine jë, thaa ewekë ka hmaloi kö koi epuni la troa cainöj ngöne itre hnalapa trootro. Maine jë, nango kucakuca ngöne la ngönetrei, maine thaa drei epuni pena kö hnene la itre atr ne la teritoar hnei epuni hna cainöje ngön. Maine jë, hna nyifegone la huliwa së hnei mus. Maine jë, pine la pengö i epun, nango jole koi epuni troa hane ithanata memine la itre atr hnei epuni hna thatre, nge eje hi lai laka, ame ngöne la nöjei epuni a troa cainöj ngöne la itre hnalapa trootro, kösë ketre hace ka tru koi epuni lai. Ngo the nanazije kö. (Eso. 4:10-12) Ame asë hi la itre trejine me epuni trahmanyi me föe e cailo fen, tre, angatr asë fe a hane cile kowe la itre jole cili.
Hnei Iesu hna ahnithe kowe la itretre drei nyidrëti laka, tro nyidrëti a ce me angatr “ngöne la nöjei drai asëjëihë uti hë la pune la fene hnengödrai.” (Mat. 28:20) Kola ithuecatre kowe la itretre drei nyidrë enehila hnene la hna thingehnaeane cili, nge kola hamë angatre la trenge catr matre troa kuca la huliwa, ene la troa inine la itre atr. Loi e tro sa catre me mejiune tui Paulo; hnei nyidrëti hna qaja ngöne Filipi 4:13, ka hape: “Ateine ni troa kuca la nöjei ewekë asëjëihë hnei nyidëti ate aegöcatenyi ni.” Thele jë troa eatrëne la itre hna amekötine ngöne la nöjei wiik e hnine la ekalesia, göi troa cainöj ngöne itre hnalapa trootro. Maine epuni a ce huliwa memine la itre xaa Keresiano, tro hë epuni a sipu kapa la itre ithuecatr memine la ketre ixatua göi troa atreine ithanata hnyawa memine la itre atr me troa hamëne la itre itus. Ketre, thithi jë matre troa hetrenyi la lapaune göi troa cile kowe la itre jol hnei epuni hna troa qëmeke kow, nge catre pi troa cainöjëne la maca ka loi.—Luka 17:5.
Ame ngöne la epuni a cainöjëne la maca ka loi kowe la itre atr, ijine hi lai koi epuni troa qaja la pengöne la mejiune i epun, nge e cili kolo mina fe a acatrene ej. (1 Pet. 3:15) Ketre, tro hë epuni a öhne la eisapengönene la itre atr ka mejiune kowe la Baselaia memine la itre ka thaa mejiune kö. Ame hë la epuni a öhne la itre atr ka hetre hni ne ajan kowe la maca ne Baselaia, nge epuni fe a öhne la aqane ujëne la itre ka xelene kö, haawe, epuni hi a mekune ju lo itre trenge ewekë i Iesu kowe lo itretre drei nyidrë hna cinyihane ngöne Mataio 10:11-14. Ketre, tro fe epuni a madrine troa atre laka ‘ka hudrume la lai i nyipunie,’ thenge lo hna amekötine hnei Iesu. Maine jë tro fe hë nyipunie a madrine troa xatuane la itre atr troa atre la nyipici ka eatrongë së kowe la mele ka epine palua.—Mat. 5:16; Ioane 17:3; 1 Tim. 4:16.
Hetrenyi la itre hna amekötine göi troa cainöj ngöne itre hnalapa trootro, e mecixeni me sabath, me ngöne mina fe la wiik. Ame ngöne la itre götran ka jole troa öhne la itre atr ngöne la itre hnalapa i angatr ngöne la drai, kola isa pui hnene la itre ekalesia troa cainöj e heji lapa. Kola qaja hnene la itre trejine ka hape, hmalahnine la itre atr troa kepe së ngöne la pune la drai, maine e hejiheji pena, ngo nango jol e hmakany. Hetrenyi la itre xaa aqane troa cainöj ka hetre thangane ka loi ngöne la nöje i nyipunie.
KOLA THELE LA ITRE KA HETRE HNI NE AJAN
Hnei Iesu hna upe la itretre drei nyidrë troa ‘thele’ la itre ka hetre hni ne ajan. (Mat. 10:11) Ame ngöne la nyidrëti a thele la itre atr ka hetre hni ne ajan, thaa hnei nyidrëti kö hna xome hmekuje ju hi la hna cainöj ngöne itre hnalapa trootro. Hnei nyidrëti hna cainöj ngöne la nöjei ijine ka ijije koi nyidrë, hna eköthe ju hë maine thaa hna eköthe pena. (Luka 8:1; Ioane 4:7-15) Ame mina fe itre aposetolo, tre, hnei angatr hna cainöj ngöne la itre götrane ka nyimutre.—Ite hu. 17:17; 28:16, 23, 30, 31.
Ame mina fe ngöne la hneijine së, nyipi ewekë tro sa qaja la maca ne la Baselaia kowe la itre atr ka ala nyimu catr. Kolo lai a hape troa nyitipu Iesu me itretre drei nyidrë ngöne la aqane troa xome la huliwa ne inine la itre atr, ngo loi e tro fe a wanga atrune la itre ewekë ka traqa ngöne la fen memine la aqane mele ne la itre atr ngöne la teritoare së.—1 Kor. 7:31.
Thaa tro hmekuje kö sa thele troa cainöj ngöne itre hnalapa trootro hmekuje hi. Hetre thangane ka loi hna kapa hnene la itre trejin, ke hnei angatr hna tro troa wange la itre atr ngöne la hnei angatr hna huliwa. Ame ngöne la itre nöje ka nyimutre, kola cainöje mina fe e cahu gojeny, me ngöne la itre park, me itre hna acili loto, me hnine la itre kar, me ngöne la itre götran easa öhne la itre atr; kola mama laka, hetre thangane catr. Haawe, matre maine paatre kö la itre atr ngöne la hnalapa i angatr, atreine hi troa cainöjëne pena la maca ka loi koi angatr ngöne la itre xaa götran.
Ame la troa tro fë la lue zonal La Tour de Garde me Réveillez-vous ! tre, celë hi ketre aqane troa anyipicine ka lolo. Ijije hi tro sa ithanata hnyawa memine la itre atr cememine la hni ka menyik, me amexeje koi angatr la ketre ewekë ka jole ka eje ngöne la nöje së, a hna hane ithanatane hnine la ketre zonale së. Ijije mina fe troa hamëne la itre xaa itus kowe la itre atr ka hetre hni ne ajan, me isa pui matre troa wai angatr ngöne la hnalapa i angatr. Kola hamëne pala hi koi së hnene la Huliwa Ne Baselaia la itre mekune nyine ixatua göne lai; celë hi ka xatua së troa xome la nöjei aqane troa cainöj. Tro epuni a öhne elanyi laka, ame la troa cainöje ngöne la itre gaa tru atr, tre, celë hi ketre jëne troa akökötrene la huliwa ne cainöje së.
Ngo ame la huliwa ne la itre Keresiano ne la hneijine së, tre, thaa ene hmekuje kö la troa thuemacane la itre atr me troa cainöjëne la maca ka loi. Maine epuni a ajan troa xatuane la itre atr matre tro angatr a hane kapa la nyipici ka eatrongë së kowe la mel, tre, loi e tro epuni a anyimua bëeke hmaca troa wange la itre ka hane wanga atrune la nyipici; ketre matre tro angatr a kökötr, nge tro fe angatr a hane itre Keresiano ka macaj.
ITRE IWAI HMACA
Hnei Iesu hna qaja kowe la itretre drei nyidrë, ka hape: “Tro nyipunie a anyipici ni . . . uti hë la cane la fene hnengödrai.” (Ite hu. 1:8) Ngo hna qaja fe koi angatr ka hape: “Qa ngöne lai, trojë nyipunie a inine la nöjei nöj’ asëjëihë, . . . ini angate jë troa trongëne la nöjei ewekë asëjëihë lo hnenge hna ahnithe koi nyipunie.” (Mat. 28:19, 20) Ijije mina fe tro epuni a hetrenyi la madrin ngöne la huliwa i Iehova, jëne la itre iwai hmaca. Eje hi laka, ame la itre atr ka wanga atrune la maca ka loi ngöne la kola xötrei iöhny, tre, maine jë tro angatr a madrine troa kepe nyipunieti hmaca. Maine tro epuni a hamëne la itre xaa ithuemacanyi qa hnine la Tusi Hmitrötr, atreine hi tro epuni a acatrene la lapaune i angatr koi Akötresie, me xatua angatr troa atrehmekune hnyawa la aja ka tru ka eje thei angatr ngöne la ua. (Mat. 5:3) Maine hnei epuni hna hnëkë hnyawa me isa pui kowe la ketre ijine ka ijij, maine jë atreine hi troa nyiqaane inine me angeic la Tusi Hmitrötr ngöne la hnalapa i angeic. Eje hi laka, ame la kola iwai hmaca, tre, göi troa nyiqaane etid memine lai atr. Thaa easë hmekuje kö a ‘traan’ la itre itine feja, ene la nyipici, ngo loi e tro fe sa ‘fie.’—1 Kor. 3:6.
Ame kowe la itre xan, tre, ketre jole ka tru la troa iwai hmaca. Maine jë majemi hë epuni enehila troa tro fë la maca ka loi ngöne itre hnalapa trootro, nge epuni a madrine troa xome la aqane cainöje cili. Ngo ma nango jole pala kö koi epuni troa bëeke troa iwai hmaca matre troa ithanatane hnyawa la ketre topik ne la Tusi Hmitrötr. Ngo, thaa tro pi kö epuni a xou. Ame ngöne lo xötrei, maine jë hnei epuni hna amë pe la ketre itusi kowe lai atr ka kepe epun. Haawe, tune kaa matre ce ithanatane me angeic la aliene lai itus? Ijije hi tro epuni a hnëkë kowe lai. Maine epuni a öhne laka nango jole koi epun, sipone jë kowe la ketre trejine ka maca hnyawa troa cainöj matre troa ce tro me epun.
Organizasio i Iehova a hamëne la ixatua ka ijije koi epun, matre troa hetre thangane hnyawa la epuni a iwai hmaca. Haawe, thele jë troa kepe thangane hnyawa la itre ewekë ka troa akökötrene la atrehmekune i epun, memine la inamacane i epuni ngöne la Tusi Hmitrötr. Lapaune ju koi Iehova nge kapa ju la ixatua ne la itre trejine trahmanyi me föe ka macaj ngöne la huliwa. Eje hi lai laka, tro hë epuni a atreine kuca la itre iwai hmaca ka hetre thangan, nge tro ha kökötre la madrine hnei epuni hna kapa qa ngöne la huliwa i epun.
ITRE ETID NGÖNE LA ITRE HNALAPA
Hnei Filipo ketre atre tro fë evangelia hna hnyinge ngöne la ketre ijin, kowe la ketre atr ka pi atre la maca ne la Wesi Ula i Akötresie; öni Filipo ka hape: “Trotrohnine hë nyipëti la hnei nyipëti hna e?” Nge önine la trahmanyi e sa ka hape: “Tro ni a ate tune ka e pëkö ate troa amekötine koi ni?” Kola qaja hnene la Ite Huliwa mekene 8, ka hape hnei Filipo hna “amamane koi angeice la maca ka loi Iesu,” nge hna nyiqaane lai ngöne la xötre ne la Tusi Hmitrötr hnei angeic hna e. (Ite hu. 8:26-36) Thatre kö së la etrune la traeme hnei Filipo hna xome matre troa ithanata memine lai atr. Ngo eje hi lai laka, pexej la aqane qeje pengöne angeic la maca ka loi, matre thaa jole ju kö kowe lai atr troa hane lapaun me sipone troa xome la bapataiso. Celë hi matre ketre atre drei Iesu Keriso jë fe hi angeic.
Ame enehila, hetrenyi la itre atr ka hetre hni ne ajan hne së hna iöhnyi memin ka thatre la Tusi Hmitrötr. Celë hi la kepine matre, maine jë loi e troa pane anyimua wai angatr me etidi hnyawa me angatr ngöne la itre wiik, me itre treu, maine caa macatre nge hetre munën, qëmekene tro angatr a hane lapaun me aejëne la itre hna amekötin koi angetre pi xome la bapataiso. Ngo ame la xomihniahoeany memine la ihnimi hnei epuni hna eën ngöne la epuni a xatuane la itre atr ka hni ka menyik matre tro angatr a itretre dreng, tre, itre ka tro lai a amadrinë epun, pine laka öni Iesu ka hape: “Sisitia la manathithi e troa hame hune la troa kapa.”—Ite hu. 20:35.
Troa hmaloi e troa etid memine la itre atr, e hnei epuni hna xome la ketre itusi ne la Itretre Anyipici Iehova hna hnëkëne thatraqane lai. Maine tro epuni a xötrethenge la aqane etidi epuni ekö, maine thele ixatua pena thene la itre xaa ka hamë ini ka maca ne la ekalesia, haawe, tro hë epuni a xomiujine hnyawa la itre etid me xatua angatr troa itretre drei Keriso.
Maine epuni a aja ixatua matre troa nyiqaane maine xomiujine la ketre etid ne la Tusi Hmitrötr, the luelue kö troa ce ithanatane memine la ketre qatre thup maine ketre Temoë pena ka kepe thangane ka loi ngöne la huliwa cili. Tro fe a hetre ixatua e hnei epuni hna trongëne la itre mekune nyine ixatua hna hamën hnine la Huliwa Ne Baselaia; itre mekune lai hna iamacanyin ngöne lo Icasikeu Ne La Huliwa. Tro epuni a kapa la itre thangane ka loi, e hnei epuni hna mejiune koi Iehova, me thithi fë koi Nyidrëti la aja ka eje thei epun. (1 Ioane 3:22) Qa ngöne lai, catre jë hane xome la huliwa ne inine la itre atr, nge thele jë troa xomiujine pala hi la ketre etid, e tröne lo itre etid hnei epuni hna kuca hnine la fami. Haawe, tro hë epuni a akökötrene la madrine ka eje thei epuni ngöne la huliwa ne cainöj.
LOI E TRO SA EATRONGËNE LA ITRE ATR KA AJAN KOWE LA ORGANIZASIO I IEHOVA
Ame la itre atr hne së hna etid memin, nge hne së hna xatuane troa itretre drei Iesu Keriso, tre, angatr a thele troa atre Iehova nge angatr a hane lö hnine la ekalesia. Hna eköthe la itre ekalesia thenge la mekuna i Akötresie matre troa kuca la aja i Nyidrë. Tro la itre hnainin a kökötre me macaje ngöne la götrane la ua, e hne së hna xatua angatr troa atrehmekune la organizasio i Iehova me ce huliwa memin. Haawe, nyipi ewekë tro sa ini angatr troa ujë tune lai.
Maine epuni a ajane troa eatrëne lai, tre, ijije hi tro epuni a xome la itre kaset video me itre boroshür hna hnëkëne thatraqane lai. Troa hetre ixatua koi epuni la itre xaa ithuemacanyi hna hamëne ngöne la mekene 4 ne la itusi celë.
Ame ngöne la kola xötrei porotrikëne la Tusi Hmitrötr memine la itre ka hni ne ajan, tre, loi e troa xatua angatre troa trotrohnine laka, Iehova a xome enehila la ketre organizasio matre troa kuca la huliwa i Nyidrë e celë fen. Amamane hnyawa jë la enyipiewekëne la itre itusi nyine xatuane troa trotrohnine la Tusi Hmitröt hna xome hnene la itre Temoë i Iehova, nge qaja jë la aqane kuca itre ej, me hamën trongëne e cailo fen asë hnene la itre atr ka nue la mele i angatr troa nyihlue i Akötresie. Hëne jë la itre atr ka etid me epuni matre troa hane sine la Ini Tusi Ne La Ekalesia. Tro sai angatre jë kowe la itre trejine trahmanyi me föe nge qaja jë koi angatr la aqane trongene la itre icasikeu hna hnen hnine la Uma Ne Baselaia, nge ithuecatre jë koi angatr troa hane sine itre ej. Fetra sai angatre jë fe kowe la itre xaa Temoë ngöne la itre ijine asabele ne sirkoskripsio me distrik. Kolo lai a aijijën la itre ka xötrei traqa troa isa öhne la aqane amamane la itre hlue i Iehova la hatrene ka tru ne la itre nyipi Keresiano, ene la ihnim. (Ioane 13:35) Ame ngöne la kola wanga atrune trootro la etrune la organizasio i Iehova hnene la itre atr ka hetre hni ne ajan, ketre angatre mina fe a kökötre catre ngöne la atrehmekune i Iehova.
AQANE TROA XOME LA ITRE ITUS KA QEJE TUSI HMITRÖTR
Ame la itre pane keresiano, tre, angatre hi lo itretre catre cainöjëne la Wesi Ula i Akötresie. Hnei angatr hna fejane la Itre Hna Cinyihan matre thatraqai angatr isa ala caas, nge göi troa inine ej hnine la itre ekalesia i angatr. Ketre, angatr a upe la itre atr troa e ej. Thaa tru menu kö la itre tusi hna fejan, celë hi matre angatr a thupëne hnyawa itre ej. (Kol. 4:16; 2 Tim. 2:15; 3:14-17; 4:13; 1 Pet. 1:1) Jëne la itre masine nyine feja itus enehila, kola fejane hnene la Itretre Anyipici Iehova la itre Tusi Hmitrötr, itre milio la etrun, me itre itus nyine troa etid, itre hadredre milio; tune la itre tarak, itre boroshür, me itre itus me itre zonal, ngöne la itre qene hlapa ka nyimutre.
Ame ngöne la epuni a tro fë la maca ka loi kowe la itre atr, thele jë troa xome hnyawa la itre itusi ka nyimutre, ka qejepengöne la Tusi Hmitrötr, hna hamëne hnene la “hlue ka nyipici me ka inamacan.” (Mat. 24:45) Kola amamane hnene la Huliwa Ne Baselaia la itre itus nyine troa tro fë e nöjei treu ngöne la hna cainöje trootro. Ijije fe tro epuni a tro fë pala hi la itre zonal ngöne la nöjei ijin ne la treu, a ngöne fe lo itre drai ne tro fë zonal.
Ngacama ame la hna pane wanga atrune hnene la “hlue ka nyipici me ka inamacan” tre, ene la troa hamëne hnine la uma i Akötresie la xeni ngöne la götrane la ua ngöne la ijine ka ijij, ngo kola xötrethenge la tulu i Iehova Akötresie hnene la “hlue” cili, ngöne la hna hamëne atrune la xeni kowe la itre atr asë ka pi ajane troa atre Akötresie. Pine laka hetre hnei epuni hna atre qa ngöne la hnei epuni hna e me inine la itre itusi ne la itre Temoë i Iehova, maine jë tro hë epuni a ajan troa hane qaja kowe la itre atr la itre hnei epuni hna inin. (Heb. 13:15, 16) Jëne la itre itusi celë, ijije fe hi troa hetre thangane hnyawa la hna cainöje trootro hnene la itre ka xötrei cainöj.
CAINÖJ NGÖNE LA NÖJEI IJIN
Hnei Iesu hna qaja kowe la itre ka wanga atrune la itre trenge ewekë i nyidrë, ka hape: “Nyipunieti la lai ne la fene hnengödrai. . . . Tune ju nyipunie ahudumenejë la lai nyipunie qëmeke ne la nöjei at, mate goeëne hnei angate la huliwa ka loi nyipunie; ame hna atrune la Tetetro i nyipunie e koho hnengödrai.” (Mat. 5:14-16) Loi e tro la itretre dreng a trongëne la itre jë i Akötresie me nyitipu Iesu Keriso, lo ka qaja fe ka hape: “Ini la lai ne la fene hnengödrai.” Hnei Iesu hna amamai tulu kowe la itre Keresiano, ke hnei nyidrëti hna ahudrumene la “lai ne la mel” matre kepe thangane hnene la nöjei ka troa drei nyidrë.—Ioane 8:12.
Paulo aposetolo mina fe la ketre tulu ka loi koi së. (1 Kor. 4:16; 11:1) Ame ngöne lo nyidrëti e Athena, hnei nyidrëti hna cainöj o drai ngöne la hna maketr kowe la itre atr hnei nyidrëti hna öhne e cili. (Ite hu. 17:17) Hna xötrethenge hnene la itre Keresiano ne Filipi la tulu i nyidrë; celë hi matre hna qeje angatr hnei nyidrë ka hape, ‘itre lai ne la fen, kola mel e nyipine la ketre xötr atr ka qaliqali me ka eni wathebo.’ (Fil. 2:15) Ame enehila, atreine hi tro sa kuca matre troa hudrume la nyipici ne la Baselaia jëne la itre trenge ewekë së me itre huliwa së, ngöne la nöjei ijine ka ijije koi së troa qaja la maca ka loi. Eje hi laka, tro la tulu ka loi hne së hna hamën, me aqane nyipici së me thiina ka meköti së, a amamane kowe la itre atr ka hape, isapengö së kö memine la itre atr ka ala nyim. Ngo, maine easë a fe la qe së troa qaja la maca ka loi kowe la itre atr ka öhne la aqane ujë së ka lolo, tro hë angatr a atre la kepine matre isapengö së kö memine la itre xaa atr.
Nyimutre la Itretre Anyipici Iehova ka qaja la maca ka loi kowe la itre sine huliwa i angatr maine itre sine ce ini me angatre pena, maine kowe la itre xaa atr ju kö. Ame itre xaa ijin, ijije fe tro sa hane ithanata kowe la itre ka ce ti he maine ka ce ti avio me easë. Loi e tro pala hi sa isa hnëkë hnyawa matre ame la easa porotrike memine la itre atr, easë fe hi a hane anyipicine me cainöje koi angatr ngöne la nöjei ijine ka ijij.
Tro ha ketre ixatua koi së me upi së troa cainöjëne la maca ka loi koi itre xan, e hne së hna lapa mekune laka, ngöne la nöjei ijine easa ujë tune lai, tre, easë hi lai a atrune la Atre xupi së me adraiëne la ëje i Nyidrë. Ketre, maine jë tro hë së a xatuane la itre atre ka hni ka menyik troa hane atre Iehova, göi matre tro fe angatr a hane nyihlue i Nyidrë me hane mejiune kowe la mele ka thaa ase palua kö hna aijijëne hnene la hna lapaune koi Iesu Keriso. Ame la itre ewekë cili, tre, celë hi huliwa ka hmitrötre lai hne së hna kuca, nge huliwa ka hnyapa nge ka nyipi loi Akötresie.—Heb. 12:28; Hna ama. 7:9, 10.
ITRE TERITOAR
Ame la aja i Iehova, tre, troa cengöne caasi la aqane troa cainöjëne la maca ne Baselaia e cailo fen, ngöne la itre traon uti fe hë la itre tribu. Celë hi matre kola athip hnene la filial ne la nöj kowe la itre ekalesia, me kowe mina fe la itre trejine ka mele ngöne la itre götrane gaa nany, la ketre teritoar. (1 Kor. 14:40) Ka ihmeku la aqane huliwa celë memine la itre hna amekötine hnei Akötresieti ekö ngöne lo hneijine i Iesu. (2 Kor. 10:13; Gal. 2:9) Pine laka kola kökötre nyimenyime la huliwa ne la Baselaia ngöne la itre drai tixenuë celë, haawe, nyipi ewekë catre troa eköthe hnyawa la aqane troa thawa la itre teritoar matre thaa tro kö sa aluuzine la trenge catre së. Kolo hi lai a aijijëne la itre atr ka ala nyimu troa drenge la maca ka loi.
Qa ne la atre thupëne la huliwa ne cainöj troa wange la teritoar ne la ekalesia nyine huliwan. Ijije hi troa nue kowe la ketre drikona troa xome la hnëqa ne troa thawa la itre teritoar, me wange maine ka ihmeku pala hi itre ej memine la ijine kuca lai. Maine hna sa tulune hi la etrune la itre teritoar, ngo tro pala hi a hetrenyi thene la atre thupëne la Ini Tus la itre teritoar thatraqane la itre atrene la gurupe i angeic.
Ngo maine ka tru la teritoare ne la ekalesia i epun, haawe, maine jë tro epuni a ajane troa hetrenyi la ketre sipu teritoare i epun, maine jë thaa ka nanyi kö qa ngöne la hnalapa i epun. Maine thaa nanyi kö la teritoar hna hamë epuni qaa cili hnei epuni hna lapa, haawe, kolo hi lai a aijijë epuni troa xome hnyawa la traeme ne troa cainöjëne la maca ka loi. Ketre, ijiji epuni troa hane hëne la itre xaa ka cainöj troa hane ce tro me epuni kowe la teritoare cili.
Maine ijije troa sipu xome la ketre teritoar jëne la ekalesia i epun, sipone jë kowe la ka cilëne la itre teritoar troa hamëne la caas thaa hna huliwane pala kö. Thupene lai, loi e tro epuni a thuemacanyi angeic la hnei epuni hna kuca ngöne la teritoare cili. Ame la epuni a kuca lai teritoare i epun, tro epuni a iöhnyi memine la itre atr ka ala nyim, nge maine ka xomihni ahoeanyi epun, haawe, maine jë tro hë epuni a madrine troa xatuane la itre xaa atr troa nyipi ewekëne la itre hna amekötine hnei Akötresie matre troa amele së.
Eje hi lai laka, maine hetre sipu teritoare i epun, tre, hnëqa i epuni troa ithanata kowe la itre atr ka ala nyim. Kolo lai a hape, tro epuni a bëeke kowe la itre hnalapa ka pë atren, me hamën la ixatua ngöne la götrane la ua kowe la itre ka hetre hni ne ajan kowe la maca ne Baselaia. Ame ngöne la itre xaa ijin, kola hamën hnene la Huliwa Ne Baselaia la itre mekune nyine ixatua ka ijij ngöne la aqane tro sa kuca asë la teritoar hna athipe koi së, me cainöje fë la Tusi Hmitrötr, me itre itus, me itre zonal, me itre boroshür, me itre tarak, me itre pepa ne ihë, maine itre xaa jiane huliwa pena hna hamën hnene la “hlue ka nyipici me ka inamacan.” Maine epuni a ajan troa ithanata memine la itre xaa atr ne la teritoare i epun, ene lo itre ka trene uma ka jol e troa lö kow, maine itre iuma pena hna eköhagene hnyawa, haawe, loi e tro epuni a cinyanyi koi angatr, me telefone maine xome pena la itre xaa aqane troa cainöj, maine e cahu gojeny matre troa ketri angatr. Tro la atre thupën la huliwa ne cainöj memine la atre thupëne la Ini Tusi hnei epuni hna sin, a hamë epuni la itre mekune nyine ixatua ka ijij thenge la götran hnei epuni hna cainöje ngön me thenge fe la itre hnei epuni hna melën.
Maine tro asë hi la itre ka sine la ekalesia a ce huliwa, haawe, tro ha huliwane hnyawa la teritoar. Ketre, tro hë së a neëne troa traqa itronyi asë ngöne la caa teritoar, wanga troa wesitre koi së hnene la itre atr. Tro hë së a amamane la metrötre së kowe la itre trejine me easë me kowe la itre atr ne la teritoar.
TROA CAINÖJ KOWE LA ITRE ATR ASË KA ISA QENE HLAPAN
Nyipi ewekë tro la itre atr asë a atre Iehova Akötresie, memine la Hupuna i Nyidrë memine la Baselaia i Nyidrë. (Hna ama. 14:6, 7) Hetre aja së troa xatuane la itre ka qaja la ketre qene hlapa ngöne la teritoare së, matre tro fe angatr a hane qaja la ëje i Iehova; jëne iamele hi lai koi angatr nge ketre, aqane tro hi angatre lai a hane xetrën la atre ka hnyipixe. (Rom. 10:12, 13; Kol. 3:10, 11) Ngo nemene la aqane troa qëmeke me ujë, cememine la ihnim, kowe la itre jol hne së hna cile kow, ngöne la easa cainöjëne la maca ka loi kowe la itre atr cili?
Loi e tro së itre Keresiano a kuca kowe la itre xaa atr la hne së hna ajan tro angatr a kuca koi së. (Mat. 7:12) Tro hë së a amamane ka hape, easa wanga atrune hnyawa la itre xaa atr ka traqa qa ngöne la itre xaa nöj maine ka qaja pena la ketre qene hlapa, e keukawa la aqane ithanata së nge easë a hane kepe angatre hnyawa. (Rom. 15:7) Celë hi ketre aqane mekune lai ka nyipi ewekë ngöne la easë a cainöjëne la maca ka loi ngöne la itre götran gaa tru atr ka qaja la ketre qene hlapa, pine laka kola xatua së troa goeëne la itre xaa atr ceitune memine la aqane goeë angatr hnei Akötresie.—Ite hu. 10:34, 35; 17:26.
Maine epuni a iöhnyi memine la ketre atr ka qaja la ketre qene hlapa hnei epuni hna thatre, thele jë troa atre la qene hlapa i angeic. Amamane jë koi angeic la maca ka eje e hnine la boroshür Une bonne nouvelle pour des gens de toutes nations. Maine hetrenyi ezi angeic la ketre ekalesia maine ketre gurup ngöne la qene hlapa i angeic, haawe, maine jë tro epuni a wange la ketre e itre trejine e cili matre troa ithanata memine lai atr. Maine hetrenyi hnine la ekalesia i epuni la ketre trejine ka qaja la qene hlapa i angeic, haawe, maine jë tro angeic a lapaa tro troa wange lai atr. Maine pena, qaja jë kowe lai atr ka hape, tro pë hë epuni a traqa fë itus ngöne la qene hlapa i angeic. Ce wange ju fe memine la atre cilëne la itre itus, la itre ka hetrenyi ngöne la qene hlapa ne lai atr.
Tru catre la itre hnëewekë hna inine hnene la itretre cainöj ngöne la ketre qene hlapa, matre ijije troa eköthe la ketre aqane nyiqaane ithanata ka hmaloi. Hnene la itre xan hna cile kowe la jol, ene la troa etid memine la ketre atr ngöne la ketre itus ngöne la qene hlapa i angeic. Maine tro sa xome la itre iatr me upi angeic troa e la itre xötr ngöne la Tusi Hmitrötre i angeic hna hamën nyine ithuemacany, haawe, tro la atr a hetrenyi la ketre aqane trotrohnine hna eköthe hune la Tusi Hmitrötr. Maine jë tro fe la ketre atrene la fami i angeic ka atre hnyawa la qene hlapa i angeic memine fe la qene hlapa së matre troa ujëne koi angeic.
Loi e eje pala hi ngöne la mekuna i epuni la aja hna troa eatrën, ene la troa inine la itre atr; me xatuane la atr ka drenge la maca troa hane sine la itre icasikeu ne la ekalesia i epuni e pëkö ekalesia ngöne la qene hlapa i angeic. Maine tro angeic a caas memine pala hi la itre Keresiano, haawe, nyine ithuecatre lai koi angeic, nge troa xatua angeic troa kökötr ngöne la götrane la ua.
Maine tru catre ngöne la teritoare ne la ekalesia la itre atr ka qaja la ketre qene hlapa, ka loi tro la itre qatre thup a eköthe la huliwa ne cainöj matre troa hamëne la ixatua ngöne la götrane la ua. Maine jë troa nyimutre la itre atr ka qaja la ketre qene hlapa, nge angatr a lapane la teritoare ne la luetre maine nyimu ekalesia ezin. Ame e cili, tre, tro la itretre thupëne la sirkoskripsio a xatuane la itre qatre thup troa xötrethenge la itre ithuemacanyi hna hamën hnene la filial, matre aijijën la itre ekalesia cili troa ce huliwa ngöne la huliwa ne cainöje trootro. Ame ngöne la itre xaa ijin, ijije hi troa kuca la ketre cainöj maine ketre ini ne La Tour de Garde (Ita Ne Thup) ngöne la qene hlapa cili matre troa wang la etrune la itre ka sine la itre icasikeu cili.
Ijije hi tro sa eköthe la kete gurup ka qaja la ketre qene hlapa e eatre asë la itre hna amekötine celë: 1) Trotrohnine hnyawa la maca ka loi ngöne la qene hlapa cili hnene la itretre cainöj maine itre atr ka hetre hni ne ajan kowe la nyipici, 2) thaa jole kö kowe la ketre qatre thup ka maca maine ketre drikona pena troa elemekene la gurup me xomiujine la caa icasikeu ngöne la wiik, nge 3) hetrenyi la ketre lapa ne la itre qatre thup ka ijij troa ixatua kowe lai gurup. Maine hna eatrëne asë hi lai itre hna amekötine cili, troa thuemacane la filial matre troa kapa lai gurup me hamëne la itre ithuemacany.
Ame la itre pane icasikeu hna kuca ngöne la nöjei wiik hnene la gurup, tre, ene la Ini Tus. Ame hë thupene lai, ijije hi tro la itre qatre thup a kapa matre troa eköthe la itre xaa icasikeu, tune la cainöj kowe la ka ala nyim memine la ini ne La Tour de Garde (Ita Ne Thup). Ijije hi troa kuca la itre xötre qa hnene la itre trejin ngöne la qene hlapa i angatr, ngo troa hnen ngöne la ketre hnahag ne la Uma Ne Baselaia; e ka hape, ijije hi troa elemekene hnene la ketre qatre thup maine ketre drikona ka ithanatane hnyawa la qene hlapa, matre ijije hi tro angeic a hamë eamo ngöne la ijine ini. Ijije mina fe troa eköthe la itre icasikeu göi cainöje trootro, thatraqane lai gurup. Itre hna amekötine lai kowe la nöjei qene hlapa.
Loi e tro la itre atrene la gurup a ce huliwa memine la lapa ne la itre qatre thup ka elemekene lai gurup. Loi e tro la itre qatre thup a hamëne la itre eamo ka lolo me ketre thele matre troa aejëne la itre hna ajan hnene la gurup. Ame ngöne la kola wange la ekalesia hnene la atre thupëne la sirkoskripsio, tro angeic a ce cainöj memine lai gurupe cili, nge tro angeic a iupi fë koi filial la ketre hnepe mekun ngöne la aqane kökötr lai gurup memine la itre ka nyipi ewekë koi angatr. Maine tro asë hi la itre ka cainöj ngöne lai teritoar a trongëne la itre eamo qa hnine la Tusi Hmitrötr me xötrethenge la hna amekötine hnei Akötresie, haawe, tro ha atrune la ëje i Iehova.—1 Kor. 1:10; 3:5, 6.
ITRE TERITOAR KA NYIMU QENE HLAPA NGÖN
Ame ngöne la itre götran ka nyimutre ne la nöj, loi e tro la itretre cainöj a isa ithanata kowe hmekuje hi la itre atr ka qaja la qene hlapa i angatr, pine laka hna isa thawa ha la itre teritoar thenge la itre qene hlapa hna ithanatan. Ame koi itretre thupëne la huliwa ne cainöj ne la itre ekalesia ka kuca la itre teritoare cili, tre, ijije hi tro angatr a eköthe la ketre aqane troa kuca la teritoar me eatrongëne la itre atr ka hetre hni ne ajan kowe la ekalesia ka ijij. Ka nyipi ewekë lai, pine laka, canga tro hi la itre ka cainöj ka sin la itre ekalesia ka ithanatane la itre qene hlapa cili, a ce kuca lai teritoar ka caas ngöne la caa ijin, nge thaa ajane kö së troa “nyi jolene la maca ka loi Keriso.”—1 Kor. 9:12.
Ame ngöne la angatr a cainöj e cahu gojeny maine ngöne la nöjei ijine pena, ijije hi tro la itre trejine a xometrongëne la itre itus ngöne la nyimu qene hlapa. Ngo ame la angatr a cainöj ngöne la itre hnalapa trootro, tro angatr a tro fë la itre itus hna ujën ngöne la qene hlapa ne la ekalesia hnei angatr hna sin. Mekune hnyawa kö së laka ame ngöne la itre götrane cili, tre, hna athipe hë la itre teritoar thenge la qene hlapa, matre tro la itretre cainöj ka hamëne la itre itus a hëne la itre atr ka drei angatr a hane sin la itre icasikeu hna eköth ngöne la qene hlapa hnei angatr hna trotrohnine hnyawa maine hnei angatre pena hna nyipi ajan. (1 Kor. 14:9) Maine tro sa thele troa cainöje hnyawa kowe la itre atr ka trotrohnin maine ka ajan la qene hlapa ne la ekalesia së, ijije hi tro sa xatua angatr matre tro angatr a hane mel.
TROA CAINÖJ MEMINE LA GURUP
Ame la itre Keresiano ka sa xepu hë koi Akötresie, tre, hnëqa i angatr troa qaja la maca ka loi kowe la itre atr. Nyimu aqane tro angatr a eatrëne la hnëqa cili; ngo ala nyimu the së la itre ka madrine troa ce cainöj memine la itre xan. (Luka 10:1) Celë hi matre kola eköthe hnene la itre ekalesia la itre icasikeu göi cainöje trootro, e mecixeni me sabath tune mina fe ngöne la wiik. Ame mina fe la itre drai ne mano, tre, celë fe itre ijine ka lolo catr troa ce cainöj memine la gurup, pine laka nyimutre la itre trejine ka thaa huliwa kö. Tro pe a thupëne matre ame la itre drai memine la itre hawa ne icasikeu göi cainöj, tre, ka loi hi kowe la itretre cainöj. Ijije hi troa hnen la itre icasikeu cili ngöne la Uma Ne Baselaia, me ngöne la itre hnalapa hna Ini Tusi ngön maine ngöne pena la itre xaa götran ka lolo kowe la itre trejin.
Ame ngöne la itre ijine icasikeu cili, tre, ijije hi troa hnëkë matre troa xatuane la itre ka hnyipixe ngöne la nyipici maine itre ka cainöje pena ka thaa maca hnyawa kö. Ketre, hetrenyi la itre xaa kepin matre, ka lolo e itre xaa ijin troa upe la lue trejin maine troa nango ala nyim pena troa ce cainöj ngöne la itre xaa götran ne la teritoar. Eje hi lai laka, ame la itre ka cainöje tune lai, tre, hetrenyi pala hi la ixatuanekeun me ithuecatrekeu. Ngacama epuni a mekune troa cainöje caas, ngo ka lolo catr tro epuni a tro kowe la hna icasikeu göi cainöj, ke, tro fe hë epuni a ketre ithuecatre kowe la itre atrene la gurup. Ame la troa atre laka, itre xan a hane sin la huliwa ne cainöj ngöne la teritoare ka caas, tre, celë hi ka troa nyi ecatre i epuni lai.
Loi e tro sa xötrethenge la tulu hna amë pe hnei Iesu memine la itre aposetolo. Thaa tro pi kö sa luelue laka, tro Iehova a amanathithine la trenge catr hne së hna kuca matre troa cainöjëne hnyawa la huliwa ka sisitria, la troa cainöjëne la maca ka loi ne la Baselaia.—Luka 9:57-62.