Hna Hnëkëne Troa Kuca La Aja i Iehova,
Mekene 8
Itre Hlue Ne La Maca Ka Loi
HNEI Iehova hna hamën la ketre tulu ka pexej nyine tro sa xötrethenge, ene laka hnei Nyidrëti hna upe la Hupuna i Nyidrëti a tro celë fen. (1 Pet. 2:21) Ame ngöne la kola xötrethenge Iesu hnene la ketre atre dreng, haawe, nyidrëti a xatua angeic troa cainöjëne la maca ka loi; kösë ketre hlue i Akötresieti fe hë. Hnei Iesu hna qaja la ixatua ngöne la götrane la ua hna troa kapa qa ngön; öni nyidrë: “Trohemi koi ni, nyipunieti asë ange ka huliwa me hace, nge tro ni a amanonyi nyipunie. Xomejë la nyine isilikeunge hui nyipunie me inine theng [“me hane atre drei ni”]; ke menyike ni, nge ipië la hning; nge tro nyipunieti a öhne la hna mano thatraqane la ite u i nyipunie.” (Mat. 11:28, 29) Ame asë hi la itre ka xemine la ihë celë, tre, öhne asë hë angatr laka, thaa tria kö lo itre hnei nyidrëti hna thingehnaean!
Qa ngöne laka nyidrëti la hlue ka tru i Akötresie, haawe, hnei Iesu hna könën la itre atr troa xötrethenge nyidrë. (Mat. 9:9; Ioane 1:43) Hnei nyidrëti hna ini angatr troa cainöj me upi angatr troa xome la huliwa hnei nyidrëti hna kuca. (Mat. 10:1–11:1; 20:28; Luka 4:43) Ame hë thupene lai, hnei nyidrëti hna upe la itre xan, ala 70 la etrun, troa cainöjën la maca ka loi ne la Baselaia i Akötresie. (Luka 10:1, 8-11) Hnei nyidrëti hna qaja ngöne lo ijine nyidrëti a upi angatr, ka hape: “Ame la ate dei nyipunie, te, kola dei ni ; nge ame la ate methinë nyipunie, te, kola methinë ni ; nge ame la ate methinë ni, te, kola methinëne la ate upi ni.” (Luka 10:16) Iesu hi la a amamane hnyawa la etrune la hnëqa hna troa xome hnene la itretre drei nyidrë; ene la troa nyitrenge ewekëne la Akötresie Ka Draië Catr. Celë mina fe hnëqa lai hna xome uti hë enehila hnene asë la itre ka troa xemine la hë Iesu, ngöne lo nyidrëti a hape, “trojë fe, ma xöte thenge ni,” hnëqa lai hna xome mina fe enehila. (Luka 18:22) Ame asë hi la itre ka xemine la hë celë, tre, Akötresie a nue koi angatr la huliwa ne troa cainöjëne la maca ka loi ne la Baselaia me troa inine la itre atr.—Mat. 24:14; 28:19, 20.
Pine laka hne së hna xemine la hë i Iesu ngöne la easë a tro koi nyidrë me xötrethenge nyidrë, haawe, hna aijijë së hë troa atre Iehova Akötresie me Iesu Keriso. (Ioane 17:3) Hna ini së la itre jë i Iehova. Jëne la ixatua i nyidrë, easë a atreine troa ahnyipixene la itre mekuna së memine la itre thiina së, me trongëne ngöne la nöjei drai la itre wathebo i Nyidrë ka meköt. (Rom. 12:1, 2; Efe. 4:22-24; Kol. 3:9, 10) Hnene la hni ne ole së koi Nyidrë, ene pe easë a nue la mele së koi Nyidrë me amamane lai hnene la hna xome la bapataiso hnine la tim. Kola mama jëne la bapataiso ka hape easë la itre hna acile troa itre hlue.
Thaa tro pi kö sa thëthëhmine laka, loi e tro pala hi sa nyihlue i Akötresie cememine la aqane mele ka pë ethan me hni ka wië. (Sal. 24:3, 4; Is. 52:11; 2 Kor. 6:14–7:1) Jëne la lapaune koi Iesu Keriso, atreine hë së qaja la nyipici nge hetrenyi hë së la mekuthethewe ka lolo. (Heb. 10:19-23, 35, 36; Hna ama. 7:9, 10, 14) Hnei Paulo aposetolo hna ithuecatre kowe la itre Keresiano troa kuca asë la hnei angatr hna atrein troa atrunyi Akötresie; ketre, matre thaa tro kö a athixötrëne la itre xan. Hnei aposetolo Peteru fe hna amamane laka, ijije hi tro la aqane ujë ka loi thenge la aja i Akötresie a hane aijijën la itre ka thaa hmi kö troa hane kapa la nyipici. (1 Kor. 10:31, 33; 1 Pet. 3:1) Nemene la aqane tro nyipunieti a xatuane la ketre atr troa hane aejën la itre hna amekötin matre troa hane ketre hlue ne la maca ka loi?
ITRETRE CAINÖJ KA HNYIPIXE
Ame la nyipunieti a nyiqaane inine la Tusi Hmitrötr memine la ketre atr, xatua angeice jë troa hane qaja la hnei angeic hna inin kowe la itre xan. Tro lai a ithuecatre koi angeic troa cainöj ngöne la nöjei ijin memine la keme me thine i angeic, me itre sine ce elo, me itre sine huliwa me itre xane ju kö. Celë hi ketre ewekë ka nyipi ewekë catr ngöne la kola inine la itre ka xötrei atre la nyipici troa itretre drei Iesu, me ketre hlue ne la maca ka loi. (Mat. 9:9; Luka 6:40) Ame hë la angeic a kökötre trootro ngöne la götrane la ua, nge maca hnyawa ha troa cainöj ngöne la nöjei ijin, haawe, maine jë tro hë angeic a amexeje la aja i angeic troa hane ce cainöje trootro kowe la ka ala nyim, cememine la ekalesia.
HNA THELE THENE LA KA AJAN TROA CAINÖJ
Qëmekene tro nyipunie a hëne la ketre atr troa ce tro me nyipunie troa xötrei hane cainöj maine troa hamëne pena la rapor ne hna cainöj ngöne la ekalesia, nyipi ewekë tro angeic a pane eatrën la itre hna thele thei angeic. Eje hi lai laka, ame la atr ka ce cainöj me easë, tre, angeice lai a amamane koi nöjei atr asë ka hape, angeic a caas memine la ekalesia ne la itre hlue i Iehova; kösë kolo hi lai a amamane ka hape, ase hë angeic nyiqaane trongëne ngöne la mele i angeic la itre trepene meköti Iehova, nge pëkö ejolen tro la ekalesia a atrehmekunyi angeic a ketre ka cainöje hë hna thaa bapataisone petre kö.
Qa ngöne laka epuni pala hi a inine la Tusi Hmitrötr memine la ketre atr me ce ithanatane me angeic la itre trepene meköt, haawe, tro hë epuni a atre la itre aqane mele i angeic. Maine jë tro hë epuni a öhne laka angeic a trongën la itre hnei angeic hna inin. Ngo eje hi lai laka tro la itre qatre thup a ce tro me epuni matre troa ce ithanatane me angeic la itre xaa götrane ne la mele i angeic, qëmekene tro epuni a hë angeic troa ce cainöj me ce anyipicine me epun.
Qanyine la atre thup perezida troa iën la lue qatre thup (troa sine lai hnene la ketre atrene lo Kometr Ne Huliwa Ne La ekalesia) matre troa ce ithanatane la götrane cili. Loi e troa ce wange la itre mekune celë:
● Kolo kö a amamane hnene la itre trenge ewekë i angeic laka angeic a atrehmekune ka hape, Wesi Ula i Akötresieti la Tusi Hmitrötr? (2 Tim. 3:16)
● Atre kö angeic me kapa la itre trepene ini qa hnine la Tusi Hmitrötr, ene pe ame la kola hnyinge koi angeic, tre, kola troa sa hnei angeic hmekune la itre hna qaja hnei Tusi Hmitrötr ngo thaa thenge kö la itre sipu mekuna i angeic maine itre ini ne la itre hmi ka thoi? (Mat. 7:21-23; 2 Tim. 2:15)
● Maine pëkö ejolen göi mec me ngöne la aqane mele i angeic, haawe, angeice kö a drengethenge la hna amekötine hnei Tusi Hmitrötr, la troa ce memine la itre hlue i Iehova ngöne la itre ijine icasikeu ne la ekalesia? (Sal. 122:1; Heb. 10:24, 25)
● Atre fe kö angeic la hna qaja hnei Tusi Hmitrötr ngöne la kuci ngazo, me nyi xetë, me nyimu föe me ce meköl me ketre trahmany ngo ketre trahmanyi hi maine ketre föe ngo ketre föe hi? Tune kaa angeice kö a xötrethenge la itre trepene meköt ngöne la mele i angeic? Nge maine angeic a ce mele memine la ketre atr, hapeu, ase je hë nyidroti faipoipo ngöne la mus? (Mat. 19:9; 1 Kor. 6:9, 10; 1 Tim. 3:2, 12; Heb. 13:4)
● Angeice kö a metrötrëne la hna wathebon hnei Tusi Hmitrötr göi iji menu la kahaitr? (Efe. 5:18; 1 Pet. 4:3, 4) Hapeu ka ufi sixa angeic maine ka xome pena la itre xaa ewekë ju kö ka adrone me angazone la ngönetrei? Hapeue fe lo itre ewekë thaa hna nue kö troa xom hnei droketre nge ka musinën la mele ne la atr, ka hane kö angeic xome itre ej, tune lo itre dorog? (2 Kor. 7:1)
● Trotrohnine kö angeic la enyipiewekëne la troa kötrene la itre sine elo ka ngazo? (1 Kor. 15:33)
● Hane kö angeic tro trij palua lo itre hmi ka thoi? Angeice pala kö a hane sin lo itre icasikeu ne itre ej, me hane sine fe la itre huliwa ne itre ej me hane sajuëne itre ej? (2 Kor. 6:14-18; Hna ama. 18:4)
● Hapeu, thaa sine hë angeic lo kuci politik ne la fene enehila? (Ioane 6:15; 15:19; Iako. 1:27)
● Angeice kö a lapaune kowe la itre hna qaja hnei Tusi Hmitrötr ngöne Isaia 2:4 göne la itre ewekë ne la itre nöj, nge angeice kö a mele thenge la itre trenge ewekë cili?
● Aja i angeice kö troa hane ketre Atre Anyipi Iehova? (Sal. 110:3)
Maine thaa xecie hnyawa kö la pengöne la atr ngöne la itre xaa hnying, tro angatr a sipo angeic troa goeën la itre xaa xötr ne la Tusi Hmitrötr hna hamëne hë me hamë mekune ngön matre tro angeic a trotrohnine hnyawa la aliene itre ej. Loi e tro angeic a trotrohnine laka, maine angeic a ajan troa hane ce cainöj memine la Itretre Anyipici Iehova, nyipi ewekë tro angeic a mele thenge la itre hna amekötine hnine la Tusi Hmitrötr. Tro la itre mekune hnei angeic hna hamën, a xatuane la itre qatre thup troa atrehmekune maine angeice fe hë a hane eatrën la hna thele thei angeic matre troa nyiqaane hane cainöjëne la maca ka loi.
Maine ka eatrëne fe hë angeice la itre hna amekötin, loi e tro la itre qatre thup a kapa lai atr ka ajane troa hane ce cainöj memine la Itretre Anyipici Iehova. (Rom. 15:7) Troa xatua angeic troa nyiqaane cainöj me hane hamëne la rapor ne hna cainöje i angeic ngöne la pune treu. Tro la itre qatre thup a qaja koi angeic ka hape, ame ngöne la kola kapa la ketre hnainin matre troa ketre atre cainöj hna thaa bapataisone petre kö, nge kola hane xötrei hamën la rapor ne hna cainöj, haawe, e cili kola kuca la ketre pepa hna hape, Activité du proclamateur (Fichier de la congrégation); kola amë la ëje i angeic me amë hnine la dosie ne la ekalesia. Troa thuemacanyi angeice hnyawa laka kolo asë hi a wanga atrune hnene la itre qatre thup la huliwa ne la itretre cainöj ngöne la nöjei treu.
Ame ngöne la easë a thele troa atrepengöne hnyawa la ka xötrei cainöj, nge easë a wanga atrune hnyawa la hnei angeic hna kuca, tro ha hetre thangane ka loi koi angeic. Tro lai a upi angeic troa catre nyihlue i Iehova me hamëne pala hi ngöne la nöjei treu la rapor ne hna cainöj.—Fil. 2:4; Heb. 13:2.
E öhne hnyawa ha hnene la itre qatre thup laka, kola eatrëne hnene la hnainin la itre hna amekötin göi troa hane cainöje trootro, haawe, tro hë angeic a kapa la ketre itus hna hape, Organisés pour faire la volonté de Jéhovah. Thupene la hnei angeic hna hamën la pane rapor ne cainöje i angeic, tro ha hane thuemacane la ekalesia ka hape, ketre atre cainöje fe hë angeic hna thaa bapataisone petre kö.
IXATUA KOWE LA ITRE THÖTH
Ijije fe kowe la itre nekönatre troa hane trongëne la itre hna amekötin göi troa cainöjëne la maca ka loi. Hnei Iesu hna hane kapa la itre nekönatr ka tro koi nyidrë, nge hnei nyidrë hna amanathithi angatr. (Mat. 19:13-15; 21:15, 16) Ngacama itre keme me thine la atrekë hnëqan la itre nekö i angatr, ngo maine jë troa ajane fe hnene la itre xaa atrene la ekalesia troa xatuane la itre thöth ka ajane troa hane cainöjëne la maca ka loi. Maine hetre nekö i nyipunie, tro la tulu ka loi hnei epuni hna hamën ngöne la hna cainöje trootro, a xatua angatr troa catre ngöne la huliwa ne cainöje trootro. Maine ka lolo la aqane ujë ne la ketre nekönatr nge eje e kuhu hni angeic la ajan troa amamane la lapaune i angeic, ene la troa qaja la maca ka loi kowe la itre xaa atr, nemene la itre xaa nyine tro sa kuca matre troa xatua angeic?
Ka loi e tro la keme maine thin a tro troa wange la ketre qatre thup, ketre atrene la Kometr Ne Huliwa Ne La Ekalesia, matre troa atrehmekun maine kola hane eatrëne hnene la nekönatr la itre hna thele thei angeic. Tro la atre thup perezida a wange matre tro la lue qatre thup (ame la ketre e nyidro, tre, ketre atren la Kometr Ne Huliwa Ne La Ekalesia) a ce icasikeu memine la nekönatr me lue keme me thine i angeic. Maine hetrenyi thene la nekönatr la atrehmekune ne la nyipici hna nyitrepene hnei Tusi Hmitrötr me amamane ka hape, angeic a ajan troa hane cainöjëne la Baselaia, kolo hi lai a amamane ka hape nyën a kökötre hnyawa ngöne la ua. Thupene la hna goeëne la itre ewekë cili, memine la itre hna amekötin ka ceitun memine lo itre hna thele thene la itre ka tru, tro ha atre hnene la lue qatre thup maine ijije hë troa hane kapa la nekönatr ceitun me ketre atre cainöj hna thaa bapataisone petre kö.—Luka 6:45; Rom. 10:10.
SA XEPU ME BAPATAISO
Maine hetrenyi hë thei nyipunie la nyipi atrehmekun, nge epuni fe hë a hane amamane la ihnimi epuni koi Akötresie hnene la hna trongëne la itre hnei Nyidrëti hna amekötin me hane cainöje trootro, haawe, loi e tro fe a thele troa acatrene la itre aqane imelekeu i epuni me Iehova. Troa tune kaa? Troa sa xepu koi Nyidrë jëne la thith me nyihatrene lai hnene la hna bapataiso hnine la tim.—Mat. 28:19, 20.
Ame la troa sa xepu, tre, ewekë hna ketre amë kö thatraqane la ketre huliwa ka hmitrötr. Ame la troa sa xepu koi Akötresie, tre, ene la troa ithanata koi Nyidrë jëne la thith, me isisinyikeu me Nyidrë laka, easë a troa xome la mele së matre nyihlue i Nyidrë me xötrëne hnyawa la itre jë i Nyidrë, me thili koi Nyidrëti hmekuj epine palua. (Deu. 5:9) Celë hi aqane tro lai a sa xepu koi Akötresie. Troa isa axecië mekun. Thaa qanyi ketre kö troa sa xepu thatraqai epun, isa qanyi së kö isa ala caas.
Thaa eje hmekuje kö la troa qaja koi Iehova ngöne la gaa sihngödre laka, epuni a ajan troa nyihlue i Nyidrë. Nyipi ewekë tro fe nyipunie a amamane kowe la itre xaa atr ka hape, ka sa xepu fe hë epuni koi Akötresie. Nyipi ewekë troa amamane lai koi nöjei atr hnene la hna bapataiso epuni hnine tim tui Iesu. (1 Pet. 2:21; 3:21) Loi e tro epuni a fe amamane la aja i epuni kowe la atre thup perezida ne la ekalesia ne la Itretre Anyipici Iehova hnei epuni hna ce icasikeu memin? Tro hë nyidrë a wange matre tro la itre qatre thup a ithanata me epun matre troa xecie hnyawa koi angatr ka hape, epuni a trongëne la itre hna amekötin hnei Akötresie göi troa xome la Bapataiso. Maine epuni a aja itre xaa ithuemacany, wange hmaca ju la götran hna hape, “Drei La Ithuemacanyi Koi Nyipunie Itretre Cainöj hna Thaa Bapataisone Petre Kö” götrane 180-2 ne la itusi celë, me “Hnyinge Thatraqai Itre Ka Ajane Troa Xome La Bapataiso,” götrane 182-215.
ITRE RAPOR NGÖNE LA AQANE KÖKÖTRENE LA HULIWA NE CAINÖJ
KETRE ithuecatre ka tru pala hi kowe la itre hlue i Iehova la kola traqa la itre rapor göne la hmi ka wië e cailo fene hnengödrai ngöne la itre macatre ka ase hë. Qaane lo Iesu a qaja amamane kowe la itretre drei nyidrë laka, tro ha cainöjëne la maca ka loi e cailo fen, haawe, kola wanga atrune hnyawa hnene la itre nyipi Keresiano la aqane trongene la huliwa cili.—Mat. 28:19, 20; Mar. 13:10; Ite hu. 1:8.
Hna nyipi ewekën ekö hnene la itre pane Keresiano la itre rapor göne la aqane kökötre ne la huliwa ne cainöj. (Mar. 6:30) Haawe, kola thuemacanyi së hnene la tusi Ite Huliwa laka, ame lo kola nenge la uati hmitrötr hune la itretre dreng ngöne lo Penetekos, hetrenyi la 120 lao atr. Canga elë hi la etrun, 3 000, nge thupene lai 5 000. Kola ithuecatre la ketre rapor me amamane ka hape, hnei “Iehova hna nyi xane koi angat’ o drai la ite ka troa mel,” nge ketre laka “kösau la nöjei ate huj’ a hane kapa la lapaun.” (Ite hu. 1:15; 2:5-11, 41, 47; 4:4; 6:7) Xecie hnyawa koi së laka hetre ithuecatre göne lai itre aqane kökötre la huliwa, hna kapa hnene la itretre dreng. Hna upi angatr hnene lai itre rapore cili ka lolo, troa catre xome la hnëqa hnei Akötresieti hna hamëne koi angatr, ngacama kola icilekeu me angatr hnene la itre hene hmi ne Iudra.
Ame ngöne la itre macatre 60 koi 61 M.K., hnei Paulo hna cinyihane la tusi nyidrë koi angetre Kolose ka hape ame la maca ka loi, tre, kola traqa kowe “la fene hnengödrai asëjëihë ; me kola wa nyimute,” kösë hna “cainöjëne kowe la nöjei ate asëjëihë e celë fen.” (Kol. 1:5, 6, 23) Hnene la itre pane Keresiano hna drengethenge la Wesi Ula, nge hna hamë angatr hnene la uati hmitrötr la trenge catr troa tro xome hnyawa la huliwa ne cainöj e cailo fen, qëmekene la pune la fene i angetre Iudra ngöne lo macatre 70 M.K. Celë hi ketre hnëqa hna mekune ka hape thaa tro kö a eatrën. Drei la ketre ithuecatre ka tru kowe la itretre catre cainöj, ngöne laka hna thuemacanyi angatre pala hi la itre hna kuca ha!
Ketre tune mina fe enehila, kola thele hnene la organizasio i Iehova troa hamën la itre rapor ka lolo ne la huliwa ne cainöj; kola eatrën lo hna perofetan ngöne Mataio 24:14, ngöne la kola hape: “Tro ha cainöjëne la maca ka loi celë ne la baselaia e cailo fene nyine anyipicine kowe la nöjei nöj ; ame hna traqapi la pun.” Pine laka ase hë së sa xepu koi Akötresie troa nyihlue i Nyidrë, haawe, hetrenyi la ketre huliwa nyine tro sa canga kuca. Nyipi ewekë tro sa isa canga thele troa eatrëne eje hnyawa, qëmekene troa traqa la pun. Tro kö Iehova a kuca matre troa eatre la huliwa cili, nge maine tro sa hane kuca la huliwa cili, tro ha kepe së hnei Nyidrë.
LOI E TROA HAMËN LA RAPOR NE CAINÖJE SË
Nemene la itre ithuemacany nyine tro sa hamëne hnyawa ngöne la rapore së? Eje e hnine la rapor ne hna cainöje trootro hna hamëne hnei organizasio, la itre nyine tro sa nyialien, göne la hne së hna kuca ngöne la huliwa ne cainöj. Ngo hetrenyi kö ngöne la itre xaa ijin la itre xaa ithuemacanyi nyine xatua së hna hamën hnine la Huliwa Ne Baselaia me itre xaa mekune e cahu fen.
Fene la itre hna cinyihan hna hape “ Livres ” (Itus), “ Brochures ” (Boroshür), “ Périodiques ” (Zonal), tre, kola amamane la etrune la itre itus hnei epuni hna hamëne kowe la itre atr ka thaa sa xepu petre kö koi Akötresie me ka thaa xome petre kö la bapataiso.
Ame fene la hna cinyihan hna hape “ Nouvelles visite ” (Iwaihmaca), cinyihane jë la etrune la itre vizit hnei epuni hna kuca matre troa ahlëne la aja ne lo itre atr ka thaa itre Temoë i Iehova kö angatr. Troa nyiqaane e lai ketre vizit, e hna wange hmaca lo lai atr ka hetre hni ne ajan ngöne la xötrei iöhny. Maine kola sipo epuni hnene la Kometr Ne Huliwa Ne La Ekalesia troa inine la Tusi Hmitrötr memine la ketre trejine trahmanyi maine föe ka nango nanazije hë, haawe, ijije hi tro epuni a e lai ceitune me ketre vizit. Ketre, nyipi ewekë troa e fe la itre vizit hnei epuni hna kuca kowe la itre atr hna hnyipi bapataison, ka nango aja ixatua petre kö. Thaa easë hmekuje kö a e la ketre vizit ngöne la easa tro troa wange la ketre atr ngöne la hnalapa i angeic, ngo ngöne mina fe la easa cinyanyi koi angeic, me hë angeic ngöne telefon, maine ngöne la kola tro fë itus koi angeic, maine jë kolo ketre zonal hna kapa pinën. Ame ngöne la nöjei epuni a xomiujine la ketre etid, loi e tro epuni a e ej ceitune me ketre vizit.
Ngacama hna majemine acaa kuca la etid ngöne la nöjei wiik, ame ngöne la rapor hna hamën e nöjei treu, tre, tro hi a hamën la caa etid. Ame ngöne la itre nöj ka xome la itre pepa, hna hape, Rapport d’étude (Rapor göi etid), tro la itretre cainöj a cinyihan la etrun la itre etid hna kuca ngöne la treu memine la itre atr, laka, thaa Itre Temoë kö ka sa xepu hë me xome la bapataiso, maine ka tune pena la itre atr hna qaja ngöne la paragaraf thupen. Thupene la hna nyialiene hnyawa la itre rapor, cinyihane ju la etrune la itre etid e cahu fen ngöne la götrane maca ne la rapor ne hna cainöj. Ame la etrune hnei epuni hna troa cinyihan ngöne la rapore ne hna cainöje trootro, tre, celë hi etrun la itre Rapport d’étude (rapore göi etid) hnei epuni hna troa nyialien.
Nyipi ewekë troa hamëne hnyawa la itre “ Heures de prédication ” (Hawa ne hna cainöj). Eje hi lai laka, ame la xötrehnëewekë celë, tre, kola qaja la etrune la traeme hnei epuni hna xom troa cainöje ngöne itre hnalapa trootro, me e cahu gojeny, me troa iwai hmaca, me troa kuca la itre etid, maine troa cainöj ngöne la nöjei ijin, maine kowe la ka ala nyim; itre hna kuca lai matre troa cainöje kowe la itre atr laka, thaa itre Temoë kö ka sa xepu hë me ka thaa xome la bapataiso. Ijije fe tro epuni a e la traeme hna xome ngöne la kola sipone hnene la Kometr Ne Huliwa Ne La Ekalesia troa etid memine la itre trejine trahmanyi me föe ka nanazije ngöne la götrane la ua. Ketre, ka loi mina fe troa hamëne pala hi la traem hnei epuni hna xom matre troa etid memine lo itre hna xötrei bapataison nge ka ajane pala kö troa xatua angatr ngöne la götrane la ua. Maine hetre kepin ka aijijën la lue trejin troa cainöj, haawe, tro nyidroti a e la etrune la traem hnei nyidroti hna xom; ngo eje hi lai laka, loi e tro nyidroti a ithanata me cainöj. Thaa hna e kö la traeme hna xome kowe la itre xaa huliwa ka nyipi ewekë. Tune la traeme hna xom troa hnëkë troa cainöj, me troa sin la ketre icasikeu göi cainöj, me traem hna xom troa tro kowe la teritoar me troa bëeke hmaca.
Qa ngöne lai, kola nyiqaane la traeme ne cainöj ngöne la epuni a nyiqaane troa cainöj, nge kola nyipun ngöne la kola cainöj tixenuë (maine ngöne la eö a thele troa ithanata memine la ketre atr me umuthe e cili la traeme ne cainöje i eö). Thaa tro fe kö a e la traeme ne pane xen maine nango iji ka menyik ngöne la ijine kola cainöje trootro. Hetre etrune hawa mina fe nyine troa eatrën hnene la itre pionie ka ixatua, pionie lapaa, me pionie hut. Ame koi itretre cainöj, kola ithuecatre mina fe koi angatr troa amë panëne pala hi la itre aja ne la Baselaia, me troa catre cainöje pala hi thenge la ka ijije koi angatr. Ngo eje hi lai laka, ame asë hi la itre ka sa xepu koi Iehova matre troa nyihluei Nyidrë, tre, angatr a catre troa cainöj cememine la hni ka pexej. (Kol. 3:23) Tro la itre trejine trahmanyi a hamën la etrune la traem ne cile fë cainöje angatr, nge ame keme maine thin, ijije hi tro nyidroti a e la traem hnei nyidroti hna xome matre troa etid e nöjei wiik memine la itre nekö i nyidro ka thaa sa xepu petre kö koi Akötresie; maine caa hawa ngöne la wiik.
Ame göi traeme ne hna cainöj, tre, loi e troa pexeje la itre hawa (maine 10 h 40 mn, tre, amë ju hi la 10h, nge xome jë pë hë la 40 menetre thatraqai rapore ne treu hnapin). Ngo troa ketrepengöne kowe la itretre cainöj ka qatre catre hë, ka lapa hnalapa pala pë hë maine ngöne ketre uma ne inyië, maine ka trene meci pena. Ijije hi tro angatr a hamëne la rapore i angatr, maine 15 lao menetr hna kuca, haawe, 15 mn hna troa cinyihan. Maine 15 hi lao menetre ne cainöj ngöne la treu, haawe, nyipi ewekë tro angatr a hamën la traeme cili matre troa catre e angatr ceitune me ketre atre cainöjëne la Baselaia. Hna amekötine mina fe la aqane huliwa celë kowe la ketre trejine ka nango jole troa cainöj, pine laka, ka wezipo maine ka eatre pena matre caas maine itre treu ne troa pane inyië. Ngo eje hi lai laka, ame la hna amekötine cili, tre, thatraqane hi la itre trejine laka thatreine pala ha angatr troa hane xome la huliwa ne cainöj. Qanyine la Kometre Ne Huliwa Ne La Ekalesia troa wang maine ijije kowe la ketre trejin lai hna amekötine cili.
PEPA ACTIVITÉ DU PROCLAMATEUR (PEPA NE HULIWA NE LA ITRETRE CAINÖJ)
Ame ngöne la nöjei treu, epuni a hamën la itre hawa hnei epuni hna kuca; troa cinyihane itre ej hnine la pepa ne huliwa ne la atre cainöj hna hape activité du proclamateur (Fichier de la congrégation), hna xeen memine la itre xaa pepa ne la ekalesia. Ame la itre pepa cili, thaa kowe kö la itretre cainöj. Maine epuni a troa saze ekalesia, thaa tro pi kö a thëthëhmine troa thuemacane la itre qatre thup. Troa sipone hnene la seketere ne la ekalesia hnei epuni hna tro kow, troa iupi fë la dosie i epun, ene lo Activité du proclamateur (Fichier de la congrégation). Maine atre hi hnene la seketere ne lo ekalesia i epun la ëjen la ekalesia hnei epuni hna troa tro kow, haawe, tro angeic a iupi fë mekötine la pepa ne huliwa i epun cememine la ketre tusi göi epun. Kolo hi lai a aijijën la itre qatre thup ne la ekalesia i epuni ka hnyipixe, troa hamëne la ixatua hnei epuni hna ajan ngöne la götrane la ua. Maine tro epuni a pane paatr ngöne la köni treu qa ngöne lai ekalesia i epun, haawe, loi e tro epuni a hamëne pala hi la rapor ne hna cainöje i epuni kowe lo ekalesia i epun.
PINE NEMEN MATRE EASA HAMËN LA RAPOR NE HNE SË HNA CAINÖJ
Hnei epuni kö hna lapaa thëthëhmine troa hamën la rapor ne hna cainöje i epun? Maine jë easa ajan troa lapaa amekunë së e itre xaa ijin. Ngo, maine troa eje hnyawa pala hi la aqane waiewekë ka loi ngöne la troa hamën la rapore ne hne së hna cainöj, nge easa trotrohnine hnyawa fe la kepine matre nyipi ewekë troa eatrëne lai, haawe, thaa tro kö a jole tro sa mekune troa kuca hnyawa la rapore së.
Hna hnyinge hnene la itre xan me hape: “Pine laka atre hnyawa hi Iehova la hnenge hna kuca ngöne la huliwa i Nyidrë, hnauëne kö la tro ni a hamën la rapore i eni kowe la ekalesia?” Nyipici, atre hnyawa hi Iehova la hne së hna kuca, nge atre hnyawa fe Nyidrë maine easë a kuca la huliwa së cememine la hni së ka pexej maine easë pena hi a hamëne la ketre hnepe ijine ka coco catr. Ngo, mekune hnyawa kö laka, hnei Iehova hna kuca matre troa cinyihane la etrune la itre drai ne Noa e hnine lo aka memine la itre macatre ne pane tro angetre Isaraela ngöne la hnapapa. Hnei Nyidrëti mina fe hna kuca matre troa cinyihane hnine la itre itus la etrune la itre ka mele nyipici koi Nyidrë memine la itre ka icilekeu me Nyidrë. Hnei Nyidrëti mina fe hna qaja la itre ewekë ka loi hna kuca hnei angetre Isaraela ngöne la angatr a thapa la nöje Kanana, memine la etrune la itre ewekë hna kuca hnene la itretre amekötin ka mele nyipici. Nyipici, hnei Nyidrëti hna hamën la itre ithuemacanyi ka nyimutre göne la itre huliwa me itre hna kuca hnene la itre hlue i Nyidrë. Ame la Nyidrëti a nyijëne la uati hmitrötre i Nyidrë troa cinyihane la itre ewekë celë, Nyidrëti hi lai a amamane hnyawa koi së la mekuana i Nyidrë ngöne la enyipiewekëne la troa meköti me nyipici la itre rapor hna troa kuca.
Kola amamane hnyawa hnene la itre ewekë hna cinyihan hnine la Tusi Hmitrötr, la emekötin me enyipicine la itre rapor hna hamën hnene la nöje ka xome la ëje i Iehova. Maine thaa hnei Tusi Hmitrötre ju hna hamëne hnyawa la etrune la itre ewekë, thatreine jë kö tro sa trotrohnine hnyawa la etrune la itre ewekë cili. Drei cahu itre ceitun: Genese 46:27 me Esodo 12:37; Angete Amekötin 7:7; 2 Ite Joxu 19:35; 2 Aqane lapa ite Joxu 14:9-13; Ioane 6:10; 21:11; Ite Huliwa 2:41; 19:19.
Ame enehila, nyimutre la itre kepin tro sa hamën la itre hawa ne cainöje së. Ngacama thaa easë kö a qaja asë la itre hne së hna kuca ngöne la huliwa së koi Iehova, ngo ame la hne së hna hamën me qaja, tre, ka lolo catre kowe la itre atrene la organizasio i Iehova, me kowe mina fe la itre qatre thup ne la ekalesia së.
Ame e itre xaa ijin, tre, kola amamane hnene la itre rapor laka, loi e tro sa wanga atrune la ketre götrane ne la huliwa ne cainöje së. Kola amamane e itre xaa ijin hnene la itre rapor, la aqane kökötre së ngöne la itre xaa götran la huliwa, ngo ame pë hë ngöne la itre xan, nango co la hna kuca; maine jë kola elë la etrune la itretre cainöj. Haawe, kola aijijën troa ithuecatre kowe la itre trejine maine pena troa senge pena la ketre jol. Troa wanga atrune hnene la itretre thup ka trene hnëqa hnine la ekalesia la itre rapore cili, me thele troa nyinyine la itre jol matre thaa tro kö a ajojezine la aqane kökötre ne la itretre cainöj maine ekalesia asë pena.
Ketre, ame la itre rapor, tre, ka nyipi ewekë catre itre ej göi troa eköthe hnyawa la huliwa ne cainöj. Itre ej a amamane la itre götrane gaa aja ka cainöj, me itre nöj laka hetre thangane la hna cainöj, maine itre götran laka, thaa kökötre menu kö la huliwa ne cainöj; kola aijijën mina fe hnene la itre rapore cili, troa atre la itre itus hna ajan hnene la itre atr matre troa atre la nyipici. Itre eje mina fe a xatuane la organizasio i Iehova troa canga hnëkë e sipo itusi jë elany hnene la itre nöj e cailo fen; matre tro pala hi la itretre cainöje a hetre Tusi Hmitrötr me itus nyine troa tro xome ngöne la hna cainöje trootro.
Nyine ithuecatre koi së la itre rapor. Hapeu, ka madrine kö së la easa drenge la kola qaja la eloine la aqane huliwa ne la itre trejine ngöne la fen asë, ngöne la kola cainöjëne la maca ka loi? Ame la itre rapor ka qaja la aqane kökötrene la etrune la itretre cainöj, tre, itre ej a xatua së troa trotrohnine hnyawa la aqane haöthe la fen hnene la huliwa hna kuca hnene la organizasio i Iehova. Ame göi itre ewekë hna melën hnene la itre trejin, tre, kola akeukawane la itre hni së, me xatua së troa cile catr; itre ej a upi së troa nue la trenge catre së troa cainöj. (Ite hu. 15:3) Qa ngöne lai, nyipi ewekë tro sa ce huliwa hnyawa memine la ekalesia, hnene la hna hamëne pala hi la rapor ne hne së hna cainöj. Celë hi hatrene la ihnimi së kowe la itre trejine me easë e cailo fen. Ketre, celë fe aqane tro së lai a amamane ka hape, easë a lapa fene la organizasio hna acile hnei Iehova.—Mat. 24:45-47.
EASË KÖ A ISA THELE TROA EKÖTHE LA ITRE MEKUN HNE SË HNA AJAN TROA EATRËN
Pëkö ketre kepine ka aijijë së troa goeëne la huliwa ne la ketre me ketre. (Gal. 5:26; 6:4) Isa pengöne kö la itre aqane mele së, matre thaa loi kö tro sa igoeë. Ngo ka loi pe tro sa isa eköthe la itre mekune hne së hna ajan troa eatrën. Celë hi itre ewekë lai ka troa xatua së troa waipengöne hnyawa la itre sipu aqane kökötre së ngöne la huliwa ne cainöje trootro. Ketre, maine ijije hi tro sa eatrëne la itre aja cili thenge la aqane mele së, haawe, tro hë së a madrine ngöne la easa eatrëne itre ej.
LOI E TRO SA HANE SIN LA RAPOR TIXENUË
Ame göne la ketre huliwa ngöne la ua ka nyihatrene la huliwa ne cainöj hne së hna tro fë enehila, kola qaja la ketre rapor hna hamën e ase hë humuthe la huliwa cili. Ame ngöne la hna meköle goeën hnei Perofeta Ezekiela, tre, nyidrëti a öhne la sikisi lao trahmanyi memine la itre jiane isi kola troa lepe anyilanyilane lo Ierusalema ka thoi, ke hna amekötine hë. Nge kolo fe a öhne la hnaasevenene atr; angeic a xome trongën la nyine cinyiany ne la seketere, nge hna upi angeic troa trongën la hna amekötin kola hape: “Trongënejë eö la lapa nyipine Ierusalema, nge tro eö a nyi hatene ngöne la ite göpadi ne la ite ate itete awe me teije latesi pine la ite ewekë ka sisi asë lo hna kuca nyipin’ej.” Thupene la hna nyi hatrene la itre hna nue pe troa mel hnene la seketere ka tro xome la ge ne cinyany, nge hna troa neëne hnene la itre atr ka trene jiane isi nyine ihumuth, hna bëeke hmaca hnei angeic, me hape: “Azeti hë nie longëtine tune lo hnei enëtilai hna upengë nie.”—Ezek. 9:1-11.
Thatre kö së la rapor tixenuë hnei Iehova elanyi hna troa sipo së, göne la huliwa ne cainöj hna kuca ha matre troa eatrëne lo Mataio 24:14. Ngo eje hi lai laka, maine ame ngöne la nöjei treu, easa hamëne hnyawa la itre hne së hna kuca ngöne la hna cainöje trootro, easë lai amamane hnyawa la hni ne ole së kowe la itre hnepe huliwa hna aijijë së troa hane kuca ngöne la hna cainöj. Loi e tro asë hi la itretre cainöj a canga hamën la itre rapor ne hna cainöj ngöne la nöjei pune treu. Troa madrine catr hnene la itre trejin atrekë hnëqane la troa hleme la itre rapor, matre troa canga iupi fë itre ej kowe la filial.
Eje hi laka, Iehova hë a icasikeune nyimenyimën la itre atr hnei Nyidrëti hna troa amelene pe ngöne lo “akötr atraqatr.” Easë a mele ngöne la ijine kola eatr la hna perofetane hnei Isaia, hna hape: “Tro ha ala thausane la ala xalaith, nge tro ha nöje ka cate la ka co ; tro ni Iehova a asaqen’ eje ngöne la ijin’ ej.” (Hna ama. 7:9, 14; Is. 60:22) Pine laka easë fe e hnine la caa lapa ne la itre trejin e cailo fen hna ahnithe kow lo huliwa ne cainöj, haawe, loi e tro sa xome koi së la rapor ne la atr hetre ge ne cinyihan, hna meköle goeën hnei Ezekiela, hna hape: “Azeti hë nie longëtine tune lo hnei enëtilai hna upengë nie.”