Hna Hnëkëne Troa Kuca La Aja i Iehova,

Mekene 7

Itre Icasikeu Ka “Aciane La Ihnim Me Itre Huliwa Ka Loi”

DREI la elolone la itre hna amekötine hna hnëkëne thatraqane la itre Keresiano, matre tro angatr a ce traqa itronyi pala hi troa thili koi Iehova me xome la göxeni ne la ua! Ka nyipi ewekë catre koi së asë troa ce icasikeu matre troa drenge la Wesi Ula i Akötresie, matre troa atre la itre hnei Nyidrëti hna thele the së, me aqane troa nyihlue i Nyidrë. Ewekë la ka loi kowe la itre ka co me kowe mina fe la itre ka tru; ketre ewekë lai ka mama ha ekö thene la nöje Isaraela, nöje ka isisinyikeu me Akötresie. Ame ngöne la nöjei hnaasevenene Pui Ne Xeni Ne Uma Ne Hunuma, hnei Iehova hna jëne Mose troa qaja koi angetre Isaraela, ka hape: “Troa icasinekeune la nöj, ite trahmanyi me fö, me nekönat, me tenyiwa thei ’ö ngöne la ite lapa i ’ö, mate deng, me inin, me qoue Iehova Akötesi nyipunie, me aköte hnine troa kuca la nöjei tenge ewekë asë ne la wathebo celë.”​—Deu. 31⁠:⁠12.

Kola mama laka, ceitune hi enehila me ekö. Kola icasikeu la itre hlue i Akötresie matre troa dreng me ‘inine hnei Iehova.’ (Is. 54⁠:13) Ame ekö e Isaraela, tre, itre ijine madrin la kola ce traqa itronyi troa hmi hnei angetre Isaraela; kola anyipicine lai hnene la itre trenge ewekë i Davita, kola hape: “Ini a madin’ e angat’ a qaja koi ni, a hape, Tro shë kowe la ēnē i Iehova.” (Sal. 122⁠:⁠1) Hnei Paulo aposetolo hna amexeje la ketre kepin matre hetrenyi la madrine së ngöne la easa icasikeu memine la itre trejine me easë Keresiano. Hnei nyidrë hna cinyihane ka hape: “Tro sha imekunekeune mate troa aciane la ihnimi me ite huliwa ka loi.” (Heb. 10⁠:24) Kola aijijëne hnene la itre icasikeu ne la ekalesia kowe la itre pane Keresiano troa atre la ketre me ketre, me troa ithuecatrekeu, nge troa hane kapa fe la itre ixatua qa ngöne la hna ce traqa. Eje mina fe la ewekë cili thene la Itretre Anyipici Iehova enehila ngöne la angatr a ce traqa itronyi troa hmi koi Iehova.

ITRE ICASIKEU NE LA EKALESIA

Tusi Hmitrötr a amamane hnyawa la enyipiewekëne la troa ce traqa itronyi troa thili koi Iehova me atrunyi Nyidrë. (Sal. 26:​8, 12; Mat. 18⁠:20) Ame kowe lo itre atr ka kapa la nyipici ngöne la Penetekos macatre 33 M.K. tre thaa hnei angatre kö hna sixane la ewekë cili. Hnei angatre pala hi hna catre kowe la itre hna inine hnei ange aposetolo, nge “angate pala hi a lapa ce hni ngöne la ēnē o drai.” (Ite hu. 2:​42, 46) Thupene lai, angatr a ce traqa itronyi troa hmi, kola e hnene la itre Keresiano la itre hna cinyihane qaathene la ua i Akötresie, ene lo itre tusi hna cinyihane hnene la itre aposetolo memine la itre xaa atre dreng. (1 Kor. 1:​1, 2; Kol. 4:​16; 1 Thes. 1⁠:1; Iako. 1⁠:⁠1) Kolo mina fe a thithi koi Akötresie hnene la ekalesia. (Ite hu. 4:​24-​29; 20⁠:36) Ame ngöne la itre xaa ijin, kola qaja hnene la itre mesinare la hnei angatr hna melën ngöne la angatr a cainöje trootro. (Ite hu. 11:​5-​18; 14⁠:​27, 28) Kola ce wange mina fe la itre ini qa hnine la Tusi Hmitrötr, memine la aqane eatr la itre hna perofetan. Kola kapa fe la itre eamo thatraqane la aqane ujë ne la Keresiano, me aqane troa kuca la aja i Akötresie. Kolo mina fe a ithuecatre troa catre cainöjëne la maca ka loi.​—Rom. 10:​9, 10; 1 Kor. 11⁠:​23-​26; 15⁠:58; Efe. 5:​1-​33.

Ame ngöne la hneijine së, easa hane xötrethenge la tulu ne aqane eköthe la itre icasikeu ekö ngöne la hneijine i ange aposetolo. Easa wangatrune la ithuecatr hna hamën ngöne Heberu 10⁠:25 ene laka, “thaa tro kö a tije la icasikeu shë tune la thina i ite xan; ngo loi pe troa [“ithuecatrekeu,” MN] nge nue catëne jë e tro nyipunie a goeëne la drai a easenyi hë.” Maine easa ajan tro sa egöcatr ngöne la götrane la ua me nyipici pala hi koi Akötresie ngöne la itre drai tixenuë ne la fene celë ka ngazo, haawe, nyipi ewekë tro sa sine pala hi la itre icasikeu, tre, easë a troa kapa la itre xaa ixatua ka tru. (Rom. 1:​11, 12) Tune la itre Keresiano ne la hneijine i Paulo, easë a mel nyipine la ketre xötr ka qaliqali me ka eni wathebo. Ase hë së xelene la thiina ka thaa ijiji Akötresie, memine la aqane mekune ne la fene ka ngazo celë. (Fil. 2:​15, 16; Tito 2:​12-​14) Ekaa la gaa loi koi së, thaa ngöne kö la easa ce memine la itre hlue i Iehova? (Sal. 84⁠:10) Nge nemene la ka troa hetre thangane ka loi koi së, thaa ene jë kö la troa drenge hnyawa la kola ithanatane la Wesi Ula i Akötresie?

Iehova la Qeqe ne la göxeni ne la ua ka mana nge ka hetre thangane ka loi. (Sal. 145⁠:​14, 15) Jëne la Hupuna i Nyidrë memine la “hlue ka nyipici me ka inamacan,” Nyidrëti a hamëne kowe la organizasio i Nyidrë la göxeni ngöne la ijine ka ijij. (Mat. 24⁠:45) Tune kaa la aqane kapa së isa ala caas la göxen? Kola kapa jëne la itre icasikeu ne la ekalesia hna kuca ngöne la nöjei wiik. Tro sa ce wange la itre icasikeu cili memine la itre manathith hne së hna kapa, e hna ‘aciane [pala hi hne së] la ihnim me itre huliwa ka loi.’

INI NE LA TOUR DE GARDE

Ame la zonal La Tour de Garde annonce le Royaume de Jéhovah, tre, celë hi sipu jën ka nyipi ewekë hna xome hnei Iehova matre tro pala hi la itre hlue i Nyidrë a kapa la göxenine la ua ngöne la ijine ka ijij. Hetrenyi la itre xaa hna cinyihan hnine zonal La Tour de Garde (Ita Ne Thup) ka qatrenge la ketre ini hna eköth hune la Wesi Ula i Akötresie, nge hna hnëkëne matre troa ce ithanatane hnene la ekalesia ngöne la nöjei wiik. Ame la itre mekune hna ce wange hnyawa ngöne la ijine inine La Tour de Garde (Ita Ne Thup), tre, itre ej a enijën la hni memine la mekune ne la itre atrene la ekalesia, me acatrene la lapaune i angatr.

Ame la itre hna cinyihane nyine etid, tre, kola ithanatane la itre topik ka isa pengön. Kolo pala hi a amamane la aqane troa trongëne hnyawa la itre trepene meköti ne la Tusi Hmitrötr ngöne la nöjei drai ne mele së. Itre eje fe a hamëne la trenge catr kowe la itre Keresiano, matre troa cile catr kowe la “ua ne la fen” me kowe la aqane ujë ka sisi ne ej. (1 Kor. 2:​12) Ame la itre aliene la zonal La Tour de Garde (Ita Ne Thup), tre, itre ej a xatua së troa trotrohnine trootro la itre ini qa hnine la Tusi Hmitrötr, me hamëne la itre ithuemacanyi ka nyimutre ngöne la aqane eatre la itre hna perofetan; Iehova la ka amamane trongëne koi së, ene pe kola aijijë së asë troa trotrohnine hnyawa pala hi la nyipici, me troa catre trongëne la jë ne la itre ka meköt. (Sal. 97⁠:11; Ite edomë 4:​18) Kola xatua së hnene la hne së hna sin me qeje mekun ngöne la ijine ini ne la La Tour de Garde (Ita Ne Thup), troa madrin me mejiune kowe la fene ka hnyipixe ka meköt hnei Iehova hna mekune troa acil. (Rom. 12⁠:12; 2 Pet. 3:​13) Kola xatua së mina fe troa eëne la wene ne la ua ngöne la mele së, nge troa eje pala hi la aja së ka catr troa nyihlue i Iehova. (Gal. 5:​22, 23) Kolo mina fe a acatrene hnyawa la lapaune së matre tro sa atreine cile kowe la itre itupath, me troa eköthe la “tepene ka loi nyine thatraqan’ epin” göne matre tro sa “xölehuje la nyipi mel.”​—1 Tim. 6:​19; 1 Pet. 1:​6, 7.

Eje hi lai laka, ka sisitria catre la itre mekune hna ce wange jëne la ini ne la La Tour de Garde (Ita Ne Thup) ngöne la nöjei wiik. Itre ej a xatua së troa kökötre ngöne la götrane la ua, me troa eje the së la nyipici qa hnine Wesi Ula i Akötresie, me troa trongëne ngöne la mele së la itre ini qa hnine la Tusi Hmitrötr, me troa caasi ngöne la ua memine la itre trejine me easë e cailo fen asë. Ngo nemene la nyine tro sa kuca isa ala caas matre tro sa kepe thangane hnyawa la göxeni ne la ua? Nyipi ewekë tro sa hnëkë, me thele la itre xötr ne la Tusi Hmitrötr hna hamën, me troa qeje mekune ngöne la ijine icasikeu. Maine tro sa hane qeje mekun, eje hi lai laka, tro sa hneheene la itre mekune cili, nge tro fe a cile huti la nyipici e kuhu itre hni së. Ketre, troa hetre thangane ka loi mina fe kowe la itre xan, la hne së hna hane qaja amamane la lapaune së memine la mejiune së. Nge maine tro sa hane drenge hnyawa la itre mekune hna hamën, tro ha xecie hnyawa koi së laka, hetrenyi pala hi la itre manathith hne së hna troa kapa ngöne la nöjei wiik qa ngöne la ini ne la La Tour de Gar­de (Ita Ne Thup).

Ame la ini ne la La Tour de Garde (Ita Ne Thup), tre, ej a xatua së tro pala hi a egöcatre ngöne la götrane la ua, me cile catr ngöne la lapaun. Thaa loi kö e troa wange sixane la icasikeu cili. Thaa tro kö sa triane lai hnei Iehova hna amekötine ka nyipi ewekë catr; pine laka, jëne ithuecatre hi lai kowe la nöjei ka traqa lapaa kowe la lapa ne la lapaun.

ICASIKEU KOWE LA KA ALA NYIM

Eje hi laka, ame la Icasikeu Kowe La Ka Ala Nyim, tre, ej a ce tro memine la ini ne la La Tour de Garde (Ita Ne Thup). Ngo isapengöne la aqane tro fë la ini. Ame la ini ne la La Tour de Garde (Ita Ne Thup), tre, kola ce ithanatane la itre hnying me itre mekune nyine sa hnene la itre atren la icasikeu; ame koi Icasikeu Kowe La Ka Ala nyim, tre, kola kuca la ketre cainöj ka ithanatan la ketre taan hna xome qa hnine la Tusi Hmitrötr. Ka lolo catre la icasikeu cili, pine laka, kola troa aejëne la itre aja ngöne la ua ne la itre atr ka xötrei hane sine la itre icasikeu, ngo ene mina fe la itre atrene la ekalesia.​—Ite hu. 18⁠:4; 19:​9, 10.

Maine easë a hëne kowe la icasikeu cili la itre atr ka ajane troa atre la nyipici, memine fe la ka ala nyim, tro hë së a hane xatua angatr troa atrepengöne hnyawa la itre trepene ini qa hnine la Tusi Hmitrötr. Ketre, tro la Icasikeu Kowe La Ka Ala Nyim a aijijëne la itre atrene la icasikeu tro pala hi a hmekëne la itre ini ne la Keresiano, nge troa xatua angatr troa catre kowe la huliwa ne la Baselaia.

Nyimu pengöne topik hna xome matre troa ce wang ngöne la Icasikeu Kowe La Ka Ala Nyim. Ame la itre xaa cainöj tre, itre ej a qaja la itre ini maine itre hna perofetane qa hnine la Tusi Hmitrötr, me itre trepene meköti me itre eamo hna hamën hnene la Wesi Ula i Akötresie thatraqane la mele ne la fami, me itre jol thene la lue trefën, me itre jol hna cile kow hnene la itre thöth, maine itre wathebo pena göi thiina ne la Keresiano. Ame itre xaa cainöj, tre, kola ithanatane la itre hnei Iehova hna xupe ka lolo. Ame itre xan, tre, kola qaja amamane hnyawa la itre tulu ne lapaun, me catre me nyipici e hnine la Tusi Hmitrötr, nge kola hamëne koi së la itre ini nyine tro sa xome thatraqa së enehila. Haawe, kola hamë së hnene la Icasikeu Kowe La Ka Ala nyim la ketre göxeni ngöne la götrane la ua nyine ini koi së me nyine akeukawane la mele së.

Maine easa ajane troa kepe thangane ka loi qa ngöne la icasikeu cili, loi e tro sa sine pala hi, me drenge hnyawa, me thele hnine la Tusi Hmitrötr la itre xötr hna hamën hnene la ka cile fë cainöj me goeëne itre ej ngöne la nyidrëti a e me qejepengöne itre ej. (Luka 8:​18) Kolo hi lai a xatua së troa majeme kowe la itre itusi ne la Tusi Hmitrötr, nge tro fe hë së a atrepengöne eje hnyawa. E mama ha me xecie koi së la itre ewekë hna ithanatan, tre loi e tro sa fedre kowe la itre hne së hna inin me trongëne itre ej ngöne la mele së.​—1 Thes. 5:​21.

Maine nyimu trejine ka cile fë cainöj, haawe, tro la ekalesia a wange matre troa kuca la caa cainöj ngöne la nöjei wiik. Ijije hi troa sipo ka troa cainöj thene la itre ekalesia ezin. Maine thaa tru kö hnei ka cile fë cainöj ngöne la nöj, haawe, loi troa thele matre troa lapaa kuca la itre cainöj e ijij.

Ceitune hi la itre icasikeu hna xomiujine ekö hnei Iesu Keriso, me itre aposetolo i nyidrë me itre sine ce huliwa i angatr, memine la itre icasikeu ne la Itretre Anyipici Iehova enehila. Pëkö ka tro fë cainöj e celë fen ka tui Iesu, sisitria catre kö nyidrë. Tune la hna qaja göi nyidrë: “Pëkö ate ewekë tune lai.” (Ioane 7:​46) Iesu a ithanata cememine la mus, celë hi matre kola ketr la itre ka drei nyidrë. (Mat. 7:​28, 29) Ame koi itre ka drenge la maca i nyidrë, tre, hnei angatr hna kapa la itre manathith ka nyimutre. (Mat. 13⁠:​16, 17) Hna xötrethenge la tulu i nyidrë hnene la itre aposetolo. Ame ngöne Ite Huliwa 2:​22-​36, easa öhne la cainöje ka tru i Peteru ngöne lo Penetekos macatre 33 M.K. Nyimutre la itre atr ka trongëne la itre hnei angatr hna dreng. Ame pë hë thupen, ala nyimu catre la itre ka kapa la itre manathithi ka tru qa ngöne la cainöj hna kuca hnei Paulo e Athenai. (Ite hu. 17⁠:​22-​34) Ketre tune mina fe enehila ngöne la hneijine së, nyimutre la itre atr, itre milio la etrun ka kepe thangane ka loi qa ngöne la itre Icasikeu Kowe La Ka Ala Nyim, hna hnëkëne ngöne la nöjei wiik ngöne la itre ekalesia, memine fe la itre cainöj kowe la ka ala nyim hna hamëne ngöne la itre ijine asabele ne sirkoskripsio, me itre xan hna kuca ngöne la nöj me e cailo fen, memine la itre xaa asabele ne ju kö. Haawe, catre pi së sajuëne hnyawa la itre Icasikeu Kowe La Ka Ala Nyim.

ICASIKEU NE LA HULIWA

Hna hnëkën la Icasikeu Ne La Huliwa thatraqane la huliwa ne cainöj. Kola xatua së matre tro sa atreine kuca hnyawa la huliwa së, ene la troa cainöjëne la maca ka loi ne la Baselaia, me troa inine la itre atr me troa ithuemacanyine laka calemi hë la drai ne ihnyingë i Akötresie (Mat. 28⁠:20; Mar. 13⁠:10; 2 Pet. 3⁠:⁠7). Easa kuca la huliwa cili ngöne la easa ithanata kowe la itre atr, angatr isa ala caas, me hamëne koi angatr la itre itus ka qejepengöne la Tusi Hmitrötr. Ngo, ame la easa trongëne la itre trepene meköti qaathei Iehova ngöne la mele së, tre, kolo fe lai a acatrene hnyawa la elolone la huliwa ne cainöje së memine la itre thangane ne ej the së (Mat. 13⁠:23; Ioane 15⁠:⁠8). Haawe, easë hi lai a amamane la itre thangane ka loi hna kapa qa ngöne la hna trongëne la Tusi Hmitrötr. Celë hi kepine matre kola troa ithanatane ngöne la Icasikeu Ne La Huliwa la itre götrane ne la huliwa së koi Akötresie.

Ame ngöne la Huliwa Ne Baselaia, hetrenyi ngöne la nöjei treu la porogaram ne la itre Icasikeu Ne La Huliwa hna troa ce wang ngöne la nöjei wiik. Tro pë hë a hamë nyipunie ngöne la ekalesia. Ame ngöne la kola kapa hnene la qatre thup perezida la Huliwa Ne Baselaia, haawe, nyidrëti a pane goeëne hnyawa la alien ej. Thupene lai, nyidrëti a isa athipi qan la itre trejine ka macaj nge ka ijije troa cile fë itre ej. Ijije fe tro nyidrëti a nue kowe la ketre qatre thupe troa xome la hnëqa cili.

Troa athipe la itre götrane la porogarame ne la Icasikeu Ne La Huliwa, kowe la itre qatre thup maine itre drikona pena ka macaj ngöne la ua. Tro la itre trejine cili a thupëne hnyawa matre thaa tro kö a xome la itre xaa mekun, ngo troa xötrethenge la itre ini hna hamën e hnine la Huliwa Ne Baselaia. Celë hi matre, loi e tro angatr a goeëne hnyawa la itre mekune hna hamën matre troa ithanatane la itre mekune ka tru, me troa thele troa cile fë hnyawa matre tro la itre atrene la icasikeu a trotrohnine me lapa fë itre ej. Tro fe angatr a amamane la aqane troa trongëne la itre mekun, thenge la hna ajan hnene la ekalesia.

Eje hi laka, nyimu aqane troa cile fë hnyawa la ketre xötreqa. Ngo, thaa tro pi kö hnehengazon menune pala ha la aqane troa eköth ej, ame la ka nyipi ewekë, tre, ene la alien. Ame la itre iamacany, tre, thaa tro kö a nyi pengöne menune pala ha. Iëne jë la itre jëne cainöj hna atre hnyawa, maine ngöne la hna huliwa, maine ngöne hna cainöj ngöne itre hnalapa trootro, maine ngöne ijine etid maine ngöne la kola porotrik e hnine la fami. Loi e troa ihmeku la itre aqane eköth la iamacany memine la itre ewekë ka traqa ngöne nöje së, matre thaa tro kö a jole kowe la itre trejine troa trotrohnin la nyine tro angatr a hane kuca.

Ijije fe tro sa sipone kowe la itretre cainöj hna thaa bapataisone petre kö ka amamai tulu ka loi, me itre hna bapataisone hë, me itre neköi angatr ka co hna hiane hnyawa, troa hane sin la itre xaa götranene la porogaram, tune la itre iamacany. Ame ngöne la itre xaa ijin, troa hnyingën maine sipo angatr troa qaja la itre xaa ewekë hnei angatr hna atre maine hna melëne pena. Maine kola aijijë nyipunie troa hane sin la porogaram ne la icasikeu cili, loi e tro nyipunie a madrine troa ce huliwa hnyawa, me atrehmekune laka celë hi ketre igötranene la huliwa hnei nyipunie hna kuca koi Iehova.

Loi e tro asë hi la itre keresiano a catre thele matre tro la aqane mele i angatr a upe la itre atr ka lapa easenyi angatr a hane sa xepu koi Iehova matre troa Itretre Anyipici Nyidrë, me troa hane xötrethenge la itre thupa ca i Iesu Keriso. Celë hi matre hna hnëkëne la porogaram ne la Icasikeu Ne La Huliwa matre troa eatrëne la mekune celë: (1) troa xatua së troa hane sine hnyawa la huliwa ne cainöj, maine ngöne itre hnalapa trootro, maine ngöne la itre gojeny maine ngöne ketre götran easë a troa öhne la itre atr, nge troa amacane hnyawa la aqane tro sa tro fë la maca ka loi; (2) troa ini së la aqane tro sa kuca ngöne la easë a bëeke hmaca troa wange la itre atr ka kapa la maca maine ka xome la itre itusi së; (3) troa upi së troa ami ijine troa inine pala hi la Tusi Hmitrötr kowe la itre atr ka hetre hni ka ajan, me troa eatrongë angatr kowe la organizasio i Akötresie; (4) troa amamane la aqane troa cainöj ngöne la nöjei ijin; (5) troa xatua së troa nue hnyawa la trenge catre së troa xatuane la itre ka xötrei kapa la nyipici, me itre nekö së me itre xaa thöthi pena, matre tro fe angatr a hane itretre drenge ka sa xepu koi Akötresie.

Ka loi e tro nyipunie a canga e la porogaram e hnine la Huliwa Ne Baselaia qëmekene la icasikeu. Ame itre xaa ijin, tre, kola upi së troa goeën la itre xaa hna cinyihan e hnine la itre itus ne la Itretre Temoë i Iehova. Maine tro nyipunie a canga thele la itre mekune qëmekene troa icasikeu, eje hi lai laka, troa hetre thangane la itre ini hnei nyipunie hna troa kapa. Ngo thaa eje hmekuje kö lai, tro mina fe la itre mekune hnei nyipunie hna thele hë, a aijijë epuni troa hamë mekun ngöne la ijine kola troa ce ithanatan la ketre götran ne la porogaram. Maine hnei nyipunieti pala hi hna kepe thangane ka loi qa ngöne la ini hna hamën jëne la Icasikeu Ne La Huliwa, eje hi lai laka, tro fe ha hetre thangane catre la huliwa ne cainöje i epun.

Maine tro pala hi a sine hnene la itre atrene la ekalesia la icasikeu ne la huliwa, haawe, tro hë angatr a ce huliwa ngöne la caas. Pine laka ame asë hi la itre Temoë hna bapataisone hë, tre, itre hlue angatr, haawe, nyipi ewekë koi angatr troa sin la icasikeu cili, pine laka kola aijijë angatr troa eatrëne hnyawa la hnëqa i angatr. Ka nyipi ewekë mina fe la icasikeu cili kowe la atr ka ajan troa sa xepu koi Iehova matre troa nyihlue i Nyidrë. Haawe, xome jë fe la icasikeu cili ngöne la epuni a eköthe la itre nyine tro epuni a kuca ngöne la wiik.

Eje hi lai laka, thaa ka hnyipixe kö la itre icasikeu cili. Kola xötrethenge la itre trepene ka catr hna eköthe hë e hnine la Tusi Hmitrötr. Qëmekene tro Iesu a upe la itretre drei nyidrë troa cainöj, hnei Iesu hna hamëne la itre ithuemacany me itre ini ka nyimutre ngöne la itre nyine tro angatr a qaja me kuca (Mat. 10⁠:5–11⁠:1; Luka 10⁠:​1-16). Ame hë thupen, hnene pena ha la itretre dreng hna eköthe la itre icasikeu ka tune lai; e cili, angatr a hane qaja la itre ewekë hnei angatr hna melën ngöne la hna cainöje trootro; ewekë lai ka upi angatr troa catre cainöjëne la Baselaia (Ite hu. 4⁠:​23-31). Ame enehila, easë mina fe a kuca tune lai.

INI NE CAINÖJ QAATHEI AKÖTRESIE

Ame la Ini Ne Cainöj Qaathei Akötresie, tre, ej a xatuane asë la itre atrene la ekalesia troa kapa la ini qaathei Akötresie. Ej e hnine la porogaram la troa e la Tusi Hmitrötr, me itre taane cainöj qa hnine la Tusi Hmitrötr hna cile fë, me itre xötreqa ne la itre hnainin, me itre xaa ini thatraqane la huliwa ne cainöje trootro. Kola kapa hnene la itre hnainin la itre eamo ka troa xatua angatr troa amacane hnyawa trootro la aqane tro angatr a cile fë hnyawa la itre xötreqa i angatr. Kola hamëne hnene la icasikeu celë kowe la itre atrene la icasikeu la ketre ini ka nyimu pengön, nge ka hetre thangane catr; ketre kola aijijëne la itre ka trene xötreqa me itre ka dreng, troa maca hnyawa ngöne la nöjei götrane ne la huliwa ne cainöj. Ame ngöne la itre xaa ijin, troa kuca la itre revizio matre tro së isa ala caasi a pane goeën me mekune ka hape, kökötre jë fe kö së ngöne la itre ini hna hamën thatraqane la huliwa ne cainöje së.

Ame ngöne la nöjei macatre, kola hamën hnei Iehova la porogaram ne Ini Ne Cainöj Qaathei Akötresie. Eje e hnine la itre topik hna troa ce wang memine la aqane troa cile fë la itre xötreqa. Kola mama ngöne la itre macatre ka nyimutre laka, ame la Ini Ne Cainöj Qaathei Akötresie, tre, celë hi ketre ewekë ka sisitria, jëne troa xatuane la Itretre Anyipici Iehova matre tro angat a a itretre cainöjëne hnyawa la Baselaia. Ame asë hi la itre ka catre sine la itre huliwa ne la ekalesia tre, ijije hi tro angatr a hane saene kowe la ini cili; kola e fe la itre atr ka xötrei hane sine petre hi la itre xaa icasikeu, ngo eje hi lai laka, loi e tro angatr a kapa la itre ini qa hnine la Tusi Hmitrötr, nge troa mama ngöne la mele i angatr laka angatr a trongën la itre trepene meköti ne la Keresiano.

Ame la easë a hane sin la Ini Ne Cainöj Qaathei Akötresie, easë hi lai a amamane laka aja së fe troa kökötre ngöne la götrane la ua. Kola xatua së hnene la ini hne së hna kapa jëne la icasikeu cili, matre tro sa kuca la itre “huliwa ka loi” ngöne lo easa atrunyi Iehova e nyipine la ka ala nyim (Mat. 5⁠:16). Eje mina fe a xatua së troa kepe thangane hnyawa la traem hne së hna xom troa cainöje trootro, me troa ithuecatre kowe la itre xan jëne la itre mekune ka lolo hne së hna hamën ngöne la itre icasikeu ne la ekalesia. Ame itre koi itre trejine trahmany, tre, tro la ini cili a xatua angatre hnyawa troa eën la itre thiina ka aijijë angatr troa itre drikona maine qatre thupe pena, nge göi tro fe angatr a atreine cile fë la itre xaa götran ne la porogaram ka nyipi ewekë, me hane cile fë la itre cainöj kowe la ka ala nyim.

Ame koi itre ka saen kowe la ini cili, tre, tro ha canga thuemacanyi angatr matre hetre ijine tro angatr a hnëkë hnyawa. Maine easë a troa cile fë la ketre xötreqa, nyipi ewekë catr tro sa canga traqa qëmekene troa nyiqaane la icasikeu. Loi e tro sa kuca asë la hne së hna atrein matre troa traqa troa kuca la xötreqa së. Ngo maine hetre hnepe jol ka traqa koi së nge thatreine hë së troa cile fë la xötreqa së, haawe, loi e tro sa thuemacane nyimenyimën la atre thupëne la ini, maine ketre trejine pena ka xatua angeic, matre troa canga thele ka troa inyihnai.

Nyimu thangane ka loi hne së hna kapa qa ngöne la Ini Ne Cainöj Qaathei Akötresie, ketre igötranene lo porogaram ne ithue göxen ngöne la götrane la ua. Hna qaja hnei Isaia perofeta, ka hape: “Hnei Joxu Iehova hna hamë ni la sesepeneqë hna inin, matre ate ni troa hajine la ka kucakuca hnene la tenge ewekë.” (Is. 50⁠:⁠4). Eje hi lai laka, maine itre milio la etrune la itre atr ka hetrenyi hë la sesepeneqë ne la itre hna inine hnei Iehova, hnene hi laka hnei angatr hna hane kapa hnyawa la ini qaathei Iehova. Kola tro la itre macatre, nge kolo pala hi a xatuane la itre ka saen kowe la ini cili troa kökötr ngöne la götrane la ua, me troa atreine ithanata hnyawa ngöne la angatr a tro fë la maca ka loi ne la Baselaia. Jëne la uati hmitrötr, kola aijijën hnene la ini cili kowe la itre hlue i Akötresie troa sa kowe la itre atr ka hnyingëne thel la kepin matre angatr a mejiune koi Iehova. Drei la ketre manathithi ka tru e tro sa inine troa xome la Wesi Ula i Akötresie!

Ame koi itre ka sin la Ini Ne Cainöj Qaathei Akötresie, ijije hi tro angatr a kapa la itre manathithi ka tru qa ngöne la hnei angatr hna xome la itre itus ka eje e hnine la hna ami tusi ngöne la Uma Ne Baselaia. Kolo lai a qaja fe la itre itus ne la Itretre Anyipici Iehova, ene la Index des publications, me itre xaa aqane ujëne la Tusi Hmitrötr, memine lo itus nyine thele la itre xötr, me itre xane ju kö. Loi e tro sa goeëne la itre itusi cili e hnine la Uma Ne Baselaia, qëmeken maine e thupene la itre icasikeu.