Hna Hnëkëne Troa Kuca La Aja i Iehova,
Mekene 4
Aqane Eköthe Me Elemeken La Ekalesia
AME ngöne la pane tusi Paulo aposetolo koi angetre Korinito, hnei nyidrëti hna qaja la ketre nyipici ka nyipi ewekë catr göi Akötresie, ngöne lo nyidrëti a cinyihane ka hape: “Tha qa thei Akötesieti kö la menumenu, ngo loi la tingeting.” Nge nyidrëti a qaja fe la pengöne la itre icasikeu ne la ekalesia, me hape: “Kuca alolone jë me amekötine la nöjei ewekë asë.”—1 Kor. 14:33, 40.
Atre hë Paulo ka hape hetre gomegome e hnine la ekalesia ne Korinito, ene pe nyidrëti a hamëne ju ngöne la qaane la tusi nyidrë, la itre eamo. Hnei nyidrëti hna ithuecatre kowe la itre trejine ne Korinito troa “ca hna ewekë” nge öni nyidrë, loi e “ce hni nyipunie ngöne la mekune ka cas.” (1 Kor. 1:10, 11) Nge nyidrëti a hamë eamo koi angatr ngöne la itre jol ka isa pengön, matre kola isazikeu e hnine la ekalesia. Nyidrëti a xome jë la ngönetrei ne la atr nyine ceitun, me amamane hnyawa la enyipiewekëne la troa caas me ce huliwa. Qa ngöne lai, nyidrëti a catr xatuane asë la itre keresiano asë ne la ekalesia troa ihnimekeu, ngacama isa hnëqa i angatre kö e hnin ej. (1 Kor. 12:12-26) Maine kola ajane hnene la itre atrene la ekalesia troa hetrenyi la aqane ce huliwa cili, haawe, loi e troa eköthe mekötine la itre ewekë, thaa tro kö a isazikeu.
Ngo tune kaa la aqane troa eköthe la ekalesia i Keresiano? Drei la ka troa eköth ej? Nemene la pengön aqane huliwa hna acil, nge drei la itre ka cilën la itre hnëqa e hnin? Maine tro sa nue la Tusi Hmitrötr troa eatrongë së, tro hë së a kapa la itre mekune ka sa hnyawa la itre hnyinge celë.—1 Kor. 4:6.
HNA EKÖTHE THENGE LA HNA AMEKÖTINE HNEI AKÖTRESIE
Hna eköthe la ekalesia i Keresiano ngöne lo macatre 33 M.K., hmekune lo Penetekos, ketre feet ne la itretre Iudra. Nemene la hne së hna atre göne la ekalesia ngöne la ijine cili? Hna eköthe ej me elemekene hnene la musi Akötresie. Kola amamane hnyawa hnene la ewekë ka traqa ekö e Ierusalema, a 2 000 hë lao macatre enehila, laka, hna eköth hnei Akötresie la ekalesia ne la itre Keresiano hna iën. (Ite hu. 2:1-47) Iuma i Nyidrë nge lapa i Nyidrë. (1 Kor. 3:9; Efe. 2:19) Ame enehila, tre, kola kökötr atraqatr la ekalesia i Akötresie, hnene la hna hane löhnine fe hnene la “ka ala nyimu atraqat,” hna eköth la ekalesia cili me huliwane ej thenge la tulu ne lo ekalesia ngöne la hneijine i Iesu.—Hna ama. 7:9, 10.
Ame ngöne la qaan, tre, ala 120 hi lao atrene la ekalesia. Angatre hi lo itre ka pane kapa la uati hmitrötr, ewekë hna perofetane hë hnei Ioela 2:28, 29. (Ite hu. 2:16-18) Ngo ame ju fe kö la drai cili, kolo fe a hane bapataisone ngöne la tim me löhnine fe la ekalesia la ala 3 000. Hnei angatr hna kapa hnene la hni ka pexej la trenge ewekë göi Keriso me “cate kowe la hna inine hnei ang’ aposetolo.” Thupene jë hi lai, hnei “Iehova hna nyi xane koi angat’ o drai la ite ka troa mel.”—Ite hu. 2:41, 42, 47.
Pine laka kola kökötre catr la ekalesia ne la itre hna iën e Ierusalema, ene pe kola eetr hnene la atre huuj ne Iudra ka sisitria; tiqa ha e Ierusalema hnene la ini hna hamën hnene la itretre dreng. Kola e fe thene la itretre dreng ka hnyipixe lo itretre huuj ka nyimutre, ka hane löhnine la ekalesia ne Ierusalema.—Ite hu. 5:28; 6:7.
Hnei Iesu hna qaja ka hape: “Tro nyipunie a anyipici ni e Ierusalema, me Iuda asë, me Samaria, nge uti hë la cane la fene hnengödrai.” (Ite hu. 1:8) Nge celë hi ewekë lai ka traqa, ngöne laka, thupene lo meci Esetefano, hna xulu la ketre icilekeu ka tru e Ierusalema; ene pe kola aisaijene pi la itretre dreng ka mele e cili, a tro Iudra me Samaria. Ngo ame asë hi la nöjei götran hnei angatr hna tro kow, angatr a catre cainöjën la maca ka loi me inine la itre atr, a ene mina fe thene lo itretre Samaria. (Ite hu. 8:1-13) Ame fe hë thupene lai, hna nyiqaane cainöjëne fe la maca ka loi koi angetre ethen, laka thaa itre nöje kö ka hmine la hmi angetre Iudra, thaa hna peritomo angatre kö; lolo catre la thangane la hna cainöje kowe la itre nöje cili. (Ite hu. 10:1-48) Atraqatre catre fe la thangane lai cainöje cili, memine la ini hna hamën, pine laka, hetrenyi la itre ekalesia ka hnyipixe hna acil e tröne e Ierusalema.—Ite hu. 11:19-21; 14:21-23.
Nemene la itre hna amekötine matre xecie laka hna eköthe me elemekene hnyawa thenge la aja i Akötresie, lo itre ekalesia hna xötrei acil? Jëne la uati hmitrötre i Akötresie, hna acile la itre qatre thup matre thupëne la hna axö mamoe. Ame ngöne lo kola pane tro hnei Paulo me Banaba troa tro fë la evangelia, hnei nyidroti hna acile la itre qatre thup ngöne la itre ekalesia hnei nyidroti hna wange trongën. (Ite hu. 14:23) Kola amexeje ngöne la tusi Ite Huliwa mekene 20, la ketre icasikeu hnei Paulo aposetolo hna ce sin memine la itre qatre thup ne la ekalesia ne Efeso. Hnei Paulo hna qaja koi angatr ka hape: “Qa ngöne lai, wai nyipunieti kö, memine la hnënge mamoe asë, hnei Uati Hmitöte hna acilë nyipunie nyine itete thup, troa hiane la ekalesia i Akötesie, hnei nyidëti hna itöne thupene la madra i nyidëti kö.” (Ite hu. 20:28) Kolo la a qaja la itre qatr, thaa ngöne kö la götrane la ngönetrei ngo ngöne la götrane la ua. Maine hna acili angatr troa qatre thup, tre hnene laka, angatr a trongën la itre hna amekötine e hnine la Tusi Hmitrötr thatraqane la itre ka troa cilën la hnëqa cili. (1 Tim. 3:1-7) Hna ami Tito, ketre ka ce huliwa me Paulo, matre troa acile la itre qatre thup ngöne la itre ekalesia ne Kerete.—Tito 1:5.
Kola acile trongëne pala hi la itre ekalesia, nge itre aposetolo me itre qatre thup ne Ierusalema la sipu itretre thupëne la ekalesia e cailo ngöne la hneijine i Iesu. Angatre hi lai ka sine lo Collège central, ene lo lapa ne xomi meköt, lapa ka elemekene la itre ekalesia i Keresiano asë.
Hnei Paulo aposetolo hna cinyanyi kowe la ekalesia ne Efeso, me qaja ka hape, maine tro la ekalesia i Keresiano a ce huliwa memine la uati hmitrötre i Akötresie, tro ha hetrenyi pala hi la caasi e hnin, ke, jëne tro hi lai a drengethenge me lapa pala hi fene la musi Keriso Iesu. Celë hi matre nyidrëti a xatuane jë la itre Keresiano ne la traone cili troa thiina ka ipië, me troa caasi pala hi la mekun me mele tingetinge memine asë la itre atrene la ekalesia. (Efe. 4:1-6) Nge nyidrëti a xome jë la Salamo 68:18, me ithanatane la itre hna amekötine hnei Iehova hna hnëkëne matre tro la itre atr ka macaj me atrein ngöne la götrane la ua, a nyihluene la ekalesia ceitu me itre aposetolo, me itre perofeta, me itretre tro fë evangelia, me itretre thupë mamoe, me itretre hamë ini. Celë hi itre atr lai, hna aceitunën me itre ahnahna qaathei Iehova; angatr a troa acatrene me xatuane la itre ekalesia asë matre troa pexej ngöne la götrane la ua, ene pe troa amadrinë Akötresie.—Efe. 4:7-16.
KOLA XOME ENEHILA HNENE LA EKALESIA LA TULU HNA AMË HNENE LA ITRE APOSETOLO
Ame enehila, caasi hi la aqane eköthe la itre ekalesia ne la Itretre Anyipici Iehova. Ceitune itre ej memine la ketre gurup, pine laka, itre ekalesia ka caas e cailo fen asë; nge ame la iwahutin, tre, itre Keresiano hna iën hnene la uati hmitrötr. (Zek. 8:23) Kola aejëne lai, pine laka, tune lo hnei Iesu hna thingehnaeane hë, nyidrëti a troa cememine la itretre drei nyidrë hna iën “ngöne la nöjei drai asëjëihë uti hë la pune la fene hnengödrai.” Ame la itre atrene enehila la ekalesia ka kökötre catr, tre, angatr a kapa la maca ka loi Akötresie, me nue la mele i angatr troa nyihlue i Iehova, me xome la bapataiso matre troa itretre drei Keriso Iesu. (Mat. 28:19, 20; Mar. 1:14; Ite hu. 2:41) Angatr a atrehmekune laka, Iesu Keriso la “ate thupë mamoe ka sisitia,” nge thaa nyidrëti hmekuje kö a Taan la itre hna iën, ngo ene asë hi la hna axö mamoe, laka kolo mina fe lo “ite xa mamoe.” (Ioane 10:14, 16; Efe. 1:22, 23) Kola caas la “hna axö mamoe ka caasi” celë, pine laka, ej a atrehmekune me mele nyipici kowe la musi Keriso, me drengethenge la jëne hnei nyidrëti hna acile matre troa elemeken ej, ene lo “hlue ka nyipici me ka inamacan.” Epi tro pala hi sa catre troa lapaune hnyawa me mejiune kowe la hlue cili ka nyipici.—Mat. 24:45.
ITRE GURUP NE HMI
Ame ngöne la itre drai tixenuë ne la fene ka ngazo celë, kola kökötre hnyawa la itre ewekë ne la Maseta e cailo fen. Matre atraqatre la hnëqa hna xome hnene la ‘hlue ka nyipici.’ Hnene la hlue celë hna hnëkëne la itre jiane huliwa göi troa meköti xajawa i mus me ijije troa kuca hnyawa la hnëqa, ene la troa hamëne la göxeni ne la ua ngöne la ijine ka ijij, me troa cainöjëne la maca ne Baselaia qëmeken troa nyipune la fen. Kola mama laka, loi e troa hetrenyi la itre asosiasio hna eköth thenge la itre wathebo ne la itre musi ngöne la itre nöj ka isapengön. Hetrenyi la itre asosiasio cili la itre hnë nyine feja Tusi Hmitrötr, me itre itus ka qejepengön ej; thupene lai, kola iupi fë itre ej e cailo fen asë, matre troa huliwane itre ej ngöne la kola cainöjëne trongëne la maca ne Baselaia.
Ame la itre jiane huliwa cili, ke itre ej a kuca matre troa kökötre la itre aja ne la nyipi hmi e cailo fen. Kolo asë hi a caas la itre jëne huliwa cili ka meköt xajawa i mus. Hna jëne hi la itre jiane huliwa cili, matre ijij troa cainöjëne la maca ka loi ngöne la fene hnengödrai asë, me hamëne la itre ka nyipi ewekë ngöne la götrane la ua kowe la ekalesia i Akötresie e cailo fen asë.
AQANE EKÖTH LA WAPICINE I SASAIATRI
Ame ngöne la nöjei kola eköth la ketre wapicine la sasaiatri, troa acile la ketre Kometr Ne La Wapicine i Sasaiatri; köni qatre thup e hnin, ka troa xome la itre hnëqa matre troa thupëne la huliwa ngöne la caas maine itre nöj hna elemeken hnene la wapicine cili. Tro la ketre e angatr itre trejin, a xome la hnëqa ne troa eköthe la huliwa e hnine la Kometr Ne La Wapicine i Sasaiatri.
Hna ce xawane la itre ekalesia hna thupën hnene la ketre wapicine la sasaiatri, e hnine la itre sirkoskripsio; ame itre sirkoskripsio, tre, itre ej e hnine la ketre distrik. Ame la etrune la itre sirkoskripsio me itre distrik, tre, thenge la etrune la itre nöj maine troa thawa thenge la itre qene hlapa, nge ketre, thenge mina fe la etrune la itre ekalesia hna elemekene hnene la wapicine la sasaiatri. Troa thupëne la itre ekalesia e hnine la caa sirkoskripsio hnene la caa qatre thup, hna hëne ka hape atre thupëne la sirkoskripsio. Ame göi troa wange trongën la nyimu sirkoskripsio, tre, qanyine la atre thupëne la distrik; nyidrëti mina fe a hane thupëne la itre asabele ne sirkoskripsio me vizitën e itre xaa ijin la itre ekalesia cememine la atre thupën la sirkoskripsio. Hna qaja amamane hnyawa e itre xaa ijin, la huliwa ne la itre qatre thupe cili ka iwai trootro, hnine la Huliwa Ne Baselaia, me jëne la itre tusi hna iupi fë koi angatr hnene la wapicine la sasaiatri.
Kola atrehmekune hnyawa hnene la nöjei atren la organizasio ne la Keresiano, laka, celë hi aqane eköthe Akötresieti lai la itre ewekë. Kola olene hnene la itre ekalesia la itre aqane eköthe Iehova la itre ewekë nyine loi koi së asë; ene pe easë a kapa madrine lai itre hna amekötin. Angatre mina fe a kapa la itre qatre thupe hna acile matre troa thupëne la huliwa hnine la itre wapicine i sasaiatri, me ngöne la itre distrik, itre sirkoskripsio, me hnine la itre ekalesia. Angatr a mejiune kowe la “hlue ka nyipici me ka inamacan” matre troa kapa la xeni ne la ua ngöne ijine ka ijij. Ame ngöne la ketre götran, kola metrötrëne hnyawa hnene la ‘hlue ka nyipici’ enehila, la musi Keriso, nge angatr a trongëne hnyawa la itre trepene meköti ne la Tusi Hmitrötr, me nue troa eatrongë angatr hnene la uati hmitrötr. Ame ngöne la angatr a ce huliwa me caas, ene pe hetre thangane ka loi hnei angatre hna kapa, a tune ekö lo itre ekalesia ne la hneijine i Iesu. Ame ngöne Ite Huliwa 16:5, hna qaja ka hape: “Hna acile hutine la nöjei ekalesia ngöne la lapaun, me nyi xane ju o drai.”