Hna Hnëkëne Troa Kuca La Aja i Iehova,
Mekene 3
Loi e Tro Sa Mejiune Kowe La “Hlue Ka Nyipici Me Ka Inamacan”
“DREI la hlue ka nyipici me ka inamacan?” Hna jëne la hnyinge celë la Iesu Keriso a xome la ketre ceitun ka nyipi ewekë catre ngöne la itre hna perofetan. Celë hi ketre götrane ne la “hatene” hnei nyidrëti hna hamëne göne “la puatine la fewatin.” (Mat. 24:3, 42-47) Hnei Iesu hna amamane ka hape, ame la “hlue” tre, troa tru catre hnei jole i angeic ngöne la hneijine ne la pun. Troa upe la “hlue cili” troa thupëne la itre ewekë ne la Baselaia e celë fen, nge hnëqa ne ej troa hamëne kowe la itre hlue i Akötresie la xeni ne la ua “ngöne la nyipi ijin.” Hnei Iesu hna qaja la hnëqa cili ka hape: “Manathithi hë la hlue cili, e traqa la joxu i angeic’ a öhnyi angeic’ a kuca tune lai. Nyipici ini a qaja koi nyipunie, tro nyidëti a acilë angeice troa musinëne la nöjei ewekë i nyidëti asë.”
Loi e tro sa ce wange hnyawa la itre hnying hna amejën hnene la ceitune cili, kola hape: Drei la “hlue”? Nemene la itre “ewekë”? Nemene la hnëqa së isa ala caas ngöne la hna perofetane celë? Eje hi lai laka, ame la itre hnyinge celë, tre thaa göi tro kö a nyialiene la he së. Maine tro sa wanga atrehmekune hnyawa la itre ewekë celë me mejiune kowe la “hlue ka nyipici me ka inamacan,” tro ha xatua së troa kuca la aja i Iehova.
LOI E TROA WANGA ATREHMEKUNE LA “HLUE KA NYIPICI ME KA INAMACAN”
Ame ngöne la ceitune i nyidrë, hnei Iesu hna qaja ka hape, tro la “hlue” a hamëne la xeni ka ijije ngöne la götrane la ua. Drei la hnei Iesu hna acile matre troa ithuane la itretre drei nyidrëti ekö ngöne la hneijine i nyidrë? Nge drei la hnei nyidrëti hna öhn e hamë xen ngöne lo macatre 1914, ijine traqa i nyidrëti hmaca troa musi ngöne la Baselaia? Eje hi lai laka, pëkö atr ka ijije troa mele aqeany qaane lo hneijine i nyidrë. Haawe, ame la “hlue ka nyipici me ka inamacan,” tre, ej a nyihatrene lo lapa ne la itretre drei Keriso hna iën ka mele ngöne la nöjei hneijin. (Luka 12:42) Keriso a upe la gurupe cili troa hamëne la itre ithuemacanyi ngöne la aqane troa eatre la itre hna perofetane hnine la Tusi Hmitrötr, me hamëne fe la itre eamo ka ijij ngöne la aqane troa trongëne la itre trepene meköti ngöne la nöjei drai ne mele së. Hna thawa pë hë la göxeni ne la ua cili, jëne la itre ekalesia ne la Itretre Anyipici Iehova.—Is. 43:10; Gal. 6:16.
Nge nemene pe kö lo itre “ewekë”? Kolo lai a qaja la itre ewekë e celë fen ka nyipi ewekë ngöne la götrane la ua, nge itre ewekë i Keriso hë itre ej qaane lo nyidrëti a nyiqaane Joxu e koho hnengödrai. Kösë kola e ngöne la itre ewekë cili, lo itre iuma ngöne la iwahutine la Sasaiatri me itre bethela e cailo fen, me itre Uma Ne baselaia, me itre Iuma Ne Asabele. Ame lai itre “ewekë,” tre, kolo mina fe a qaja la hnëqa ne troa tro fë la “maca ka loi ne la baselaia” e cailo fen, nge troa inine la itre atr ka kapa la maca cili. Akötresie a xome la “hlue” matre troa icaasinekeune memine la ekalesia, la “ka ala nyimu atraqatr [...] qa ngöne la ite xöte nöj’ asë, me ite tribu, me nöjei ate, me ite qene hlapa,” ka troa mele pe qa ngöne la akötr atraqatr. (Luka 12:42-44; Mat. 24:14; Hna ama. 7:9-14) Eje hi lai laka, tru catre la hna kuca hnene la ka ala nyimu atraqatr ngöne la troa cainöjëne la maca ka loi e cailo fen. Angatre mina fe lo itre “ewekë” i Keriso, nge ka nyipi ewekë catre la ka ala nyimu cili xajawane la hlue, pine laka angatr a catre mele nyipici me sajuë nyën.
HNËQA NE LA LAPA NE IAMEKÖTI
Kola thele hnene la “hlue ka nyipici me ka inamacan,” troa cile huti la caas me eköth la itre ewekë, matre troa ‘kuca alolone me amekötine la nöjei ewekë asë.’ (1 Kor. 14:40) Celë hi matre hna iëne la ketre gurup ne la itre Keresiano ka hane sine lo lai lapa ne la hlue ka nyipici, matre troa nyi trenge ewekëne lai lapa cili. Haawe matre qëmekene troa axeciëne la ketre mekun, thaa angatre kö a troa hnyingëne la mekunene la nöjei qatre thupe hna iëne asë e cailo fen. Hna hnen e Ierusalema lo Lapa Ne Iameköti, ene lai gurupe ka nyi trenge ewekëne la nöjei ekalesia i Keresiano hna iën.
Qaane lo Penetekos 33 M.K., hnene la itre aposetolo i Iesu Keriso ka mele nyipici, hna xomiujine la ekalesia i Keresiano hna nyipi acil. (Ite hu. 4:33, 35, 37; 5:18, 29) Ame hë ngöne la macatre 49, tre, thaa itre aposetolo i Iesu hmekuje hmaca kö la Lapa Ne Iameköti. Ame la kola xulu lo jol göi troa peritomon, ame la itre ka thele troa senge la jole cili, tre, ene hi lo itre “aposetolo memine la itre qatre thup ne Ierusalema.” (Ite hu. 15:1, 2) Hnëqa i angatr ekö la troa ce ithanatane la itre jole ka traqa kowe la nöjei Keresiano ngöne la nöjei götran. Angatr a iupi fë la itre tus me itre hna amekötin ka acatrene la itre ekalesia me aijijën la itretre drenge troa catre caasi ngöne la mekun me ngöne la huliwa. Hna drengethenge hnene la itre ekalesia la musi ne la Lapa Ne Iameköti, ene pe hnei Iehova hna amanathithi angatr nge kola kökötre lolo hnei angatr.—Ite hu. 8:1, 14, 15; 15:22-31; 16:4, 5.
Easë pala hi a öhne enehila la etrune la hna amekötine cili. Ame la itre hna iën ka sin enehila la Lapa Ne Iameköti ne la Itretre Anyipici Iehova, tre, itre macatre ka nyimutre ne mele nyipici nge hetre inamacane i angatr ngöne la aqane troa eköthe la organizasio i Iehova. Angatr a eatrongëne la nöje i Iehova ngöne la götrane la ua, tune la hna kuca hnene la Lapa Ne Iameköti ne la hneijine i Iesu. Kolo mina fe a catre kuca hnene la Lapa Ne Iameköti ne la hneijine së la hnëqa ne troa elemekene la huliwa ne cainöj; ene la troa kuca la itre itus göi troa inine la Tusi Hmitrötr me troa iëne la itre qatre thup ka troa xome la itre hnëqa ka isapengön hnine la organizasio. Celë hi la itre xaa hnepe ewekë ne la Baselaia i Keriso la, a hna thupëne hnene lai gurupe cili. Easa madrine tune lo itre pane Keresiano, troa eatrongë së hnene la itre atr ka macaj ngöne la götrane la ua me hamën la itre eamo hna nyitrepene hnei Tusi Hmitrötr thatraqane la hmi.
Ceitune hi la itre atr ka sin la Lapa Ne Iameköti enehila memine lo hneijine i Iesu; itre atr ka ngazo asë hi angatr. Ngo eje hi lai laka, ame lo itre drai ekö, tre, hnei Iehova hna upe la itre atr matre troa kuca la aja i Nyidrë. Hnei Nyidrëti hna upi Noa troa cane la ketre aka me troa thuemacane la itre atr laka, tro Nyidrëti a apaatren la fen ngöne la hneijine i angatr. (Gen. 6:13, 14, 22; 2 Pet. 2:5) Hnei Nyidrëti mina fe hna upi Mose troa thapa la nöje i Nyidrë qaa Aigupito. (Eso. 3:10) Hnei Iehova mina fe hna xome la uati hmitrötr matre tro la itre atr ka thaa pexeje kö a cinyihane la Tusi Hmitrötr. (2 Tim. 3:16; 2 Pet. 1:21) Thaa hnene kö laka Nyidrëti a upe la itre atr ka thaa pexeje kö troa xomiujine la huliwa ne cainöj me inine la itre atr, tre tro ha kötrekötre la lapaune së kowe la organizasio i Akötresie. Ohea, kolo pe a acatrene hnyawa la mejiune së, pine laka, mama hi koi së ka hape, maine paatre ju la ixatua qaathei Iehova, thatreine jë kö tro la Lapa Ne Iameköti a kuca la huliwa cili.
KEPINE MATRE LOI E TROA MEJIUNE KOWE LA “HLUE KA NYIPICI ME KA INAMACAN”
Nyimutre la itre kepin matre easa mejiune kowe la lapa ne la hlue. Ame la hnapan, tre, hnei Iesu hna acile la itre atrene la lapa cili ngöne la nöjei “ewekë” i nyidrë ka sisitria. Celë hi nyine anyipicine lai laka pexeje la mejiune i nyidrë koi angatr.
Ame la hnaaluen, tre, kola ithuecatre hnene la Wesi Ula i Akötresie kowe la itre Keresiano troa ce huliwa memine la itre ka elemekene la huliwa. Nemene la eloine lai koi së? Hnei Paulo aposetolo hna cinyihane ngone Heberu 13:17 ka hape: “Ideiju kowe la ite mekene i nyipunie, me denge thenge ju ; ke angat’ a hmekëne thatraqane la ite u i nyipunie, ke itete troa qeje gelen ; mate troa kuca lai memine la madin, nge tha memine la aköt ; ke ka pë thangane lai koi nyipunie.” Nyipi ewekë tro sa drengethenge me nue la itre qatre thup ka ‘hmekën la mele së,’ troa eatrongë së, matre troa thupë së me hetre thangane ka loi pala hi kowe la mele së ngöne la götrane la ua.
Hnei Paulo hna qaja ngöne 1 Korinito 16:14, ka hape: “Kuca jë la nöjei ewekë asë i nyipunie ngöne la ihnim.” Ihnimi hi la thiina ka sisitria ka nyitrepene la itre mekune hna axeciën thatraqane la nöje i Akötresie. Hna qeje pengöne la ihnim ngöne 1 Korinito 13:4-8, kola hape: “Ihnimi la ate xome ahoeane me ka menyik ; tha ate ikucanyi kö la ihnim ; tha ate selëne kö la ihnim, nge tha ate pi tru kö, tha thina ka qali kö, tha ate thele ewekë i nyëne kö, tha ate canga elëhni kö, tha ate meku ngazo kö ; tha ate madine kö la thina ka tha meköti kö, ngo ate madine la nyipici ; ate juetëne la nöjei ewekë asë, ate kapa la nöjei ewekë asë, ate mejiune la nöjei ewekë asë, ate xomi hnine la nöjei ewekë asë. Tha tro kö a ase la ihnim.” Pine laka ihnimi la ka nyitrepene asë la nöjei mekune hna axeciën nyine loi kowe la itre hlue i Iehova, haawe, nyimu kepin ka upi së tro sa lapa xetietë fene la musi cili. Ketre, celë hi hatrene la ihnimi Iehova lai kowe la nöjei hlue i Nyidrë.
Hna anyipicine hnene la lapa ne la hlue, jëne la itre itupathi ka nyimutre me aqane xomihnine itre ej, laka, thei angatr la uati hmitrötre i Akötresie. Nyimutre catre la itre manathithi hna kapa enehila hnene la organizasio i Iehova ka mama koi atr. Qa ngöne lai, loi e troa pexej la aqane sajuën ej hne së nge troa atraqatre la mejiune së kowe ej.
NEMENE LA AQANE TRO SA AMAMAN LA MEJIUNE SË KOWE LA LAPA NE LA HLUE
Ame koi itre hna athipi qan e hnine la ekalesia, tre, angatr a amamane la mejiune i angatr ngöne la angatr a kapa madrine la itre ejolen me kuca asë la itre hnëqa cili. (Ite hu. 20:28) Pine laka itretre cainöjëne së la Baselaia, haawe, easë a catre troa tro fë la maca ka loi ngöne la itre hnalapa trootro, me iwai hmaca, me xomiujine la itre ini tus ngöne la itre hnalapa ne la itre atr. (Mat. 24:14; 28:19, 20) Maine easa ajan troa kepe thangane hnyawa la göxeni ne la ua hna hamën hnene la “hlue ka nyipici me ka inamacan,” haawe, loi e tro sa hnëkë hnyawa kowe la nöjei icasikeu i Keresiano me hane sine itre ej. Ceitune hi lai memine la itre asabele hna kuca ngöne la nöjei macatre. Ame la easa ce sin la itre icasikeu i Keresiano memine la itre trejin me easë, ene pe easë hi a ithuecatrekeu ngöne la itre ijine cili, nge nyipi hetre thangane ka loi koi së.—Heb. 10:24, 25.
Kola mama fe la mejiune së kowe la “hlue ka nyipici me ka inamacan,” ngöne la easa sajuëne la organizasio hnene la itre ewekë së. (Ite edomë 3:9, 10) Ame la easa öhne la itre trejine me easë e cile kowe la itre jol ngöne la ngönetrei, easë a canga nyinyape troa hane hamën la ixatua së koi angatr. (Gal. 6:10; 1 Tim. 6:18) Hnene la ihnimi së kowe la itre trejine me easë, matre easë pala hi a thele la nöjei ijine troa amamane la ole së koi Iehova me kowe la organizasio i Nyidrë, pine la aqane hnimi së hnei nyidro.—Ioane 13:35.
Ijije mina fe tro sa amamane la mejiune së kowe la lapa ne la hlue, hnene la troa sajuëne la itre mekune hnei angatr hna axeciën. Ngacama nango jole tro sa trotrohnine hnyawa la itre xaa mekune hna axeciën, atre hnyawa hi së laka, maine tro sa sajuëne la itre mekune cili, haawe, tro kö a cile huti la itre eloin hne së hna troa kapa elany. Ame ngöne itre xaa ijin, mama hnyawa pi hi la aqane senge la ketre jol, nge kola mama laka, hne së hna sajuëne lo lai itre mekune hna axeciën thatraqane lai jole cili. Ame la pune lai, Iehova a amanathithi së, pine laka, easë a drengethenge la Wesi Ula i Nyidrë memine la lapa ne la hlue. Haawe, easë hi lai a amamane laka, easa lapa fene la musi ne la Maseta së Iesu Keriso.
Nyipici laka, nyimu kepine ka upi së troa mejiune hnyawa kowe la “hlue ka nyipici me ka inamacan.” Satana, lo haze ne la fene hnengödrai, a kuca asë la hnei angeic hna atrein, matre troa thaipiën la ëje i Iehova me adrone la organizasio i Nyidrë. (2 Kor. 4:4) Thaa tro pi kö sa nue la itre nyinyithiina i angeic, troa athixötrë së. (2 Kor. 2:11) Atre hi angeic ka hape, xoxopatre pe hi la ijine i angeic qëmekene troa kuië angeic hnine la hnaop. Celë hi matre, angeic a thele troa amenune la itre hlue i Iehova. (Hna ama. 12:12) Ngo, hnene laka Satana a catre itupathi, loi e tro pala hi sa catre qale koi Iehova, me mejiune hnyawa kowe la jëne hnei Nyidrëti hna xom matre troa eatrongëne la nöje i Nyidrë enehila. Satana a isi memine la “thelen” ne la matrane la [föe] hna upe troa cilaxome la huliwa “nyine anyipici Iesu Keriso.” (Hna ama. 12:17) Maine tro sa nue asë la mejiune së koi Iehova me kowe la itre hnei Nyidrëti hna amekötin, tro hë së a caasi hnyawa memine la itre trejine me easë e cailo fen.