Nemene La Pengö i Angatr?

KOLA könë nyipunieti hnene la Itretre Anyipici Iehova troa hane atrepengöi angatre hnyawa. Ma tro hi epuni a atre la itre xan, pine laka, itre ka lapa ezi epuni hi maine ka ce huliwa me epun, maine pena, hnei epuni hna hane iöhnyi memine la itre xan ngöne la itre xaa ijin. Maine jë hnei epuni hna öhne la itre xan e cahu hna tro, a kola tro fë zonale kowe la itre atr. Maine pena, ase jë fe hë epuni ce ithawakeune la itre xaa hnepe mekune me angatr, ngöne la angatr a traqa kowe la hnalapa i epun.

Ka tru nyipunie nge ka nyipi ewekë la mele i nyipunie kowe la Itretre Anyipici Iehova. Angatr a thele tro nyipunieti a ce mele treme sinen me angatr, me ajane troa hane qeje pengöne hnyawa la pengö i angatr, me itre ini hnei angatre hna mejiune kow, memine la aqane hnea trepene angatr la huliwa i Iehova; ketre, angatre fe a amamane la itre aliene hni angatr kowe la itre sinee i angatr memine la fen hnei angatre hna mele ngön. Celë hi itre ewekë lai hna troa ithanatane hnine la boroshüre celë, nge hna hnëkëne ej thatraqai nyipunie.

Thaa ka sisitria menu kö la Itretre Anyipici Iehova hune la nöjei atr asë. Hetre itre jole fe hi hnei angatre hna hane cile kow, tune la itre ejolene göi manie, me itre sine kucakuca ngöne la ngönetrei me ngöne la aqane imelekeu i angatr memine la itre xan. Pine laka thaa itre ka pexeje kö angatr, nge thaa itre atr ka loi kö angatr, haawe, ame itre xaa ijin, tre, angatr a hane kei kowe la ngazo. Ngo angatr a thele troa xomi ini qa ngöne la itre ewekë ka traqa koi angatr, nge jëne la hna catre inine la Tusi Hmitrötr, haawe, kola saze la itre aqane ujë i angatr. Hnei angatr hna nue la mele i angatr matre troa kuca la aja i Akötresie, nge angatre fe a thele troa mele thenge la aqane sa xepu i angatr. Angatr a nue la Wesi Ula i Akötresie memine la Uati Hmitrötre i Nyidrë troa eatrongë angatr.

Ka nyipi ewekë catre koi angatr la troa nyitrepene qa hnine la Tusi Hmitrötr la itre ini hnei angatr hna mejiune kow, ngo thaa qa ngöne kö la itre mekune hna thele hnei atr, maine itre ini pena ka xulu pe hi qaathene la itre hene ne hmi. Caasi hi la mekunane la Itretre Anyipici Iehova me Paulo, lo nyidrëti a qaja ka hape: “Ngacama thoi asë la nöjei ate, loi pe nyipici Akötesie.” (Roma 3:4, Lifu Biblea) Ame la itre ini ka nyipici e hnine la Tusi Hmitrötr, ke, Itretre Anyipici Iehova a kapa tune la aqane ujë ne la itretre Berea, laka ame la angatr a drenge la Paulo a cainöj: “Hnei angatr hna kapa la wesi ula hnene la hni ka ajan, me thele o drai la ite hna cinyihan, maine nyipici la nöjei ewekë cili.” (Ite Huliwa 17:11) Kola mekune hnene la Itretre Anyipici Iehova ka hape, loi e troa pane waipengöne la nöjei ini ne la itre hmi asë, ene la itre ini hnei angatr hna mejiune kow memine fe la itre ini ne la itre xaa hmi; loi e troa pane wange ka hape ka ihmeku jë kö la itre ini asë cili memine la hna qaja hnei Tusi Hmitrötr. Aja i angatre catre troa ce ithanatane me epuni la itre ini cili.

Qa ngöne lo itre hne së hna ce wange hë, mama pi hi laka, ame la Itretre Anyipici Iehova, tre, angatr a mejiune kowe la Tusi Hmitrötr, ene la Wesi Ula i Akötresie. Ame koi angatr, tre, ame lo lai 66 lao itusi ne la Tusi Hmitrötr, tre, qaathei Akötresie, nge thaa tria kö la aqane qeje pengöne itre ej lo aqane trongene la mele ne la itre atr ekö. Angatr a hëne ka hape Itre Hna Cinyihane Qene Heleni lo hna lapa majemine qaja ka hape Isisinyikeu Ka Hnyipixe, nge ame koi Isisinyikeu Ka Hekö, tre angatr a hëne ka hape, Itre Hna Cinyihane Qene Heberu. Angatr a eköthe la lapaune i angatr ngöne la lue Hna Cinyihane cili, Qene Heleni me Qene Heberu, nge angatr a kapa la itre mekune thenge la aqane cinyihane itre ej; ame pë hë koi itre hatren, me itre mekune nyine nyihatren, tre, angatr a thele troa trotrohnin. Mejiune hnyawa la Itretre Anyipici Iehova laka, nyimu hna perofetane hnei Tusi Hmitrötr ka eatre hë, nge kola eatre la itre xan enehila, nge calemi hë la itre xan.

ËJE I ANGATR

Itretre Anyipici Iehova? Hane hi la aqane hë angatr. Ka hetre aliene la ëje celë, nyine tro lai a amamane laka, angatr a anyipici Iehova, nge Nyidrëti la Akötresieti angatr, nge hetre itre hnei Nyidrëti hna mekune troa eatrën. Ame la itre hnëewekë hna hape “Akötesie,” “Joxu,” me “Atre Ixup,” tune mina fe la “Hene ka tru,” me “Angajoxu,” me “Komadran”; kösë itre hnëewekë ka qaja la itre götrane qa maine metie pena hna xome hnene la itre atr ka nyimutre nge ka isapengön. Ngo ame la hnëewekë hna hape, “Iehova,” tre, sipu ëje i Nyidrëti hi lai, nge kola qaja la pengö i Nyidrë, ene laka, Akötresie ka pucatin asë nge Atre Xupe la fen memine la hnengödrai. Celë hi hna amamane hnene la Salamo 83:18, kola hape: “Tro la nöjei ate a ate laka cilieti Kasisitia hmekuje hune la fene hnengödrai asëjëihë, nge IEHOVA la atesiwa i cilie.”

Ame la ëje i Iehova (ame itre xaa ka ujë Tusi Hmitrötr, angatr a xome la ëje hna hape, Yahweh; goeëne ju fe la Tusi Hmitrötr, Bible de Jérusalem me Bible de Liénart, hna xome hnei itre Katolik) tre, a 7 000 lao hna fejane hnine la itre hna cinyihane qene Heberu, ekö ngöne la qaan. Ame hnine la itre xaa Tusi Hmitrötr, tre, hna xometrije la ëje i Iehova, me nyihnane hnene la itre trenge ewekë hna hape, “Akötresie” me “Joxu” maine “Enëtilai” pena. Ame ngöne la itre Tusi Hmitrötre cili, tre, ijije hi troa atrehmekune la itre götrane hna hnen lo ëje i Iehova qene Heberu, pine laka, ame la itre hnëewekë ka nyihnan ej, tre, hna fejane atrune la itre mataitus; hna hape: AKÖTESIE, JOXU. Ngo nyimu Tusi Hmitrötr enehila ngöne la hneijine së, ka xome la ëje i Iehova maine Yahvé (Yahweh) pena. Drei la aqane ujëne hnene la Tusi Hmitrötr Lifu Bible, la Isaia 42:8, kola hape: “Iehova ni, celë hi ëjeng.”

Ame la Itretre Anyipici Iehova, tre, angatr a xome la mekene 43 ne tusi Isaia, matre troa amamane la kepine matre kola ati ëje i angatre tune lai. Ame ngöne la mekene tusi celë, tre, hna aceitunëne la fene memine la ketre hnaakootr; kola hëne la itre haze ne la fen matre tro angatr a hamëne la itretre anyipici angatr, itre ka troa isigöline la meköt i angatr, maine tro pena a drenge la itre ka troa anyipici Iehova me troa hane kapa la nyipici. E cili hi lo Iehova a qaja kowe la nöje i Nyidrë, ka hape: “Nyipunie la itete anyipici ni, öni Iehova, nge hluenge lo hnenge hna iën, mate ate nyipunie me lapaune koi ni, me trotrohnine laka eje hi ini hi ; pëkö haze hnapane nge pinge pe, nge kete pëkö e thupeng. Ini, ini hi Iehova, nge pëkö xa at’ amelen, ngo ini hi.”—Isaia 43:10, 11.

Hetre itretre Anyipici Iehova pala hi ngöne la nöjei xötr atr, qëmekene troa hnaho Iesu. Thupene la hna pane e wengëne ngöne Heberu 11 la itre xaa atr ekö ka lapaun, kola qaja ngöne Heberu 12:1, ka hape: “Qa ngöne lai, kola cile xöteithi shë la itete anyipicine ka ala nyimu, tro fe sha nue tije la nöjei hace asë, memine la ngazo ate ajolenyi shë, nge tro sha nyenyape fë la xomi hnine ngöne la hna isasaqe hna amë qëmeke shë.” Hnei Iesu hna qaja qëmeke i Ponetio Pilato ka hape: “Hna hnaho ni thatraqane lai, nge traqa ni e celë fene thatraqane lai mate tro ni a anyipicine la nyipici.” Hna hë nyidrëti ka hape, “ate anyipicine ka nyipici me meköt.” (Ioane 18:37; Hna Amamane 3:14) Hnei Iesu hna qaja kowe la itretre drei nyidrë, ka hape: “Ngo tro nyipunie a hete mene e hlepëtipi la Uati Hmitöte koi nyipunie ; nge tro nyipunie a anyipici ni e Ierusalema, me Iuda asë, me Samaria, nge uti hë la cane fene hnengödrai.”—Ite Huliwa 1:8.

Celë hi kepine lai matre ame enehila, tre, 6 000 000 nge hetre munën la etrune la itre atr ngöne la 230 lao nöj me götran, ka tro fë la maca ka loi ne la Baselaia i Iehova hna ahnithe koi Iesu Keriso; angatr a mekune laka meköti catre koi angatr e troa xome la ëje hna hape, Itretre Anyipici Iehova.

[Ithueamacany]

[Hna cinyhan ne la götran 4]

Hnei angatr hna nue la mele i angatr troa kuca la aja i Akötresie

[Hna cinyhan ne la götran 4]

Angatr a mejiune laka Wesi Ula i Akötresieti la Tusi Hmitrötr

[Hna cinyhan ne la götran 5]

Otrene la ëje memine la ketre hnaakootr

[Hna cinyhan ne la götran 5]

6 000 000 la Itretre Anyipicin ngöne la itre nöj ka 230 nge hetre munën

[Iatr ne la götran 3]

Angatr a hane meku nyipunie

[Iatr ne la götran 4]

Sipu ëje i Akötresieti ekö ngöne la qene Heberu