Meken 115

Kola Fetra La Iwatratra

AME petre kö lo heji lapa, hnei Iesu hna hamëne la ketre tulu ka lolo, göne la aqane troa ipië; hnei nyidrëti hna hnea la lue ca ne la itre aposetolo. Thupene lai, hnei nyidrëti hna acile la Drai Ne Amekunën, ene laka, troa amekunëne la meci nyidrë, laka, calemi hë. Enehila, kola traqa la ketre jole ka tru, ngöne laka, itre aposetolo a ikelikelë, matre troa atre la ka sisitria e angatr. Ngo thaa ka he enehila kö la iwesitrë cili.

Mekune hi së lo Iesu e hune la wetr Elaio, nge nyidrëti a ketrepengön; thupene lo lai, kola ikelikelë hnene la itre aposetolo, me pi nyi ka tru. Ketre, hnei Iakobo, me Ioane hë hna sipone troa cilëne la itre göhnë ka tru ngöne la Baselaia, matre kolo mina fe a ikelikelë e cili, hnene la itre aposetolo. Nge pine laka, jidri tixenuë i Iesu pe hi la me angatr, haawe, akötre catre koi nyidrëti troa goeë angatre e iwesitrë. Nemene la hnei nyidrëti hna kuca?

Thaa hnei nyidrëti kö hna hajine la itre aposetolo, pine la aqane ujë i angatr, ngo tune la hna majemin, hnei nyidrëti pe hna xomihni me ithahnata hnyawa koi angatre ka hape: “Ame la ite joxu ne la ite etheni kola qeje joxu koi angat; nge hna qaja aloine la angete musinë angat. Ngo the tro kö nyipunieti a tune lai; . . . ke dei la ka sisitia, ene la ate lapa a kola xeni me hlu? hape u, tha angeice kö la ate xen?” Nge nyidrëti a amekunëne koi angatre lo ceitune hnei nyidrëti hna hamëne hë, me hape: “Ngo ini la thei nyipunie tune la hlu.”

Ngacama ngazo la itre aposetolo, ngo hnei angatre pala hi hna ce me Iesu ngöne la itre itupathi ka xulu koi nyidrë. Celë hi matre nyidrëti a qaja koi angatre ka hape: “Ini a hamëne koi nyipunie la baselaia, tune lo hnei Angakakati hna hamëne koi ni.” Ame la isisinyikeu celë hnei Iesu hna kuca memine la itretre drei nyidrë, ke kola acaasi angatre matre troa ce musi ngöne la Baselaia. Ala xalaithe hi la itre atr ka troa lö hnine la isisinyikeu cili thatraqane la Baselaia, 144 000 la etrun.

Ngacama ketre manathithi ka tru lai hna kapa hnene la itre aposetolo, ene la troa ce musi me Keriso, ngo angatre la a pane nango nanazije ngöne la götrane la ua. Öni Iesu ka hape: “Tro asë nyipunie a jingenekëne pi ini ngöne la jidi celë.” Ngo nyidrëti a thuemacanyi Peteru ka hape, hnei nyidrëti hë hna thithi sai angeic, nge kola ithuecatre koi angeice ka hape: “E hmaca ha eö, tro eö a acatene la ite tejine me eö.”

“Ange nekönate fe, xoxopate pe hi la ijinenge thei nyipunie. Tro nyipunie a thele ni; nge ame la hnenge hna qaja koi angete Iuda, ini mina hi a qaja enehila koi nyipunieti, ka hape, Tha ’teine kö nyipunie tro kowe la hnenge hna tro kow, Ini a hamë nyipunie la wathebo ka hnyipixe, laka tro nyipunieti a ihnimikeun; tro nyipunie a ihnimikeune tune la hnenge hna hnimi nyipunie. Celë hi mate tro nöjei ate asëjëihë a wangate hmekune laka, itete dei ni nyipunie, e tro nyipunie a ihnimikeu.”

Peteru a hnyinge ka hape: “Joxu, jötëti cilieti ië?”

Iesu a sa koi angeice ka hape: “Tha ’teine kö eö enehila troa xötethenge ni kowe la hnenge hna tro kow; ngo tro eö a xötethenge ni epin.”

Öni Peteru koi nyidrë ka hape: “Joxu, qa ngöne nemene laka tha ’teine kö ni troa jöjëti thenge cilie enehila? tro ni a hamëne la melenge thatraqai cilie.”

Iesu a sa ka hape: “Huni kö, tro eö a hamëne la mele i ’ö thatraqai ni? Nyipici, nyipici, ini a qaja koi ’ö, e tha kukahleke pete kö la trotro, tro eö a köni a kelikelë ni.”

Öni Peteru koi nyidrë ka hape: “Ngacama ce meci ju ni me cilie, te, tha tro jë kö ni a kelikelë cilie.” Nge pine laka, kolo asë hi a qaja tune lai hnene la itre aposetolo, Peteru a pi mama, me qaja ka hape: “Maine tro angat’ asë a jingenekë enëtilai, te, tha hane jë kö ni jingenekë!”

Iesu a mekune hmaca lo ijine nyidrëti a upe la itretre drei nyidrë troa cainöje e Galilaia, a pëkö trengene mani, me watreng, nyidrëti a hnyingë angatre ka hape: “Hete ka pë e nyipunie?”

Öni angatre ka hape: “Qatikö.”

Haawe, nyidrëti a qaja jë koi angatre ka hape: “Ngo enehila, ame la ate hetenyi la tenge ne mani, loi e tro angeic’ a xom, memine fe la wateng; nge ame la ate ka pë taua, loi e tro angeic’ a xome la ixete i angeice troa itö taua. Ke ini a qaja koi nyipunie, ijije troa eate koi ni la hna cinyihane celë, ka hape, ‘Hna ce e nyidëti me ite ka ngazo’; ke hete pune la ite ewekë göi ni.”

Iesu hi lai a ahnithe koi angatre la ijine kola troa athipi nyidrë hune la sinöe memine la itre atr ka ngazo, a memine la itre atr ka methinëne la trenge wathebo. Nyidrëti mina fe a qaja ka hape, tro ha icilekeu memine la itretre drei nyidrë hnene la itre atr. Önine la itre aposetolo ka hape: “Joxu fe, Deti lola lue taua.”

Iesu a sa ka hape: “Loi hi.” Tune la hne së hna troa ce wange pë hë thupen, Iesu a troa hamëne la ketre tulu ka sisitria qa ngöne la itre taua. Mataio 26:31-35; Mareko 14:27-31; Luka 22:24-38; Ioane 13:31-38; Hna Amamane 14:1-3.

▪ Pine nemene matre ka iasesëkötrë la ikelikelë ne la itre aposetolo?

▪ Nemene la aqane cile Iesu kowe la jole cili?

▪ Nemene la hna eatrëne hnene la isisinyikeu hnei Iesu hna kuca memine la itretre drei nyidrë?

▪ Nemene la wathebo ka hnyipixe hna hamëne hnei Iesu, nge nemene la enyipi ewekëne ej?

▪ Nemene la aqane mama thei Peteru laka, sasaithi tulu menu pala ha la aqane mejiune i angeic, nge nemene la hnei Iesu hna qaja koi angeic?

▪ Pine nemene matre ame la itre hna amekötine hnei Iesu ekö göi troa xomi trengene mani, me watreng, ke ketre pengöne pena ha itre eje enehila?