Troa Thele Ixatua Thene La Itre Ka Tru

NEMENE LA ALIENE LA TROA HETRE IXATUA QAATHENE LA ITRE KA TRU?

Nyipiewekë tro la itre nekönatr a kapa la ixatua me eamo qaathene la itre ka tru. Hnëqa i keme me thine troa xatuan, me eamone la nekönatr. Ngo, ijije fe tro la itre xötr ka tru a xatuane me hamë eamo kowe la nekönatr.

NYIPIEWEKË LA IXATUA QAATHENE LA ITRE KA TRU

Ame ngöne la itre nöj ka nyimutre, tha hna majemine kö hnene la itre thöth troa ce tro memine la itre ka tru. Hanawang la itre kepin:

• Ame ngöne la hna ini, tru catre kö la etrune la itre nekönatr hune la itre porofesör, maine itre xaa xötr ka tru, matre nyudreni pala hi memine la itre xaa nekönatr.

• Ame la kola bëeke qa hna ini, alanyimu la itre nekönatr ka lapa caas, ke, kola huliwa la keme me thin.

• Kola mama ngöne la ketre rapor e Etazini ka hape, ame la itre nekönatr ka 8 koi 12 lao macatre, 6 lao hawa hnei nyudreni hna nue troa goeë tele, me drei miuzik, me elo jeux e nöjei draia

Önine la ketre itus (Hold On to Your Kids): “Ame enehila, itre thöth a thele eamo thene la itre xaa thöth. Tha hnyinge hë angatr kowe la kem, me thin, me itre porofesör, me itre xaa xötr ka tru.”

AQANE TROA HAMË IXATUA

Thele ijine jë troa ce lapa memine la nekö i epun.

TREPENE MEKÖT: “Ininejë la nekönate thenge la jë i nyën; nge e qatë hë tha tro kö nyën’ a jea qa ngön.”—Ite Edomë 22:6.

Itre nekönatr a ajan tro la keme me thine a iuji nyudren, me hamë ixatua. Önine la itre ka inamacan ka hape, aja ne la itre thöth troa kapa la eamo qaathei keme me thin, hune la itre xaa thöth. Önine la Droketre Laurence Steinberg ngöne la ketre itus (You and Your Adolescent) ka hape, “Itre nekönatr a nyitipune la aqane ujë ne la keme me thin, qaane la nyudreni a thöth utihë la kola tru. Aja ne la thöth troa atre la mekuna i epon, me dreng la hnei epon hna qaja, ngacama tha kapa kö nyën la itre xaa ewekë hnei epon hna qaja.”

Hnene laka, nekönatr a thele eamo thei epon, hamë eamo jë koi nyën. Thele ijine jë troa ce me nyën, me qaja la aliene hni epon, memine la mekuna i epon. Qaja jë koi nyën la itre hnei epon hna nyipiewekën, memine la itre ini hnei epon hna melën.

Thele jë la ketre atr ka troa hamë ixatua kowe la nekönatr.

TREPENE MEKÖT: “Ame la ate ce tro me ite ka inamacan, te, troa inamacan.”—Ite Edomë 13:20.

Drei la atr ka ijij troa hamë ixatua me eamo kowe la thöth? Thele jë tro la nekö i epun a ce tro memine la atr hnei epun hna mejiune kow. Eje hi laka, tha kolo kö a hape, qa i angeice pë hë troa thupëne la nekö i epun. Tro pe angeic a hamë ixatua thenge la itre ini hnei epuni hna hamën, ngo tha tro kö a amenune la nekönatr. Ame ngöne la Tusi Hmitrötr, kola amamane la pengöi Timoteo me Paulo. Ngacama tru hë Timoteo, ngo hnei angeic hna kepe thangane qa ngöne la hna ce tro me Paulo aposetolo. Nge tru la madrine i Paulo troa ce tro me Timoteo.—Filipi 2:20, 22.

Ame enehila, nyimutre la itre sinee së (qaaqaa, me hmihmi, me tretre, me itre xan) ka mele ngöne la itre xaa götrane la fen. Maine celë hi ka traqa koi epun, thele jë tro la nekö i epuni a ce tro memine la itre xötr ka tru. Troa iëne la itre ka trene thiina hnei epuni hna ajan tro nyën a melën.