Ҫынсем ҫӳллӗ башня тӑваҫҫӗ

ЧЫЛАЙ ҫул иртнӗ. Ной ывӑлӗсен ачасем ҫуралнӑ. Вӗсем ҫитӗнсе ҫитсен, вӗсен те ачасем ҫуралнӑ. Кӗҫех ҫӗр ҫинче ҫынсем нумайланса кайнӑ.

Вӗсенчен пӗри, Ной мӑнукӗн ачи, Ни́мрод пулнӑ. Вӑл чӗрчунсене те, ҫынсене те вӗлерекен усал ҫын пулнӑ. Ҫитменнине тата вӑл пурне те тытса тӑрас тесе хӑйне хӑй патшана лартнӑ. Турӑ Нимрода́ юратман.

Ун чухне пур ҫын та пӗр чӗлхепе калаҫнӑ. Ни́мрод ҫынсемпе пуҫ пулас тесе вӗсене пурне те пӗрле пурӑнтарасшӑн пулнӑ. Ҫавӑнпа та вӑл мӗн тунине пӗлетӗн-и? Вӑл ҫынсене хула тата унта ҫӳллӗ башня тума хушнӑ. Вӗсем кирпӗчсем мӗнле тунине курмашкӑн ӳкерчӗк ҫине пӑх-ха.

Иегова Турра ҫак ӗҫ килӗшмен. Турӑ ҫынсене пӗр вырӑнта анчах мар, пӗтӗм ҫӗр ҫийӗпе пурӑнтарасшӑн пулнӑ. Анчах та ҫынсем каланӑ: «Айтӑр хула тата пӗлӗте ҫитекен башня тӑвар! Вара ҫавӑнпа чапа тухӑпӑр!» Ҫынсем Турра мар, хӑйсене чапа кӑларасшӑн пулнӑ.

Ҫавӑнпа Турӑ ҫынсене башня тума чарса лартнӑ. Мӗнле майпа чарса лартнине пӗлетӗн-и? Сасартӑк вӑл ҫынсене тӗрлӗ чӗлхепе калаҫмалла тунӑ. Башня тӑвакансем урӑх пӗр-пӗрне ӑнланайман. Ҫавӑнпа та вӗсен хулине Вавило́н тесе чӗнме пуҫланӑ, вӑл «арпаштару» тенине пӗлтерет.

Ҫавӑн чухне ҫынсем Вавилонра́н куҫса кайма пуҫланӑ. Пӗр чӗлхепе калаҫакан ҫынсен ушкӑнӗсем ытти ҫӗрсене кайнӑ та унта пӗрле пурӑнма пуҫланӑ.