Мӗншӗн Иегова Свидетелӗсем унччен ырӑ хыпара итлемен ҫынсем патне тепӗр хут килеҫҫӗ?

Иегова Свидетелӗсем Турра тата ҫывӑх ҫынна юратнӑран Библири хыпара пурне те — кам ӑна унччен итлемен, вӗсене те — хаваспах калаҫҫӗ (Матфей 22:37—39). Турра юратни пире унӑн Ывӑлӗн заповедьне тытса тӑма хавхалантарать, вӑл ырӑ хыпара «каласа кӑтартма» хушнӑ (Апостолсен ӗҫӗсем 10:42; 1 Иоанн 5:3). Ҫавӑнпа та эпир авалхи вӑхӑтра пурӑннӑ пророксем пекех ҫынсене Туррӑн хыпарне пӗрре анчах каламастпӑр (Иеремия 25:4). Эпир ҫывӑх ҫынна юратнӑран пурнӑҫа ҫӑлакан «Патшалӑх ҫинчен калакан ырӑ хыпара» пурне те — ҫав шутрах малтан ӑна итлесшӗн пулман ҫынсене те — калама тӑрӑшатпӑр (Матфей 24:14).

Унччен ырӑ хыпара итлемен ҫынсем патне тепӗр хут килсен час-часах эпир унта ҫак хыпара итлес текенсене тӗл пулатпӑр. Ҫакӑн пекки виҫӗ сӑлтава пула пулса тухать:

• Ҫынсем куҫса каяҫҫӗ.

• Ҫав килтех пурӑнакансенчен ыттисем ырӑ хыпара итлеҫҫӗ.

• Ҫынсем улшӑнаҫҫӗ. Тӗнчери событисене тата пурнӑҫри лару-тӑрӑва пула хӑшӗ-пӗрисен Турӑ ҫинчен пӗлес кӑмӑл ҫуралать, ҫавӑнпа вӗсем Библири хыпарпа интересленме пуҫлаҫҫӗ (Матфей 5:3). Малтан пире хирӗҫ тӑнӑ ҫынсен чӗрисем те улшӑнма пултараҫҫӗ. Сӑмахран, Павел апостолпа ҫапла пулса тухнӑ та (1 Тимофей 1:13).

Ҫапах та эпир никама та хамӑр хыпара вӑйпах итлеттересшӗн мар (1 Пётр 3:15). Эпир кашни ҫыннӑн мӗне ӗненмеллине хӑйӗн суйласа илмелле тесе шутлатпӑр (Саккуна астутарни 30:19, 20).