Библи тӗпченӗ май мӗн те пулин ҫӗннине пӗлме тӑрӑшӑр

Тӗпчеме пуҫличчен хӑвӑр ҫавна мӗнле тӗллевпе тӑвасшӑн пулни ҫинчен шухӑшласа пӑхӑр. Иегова эпир пӗлекен материала та ҫӗнӗ енчен уҫса пама пултарассине асра тытӑр. Ҫавӑнпа та мӗне те пулин ҫӗннине вӗренме хатӗр пулӑр. Ҫакна тума мӗн пулӑшӗ?

Кӗлӗре ӑслӑлӑх ыйтӑр. Иеговӑран вӑл хӑвӑра ҫак самантра мӗне вӗрентесшӗн пулнине кӑтартма ыйтӑр (Иак. 1:5). Сирӗншӗн тема ҫӗнӗ мар пулсан та, ӑна тӗпӗ-йӗрӗпех пӗлетӗр тесе ан шутлӑр (Ытар. 3:5, 6).

Библи питӗ хӑватлӑ пулнине асра тытӑр. «Турӑ сӑмахӗ чӗрӗ» (Евр. 4:12). Ҫавӑнпа та эпир ӑна вуламассерен вӑл кашнинчех пирӗн ҫине тӗрлӗрен витӗм кӳме пултарать. Анчах та Турӑ Сӑмахӗ хамӑра мӗне вӗрентнине хаваспах йышӑнсан ҫеҫ вӑл пирӗн ҫине витӗм кӳрӗ.

Иеговӑн сӗтелӗ ҫинчи пур апата та хаклӑр. Турӑ паракан сӑнарлӑ апата чи паха апатран хатӗрленӗ ӗҫкӗ-ҫикӗпе танлаштарма пулать (Ис. 25:6). Ҫавӑнпа та хӑш-пӗр темӑсем «тутлах мар» пек туйӑнаҫҫӗ пулсан та, вӗсене тӳрех сирсе ан ярӑр. Вара вӗсем хӑвӑра усӑ кӳнине кӑна мар, савӑнӑҫ панине те куратӑр.