Abril

Yomʌch mi lac ñop chaʼan Jesús tsiʼ yʌcʼʌ i cuxtʌlel chaʼan miʼ coltañonla, i cheʼ bajcheʼ jiñi mi lac mejlel ti chumtʌl tiʼ pejtelel ora (Efes. 1:7). Jiñi yambʌ tiñʌmeʼob tsaʼ bʌ i taja ti tʼan Jesús mach yomic miʼ cʼuxob jiñi pan miʼ muqʼuic i japob jiñi vino muʼ bʌ i ñusʌntel cheʼ miʼ mejlel i Cena lac Yum (Juan 10:16). Pero mucʼʌch i tajob jiñi bendición muʼ bʌ i chʼʌm tilel jiñi i cuxtʌlel Jesús cheʼ mucʼʌch i pʌsob chaʼan miʼ ñopob tiʼ tojlel (Juan 6:53). I jiñi yom bʌ miʼ cʼuxob jiñi pan yicʼot miʼ japob jiñi vino jiñobʌch jiñi ochemoʼ bʌ ti jiñi tsijiʼ bʌ trato i mi caj i majlelob ti Yumʌntel yicʼot Jesús ti panchan. Mach yʌlʌyic mi ungidojonla o maʼañic. Yomʌch mi lac pʌs chaʼan mucʼʌch lac ñop tiʼ tojlel Jesucristo chaʼan mi lac mejlel ti chumtʌl tiʼ pejtelel ora. w24.12 13 párr. 14, 16

Cheʼ bʌ Jesús tsiʼ mele jiñi Cena yicʼot jiñi apóstolob, tsiʼ ñusʌbeyob jiñi pan mach bʌ yicʼotic levadura, i tiʼ subeyob chaʼan i wentʌlelʌch i bʌcʼtal. I cheʼ bʌ tsiʼ ñusʌbeyob jiñi vino, tiʼ subeyob jaʼel chaʼan jiñi i wentʌlelʌch «jiñi chʼichʼ chaʼan bʌ trato» (Mar. 14:​22-25; Luc. 22:20; 1 Cor. 11:24). Jesús tsiʼ taja ti tʼan jiñi tsijiʼ bʌ trato, yaʼ ochem Jehová yicʼot jiñi tejclum Israel, yom i yʌl, muʼ bʌ caj i chaʼleñob yumʌntel yicʼot Cristo tiʼ Yumʌntel Dios (Heb. 8:​6, 10; 9:15). Cheʼ bʌ Jesús tsiʼ mele jiñi Cena yicʼot jiñi apóstolob i chaʼan, tsaʼ bʌ i taja ti tʼan jiñʌch jiñi «alʌ junmojt tiñʌmeʼ». Ti ili grupo, ti ñaxan cojach ochemob jiñi apóstolob yaʼ bʌ añob yicʼot i jiñʌch muʼ bʌ caj i majlelob yicʼot Jesús ti panchan. w24.12 11 párr. 9, 10

Jesús tsaʼ ajqʼui tiʼ cʼʌb i contrajob, tsiʼ cʌchʌyob, tsiʼ pʼajayob, tiʼ sʌsʌp jatsʼʌyob i tsiʼ yʌlʌyob chaʼan yom miʼ chʌmel. Ti wiʼil, jiñi soldadojob tsiʼ chʼijiyob ti teʼ. Jesús tsaʼʌch i lʌtʼʌ pejtelel ili wocol. Cheʼ bʌ Jehová tsiʼ qʼuele chaʼan jiñi i Yalobil woli i wen ñusan wocol wen cʼux tsiʼ yubi. I anquese miʼ wen cʼuxbin yicʼot añʌch i pʼʌtʌlel chaʼan miʼ coltan, maʼañic tsiʼ mele. ¿Chucoch? Come miʼ cʼuxbiñonla. Cheʼ bʌ Jehová tsiʼ yʌcʼʌ i Yalobil bajcheʼ tsʌnsʌbil bʌ majtañʌl tsiʼ pʌsʌ chaʼan miʼ wen cʼuxbiñet. Cheʼ maʼ ñaʼtan pejtelel tsaʼ bʌ i mele Jehová chaʼan miʼ locʼsañet ti mulil yicʼot chʌmel. ¿Mach ba muqʼuic i yʌcʼ ti toj sajtel a pusicʼal? (1 Juan 4:​9, 10). Jehová yom i coltañonla ti jujuntiquil chaʼan mi lac bej melben i yeʼtel anquese xmulilonla, i ti talto bʌ qʼuin mi caj i junyajl jisan jiñi mulil. w24.08 5, 6 párr. 13, 14

Miʼ mejlel lac ñumen chʼʌmben i sujm bajcheʼ cʼamel miʼ cʼuxbiñonla Jehová cheʼ bʌ mi lac ñaʼtan chuqui tsiʼ mele chaʼan miʼ yʌcʼ i cuxtʌlel i Yalobil. Satanás miʼ junyaj al chaʼan maʼañic majqui xucʼul mi caj i yajñel ti Dios mi woli i ñusan wocol. Pero Jehová tsiʼ yʌcʼʌ chaʼan jiñi i Yalobil miʼ ñusan wocol cheʼ bʌ muʼto caj i tsʌnsʌntel (Job 2:​1-5). Jehová tsaʼʌch i qʼuele cheʼ bʌ tsiʼ wen wajleyob, tsiʼ jatsʼʌyob, i tsiʼ wen ticʼlayob cʼʌlʌl cheʼ tiʼ tsʌnsayob (Mat. 27:​28-31, 39). Cheʼ yomiqui, bajcheʼ jach ora tsaʼ mejli i coltan jiñi i Yalobil (Mat. 27:​42, 43). Pero cheʼ tsaʼic i mele, maʼañic tsaʼ tojle jiñi lac mul i maʼañic lac pijtaya. Jin chaʼan Jehová tsiʼ yʌcʼʌ chaʼan jiñi i Yalobil miʼ ñusan wocol yicʼot miʼ chʌmel. w25.01 22 párr. 7

Añonla ti jabil 33, ti 16 de nisán, jiñi xcʌntʼañob i chaʼan Jesús wen chʼijyemob yicʼot woliyob ti bʌqʼuen come Jesús tsaʼix tsʌnsʌnti. I chaʼtiquil xcʌntʼañob majlel mucʼob ti Emaús. ¿Chuqui tsaʼ ujti? Cheʼ bʌ jiñi chaʼtiquilob majlel mucʼob ti Emaús tsaʼ tili juntiquil wiñic i lajal tsaʼ majli yicʼotob. Cheʼ jiñi, jiñi chaʼtiquilob tsaʼ caji i subeñob ili wiñic pejtelel chuqui tsaʼ ujti yicʼot bajcheʼ tsaʼ tsʌnsʌnti Jesús. I yaʼi, jiñi wiñic tsaʼ caji i tsictesʌbeñob i «tsʼijbujel Moisés yicʼot pejtelel jiñi Xʼaltʼañob», tiʼ subeyob chucoch tsaʼ tsʌnsʌnti Jesús yicʼot tsiʼ ñusa cabʌl wocol. Cheʼ bʌ tsaʼ cʼotiyob ti Emaús, jiñi chaʼtiquil xcʌntʼañob tsiʼ qʼueleyob chaʼan jiñi wiñic jiñʌch Jesús (Luc. 24:​13-35). Cheʼ bʌ Jesús tsaʼix chaʼ tejchi i wʌʼto tsaʼ ajñi 40 qʼuin wʌʼ tiʼ pañimil mach junsujtel jach tsiʼ pʌsbe i bʌ jiñi xcʌntʼañob i chaʼan. Ti jimbʌ ora tsiʼ coltayob chaʼan miʼ tajob i chʼejlel yicʼot i tijicñʌyel chaʼan miʼ bej chaʼleñob subtʼan yicʼot cʌntesa. w24.10 12 párr. 1-3

Juntiquil alʌl miʼ colel majlel cheʼ bajcheʼ miʼ ñumel majlel jiñi jabil, pero mach cheʼic miʼ yujtel tiʼ tojlel juntiquil yom bʌ i taj i ñaʼtʌbal. Jumpʼejl ejemplo, jiñi hermanojob ti Corinto tsiʼ cʌñʌyob i sujmlel, cheʼ jiñi tsiʼ chʼʌmʌyob jaʼ, tsaʼ aqʼuentiyob jiñi chʼujul bʌ espíritu i cabʌl chuqui tsiʼ cʌñʌyob tiʼ tojlel jiñi apóstol Pablo (Hech. 18:​8-11). Pero cheʼ bʌ ñumeñix chaʼpʼejl uxpʼejl jab an maxto bʌ i tajayob i ñaʼtʌbal (1 Cor. 3:2). Mi la com lac taj lac ñaʼtʌbal yomʌch mi lac chaʼlen wersa lac sʌclan, mi maʼañic mi lac mel lajal bajcheʼ bej alʌlontola la com ajñel (Pr. 1:22). Mach la comic chaʼan lajalonla bajcheʼ juntiquil ñuquix bʌ muʼto bʌ i pijtan chaʼan miʼ subentel chuqui yom miʼ mel. Jiñi la com bʌ jiñʌch cheʼ mi lac chʼʌm ti lac wenta lac mel muʼ bʌ caj i coltañonla chaʼan mi laj colel majlel. Mi jatet maʼ wubin chaʼan maxto a taja a ñaʼtʌbal, cʼajtiben Jehová chaʼan miʼ yʌqʼueñet jiñi i «pʼʌtʌlel yicʼot jiñi i mulʌntel i melol chuqui miʼ mulan» (Filip. 2:13). w24.04 4 párr. 9, 10

Jehová miʼ subeñonla bajcheʼ yubil miʼ yubin i bʌ cheʼ bʌ miʼ chaʼlen meloñel (Ez. 33:11). Jehová maʼañic mi caj i junyajl jisan juntiquil lac piʼʌl mi maʼañic chucoch yom miʼ mel. Wen yujil pʼuntaya i mi caj i pʌs cheʼ bʌ yomʌch miʼ qʼuel. La cujil chaʼan añʌch lac piʼʌlob mach bʌ añix mi caj i chaʼ chʼojyelob, ¿majquiyob? Jiñi Biblia miʼ yʌl chaʼtiquil uxtiquilob. Juntiquil jiñʌch Judas Iscariote, Jesús tsiʼ yʌlʌ chaʼan maʼañix mi caj i chaʼ chʼojyel (Mar. 14:21; qʼuele jaʼel Juan 17:12 yicʼot jiñi nota chaʼan estudio). Judas wen yujil chaʼan mach weñic chuqui woliʼ mel tiʼ tojlel Jehová yicʼot jiñi i Yalobil (qʼuele Marcos 3:29 yicʼot jiñi nota tac chaʼan estudio). Jesús tsiʼ yʌlʌ jaʼel chaʼan jiñi ñucoʼ bʌ i yeʼtel ti ñopbalʌl tsaʼ bʌ i contrajiyob ti jimbʌ ora maʼañix mi caj i chaʼ chʼojyelob (Mat. 23:33; qʼuele jaʼel Juan 19:11 yicʼot jiñi nota chaʼan estudio muʼ bʌ i yʌl «del hombre»). I jiñi apóstol Pablo tsiʼ wʌn alʌ chaʼan jiñi apóstatajob maʼañic bʌ miʼ chaʼ ñaʼtañob i bʌ maʼañic mi caj i chʼojyelob jaʼel (Heb. 6:​4-8; 10:29). w24.05 4 párr. 10, 11

Mi chʌn lʌcʼʌl mi la cajñel tiʼ tojlel Jehová, pejtelel chuqui miʼ mel Satanás ti laj contra, mi caj i mejlel i tojʼesan (1 Juan 3:8). I yaʼ ti tsijiʼ bʌ pañimil Jehová mi caj i chʌn cʌntañonla mi caj i yʌqʼueñonla chuqui i cʼʌjñibal lac chaʼan chaʼan chʌn lʌcʼʌl mi la cajñel tiʼ tojlel yicʼot chaʼan bej cuxul mi la cajñel (Apoc. 21:4). ¡Wen utsʼatax cheʼ i yamigojonla Jehová come lajal bajcheʼ woliʼ yotsañonla tiʼ yotot! Pero mi yaʼʌch la com bej ajñel (Ez. 37:27). ¿Bajcheʼ yilal yomonla? Laʼcu lac ñaʼtan chaʼan an majqui miʼ pʌyonla tiʼ yotot, ¿muʼ ba caj lac mel chuqui jach la com? Maʼañic, mi lac mulan lac ñaʼtan chuqui miʼ pijtan ti lac tojlel. Lʌcʼʌ lajal miʼ yujtel tiʼ tojlel Jehová, mi la com bej ajñel tiʼ yotot yomʌch mi lac ñaʼtan chuqui miʼ pijtan ti lac tojlel. I mucʼʌch caj lac chaʼlen wersa lac mel come mi laj cʼuxbin i la com lac tijicñesan (Col. 1:10). Jin chaʼan, mach yomic miʼ ñajʌyel lac chaʼan majqui Jehová. Jiñi lac bʌqʼuen tiʼ tojlel mi caj i coltañonla chaʼan maʼañic mi lac mel muʼ bʌ i yʌqʼuen i chʼijyemlel yicʼot chaʼan mi lac peqʼuesan lac bʌ tiʼ tojlel (Mi. 6:8). w24.06 4 párr. 8, 9

Jehová tiʼ sube Abrahán chaʼan miʼ yʌcʼ i yalobil bajcheʼ tsʌnsʌbil bʌ majtañʌl, Abrahán tsaʼʌch i jacʼʌ anquese wen cʼux tiʼ pusicʼal tsiʼ yubi. Cheʼ bʌ Abrahán muqʼuix caj i tsʌnsan i yalobil, Jehová tiʼ sube chaʼan maʼañic miʼ mel. Ili an chuqui ñuc bʌ i cʼʌjñibal tsiʼ pʌsʌ: Chaʼan Jehová ti jumpʼejl i pusicʼal mi caj i yʌcʼ jiñi cʼuxbibil bʌ i Yalobil come miʼ wen cʼuxbiñonla (Gn. 22:​1-18). Ti wiʼil, Jehová tsiʼ yʌqʼue Mandar jiñi israelitajob, i tiʼ subeyob chaʼan yom miʼ yʌcʼob tsʌnsʌbil bʌ majtañʌl chaʼan miʼ ñusʌbentelob i mul (Lv. 4:​27-29; 17:11). Jiñi tsiʼ pʌsʌ chaʼan Jehová mi caj i yʌcʼ jumpʼejl majtañʌl ñumen wem bʌ come mi caj i junyajl locʼsan jiñi wiñicob xʼixicob ti jiñi mulil. I tsiʼ cʼʌñʌ jiñi xʼaltʼañob chaʼan miʼ tsictesan chaʼan jiñi i Yalobil, i pʼolbal jiñi xʼixic, mi caj i ñusan wocol yicʼot mi caj i chʌmel chaʼan miʼ junyajl locʼsañonla ti mulil, i tsaʼʌch i mele ti a tojlel jaʼel (Is. 53:​1-12). w24.08 4 párr. 7, 8

Mi tsaʼix a ñaʼta bajcheʼ hora mi caj a pejcan jiñi Biblia, sʌclan o ñaʼtan bajcheʼ miʼ mejlel a jacʼ jiñi woli bʌ a cʌn, cʼajtiben a bʌ: «¿Bajcheʼ miʼ mejlel j cʼʌn ili ora o ti talto bʌ qʼuin jiñi tsaʼ bʌ ujti j cʌn?». Ñaʼtancu chaʼan tsaʼ ujti a pejcan 1 Tesalonicenses 5:​17, 18. Wʌle jumucʼ ñaʼtan iliyi: ¿Bajcheʼ yilal jiñi a woración? ¿Loqʼuem ba ti a pusicʼal? ¿Jaysujtel maʼ mel? ¿Chuqui tac muʼ bʌ a wʌqʼuen wocolix i yʌlʌ Jehová? Maʼ mejlel a ñaʼtan uxchajp chuqui a wom bʌ a wʌqʼuen wocolix i yʌlʌ. Mi mucʼʌch a wʌqʼuen i yorajlel chaʼan maʼ mel bajcheʼ iliyi, mach muqʼuic jach caj a ñʌchʼtan jiñi i Tʼan Dios, mi caj a mel cheʼ bajcheʼ woli a cʌn. I mi jujumpʼejl qʼuin maʼ meleʼ iliyi cheʼ bʌ maʼ pejcan jiñi Biblia, mi caj a sujtel ti ñumen wem bʌ xñoptʼan. w24.09 4, 5 párr. 9, 10

Jehová wen utsʼatax bajcheʼ tsiʼ meleyonla: Ñumen tijicñayonla cheʼ mi la cʌcʼ i mach jiñic cheʼ mi lac chʼʌm. Cheʼ mi laj coltan jiñi hermanojob wen mi la cubin lac bʌ i mi lac mulan chaʼan mi la cʌqʼuentel wocolix la cʌlʌ. Pero, mach yʌlʌyic mi tsiʼ meleyob o maʼañic, yom tijicñayonla come wen tsaʼ bʌ lac mele. Jin chaʼan, cheʼ bʌ an chuqui mi la cʌcʼ, mach yʌlʌyic chuquiyes, laʼ laj cʼajtesan muʼ bʌ i yʌl 2 Crónicas 25:9: «Lac Yum mi mejlel i yʌqʼueñet yambʌ [ . . . ] ñumen bajcheʼ ti ñaxan». ¡Maʼañic yambʌ muʼ bʌ i mejlel i ñumen acʼ cheʼ bajcheʼ Jehová! I cheʼ bʌ Jehová miʼ yʌqʼueñonla lac chobejtʌbal chaʼan jiñi muʼ bʌ lac mel, jiñʌch muʼ bʌ i yʌqʼueñonla lac tijicñʌyel. Jin chaʼan, laʼ lac chʌn chaʼlen wersa lac pʌs la cutslel cheʼ bajcheʼ jiñi lac Tat am bʌ ti panchan. w24.09 31 párr. 20, 21

Jehová wen yujil pʼuntaya (Sal. 103:13; Is. 49:15). Cʼux miʼ yubin cheʼ bʌ mi lac ñusan wocol (Zac. 2:8). Miʼ coltañonla chaʼan mi lac lʌcʼtesan lac bʌ tiʼ tojlel i mi lac sujtel tiʼ yamigo (Sal. 25:14; Hech. 17:27). Cheʼ jaʼel, miʼ pʌs i pecʼlel i «miʼ juʼsan i wut chaʼan miʼ qʼuel panchan yicʼot pañimil. Miʼ locʼsan pobre baʼ cʼax pʼumpʼun» (Sal. 113:​6, 7). ¿Mach ba muqʼuic lac mulan la cʌqʼuen i ñuclel juntiquil Dios cheʼ bʌ yilal i melbal bajcheʼ ili? Mi la cʌqʼuen i ñuclel Jehová come la com chaʼan jiñi yambʌ lac piʼʌlob miʼ cʌñob. Cabʌl lac piʼʌlob miʼ yʌlob mach bʌ weñic tiʼ tojlel Dios. ¿Chucoch? Come Satanás an i yʌlʌ lot tac tiʼ tojlel i an i mʌcbeyob i ñaʼtʌbal jiñi lac piʼʌlob (2 Cor. 4:4). An i yʌcʼʌ ti ñaʼtʌntel chaʼan Jehová jontol yicʼot miʼ yʌqʼueñonla lac toj lac mul. Pero joñonla la cujil chaʼan mach i sujmic jiñi. La com la cʌqʼuen i ñaʼtan jiñi lac piʼʌlob majqui Dios yicʼot bajcheʼ yilal, cheʼ bajcheʼ jiñi mi la cʌqʼuen i ñuclel (Is. 43:10). w25.01 3, 4 párr. 6, 7

Satanás tsiʼ cʼʌñʌ chaʼtiquil uxtiquil lac piʼʌlob chaʼan miʼ yʌlob lot tac tiʼ tojlel Jesús, anquese jiñʌch i Yalobil Dios, toj yicʼot tsiʼ mele milagro tac. Jumpʼejl ejemplo, jiñi añoʼ bʌ i yeʼtel ti ñopbalʌl tac tsiʼ yʌlʌyob chaʼan Jesús miʼ choc loqʼuel xibajob «tiʼ pʼʌtʌlel i yum xibajob» (Mar. 3:22). I cheʼ bʌ tsiʼ chucuyob Jesús, jiñi añoʼ bʌ i yeʼtel ti ñopbal tac tsiʼ yʌlʌyob chaʼan tsiʼ pʼajbe i cʼabaʼ Dios i tiʼ subeyob jiñi lac piʼʌlob chaʼan miʼ cʼajtiñob chaʼan miʼ tsʌnsʌntel (Mat. 27:20). Ti wiʼil, cheʼ bʌ jiñi xcʌntʼañob i chaʼan Jesús tsaʼ cajiyob ti subtʼan, jiñi i contrajob «tsiʼ ñijcʌbeyob i pusicʼal jiñi lac piʼʌlob» «i tsiʼ yʌcʼʌyob tiʼ contra jiñi hermanojob» (Hech. 14:​2, 19). Jiñi La Atalaya 1 de diciembre chaʼan 1998, tsiʼ taja ti tʼan Hechos 14:​2, baqui tsiʼ yʌlʌ chaʼan jiñi judíojob maʼañic bʌ tsiʼ ñopoyob jiñi wen tʼan, tsaʼto caji i pucob lot tac chaʼan jiñi yambʌ lac piʼʌlob miʼ yʌcʼob i bʌ tiʼ contra jiñi hermanojob. Satanás cʼʌlʌl ili ora woliʼ lotin «pejtelel lac piʼʌlob ti pañimil». w24.04 11 párr. 15, 16

Chaʼan juntiquil miʼ mejlel i taj i cuxtʌlel, mach yaʼic cʌyʌl jalix tsaʼ chʌmi. La cujil chaʼan Jehová, «jiñi xMeloñel muʼ bʌ i mel pejtel añoʼ bʌ ti pañimil», toj chuqui mi caj i mel (Sal. 33:​4, 5). ¿I chuqui mi caj i yujtel tiʼ tojlel jiñi lac piʼʌlob ñajt bʌ chumulob maʼañic bʌ tsiʼ yubiyob jiñi wen tʼan? Jehová maʼañic mi caj i yʌl chaʼan pejtelel jiñi lac piʼʌlob lajalob bajcheʼ chivo (Mat. 25:46). Ili tsiquil miʼ pʌs chaʼan Jehová mach jiñic mi caj i chʼʌm ti ñuc baqui chumul juntiquil lac piʼʌl chaʼan miʼ yʌqʼuen i cuxtʌlel. Pero mach la cujilic bajcheʼ mi caj i mel cheʼ bʌ wolix jiñi ñuc bʌ wocol. Mi joñonla mi lac pʼuntañob, Jehová ñumento. Tajol an muʼ bʌ caj i ñopob tiʼ tojlel Jehová cheʼ bʌ miʼ qʼuelob chuqui woliʼ yujtel ti jiñi ñuc bʌ wocol, come mi caj i tsictiyel tiʼ pejtelel pañimil majqui Jehová (Ez. 38:16). w24.05 12 párr. 14, 15

Mi lac mulan laj coltan jiñi hermanojob (2 Cor. 8:4). Pero chaʼan mi lac mel, an i tajol yomʌch mi lac pʌs lac chʼejlel. Jumpʼejl ejemplo, cheʼ an baqui miʼ yujtel guerra jiñi ancianojob yujilob chaʼan jiñi hermanojob yom miʼ ñuqʼuesʌbentelob i pusicʼal yicʼot yom miʼ coltʌntelob. Tajol yom miʼ yʌqʼuentelob jiñi Biblia, jiñi publicación tac yicʼot yambʌ chuqui tac i cʼʌjñibal i chaʼañob. I anquese tajol bʌbʌqʼueñʌch chaʼan miʼ melob, pero jiñi ancianojob mucʼʌch i melob come miʼ cʼuxbiñob jiñi hermanojob. Wen ñuc i cʼʌjñibal cheʼ mi lac jacʼ muʼ bʌ lac subentel chaʼan chʌn temel mi la cajñel. Jin chaʼan, cheʼ an chuqui miʼ subeñonla jiñi sucursal yomʌch mi lac jacʼ (Heb. 13:17). Jiñi ancianojob yom miʼ chʌcʌ qʼuelob jiñi instrucción tac chaʼan bajcheʼ yom chajpʌbilonla mi tsaʼ ujti jumpʼejl wocol (1 Cor. 14:​33, 40). Yom chʼejlonla, pero tsajalonla (Pr. 22:3). Laʼ laj cʼʌn lac ñaʼtʌbal chaʼan maʼañic mi lac mel muʼ bʌ mejlel i ñumen acʼonla ti wocol. Laʼ lac ñop ti Jehová, jin miʼ mejlel i coltañonla lac ñaʼtan bajcheʼ yom mi laj coltan jiñi hermanojob. w24.07 4 párr. 8; 5 párr. 11

Jiñi rey David i cʌñʌ Jehová i tsiʼ ñopo tiʼ tojlel. Jin chaʼan, cheʼ bʌ jiñi rey Saúl woli i sʌclan chaʼan miʼ tsʌnsan, David tsiʼ cʼajtibe i coltaya Jehová. I cheʼ bʌ tsiʼ qʼuele chaʼan Jehová tsaʼʌch i jacʼbe i yoración yicʼot tsiʼ colta, tsiʼ yʌlʌ: «Cuxul lac Yum» (Sal. 18:46). ¿Chucoch cheʼ tsiʼ yʌlʌ bajcheʼ jiñi? Jumpʼejl libro miʼ yʌl chaʼan jiñi tsaʼ bʌ i yʌlʌ David miʼ pʌs chaʼan mucʼʌch i wen ñop chaʼan Jehová «juntiquilʌch Dios cuxul bʌ muʼ bʌ i chʌn coltan jiñi i wiñicob». David tsiʼ qʼuele bajcheʼ tsiʼ wen colta Jehová tiʼ cuxtʌlel, i jiñi tsiʼ colta chaʼan miʼ ñumen ñop chaʼan Jehová cuxulʌch yicʼot chaʼan miʼ bej melben i yeʼtel i miʼ yʌqʼuen i ñuclel (Sal. 18:​28, 29, 49). Mi mucʼʌch lac ñop chaʼan Jehová jiñʌch jiñi cuxul bʌ Dios, mi caj i coltañonla chaʼan tijicña mi lac melben i yeʼtel. Mi caj i yʌqʼueñonla lac pʼʌtʌlel chaʼan mi lac lʌtʼ jiñi wocol tac yicʼot mi lac chaʼlen wersa lac melben i yeʼtel. Cheʼ jaʼel, mi caj lac mulan chaʼan chʌn lʌcʼʌl mi la cajñel tiʼ tojlel. w24.06 20, 21 párr. 3, 4

¿Chuqui miʼ pʌsbeñonla tsaʼ bʌ i tsʼijbube jiñi apóstol Pablo jiñi hermanojob ti Tesalónica? Chaʼan mi an chuqui tsaʼ la cubi muʼ bʌ i yʌcʼ ti toj sajtel lac pusicʼal pero mach lajalic yicʼot jiñi cʌmbil bʌ lac chaʼan yaʼ ti Biblia, yom tsajalonla. Ti wajali, jiñi Unión Soviética tsiʼ pucu jumpʼejl carta baqui miʼ suben jiñi hermanojob chaʼan miʼ mejlel i tʼoxob i bʌ tiʼ tojlel jiñi organización, i tsiʼ yʌlʌyob chaʼan jiñi carta tilem ti central mundial. Anquese poj cheʼʌch yilali, jiñi hermanojob xucʼuloʼ bʌ tsiʼ cʌñʌyob chaʼan muʼ bʌ i yʌl jiñi carta mach lajalic yicʼot jiñi cʌmbil bʌ i chaʼañob, jin chaʼan maʼañic tsaʼ yajliyob ti jiñi lot. Ili ora, jiñi laj contrajob an i tajol miʼ cʼʌñob jiñi internet chaʼan miʼ pucob lot tac ti lac tojlel i miʼ ñop i tʼoxoñobla. Jin chaʼan, yomʌch mi lac wen qʼuel miʼ sujmʌch jiñi woli bʌ lac pejcan o lac ñʌchʼtan chaʼan maʼañic mi la cʌcʼ lac bʌ ti lotintel i miʼ qʼuextan jiñi lac ñaʼtʌbal (2 Tes. 2:2; 1 Juan 4:1). w24.07 12 párr. 14, 15

An junchajp wen ñuc bʌ i cʼʌjñibal, jiñʌch cheʼ mi la cʌcʼ lac bʌ ti Jehová chaʼan mi lac sujtel tiʼ familia. Jiñʌch yom bʌ Jehová chaʼan mi lac mel ti lac pejtelel, ¿chucoch? Yom chaʼan lʌcʼʌl mi la cajñel tiʼ tojlel i mi lac chumtʌl tiʼ pejtelel ora (Dt. 30:​19, 20; Gál. 6:​7, 8). Anquese Jehová yom chaʼan mi lac melben i yeʼtel, maʼañic miʼ xicʼonla chaʼan mi lac mel. Pero ¿ixcu mi juntiquil chʼʌmʌlix bʌ i chaʼan jaʼ miʼ chaʼlen tsʌts bʌ mulil? Mi maʼañic miʼ chaʼ ñaʼtan i bʌ, yom miʼ chojquel loqʼuel ti congregación (1 Cor. 5:13). Pero Jehová yom chaʼan jiñi muʼ bʌ i chaʼlen mulil miʼ chaʼ ñaʼtan i bʌ, i jiñʌch junchajp chucoch tsiʼ choco tilel i Yalobil, chaʼan miʼ ñusʌben i mul jiñi muʼ bʌ i chaʼ ñaʼtan i bʌ. Jehová wen yujil cʼuxbiya, jin chaʼan miʼ coltan jiñi muʼ bʌ i chaʼlen mulil chaʼan miʼ chaʼ ñaʼtan i bʌ (Zac. 1:3; Rom. 2:4; Sant. 4:8). w24.08 14 párr. 1, 2

Cheʼ bʌ jiñi apóstol Juan tiʼ tsʼijbu jiñi i yuxpʼejlel i carta, ti jimbʌ ora an tsaʼ bʌ caji i pucob mach bʌ i sujmic cʌntesa i jin chaʼan an tʼox bʌ ti congregación. Pero an xñoptʼañob tsaʼ bʌ chʌn ajñiyob tiʼ sujmlel i tsiʼ jacʼbeyob i tʼan Jehová (2 Juan 4, 6). Ili xñoptʼañob mach jin jach tsiʼ yʌqʼueyob i tijicñʌyel Juan, tsiʼ yʌqʼueyob i tijicñʌyel Jehová jaʼel (Pr. 27:11). ¿Chuqui miʼ pʌsbeñonla tsaʼ bʌ i yʌlʌ Juan? Chaʼan cheʼ xucʼulonla ti Jehová tijicñayonla yicʼot mi lac tijicñesan yañoʼ bʌ (1 Juan 5:3). Wen tijicña mi la cubin cheʼ la cujil chaʼan woli lac tijicñesan Jehová. I Jehová tijicña miʼ yubin i bʌ jaʼel cheʼ bʌ miʼ qʼuel chaʼan maʼañic mi lac mel mach bʌ weñic i mi lac jacʼben i tʼan. Cheʼ jaʼel, jiñi ángelob miʼ yubiñob i tijicñʌyel cheʼ xucʼulonla ti Jehová (Luc. 15:10). I wen tijicña mi la cubin cheʼ mi laj qʼuel chaʼan an hermanojob maʼañic bʌ miʼ cʌyob Jehová (2 Tes. 1:4). I cheʼ bʌ jiñi i pañimil Satanás miʼ jisʌntel mi caj lac wen ubin lac tijicñʌyel come xucʼul tsaʼ ajñiyonla tiʼ tojlel Jehová. w24.11 12, 13 párr. 17, 18

¿Jal ba yom maʼ pijtan chaʼan maʼ pejcan jiñi woli bʌ a mulan? Mi orajach maʼ waʼ suben tajol miʼ mejlel i ñaʼtan chaʼan waʼ a womix ñujpuñel (Pr. 29:20). Pero mi maʼ cʌlʌx jalʼan miʼ mejlel i ñaʼtan chaʼan mach segurojetic (Ec. 11:4). Cʼajtesan chaʼan mach yomic i yʌl chaʼan jiñi muʼ bʌ caj a tech a pejcan jiñʌch muʼ bʌ caj i ñujpuñel a wicʼot. Yomʌch bʌ maʼ ñaʼtan jin mi chajpʌbiletʌch chaʼan jiñi ñujpuñel yicʼot chaʼan tajol jiñʌch muʼ bʌ i mejlel ti sujtel ti a ñoxiʼal o ti a wijñam. ¿Ixcu miʼ tsaʼ qʼuele chaʼan an majqui woliʼ mulañet? ¿Chuqui yom maʼ mel? Mi maʼañic woli a mulan, yom jamʌ tsiquil maʼ pʌsben chaʼan maʼañic chuqui a wom. Mach utsʼatic cheʼ muqʼuic a toʼol aqʼuen i ñaʼtan chaʼan wolʌch a mulan jaʼel (Efes. 4:25). w24.05 23 párr. 9, 10

Cojach jiñi mero ungido bʌ i chʌn xucʼul miʼ yajñel «mi caj i pʌjyel majlel», yom i yʌl, chaʼan mi caj i majlel yicʼot Jesús ti panchan chaʼan miʼ chaʼlen yumʌntel. Mi juntiquil ungido mach yʌxʌlic i yo, maʼañic mi caj i tempan i bʌ yicʼot jiñi «yajcʌbiloʼ bʌ» (Mat. 24:31). Pero jiñi muʼ bʌ caj lac chumtʌl ila ti Pañimil yomʌch mi lac jacʼ jaʼel jiñi ticʼojel tsaʼ bʌ i yʌlʌ Jesús, yom xucʼul mi la cajñel yicʼot chʌn yʌxʌl la co. Wen laj cʌñʌyix Jehová, la cujil chaʼan wen pejtelel chuqui miʼ mel. Jin chaʼan, maʼañic mi lac pensarin mi ili ora an wolito bʌ i yajcan bajcheʼ ungido. Lajal miʼ yujtel bajcheʼ jiñi lajiya tsaʼ bʌ i yʌlʌ Jesús tiʼ tojlel jiñi xʼeʼtelob wiʼilix bʌ tsiʼ techeyob eʼtel, junlajal tsiʼ chʼʌmʌyob i tojol cheʼ bajcheʼ jiñi yambʌ xʼeʼtelob ñaxam bʌ tsiʼ techeyob (Mat. 20:​1-16). Pejtelel jiñi ungidojob xucʼuloʼ bʌ jaʼel junlajal mi caj i chʼʌmob i majtan, mach yʌlʌyic mi wiʼilix tsaʼ yajcʌntiyob. w24.09 24 párr. 15-17

Jesús tsiʼ wen ñusa wocol. Jiñi i familia maʼañic tsiʼ ñopo chaʼan jiñʌch jiñi Mesías i tiʼ subeyob chaʼan tsaʼ sojqui. Jiñi añoʼ bʌ i yeʼtel ti ñopbalʌl tsiʼ yʌlʌyob chaʼan miʼ comol chaʼlen eʼtel yicʼot jiñi xibajob. I jiñi soldadojob romanojoʼ bʌ tsiʼ wajleyob, tsiʼ ticʼlayob i tiʼ tsʌnsayob (Mar. 3:​21, 22; 14:55; 15:​16-20, 35-37). Pero Jesús tsaʼʌch i laj cuchu i mach cheʼic tsiʼ mele cheʼ bajcheʼ tsaʼ melbenti. ¿Chuqui mi laj cʌn tiʼ tojlel? (1 Ped. 2:​21-23). Jesús yujil jalaqui yom miʼ chaʼlen tʼan yicʼot jalaqui ñʌchʼʌl jach miʼ cʌytʌl (Mat. 26:​62-64). An i tajol ñʌchʼʌl jach tsaʼ cʌyle cheʼ tsiʼ yʌlʌyob lot tac tiʼ tojlel (Mat. 11:19). Pero cheʼ bʌ yomʌch miʼ chaʼlen tʼan maʼañic tsiʼ yʌleʼ i contrajob yicʼot maʼañic tsiʼ chʼʌcʌyob. w24.11 5 párr. 9, 10

Laʼcu lac ñaʼtan chaʼan an majqui mi la cʌqʼuen i majtan, ¿bajcheʼ yubil mi la cubin cheʼ bʌ mi laj qʼuel chaʼan maʼañic woli i cʼʌn, tsaʼix ñajayi i chaʼan o tsaʼ jach i loto? Chʼijyem mi la cubin. Pero cheʼ bʌ mi laj qʼuel chaʼan wolʌch i cʼʌn tijicña mi la cubin. Miʼ pʌs chaʼan mucʼʌch i wen qʼuel ti ñuc jiñi majtan tsaʼ bʌ la cʌqʼue. ¿Chuqui miʼ pʌsbeñonla ili? Jehová tsiʼ yʌcʼʌ i cuxtʌlel i Yalobil chaʼañonla, i tijicña miʼ yubin cheʼ bʌ miʼ qʼuel chaʼan mucʼʌch lac wen qʼuel ti ñuc ili majtañʌl yicʼot jiñi i cʼuxbiya tsaʼ bʌ i pʌsʌ (Juan 3:16; Rom. 5:​7, 8). Pero mi tsaʼ laj cʌyʌ laj qʼuel ti ñuc ili majtañʌl tsaʼ bʌ i yʌqʼueyonla Jehová lajal bajcheʼ mi lac lot baqui maʼañix mi lac taj laj qʼuel i miʼ ñajʌyel lac chaʼan. Chaʼan mach cheʼic mi la cujtel bajcheʼ jiñi, laʼ lac ñaʼtan tiʼ pejtelel ora chuqui an i mele Jehová yicʼot Jesús ti lac tojlel. w25.01 26 párr. 1, 2

Jiñi muʼ bʌ i yochel ti anciano mach yomic tsijib xñoptʼanto. Ili yom i yʌl chaʼan yomixto miʼ tsʼitaʼ ñumel tiempo chaʼan miʼ mejlel i ñumen lʌcʼtesan i bʌ ti Jehová yicʼot miʼ taj majlel i ñaʼtʌbal. Cheʼ bʌ maxto ancianojic yom miʼ pʌs i pecʼlel yicʼot chaʼan yomʌch i melben i yeʼtel Jehová mach yʌlʌyic chuqui miʼ yʌqʼuentel i mel (Mat. 20:23; Filip. 2:​5-8). Cheʼ jaʼel, miʼ pʌs chaʼan xucʼul ti Jehová come miʼ mel chuqui miʼ mulan yicʼot miʼ jacʼ jiñi instrucción tac muʼ bʌ i yʌcʼ jiñi organización. Jiñi Biblia miʼ yʌl chaʼan jiñi anciano yom chajpʌbil chaʼan miʼ chaʼlen cʌntesa. Ili mach yomic i yʌl chaʼan wersa yom miʼ ñusan wen tac bʌ discurso, pero yomʌch wen miʼ cʼʌn jiñi Biblia cheʼ miʼ chaʼlen subtʼan yicʼot cheʼ miʼ julaʼtan jiñi hermanojob. w24.11 23 párr. 14, 15

Mi tsaʼ taja jumpʼejl texto mach bʌ añic maʼ chʼʌmben i sujm, chaʼlen ti investigar. I cheʼ bʌ miʼ ñumel majlel jiñi qʼuin, wen ñaʼtan tsaʼ bʌ a cʌñʌ tiʼ tojlel Jehová, jiñi i Yalobil yicʼot chaʼan bajcheʼ cʼamel miʼ cʼuxbiñonla (Sal. 119:97). Cheʼ bʌ maʼ pejcan jiñi Biblia lajal bajcheʼ woli a sʌclan oro. Jiñi lac piʼʌlob muʼ bʌ i sʌclañob jiñi oro mach ti orajic miʼ waʼ tajob. Tajol muʼto i ñusañob chaʼpʼej uxpʼejl qʼuin chaʼan miʼ sʌclañob, pero miʼ chaʼleñob wersa i sʌclañob jinto miʼ tajob. I anquese cheʼ ya wistʌl muʼ bʌ i tajob, yujilob chaʼan wen lets i tojol. Jiñi muʼ bʌ lac taj yaʼ ti Biblia ñumen letsto bajcheʼ jiñi oro (Pr. 8:10). Jin chaʼan mach a wubin a chʼijyemlel mi an qʼuiñil maʼan chuqui maʼ taj cheʼ maʼ pejcan jiñi Biblia. Mach a cʌy a sʌclan, bej pejcan jiñi Biblia (Sal. 1:2). w25.01 24, 25 párr. 14, 15

Jehová yom chaʼan ti jumpʼejl lac pusicʼal mi lac ñusʌbeñob i mul jiñi muʼ bʌ i lowoñobla (Sal. 86:5; Luc. 17:4; Efes. 4:32). An i tajol mi lac melbentel o mi lac subentel cʼux bʌ mi la cubin, ñumento mi juntiquil la camigo o juntiquil lac familia muʼ bʌ i melbeñonla (Sal. 55:​12-14). Jiñi Biblia miʼ yʌl chaʼan lajal bajcheʼ miʼ sʌl jecʼonla jumpʼejl espada (Pr. 12:18). An i tajol mucʼ jach lac lot ti lac pusicʼal o maʼañic mi lac wen acʼ ti ñuc. Pero cheʼ bʌ mi lac mel bajcheʼ jiñi lajal bajcheʼ mi lac jejqʼuel ti cuchillo i yaʼ jach miʼ cʌytʌl i maʼañic mi lac locʼ. Cheʼ miʼ yujtel jaʼel cheʼ maʼañic mi lac locʼ ti lac pusicʼal tsaʼ bʌ melbentiyonla, maʼañic mi caj lac ñajʌtesan. Tajol mi lac waʼ michʼan cheʼ bʌ an chuqui mi lac subentel o mi lac melbentel mach bʌ weñic. Jiñi Biblia miʼ yʌl chaʼan jiñʌch muʼ bʌ i mejlel ti ujtel. Pero miʼ subeñonla jaʼel chaʼan mach yomic mi lac lot lac michʼajel (Sal. 4:​4, TNM; Efes. 4:26). ¿Chucoch? Come jiñi lac michʼajel miʼ mejlel i yʌqʼueñonla lac mel mach bʌ weñic (Sant. 1:20). Cʼajtesan: Tajol mi lac mejlel ti waʼ michʼan, pero joñonla la cujil mi mucʼʌch caj lac ñusan. w25.02 15 párr. 4-6

Jesús tsiʼ cʼʌñʌ jumpʼejl lajiya chaʼan miʼ tsictesan chaʼan maʼañic i cʼʌjñibal cheʼ juntiquil cabʌl chuqui an i chaʼan «pero pʼumpʼun tiʼ wut Dios» (Luc. 12:​16-21). Mach la cujilic chuqui miʼ mejlel ti waʼ ujtel (Pr. 23:​4, 5; Sant. 4:​13-15). Cheʼ jaʼel, Jesús tsiʼ yʌlʌ chaʼan jiñi yomoʼ bʌ i tsajcan yom miʼ cʌyob chuqui tac añob i chaʼan (Luc. 14:33). Jiñʌch tsaʼ bʌ i meleyob jiñi xñoptʼañob ti Judea ti wajali, i yicʼotob i tijicñʌyel tsiʼ meleyob (Heb. 10:34). Ili ora, cabʌl hermanojob an i sʌtʌyob i yeʼtel o chuqui tac añob i chaʼan tiʼ caj maʼañic miʼ yotsañob i bʌ ti política (Apoc. 13:​16, 17). Miʼ pʌsob chaʼan mucʼʌch i ñopob ili albil bʌ i chaʼan Jehová: «Maʼañic baʼ ora mi caj j cʌyet i maʼañic baʼ ora mi caj j cʌy j coltañet» (Heb. 13:5). Mucʼʌch lac chaʼlen wersa chaʼan mi lac mero chajpan majlel lac bʌ chaʼan baʼ ora ñoxoñixla i mi lac ñop jaʼel chaʼan Jehová mi caj i coltañonla mi tsaʼ waʼ ujti mach bʌ pijtʌbilic lac chaʼan. w25.03 29 párr. 13, 14

Jehová maʼañic miʼ pijtan chaʼan mi lac bajñel qʼuel bajcheʼ mi caj lac taj lac ñaʼtʌbal. Tsiʼ yʌqʼueyonla xcʌnta tiñʌmeʼob yicʼot xcʌntesajob muʼ bʌ i coltañoñobla chaʼan «mi lac taj laj colel bajcheʼ juntiquil wiñic añix bʌ i ñaʼtʌbal yicʼot mi lac taj ti tsʼʌcʌl jiñi i chanlel Cristo» (Efes. 4:​11-13). Cheʼ jaʼel, miʼ yʌqʼueñonla jiñi chʼujul bʌ espíritu chaʼan an lac chaʼan «i ñaʼtʌbal Cristo» (1 Cor. 2:​14-16). I tsiʼ yʌcʼʌ ti tsʼijbuntel jiñi chʌmpʼejl Evangelio muʼ bʌ i coltañonla lac ñumen cʌn tsaʼ bʌ i mele Jesús cheʼ bʌ tsaʼ ajñi ila ti Lum. Mi tsaʼ lac laji bajcheʼ miʼ chaʼlen pensar, bajcheʼ miʼ chaʼlen tʼan yicʼot chuqui tac miʼ mel, mi caj lac sujtel bajcheʼ juntiquil xñoptʼan añix bʌ ñaʼtʌbal. Chaʼan miʼ cʼotel lac taj lac ñaʼtʌbal, mach jiñic jach yom mi laj cʌytʌl la quicʼot «jiñi ñaxan tac bʌ cʌntesa». w24.04 5 párr. 11, 12

Ti jujumpʼejl qʼuin yom mi lac ñaʼtan chuqui mi caj laj cʼux o bajcheʼ ora mi caj lac wʌyel. Iliyi mach wocolic ti ñaʼtʌntel, pero añʌch ñumen wocol tac bʌ, bajcheʼ mi caj laj cʌntan lac bʌ chaʼan cʼocʼ mi la cajñel, chaʼan lac tijicñʌyel, chaʼan jiñi lac familia o chaʼan bajcheʼ mi caj lac chʼujutesan Dios. La com chaʼan jiñi muʼ bʌ lac ñaʼtan lac mel jiñʌch wem bʌ chaʼañonla, miʼ coltan jiñi lac familia i miʼ yʌqʼuen i tijicñʌyel Jehová (Rom. 12:​1, 2). Cheʼ bʌ an chuqui woli lac ñaʼtan lac mel an tacʌch chuqui yom bʌ la cujil. Laʼcu lac ñaʼtan juntiquil cʼam bʌ i miʼ majlel ti doctor. ¿Cheʼ jach ba mi caj i waʼ aqʼuentel tsʼac? Maʼañic. Jiñi doctor yom miʼ ñaxan cʼajtiben bajcheʼ yubil miʼ yubin i miʼ qʼuel chuqui cʼux i chaʼan. Yom ñaxan an i chaʼan jiñi información. Jiñʌch yom bʌ mi lac mel jaʼel cheʼ bʌ an chuqui woli lac ñaʼtan lac mel. w25.01 14 párr. 1-3

Jehová wen yujil pʼuntaya i «mach yomic chaʼan mi juntiquilic miʼ jisʌntel» (2 Ped. 3:9). ¿Bajcheʼ an i pʌsbe i pʼuntaya jiñi am bʌ i chaʼleyob tsʌts bʌ mulil? Jiñi rey David tsiʼ chaʼle tsʼiʼlel yicʼot tsʌnsa, pero tsaʼʌch i chaʼ ñaʼta i bʌ, jin chaʼan Jehová tsiʼ pʼunta i tsiʼ ñusʌbe i mul (2 S. 12:​1-12). Cheʼ jaʼel, jiñi rey Manasés cabʌl jab tsiʼ mele mach bʌ weñic, pero Jehová tsiʼ pʼunta yicʼot tsiʼ ñusʌbe i mul cheʼ bʌ tsiʼ qʼuele chaʼan ti jumpʼejl i pusicʼal tsiʼ chaʼ ñaʼta i bʌ (2 Cr. 33:​9-16). Ili ejemplo tac miʼ pʌsbeñonla chaʼan Jehová miʼ pʌs i pʼuntaya cheʼ bʌ yomʌch miʼ qʼuel. Jin chaʼan, David yicʼot Manasés mucʼʌch caj i chaʼ chʼojyelob, come tsaʼ cʼoti i cʌñob chaʼan machʌch weñic chuqui tsiʼ meleyob i tsiʼ chaʼ ñaʼtayob i bʌ. w24.05 4 párr. 12