SIN DING THU 23

Tui Kiphumna In A Neih Taak Mahmah Ngimna Hi!

ပုံနှိပ်စာပေ

Khristiante adingin tui kiphum ding kisam ahihlam Jesuh in gen hi. (Matthai 28:19, 20 sim in.) Tui kiphum cih pen bang a hiam? Mi khat tui a kiphum theih nadingin bang a hih ding kisam hiam?

1. Tui kiphum cih in bang a hiam?

“Tui kiphum” cih kammal pen “tui sungah tumsuk” cih khiatna a nei Greek kammal pan hong pai ahi hi. Jesuh a kituiphum lai-in, Jordan Gun sungah a pumpi bupin tumsuksak hi. Tua khit ciangin ‘tui sung pan thokhia’ hi. (Marka 1:9, 10) Tua bangmahin Khristian man te’n zong tui a kiphum uh ciangin tui sungah a pumpi bupin tumsuksak uh hi.

2. Tui kiphumna in bang lak a hiam?

Tui kiphumna in, mi khat pen Jehovah Pasian kiangah amah le amah ki-ap khin ahihlam lak hi. Ki-apna cih pen mi khat in tui a kiphum ma-in Jehovah kiangah thu ngenin a tawntungin Ama’ na a sep nopna thu a genna ahi hi. Ama’n Jehovah bek bia dingin le Pasian’ deihna banga sepna pen a nuntakna-ah a masa pena koih dingin kamciam hi. “Ama deihna bangin gamta nawn loin,” Jesuh’ thuhilhnate le etteh ding limte ‘zui den dingin’ khensat hi. (Matthai 16:24) A ki-apna le tui kiphumna in Jehovah le unaute tawh kilawmtatna neisak hi.

3. Tui kiphum theih nadingin bang hih ding kisam a hiam?

Tui na kiphum ma-in Jehovah’ thu kanin, na upna a khauh nadingin na hanciam kul hi. (Hebru 11:6 sim in.) Na theihna le na upna a hong khantoh semsemna tawh kizui-in Jehovah na it semsem ding hi. Pasian’ thu na gen nuam ding a, ama’ tehna bangin na nungta nuam ding hi. (2 Timoti 4:2; 1 Johan 5:3) Mi khat in ‘Topa’ [Jehovah’] deihna banga a nuntaka leh’ a kiangah ki-ap a, tui kiphum dingin khensat nuam ding hi.—Kolose 1:9, 10.a

ZON BEH INLA, MUH BEH IN

Jesuh’ tui a kiphumna pana i theih thute le tui kiphum theih nadinga i kithawi theih dan kan in.

4. Jesuh’ tui a kiphumna pana i theih thute

Jesuh’ tui a kiphumna thu theih beh nadingin, Matthai 3:13-17 sim in. Tua khit teh hih dotnate kikum un:

Jesuh tui a kiphum lai-in naungek ahi hiam?
Jesuh koi bangin tui kiphum a hiam? Tui tawh a kitheh bek ahi hiam?

Jesuh tui a kiphum khit ciangin Pasian’ piak nasep na kipan hi. Luka 3:21-23 le Johan 6:38 sim in. Tua khit teh hih dotna kikum un:

Jesuh tui a kiphum khit ciangin a nuntakna-ah bang nasep pen a thupi penin koih a hiam?

5. Tui kiphumna pen na batzawh ngimna hi

Ki-ap a, tui kiphum ding pen a tungin lauthawng khathei ding hi teh. Ahih hang, Jehovah’ thu kansuakin ama thu na theihtel ciangin hih a thupi khensatna bawl dingin kimuanna na nei semsem ding hi. Tua banga thu a khensatte’ thu na theih nadingin VIDEO hong in.

VIDEO: Jehovah Tawh Kinai Dingin Hanciam In (1:11)

Johan 17:3 le James 1:5 sim in. Tua khit teh hih dotna kikum un:

Tui kiphum dingin bang in hong huh thei ding a hiam?

A. Numei khat in thungetna tawh Pasian kiangah amah le amah ki-ap.

B. Tua numei mah in a pumpi bupin tui sungah tumsakin Jehovah Teci mi khat hi dingin tui a kiphum laitak.

Jehovah kiangah a tawntunga amah i biak nop thu genin i ki-ap hi
Tui i kiphumna pen Pasian kiangah ki-ap khin ihihlam mipi mai-ah i lahna ahi hi

6. Tui i kiphum ciangin Jehovah’ innkuanpih i suak hi

Tui ka kiphum uh ciangin, a kipumkhat leitung bup innkuanpih khat ka suak uh hi. Omna mun le nungthu ka kibat loh uh hangin ka upna uh kibang a, Lai Siangtho tehna tawh kizui-in ka nungta uh hi. Late 25:14 le 1 Peter 2:17 sim in. Tua khit teh hih dotna kikum un:

Hih Lai Siangtho munte in a gen bangin tui kiphum leng, bang hamphatna kingah ding a hiam?

Limte: Tui a kiphum khin unaunu in pawlpi sunga midangte tawh kizopna hoih a neihnate lungdam taka ngaihsun. 1. Amah in unaunu khat kiangah a lungsim sunga omte muang takin gen. 2. Amah in kumham unaunu khat lam pai pen panpih. 3. Amah in a khan gualpih ahi lo a lawmte tawh an nekhawm. 4. Amah in unaunu khat ii panpihna tawh pasal khat kiangah Pasian thu gen. 5. Amah in kikhoppi khatah minam kibatpih loh Teci nihte tawh selfie kizaih.

MI PAWLKHATTE’ GEN: “Tui kiphum ding kingap zo nai ke’ng.”

Tua banga na ngaihsut leh tui kiphum pen a neih taak mahmah ngimna hi-in na um lai hiam?

TOMLAKNA

Khristiante adingin tui kiphum ding kisam ahihlam Jesuh in gen hi. Tui i kiphum theih nadingin Jehovah pen kiptaka i muan ding kisam hi. Pasian’ tehna tawh kituaka i nuntak ding le Ama kiangah i ki-ap ding zong kisam hi.

Kikupkikna

Tui kiphum cih in bang a hiam? Tui kiphum ding bang hang thupi a hiam?
Ki-apna le tui kiphumna pen koi bangin kizom a hiam?
Ki-ap a, tui kiphum theih nadingin bangteng kisam a hiam?

Kikup zawh ni:

Ngimna

Tui kiphum nadinga kithawikholh theih dan pen Khen 4 na ii a tawpna-a “Pawlpi’ Taangko Nasepna-ah Ka Kihel Thei Ta Ding Hiam?” cih le “Tui Ka Kiphum Thei Ta Ding Hiam?” cih thute-ah kan ding.

Adang:

Ngimna dang

THEIH BEH NADING

Tui kiphum cih a khiatna bang hi a, bang hi lo a hiam?

“Tui Kiphum Cih In Bang A Hiam?” (Website-a thu)

Tui kiphum donga khantoh theih dan sim in.

“Jehovah I Itna In Tui Kiphum Dingin Hong Hanthawn” (Vilnatausang, March 2020)

Mi khat tui a kiphum nopna a hang sim in.

“Thuman Pen Kei Mahmah In Ka Zon Nadingin Hong Hanthawn Uh” (Vilnatausang, February 1, 2013)

Tui kiphum ding pen bang hangin a neih taak mahmah ngimna hi a hiam? Koi bangin kithawikhol thei ding na hiam?

“Tui Ka Kiphum Ding Hiam?” (Khangnote’ Dotna, Volume 2, khenpi 37)

a Mi khat pen biakna dangah tui kiphum khin ahih leh zong, a kiphumkik ding kisam hi. Bang hang hiam? A hang pen tua biakna in Lai Siangtho thuman hilh lo ahih man hi.—Sawltak 19:1-5 le Sin Ding Thu 13 en in.