ကျွန်တော်တို့ကို ယေဟောဝါ “ရွှင်လန်းစေ”

ဒီနေ့ခေတ်​မှာ လူတွေ​ဟာ နည်း​မျိုးစုံ​နဲ့ ပျော်ရွှင်မှု ရှာဖွေနေ​ကြ​တယ်။ ဒါ​ပေမဲ့ ပျော်ရွှင်မှု​ဟာ ရှာလေ ဝေးလေ ဖြစ်နေ​သလိုပဲ။ ရှာတွေ့ပြန်ရင်လည်း ကြာကြာ​မခံဘူး။ ဒါကြောင့် လူတွေ​ဟာ ဟာတာတာ ဖြစ်​သလိုလို၊ အလို​မပြည့်​သလိုလို ခံစားလာ​ကြ​တယ်။ ယေဟောဝါ​ရဲ့ ကျေးကျွန် ကျွန်တော်တို့​လည်း အဲဒီ​ခံစားချက်တွေ​နဲ့ မကင်း​ပါ​ဘူး။ “နောက်ဆုံး​ကာလ” မှာ အသက်​ရှင်နေ​ရ​လို့ “အလွန်​ခက်ခဲ​ကျပ်တည်း” ပြီး စိုးရိမ်​သောက​များ​ကြ​တယ်။—၂ တိ. ၃:၁။

^၂ ဘာတွေ​ကြောင့် ကျွန်တော်တို့ ရွှင်လန်းမှု ပျောက်ဆုံးသွား​နိုင်​သလဲ၊ ပြန်​ရွှင်လန်းလာ​ဖို့ ဘာ​လုပ်​နိုင်​သလဲ​ဆိုတာ ဒီ​ဆောင်းပါး​မှာ ဆွေးနွေးသွား​ပါ​မယ်။ ဦးဆုံး၊ စစ်မှန်​တဲ့ ရွှင်လန်းမှု ဘယ်​ကနေ ရ​နိုင်​သလဲ သိထား​ဖို့ လို​တယ်။

စစ်မှန်တဲ့ ရွှင်လန်းမှု ဘယ်ကနေ ရနိုင်သလဲ

^၃ ယေဟောဝါ​ဘုရား​ဟာ အမြဲ​ပျော်ရွှင်​တယ်။ ကျွန်တော်တို့ကို​လည်း ပျော်ရွှင်​စေ​ချင်​တယ်။ သိပ်​လှ​တဲ့ ကမ္ဘာမြေ၊ ဆန်းပြား​စုံလင်​တဲ့ အရောင်​အသွေး၊ တိရစ္ဆာန်တွေ​ရဲ့ ချစ်​စဖွယ် ဟန်ပန်၊ အရသာ​ရှိ​တဲ့ အစား​အသောက် စတဲ့ ဖန်ဆင်းရာတွေ​အကြောင်း စဉ်းစားကြည့်​လိုက်​ပါ။ ကျွန်တော်တို့​ကို ယေဟောဝါ တကယ်​ချစ်​ပြီး ဘဝ​ကို ပျော်မွေ့​စေ​ချင်​မှန်း သိပ်​ထင်ရှား​တယ်။

Baby elephant: Image © Romi Gamit/Shutterstock; penguin chicks: Vladimir Seliverstov/500px via Getty Images; baby goats: Rita Kochmarjova/stock.adobe.com; two dolphins: georgeclerk/E+ via Getty Images

^၄ ယေဟောဝါ​ကို “ပျော်ရွှင်​တဲ့ ဘုရားသခင်” လို့ ကျမ်းစာ​မှာ ဖော်ပြထား​တယ်။ (၁ တိ. ၁:၁၁) အဲဒီလို​ဖော်ပြထား​လို့ လူတွေ ဒုက္ခ​ရောက်နေတာ​ကို ယေဟောဝါ မျက်ကွယ်​ပြုထား​တယ်​လို့ မဆိုလို​ဘူး။ ဒုက္ခ​ရောက်နေတာ မြင်​ပြီး တကယ်​စိတ်မကောင်း​ဖြစ်​တယ်။ ဒါ​ပေမဲ့ စိတ်​မချမ်းမြေ့​စရာတွေ၊ ဒုက္ခတွေ​ကို အဆုံး​တိုင်ပေးမယ့်​နေ့ သတ်မှတ်ထား​ပြီးပြီ ဖြစ်လို့ ပျော်ရွှင်မှု ပျောက်ဆုံး​မသွားတာ။ ဒီ​အတော​အတွင်း​မှာ​လည်း ကျွန်တော်တို့ ကြုံနေရ​သမျှ​ကို သတိထားမိ​ပြီး ကူညီပေး​တယ်။ ဘယ်လို ကူညီပေး​သလဲ။ ပျော်ရွှင်မှု ခံစားရ​စေ​ခြင်း​အားဖြင့်​ပါ။ (ဆာလံ ၁၆:၁၁ ကို ဖတ်ပါ။) သားတော်​ယေရှု​ကော ယေဟောဝါ​ဆီ​ကနေ ပျော်ရွှင်မှု ဘယ်လို ခံစားရ​သလဲ သုံးသပ်ကြည့်​ရ​အောင်။

^၅ ယေဟောဝါ ဖန်ဆင်းထား​သမျှ​မှာ ယေရှု​ဟာ အပျော်ရွှင်ဆုံး​ပါပဲ။ ထူးခြား​တဲ့ ဘယ်လို အကြောင်းရင်းတွေ ရှိလို့လဲ။ ယေရှု​ဟာ “မျက်စိ​နဲ့ မမြင်​နိုင်​တဲ့ ဘုရားသခင်​ရဲ့ ပုံ​သဏ္ဌာန်” ဖြစ်​ပြီး အဖ​ဘုရား​ကို အရာရာ​မှာ အပြည့်​အဝ အတုယူ​တယ်။ (ကော. ၁:၁၅။ ၁ တိ. ၆:၁၅) ဒါ့​အပြင် ပျော်ရွှင်မှု​ရဲ့ ရင်းမြစ် အဖ​ဘုရား​နဲ့ အချိန်​အကြာဆုံး နေတဲ့​သူ ဖြစ်​တယ်။

^၆ အဖ​ဘုရား လုပ်​စေ​ချင်​တာ မှန်​သမျှ အမြဲ​သစ္စာ​ရှိရှိ လုပ်တဲ့​အတွက်​လည်း ယေရှု ပျော်ရွှင်​တယ်။ (ပညာ. ၈:၃၀၊ ၃၁။ ယော. ၈:၂၉) အဲဒီလို သစ္စာ​ရှိတဲ့​အတွက် အဖ​ဘုရား​ရဲ့ မျက်နှာသာ​နဲ့ နှစ်သက်မှု ရ​တယ်။ ဒါ​ဟာ​လည်း ယေရှု​ကို ပျော်ရွှင်​စေ​တဲ့ အကြောင်းရင်း​ပါပဲ။—မ. ၃:၁၇။

^၇ ကျွန်တော်တို့​လည်း ပျော်ရွှင်မှု​ရဲ့ ရင်းမြစ် ယေဟောဝါ​နဲ့ ရင်းနှီးနေ​ရင် စစ်မှန်​တဲ့ ပျော်ရွှင်မှု ခံစားရ​နိုင်​တယ်။ ယေဟောဝါ​အကြောင်း အချိန်ပေး​လေ့လာ​ပြီး ယေဟောဝါ​ကို အတုယူလေ ပျော်လေ ဖြစ်​မယ်။ ယေဟောဝါ လုပ်​စေ​ချင်​တာ လုပ်တဲ့​အခါ၊ မျက်နှာသာတော် ရတဲ့​အခါ​လည်း ပျော်ရွှင်​မယ်။a (ဆာ. ၃၃:၁၂) ဒါ​ပေမဲ့ မပျော်​နိုင်​တဲ့​အချိန်တွေ​လည်း ရှိတတ်​ပါ​တယ်။ တစ်ခါ​တလေ ရက်ပိုင်းလောက်၊ တစ်ခါတလေ​ကျတော့ ရက်လ​အတော်ကြာ မပျော်​မရွှင် ဖြစ်နေ​နိုင်​တယ်။ ဒါ ယေဟောဝါ​ရဲ့ မျက်နှာသာ မရဘူး​ဆိုတဲ့ သဘော​လား။ မဟုတ်​ပါ​ဘူး။ ကျွန်တော်တို့ မစုံလင်​ကြ​လို့ တစ်ခါ​တလေ စိတ်​ထိခိုက်​နိုင်​တယ်၊ ဝမ်းနည်း​နိုင်​တယ်၊ စိတ်ဓာတ်​ကျ​နိုင်​တယ်။ ဒါ​ကို ယေဟောဝါ ကောင်းကောင်း​သိ​တယ်။ (ဆာ. ၁၀၃:၁၄) ဘာတွေ​ကြောင့် ကျွန်တော်တို့ ရွှင်လန်းမှု ပျောက်ဆုံးသွား​နိုင်​သလဲ၊ ပြန်​ရွှင်လန်းလာ​ဖို့ ဘာ​လုပ်​နိုင်​သလဲ​ဆိုတာ ဆွေးနွေး​ကြ​ရ​အောင်။

ရွှင်လန်းမှု ပျောက်ဆုံးစေနိုင်တဲ့အရာတွေ

^၈ ၁။ ဘဝ​ပြဿနာတွေ။ ဆန့်ကျင်မှု၊ သဘာဝဘေး၊ ငွေကြေး​အခက်အခဲ၊ ကျန်းမာရေး​ပြဿနာ၊ ဇရာအိုအရွယ်​ပြဿနာ သင် ကြုံနေ​ရ​သလား။ ဒီလို​ပြဿနာတွေ ကြုံနေ​ပြီး ကိုယ့်ဘက်က လုပ်​နိုင်​တာ ဘာမှ မရှိတဲ့​အခါ ရွှင်လန်းမှု အလွယ်​တကူ ပျောက်ဆုံးသွား​နိုင်​တယ်။ “ရင်ထဲ​မှာ နာကျင်နေ​ရင်​တော့ စိတ်ထောင်း​ကိုယ်ကြေ ဖြစ်ရ​တယ်” လို့ ကျမ်းစာ ဆိုတယ်။ (ပညာ. ၁၅:၁၃) အကြီးအကဲ ညီအစ်ကို ဘေးဘစ္စ​အကြောင်း စဉ်းစားကြည့်​ပါ။ တစ်ဦးတည်းသော အစ်ကိုကော မိဘ​နှစ်ပါး​စလုံးပါ လေးနှစ်​အတွင်း ဆုံးသွား​ကြ​တယ်။ “သူတို့ ရှိတုန်းက သူတို့ကို​လည်း အချိန်​ပေးချင်၊ တာဝန်တွေ​ကလည်း တစ်ဖက်​ဆိုတော့ အရမ်း​ဗျာများ​နေ​ခဲ့​တာ။ အခုတော့ သူတို့ မရှိ​ကြ​တော့​ဘူး။ ကျွန်တော် အထီးကျန်​ပြီး အားကိုး​မဲ့​သွား​သလိုပဲ” လို့ ဘေးဘစ္စ ပြော​တယ်။ ဘဝ​ပြဿနာတွေ​က ကျွန်တော်တို့​ကို တကယ်ပဲ စိတ်ကော လူပါ ချုံးချုံး​ကျ​လာ​စေ​နိုင်​တယ်။

^၉ ပြန်ရွှင်လန်းလာဖို့ ဘာလုပ်နိုင်သလဲ။ အခြေအနေ​ကို အရှိ​အတိုင်း လက်ခံ​ပြီး ကျေနပ်စရာလေးတွေ ရှာ​နိုင်​တယ်။ ဘဝ​ဟာ စိတ်ကူး​ပုံဖော်ထားတဲ့​အတိုင်း ဖြစ်နေမှပဲ ပျော်နိုင်​မယ်​လို့ လောကက လူတွေ ထင်​ကြ​တယ်။ တကယ်တော့ အဲဒီလို မဟုတ်​ပါ​ဘူး။ ဥပမာ၊ အခြေအနေသစ်​ကို လက်ခံ​ပြီး အကောင်းဆုံး အသက်ရှင်​နေထိုင်​ဖို့ ဗာဗုလုန်​ပြည် ရောက်နေ​တဲ့ ပြည်နှင်ခံ ဂျူးတွေ​ကို ယေဟောဝါ ပြော​တယ်။ (ယေရမိ ၂၉:၄-၇၊ ၁၀ ကို ဖတ်ပါ။) ဒီ​ကနေ ဘာ​သိ​ရ​သလဲ။ အဆိုး​ထဲက အကောင်း​ကို ရှာ​ပြီး ပျော်ပျော်​နေ​ပါ။ ယေဟောဝါ ကူညီပေး​မယ်​ဆိုတာ သတိရပါ။ (ဆာ. ၆၃:၇။ ၁၄၆:၅) မတော်တဆမှု ဖြစ်လို့ လမ်း​မလျှောက်​နိုင်​တော့​တဲ့ ညီအစ်မ အဲဖီ​အကြောင်း စဉ်းစားကြည့်​ပါ။ “ယေဟောဝါ၊ မိသားစု​နဲ့ ညီအစ်ကို/မတွေ​ဆီက အကူအညီ အများကြီး ရ​တယ်။ ကျွန်မ လက်လျှော့​အရှုံးပေး​လိုက်​ရင် သူတို့ ကူညီရကျိုး​မနပ်ဘဲ နေမယ်။ ဒါကြောင့် ကူညီပေးနေသူတွေ​ကို ကျေးဇူးတင်ကြောင်း ပြတဲ့​အနေနဲ့ ကျွန်မ အတတ်နိုင်ဆုံး ပျော်အောင် နေတယ်” လို့ ပြော​တယ်။

^၁၀ ဘဝ​ဟာ စိတ်ကူး​ပုံဖော်ထားတဲ့​အတိုင်း ဖြစ်မလာတဲ့​အခါ၊ ကိုယ်တိုင် ဒါမှ​မဟုတ် မိသားစုဝင်တွေ အဖြစ်ဆိုး ကြုံတဲ့​အခါတောင် ကျွန်တော်တို့ ရွှင်လန်းနေ​နိုင်​တယ်။b (ဆာ. ၁၂၆:၅) ဘာကြောင့်လဲ။ ရွှင်လန်းမှု​ဟာ ကျွန်တော်တို့​ရဲ့ အခြေအနေပေါ် မမူတည်​လို့​ပါပဲ။ “ပြဿနာတွေ ရှိတဲ့ကြား ရွှင်လန်းနေ​နိုင်​ဖို့ ခံစားချက်တွေ မျိုသိပ်ထား​စရာ မလို​ပါ​ဘူး။ ယေဟောဝါ​ရဲ့ ကတိတွေ​ကို သတိရနေ​ဖို့​ပဲ လို​တာ​ပါ။ ရွှင်လန်းမှု ပျောက်ဆုံး​မသွား​ဖို့ ယေဟောဝါ ကူညီပေး​နိုင်​တယ်” လို့ ရှေ့ဆောင် ညီအစ်မ မာရီယာ ပြော​တယ်။ ကျွန်တော်တို့ ကြုံရ​တဲ့ ပြဿနာတွေ ဘယ်လောက် ခက်ခဲ​ပါစေ ရေ​တက်လာ​တာ​နဲ့ ပျောက်သွား​တဲ့ ကမ်းစပ်​က ခြေရာတွေ​လိုပဲ ဖြစ်​မယ်။ ကြာကြာ​ထင်ကျန်​မှာ မဟုတ်​ဘူး။

^၁၁ ယေဟောဝါ​ရဲ့ မျက်နှာသာ ဆုံးရှုံးသွား​လို့ ပြဿနာတွေ ကြုံရတာ​ဆိုပြီး တစ်ခါ​တလေ ခံစားမိ​နိုင်​တယ်။ ဒါ​ဆိုရင် ယေဟောဝါ​ရဲ့ သစ္စာရှိ ကျေးကျွန်တွေ ဖြစ်ပါလျက်နဲ့ အခက်အခဲ ကြုံခဲ့သူတွေ​အကြောင်း စဉ်းစားကြည့်​လိုက်​ပါ။ ဥပမာ၊ “လူမျိုးခြားတွေ​နဲ့ ရှင်ဘုရင်တွေကိုရော အစ္စရေး​လူမျိုးကိုပါ” သတင်းကောင်း ဟောပြောဖို့ တမန်တော် ပေါလု​ကို ယေရှု​ကိုယ်တိုင် ရွေးချယ်ထား​တယ်။ (တ. ၉:၁၅) တကယ့်​အခွင့်ထူး​ပါပဲ။ ဒါပေမဲ့ ပေါလု​ရဲ့ ဘဝ​မှာ အခက်အခဲ ကင်းမနေ​ခဲ့​ဘူး။ (၂ ကော. ၁၁:၂၃-၂၇) ပေါလု အခက်အခဲ တစ်ခုပြီး​တစ်ခု ကြုံရ​တာ​ဟာ ယေဟောဝါ​ရဲ့ မျက်နှာသာ ဆုံးရှုံးသွား​လို့​လား။ မဟုတ်​ဘူး။ ခံနိုင်ရည် ရှိတာ​ကိုက ယေဟောဝါ ကောင်းချီး​ပေးနေ​လို့ ဖြစ်​တယ်။ (ရော. ၅:၃-၅) သင်​လည်း အခက်အခဲတွေ ရှိ​ပေမဲ့ သစ္စာ​ရှိရှိ ခံရပ်နေ​တယ်။ ဒါ ယေဟောဝါ​ရဲ့ မျက်နှာသာ ရနေတယ်​ဆိုတဲ့ သဘော​ပါပဲ။

^၁၂ ၂။ မျှော်လင့်သလို ဖြစ်မလာခြင်း။ (ပညာ. ၁၃:၁၂) ယေဟောဝါ​ကို ချစ်​လို့၊ ကျေးဇူးတင်လို့ အမှုတော်​မှာ အကောင်းဆုံး ပေးဆက်​ဖို့ ကျွန်တော်တို့ ပန်းတိုင်​ထား​ကြ​တယ်။ ဒါ​ပေမဲ့ ကိုယ့်​အခြေအနေ​ကြောင့် ပန်းတိုင်တွေ လက်လှမ်း​မမီတဲ့​အခါ စိတ်ဓာတ်​ကျလာ​နိုင်​တယ်။ (ပညာ. ၁၇:၂၂) “ကျွန်မ သတင်းကောင်း ဟောပြောသူများ​အတွက်​သင်တန်း တက်​ချင်​တယ်။ တိုင်းတစ်ပါး​မှာ အမှုဆောင်​ချင်​တယ်။ ရာမာပို ဆောက်လုပ်ရေး​စီမံကိန်း​မှာ ကူညီ​ချင်​တယ်။ ဒါ​ပေမဲ့ ကျွန်မ​အခြေအနေတွေ ပြောင်းလဲသွား​လို့ ပန်းတိုင်​တစ်ခုမှ လက်လှမ်း​မမီ​တော့​ဘူး။ တအား​စိတ်ဓာတ်​ကျသွား​တယ်။ လုပ်ချင်တာတွေ ရှိလျက်နဲ့ မလုပ်နိုင်တာ တော်တော်​ဆိုးတယ်” လို့ ရှေ့ဆောင် ညီအစ်မ ဟော်လီ ပြော​တယ်။ ဟော်လီ​လိုပဲ ညီအစ်ကို/မ တော်တော်​များများ ခံစား​ကြ​ရ​တယ်။

^၁၃ ပြန်ရွှင်လန်းလာဖို့ ဘာလုပ်နိုင်သလဲ။ ကျွန်တော်တို့ တတ်နိုင်တာထက် ပိုပြီး ယေဟောဝါ မတောင်းဆို​ဘူး။ ဘယ်လောက် ပေးဆက်​နိုင်​သလဲ​ဆိုတာ ကြည့်​ပြီး ကျွန်တော်တို့​ရဲ့ တန်ဖိုး​ကို မပိုင်းဖြတ်​ဘူး။ ကျိုးနွံ​ဖို့၊ သစ္စာ​ရှိ​ဖို့​ပဲ တောင်းဆိုထား​တာ။ (မိ. ၆:၈။ ၁ ကော. ၄:၂) ကျွန်တော်တို့​ရဲ့ လုပ်ရပ်ထက် အတွင်း​စိတ်​ကို ပို​အလေးထား​တယ်။ ဒီတော့ ယေဟောဝါ တောင်းဆိုတာထက် ပိုပြီး ကိုယ့်ကိုယ်ကိုယ် တောင်းဆိုတာ ကျိုးကြောင်း​ဆီလျော်ပါ့​မလား။c ဒါကြောင့် အမှုတော်​မှာ ဆန္ဒ​ရှိတဲ့​အတိုင်း လုပ်ဖို့ အခြေအနေ မပေးရင် ကိုယ်​လုပ်နိုင်တာတွေ​ကို အာရုံစိုက်​လိုက်​ပါ။ ဥပမာ၊ လူငယ်တွေ​အတွက် ရှေ့ဆောင်​လမ်းပြ ဖြစ်​နိုင်​မလား။ သက်ကြီး ညီအစ်ကို/မတွေ​ကို ကူညီပေး​နိုင်​မလား။ တစ်ယောက်ယောက်​ကို အားပေး​ဖို့ သွားလည်တာမျိုး၊ ဖုန်းဆက်တာမျိုး၊ စာပို့တာမျိုး လုပ်​နိုင်​မလား။ လက်လှမ်း​မီ​တဲ့ ပန်းတိုင်တွေ ထားပြီး ကြိုးစားတဲ့​အခါ ယေဟောဝါ​ဆီက ကောင်းချီး ခံစားရလို့ ရွှင်လန်းလာ​မယ်။ ဒါ့​အပြင် ကမ္ဘာသစ် ရောက်တဲ့​အခါ စိတ်တောင်​မကူးဖူး​တဲ့ အမှုဆောင်​အခွင့်အရေးတွေ အကန့်အသတ်​မရှိ ရလာမှာ​ကို သတိရပါ။ “‘ငါ ဘာလို့ စိတ်ဓာတ်​ကျနေ​မှာ​လဲ။ ထာဝစဉ် အသက်​ရှင်ရမှာပဲကို။ ကမ္ဘာသစ်​ရောက်ရင် ယေဟောဝါ​ရဲ့ အကူအညီ​နဲ့ အရောက်​လှမ်းနိုင်တဲ့ ပန်းတိုင်တွေ ရှိလာမှာပေါ့’ ဆိုပြီး စဉ်းစားလိုက်​တယ်” လို့ အစောပိုင်း​မှာ ဖော်ပြခဲ့တဲ့ ညီအစ်မ ဟော်လီ ပြော​တယ်။

^၁၄ ၃။ ကိုယ့်လိုအင်တွေကိုပဲ ဖြည့်ဆည်းနေခြင်း။ ဝါသနာ လိုက်စားနိုင်သူတွေ၊ လိုချင်တာ ဝယ်နိုင်သူတွေ၊ အလည်အပတ်​ခရီး သွားနိုင်သူတွေကို လူမှု​မီဒီယာမှာ တွေ့တဲ့​အခါ စစ်မှန်​တဲ့ ပျော်ရွှင်မှုဟာ ဒါပါလားလို့ ထင်လာ​နိုင်​တယ်။ ပျော်ပျော်​နေတာ မမှားပါဘူး။ ဘဝ​ကို ပျော်ပျော်​ရွှင်ရွှင် ဖြတ်သန်း​ဖို့ ကျွန်တော်တို့​ကို ယေဟောဝါ ပုံစံ​ပြုထား​တယ်။ ဒါ​ပေမဲ့ ပျော်စေမယ်လို့ လူတွေ ထင်တဲ့​အရာတွေကပဲ ပျော်ရွှင်မှု ပျောက်ဆုံးနေ​စေ​တာ။ “လိုအင်​ဆိုတာ​ကတော့ ပြည့်တယ်​ရယ်​လို့ ရှိမှာ မဟုတ်ဘူး” လို့ ရှေ့ဆောင် ညီအစ်မ အီဗာ ပြောတယ်။ ကိုယ့်​လိုအင်တွေ ဖြည့်ဆည်းဖို့ပဲ အာရုံရောက်နေရင် ဘာလိုလို့ လိုမှန်း မသိ အမြဲ​ခံစားနေ​ရ​နိုင်​တယ်။

^၁၅ ကိုယ့်​လိုအင်တွေကိုပဲ ဖြည့်ဆည်းနေခြင်း​ရဲ့ ရလဒ်​ကို ဘုရင်​ရှောလမုန်​ရဲ့ အဖြစ်​ကနေ သိရ​တယ်။ ရှောလမုန်​ဟာ ပျော်မယ်​အထင်နဲ့ စားကောင်း​သောက်ဖွယ်တွေ စားသောက်​တယ်။ သီချင်းသည်တွေ ခစား​စေ​တယ်။ သူ့ခေတ်​သူ့အခါက ကောင်းပေ့​ဆိုတာတွေ ဝယ်​တယ်။ ဒါ​ပေမဲ့ အလို​မပြည့်​နိုင်​ဘဲ ဖြစ်​နေ​တယ်။ “မျက်လုံးက မြင်ရတာကို မကျေနပ်​နိုင်​ဘူး။ နားကလည်း ကြားလို့ကို မဝ​နိုင်​ဘူး” လို့ ပြောတယ်။ (ဒေ. ၁:၈။ ၂:၁-၁၁) ဘာ​သင်ခန်းစာ ရသလဲ။ ပျော်စေမယ်လို့ လူတွေ ထင်နေတာတွေဟာ တကယ်တော့ ငွေစက္ကူ​အတုနဲ့ တူတယ်။ တန်ဖိုး​ရှိ​သလို ထင်ရပေမဲ့ ဘာကိုမှ မပိုင်ဆိုင်​စေ​ဘူး။

^၁၆ ပြန်ရွှင်လန်းလာဖို့ ဘာလုပ်နိုင်သလဲ။ “ရယူခြင်းထက် ပေးကမ်းခြင်းက ပိုပျော်ရွှင်စေတယ်” လို့ ယေရှု သင်ပေး​တယ်။ (တ. ၂၀:၃၅) “ကြီးကြီး​မားမား မဟုတ်ရင်တောင် တခြားသူတွေကို နိုင်​သလောက် ကူညီပေး​တယ်။ တခြားသူတွေ လိုအပ်တာကို ဖြည့်ဆည်းပေးတော့ ကိုယ့်​လိုအင်တွေဆီပဲ အာရုံရောက်​မနေ​တော့​ဘူး။ ဒါကြောင့် ပိုပျော်လာတယ်” လို့ အကြီးအကဲ ညီအစ်ကို အလက်ကို့စ် ပြော​တယ်။ သင်ကော တခြားသူတွေ​အတွက် ဘာ​လုပ်ပေး​နိုင်​သလဲ။ အခက်အခဲ ကြုံနေရသူ​တစ်ယောက်​ကို အားပေး​နိုင်​တယ်။ သူ့​အခက်အခဲ​ကို သင် ဖြေရှင်းပေးနိုင်ချင်မှ ပေးနိုင်မယ်။ ဒါ​ပေမဲ့ သူ ပြောတာတွေ​ကို ဂရု​တစိုက် နားထောင်ပေးတဲ့​အခါ၊ ကိုယ်ချင်းစာပေးတဲ့​အခါ၊ ထမ်းထားရတဲ့ ဝန်ကို ယေဟောဝါဆီ ပုံအပ်ဖို့ သတိပေးတဲ့​အခါ သူ စိတ်​သက်သာသွား​နိုင်​တယ်။ (ဆာ. ၅၅:၂၂။ ၆၈:၁၉) သူ့ကို ယေဟောဝါ စွန့်ပစ်မထားဘူး​ဆိုတာ မြင်လာဖို့လည်း ကူညီပေး​နိုင်​တယ်။ (ဆာ. ၃၇:၂၈။ ဟေရှာ. ၅၉:၁) လက်တွေ့​ကျကျ ကူညီတဲ့​အနေနဲ့ စားစရာ ချက်ပြုတ်ပေး​နိုင်​တယ်၊ သူ့ကို အဖော်​လုပ်ပေး​နိုင်​တယ်။ သတင်းကောင်း ဟောပြောတာက လန်းဆန်းမှု အမြဲ​ပေးလို့ အတူတူ အမှုဆောင်ဖို့ စီစဉ်​နိုင်​တယ်။ တခြားသူတွေ​ကို အားပေး​ဖို့ သင့်ကို ယေဟောဝါ သုံး​နိုင်​လို့ အသုံးတော်​ခံဖို့ အသင့်​ရှိ​ပါ။ ကိုယ့်ကိုယ်ကိုယ် မဟုတ်ဘဲ တခြားသူတွေ​ကို အာရုံစိုက်တဲ့​အခါ စစ်မှန်​တဲ့ ရွှင်လန်းမှု ခံစားရ​တယ်။—ပညာ. ၁၁:၂၅။

^၁၇ ကောင်းကင်ဘုံစံ​အဖ ယေဟောဝါနဲ့ ဆက်​ရင်းနှီး​နေ​ရင် စစ်မှန်တဲ့ ရွှင်လန်းမှု ခံစားရနိုင်တယ်။ ယေဟောဝါ​ဟာ ကျွန်တော်တို့​ကို “ရွှင်လန်းစေတဲ့ ဘုရားသခင်” ဖြစ်​တယ်​လို့ ကျမ်းစာ ဆိုတယ်။ (ဆာလံ ၄၃:၄ ကို ဖတ်ပါ။) ဒါကြောင့် ဘဝမှာ ဘာတွေပဲ ကြုံလာရပါစေ စိုးရိမ်​ကြောက်လန့်​ဖို့ မလိုဘူး။ ရွှင်လန်းမှု​ရဲ့ ရင်းမြစ် ယေဟောဝါကို​ပဲ မျှော်ကိုးနေပါ။—ဆာ. ၁၄၄:၁၅။