SIN DING THU 59
Bawlsiatna Na Thuakzo Thei Hi
Khristiante in langpanna le bawlsiatna nangawn thuak hun nei tek ding uh hi. Tua adingin i patau ding hiam?
1. Bang hangin bawlsiatna lamen i hiam?
Lai Siangtho in: “Khrih Jesuh tawh kipawlin Pasian’ deihna bangin a nungta nuam khempeuh in bawlsiatna a thuak ding mah hi,” ci-in kician takin na gen hi. (2 Timoti 3:12) Jesuh in Satan’ leitung tawh kipawl lo ahih manin bawlsiatna na thuak hi. Eite in zong hih leitung tawh kipawl lo ihih manin, kumpite le biakna kipawlnate ii bawlsiatna i thuak ciangin lamdang i sa kei hi.—Johan 15:18, 19.
2. Bawlsiatna thuak dingin koi bangin kigingkhol thei i hiam?
Tu-a kipanin Jehovah i muanna i kipsak semsem ding kisam hi. Nisima thunget nading le Lai Siangtho sim nadingin hun pia in. Pawlpi kikhopnate-ah manmanin kikhawm in. Tua banga na hih leh koi bang bawlsiatna na thuak zongin, innkuanpihte’ langpanna ahi phial zongin na thuakzo ding hi. Bawlsiatna tam veipi a thuak sawltak Paul in, “Topa, kei hong huhpa hi a, ka lau kei ding hi,” ci-in na gelh hi.—Hebru 13:6.
Taangko nasepna-ah manmana kihelna in zong hangsanna hong neisak ding hi. Taangkona in Jehovah i muan nadingin le mite i lau loh nadingin hong huh hi. (Paunak 29:25) Tu-a kipan hangsan taka na taangko leh, kumpite’n taangko nasep a khaktan uh ciangin zong taangkosuak dingin a kigingkholsa na hi ding hi.—1 Thesalonika 2:2.
3. Cihtakna tawh bawlsiatna thuakzo leng, bang hamphatna ngah ding i hiam?
Bawlsiatna thuak pen nuam i sa kei hi, ahih hangin cihtakna tawh i thuakzawh ciangin i upna hong khauh semsem hi. Thuakzo nawn mahmah lo-a i kingaihsut ciang Jehovah’ huhna ngah ihih manin, amah tawh i kinai semsem hi. (James 1:2-4 sim in.) Bawlsiatna i thuak ciang Jehovah’ lungsim na mahmah a, ahih hangin cihtakna tawh i thuak ciangin a lungdam hi. Lai Siangtho in: “A manin gamta napi-in gimna na thuak uh ciangin lungduai takin na thuak uhleh Pasian in thupha hong pia ding hi,” ci-in gen hi. (1 Peter 2:20) Cihtakna tawh a thuakzo mite pen Jehovah in leitung thakah tawntung nuntakna pia ding hi. Tua hun ciangin biakna man a langpang kuamah om nawn lo ding hi.—Matthai 24:13.
ZON BEH INLA, MUH BEH IN
Bawlsiatna i thuak ciangin zong Jehovah tunga i cihtak theihna a hang le a citakte tunga lungdam man a piak dan kan in.
4. Cihtakna tawh innkuanpihte’ langpanna na thuakzo thei hi
Innkuanpih pawlkhat in Jehovah i biak ding deih lo thei ahihlam Jesuh in limtakin thei hi. Matthai 10:34-36 sim in. Tua khit teh hih dotna kikum un:
Innkuanpih khat in Jehovah biak ding a khensat ciangin bang thuak khathei a hiam?
Ettehna khat i muh nadingin VIDEO hong in. Tua khit teh a nuai-a dotna kikum un.
Jehovah na biak loh nadingin meltheih tanau ahih kei leh lawmte khat in hong khaktan leh bang hih ding na hiam?
Late 27:10 le Marka 10:29, 30 sim in. Lai Siangtho mun khat ta sim khit ciangin hih dotna kikum un:
Innkuanpih ahih kei leh lawmte’ langpanna na thuak hun ciangin hih Lai Siangtho kamciamna in koi bangin hong huh thei a hiam?
5. Bawlsiatna na thuak hangin Jehovah biasuak in
Langpannate kawmkalah Jehovah i biaksuak nadingin i hangsan ding kisam hi. VIDEO hong in. Tua khit teh a nuai-a dotna kikum un.
Video sunga thupiangte in koi bangin hong hangsansak a hiam?
Sawltak 5:27-29 le Hebru 10:24, 25 sim in. Lai Siangtho mun khat ta sim khit ciangin hih dotna kikum un:
Taangko nasepna le kikhopnate hong kikhaktan leh zong Jehovah i biaksuak ding bang hangin thupi a hiam?
6. Cihtakna tawh thuakzo dingin Jehovah in hong huh ding hi
Kum upat dan le nungthu a kibang lo Jehovah Tecite in bawlsiatna a thuak zongun cihtakna tawh Jehovah biasuak uh hi. Amau bang in huh cih na theih nadingin VIDEO hong in. Tua khit teh a nui-a dotna kikum un.
Thuakzawhna a neih nadingun video sunga Tecite bang in huh a hiam?
Rom 8:35, 37-39 le Filippi 4:13 sim in. Lai Siangtho mun khat ta sim khit ciangin hih dotna kikum un:
Ze-etna khempeuh cihtakna tawh thuakzo ding ihihlam hih Lai Siangtho mun in koi bangin hong lungmuangsak a hiam?
Matthai 5:10-12 sim in. Tua khit teh hih dotna kikum un:
Bawlsiatna na thuak zongin bang hangin lungdam thei na hiam?
Jehovah Teci tampite in langpanna pen cihtakna tawh thuakzo uh hi. Nangh zong thuakzo ding hi teh!
MI PAWLKHATTE’ GEN: “Bawlsiatna thuakzo kei ning.”
Bang Lai Siangtho munte in amaute lungmuanna neisak thei ding a hiam?
TOMLAKNA
Bawlsiatna kawmkalah cihtakna tawh Jehovah i biak pen ama’n manphasa hi. A huhna tawh i thuakzo thei hi.
Kikupkikna
Bang hangin Khristiante in bawlsiatna a lamet ding uh kisam a hiam?
Bawlsiatna thuak dinga kigingkhol dingin tu-in bang sem thei na hiam?
Koi bang ze-etna na thuak zongin Jehovah bia thei na hihlam bang in hong lungmuangsak a hiam?
THEIH BEH NADING
Panlam a neih loh mana thong a kia khangno unaupa khat thuakzawhna nei dinga Jehovah in a huh dan en in.
Langpannate kawmkalah nupa kop khat in kum tampi sung Jehovah a biak theih dan en in.
Hangsan taka bawlsiatna do zawh theih dan thu sim in.
“Bawlsiatna Thuak Dingin Tu-a Kipan Kigingkhol In” (Vilnatausang, July 2019)
Innkuanpihte’ langpanna pen i koici muh ding kisam a hiam? Tua pen koi bangin vengsak thei ding i hiam?
“Thuman In, ‘Kilemna Hi Lo-in Namsau’ Khah Hi” (Vilnatausang, October 2017)