SIN DING THU 54

“A Pil A Citak Nasem” In Kua Hi A, Bang Sem A Hiam?

ပုံနှိပ်စာပေ

Jesuh in Khristian pawlpi’ lutang ahi hi. (Efesa 5:23) “A pil a citak nasem” tungtawnin a nungzuite vantung panin lamlak hi. (Matthai 24:45 sim in.) Jesuh in a seh tua “nasem” in thuneihna tampi a neih hang, Khrih’ thu mangin Khrih’ sanggamte adingin na sem uh hi. Tua nasem pen kua a hiam? Eite koi bangin hong don a hiam?

1. “A pil a citak nasem” cih in kua a hiam?

Jehovah in pasal khat ahih kei leh pasal hon khat zangin a mite lamlak den hi. (Malakhi 2:7; Hebru 1:1) Jesuh a sih khit ciangin Jerusalem khua-a om sawltakte le upate in Pasian mite makaih uh hi. (Sawltak 15:2) Tua lamlahna zui-in, tu huna upa pawlkhat—Jehovah Tecite ii Governing Body—in Pasian thu lamah hong vak in, taangko nasepna-ah hong makaih hi. Amaute in ‘Jesuh seh a pil a citak nasem,’ ahi hi. (Matthai 24:45a) Governing Body-a a kihel khempeuh pen kha siangtho tawh sathau a kinilhte hi a, a leitung nuntakna uh a bei ciangin vantung Gamah Khrih tawh uk khawm ding uh hi.

2. A citak nasem in i upna a kip nadingin bangteng hong vaihawmsak a hiam?

A citak nasem in ‘[Khristiante ading] a hun manmanin amaute’ nekzah ding ciat an a piak ding’ lam Jesuh in gen hi. (Matthai 24:45b) I an nek in pumpi a cidamsak mah bangin, Lai Siangtho hilhnate in Jehovah tunga i cihtak nading le Jesuh’ hong piak nasep i sep zawh nadingin tha hong neisak hi. (1 Timoti 4:6) Pawlpi kikhop, khawk kikhop, le kikhoppite banah, Lai Siangtho bulphuh laibute le video-te in Pasian’ deihna i theihtel nading le Pasian tawh i kilawmtatna a kip semsem nadingin hong huh hi.

ZON BEH INLA, MUH BEH IN

“A pil a citak nasem” ahi, Governing Body i kisapna a hang kan in.

Limte:Leitung bupa Jehovah Tecite in Governing Body kiang pan a ngah lamlahnate zui uh. 1. Innkuan khat in JW Broadcasting en. 2. Teci nasemte in dongtuakte huh nadinga a kipia vante mawtawpi tungah suan uh. 3. Khutsawn leeng gei-a Pasian’ thu a taangko Teci nihte. 4. Pawlpi upa khat in pawlpi kikhopna-ah laikhak a sim laitak. — Governing Body in leitung bupa Jehovah Tecite adingin Lai Siangtho thu, lamlahna, le huhna pia hi

3. Jehovah’ mite pen limtakin kivaihawmkhia uh hi

Jesuh’ lamlahna nuai-ah Governing Body in Jehovah Tecite’ nasep limtakin vaihawm hi. Khristian masate in zong tua bang mahin vaihawmna na nei uh hi. VIDEO hong in.

VIDEO: Jehovah In A Mite Limtakin Vaihawm Hi (6:18)

Korin Masa 14:33, 40 sim in. Tua khit teh hih dotna kikum un:

Jehovah in a Tecite limtaka a vaihawm noplam hih Lai Siangtho munte in koi bangin lakkhia a hiam?

4. A citak nasem in taangko nasep vaihawm

Taangko nasep in Khristian masate adingin a thupi pen nasep ahi hi. Sawltak 8:14, 25 sim in. Tua khit teh hih dotnate kikum un:

Khristian masate hun lai-in taangko nasepna-ah kua in lamlahna pia a hiam?
Peter le Johan in a sawltakpihte lamlahna koici thukkik uh a hiam?

Taangko nasepna pen Governing Body’ vaihawm a thupi pen nasep ahi hi. VIDEO hong in.

VIDEO: Taangko Nasepna Mitsuan In (1:24)

Taangko nasep a thupina Jesuh in na limgen hi. Marka 13:10 sim in. Tua khit teh hih dotnate kikum un:

Taangko nasep pen Governing Body adingin bang hang hihzah takin thupi a hiam?
Leitung bupa taangko nasep vaihawm dingin “a pil a citak nasem” bang hang kisam a hiam?

5. A citak nasem in lamlahna pia

Leitung bupa om Khristiante tungah Governing Body in lamlahna pia hi. Koi bangin a piak ding lamlahna khensat uh a hiam? Khristian masate ii governing body’ sep dan ngaihsun in. Sawltak 15:1, 2 sim in. Tua khit teh hih dotnate kikum un:

Khristian masa pawlkhat bang tungtangah thu kinial uh a hiam?
Paul, Barnabas le unau pawlkhat buaina vengsak dingin kuate kiang pai uh a hiam?

Sawltak 15:12-18, 23-29 sim in. Tua khit teh hih dotna kikum un:

Khristian masate ii governing body in thu a khensat ma-un Pasian’ lamlahna a ngah nadingin bang thu ngaihsun uh a hiam?—A neu 12, 15, le 28 en in.

Sawltak 15:30, 31 le 16:4, 5 sim in. Tua khit teh hih dotnate kikum un:

Khristian masate in governing body’ lamlahna koi bangin thukkik uh a hiam?
Amau’ thumanna hangin Jehovah in koi bangin thupha pia a hiam?

Timoti Nihna 3:16, 17 le James 1:5 sim in. Tua khit teh hih dotna kikum un:

Tu hunin zong Governing Body in thu khensatna a bawl ma-un lamlahna a ngah nadingin bang hih uh a hiam?

MI PAWLKHATTE’ GEN: “Governing Body’ thuman pen mi nung zuihna hi.”

Jesuh in Governing Body a makaihlam bang hangin um na hiam?

TOMLAKNA

Governing Body pen Khrih in a seh “a pil a citak nasem” ahi hi. Leitung bupa Khristiante lamlakin upna a khauhsak Lai Siangtho thute vaihawmsak uh hi.