SIN DING THU 52
I Nikten Puansilh le I Kizep Dan Bang Hangin Thupi A Hiam?
Nikten puansilh le kizep dan lamah i vekpi-in deih dan nei tek hi hang. Ahih hang, Lai Siangtho thubul pawlkhat zui leng, ei’ deih dan banga i kizep theih banah Jehovah zong lungkimsak thei ding hi hang. Tua thubul pawlkhat kikum ni.
1. Nikten puansilh le kizep dan ding i teelna-ah bang Lai Siangtho thubulte i zuih ding kisam a hiam?
‘A kilawm a kituak beka kizem kipuahin, a uanglua le a khengvala i kizep’ loh ding le “biakna lungsim” i neihlam a kilangkhia dingin siangtho taka i kizep ding kisam hi. (1 Timoti 2:9, 10) Hih Lai Siangtho thubul lite ngaihsun in: (1) ‘A kilawm a kituak beka i kizep i kipuah’ ding kisam hi. Pawlpi kikhopna-ah na muh mah bangin Jehovah’ mite in deih dan a neih ciat uh hang, nikten puansilh le kizep dan tawh Pasian a zahtaklam lak uh hi. (2) ‘A uanglua-a kizem lo’ cih in, i nikten puansilhte in nulepa lunggulhna lungsim a piansak loh ding le mite’ mitsuan luat loh dinga kizem ding cihna ahi hi. (3) Tu lai-a a suak thak nikten puansilh le kizep dante zui lo-in, ‘a khengvala kizem lo’ ihihlam i lak hi. (4) Eite’ kizep dan in “biakna lungsim” i neihlam a tawntungin a kilatsak ding kisam hi. Tua hi leh Pasian man i biaklam mite in theithei ding uh hi.—1 Korin 10:31.
2. I kizep dan in unaute koi bangin sukha thei a hiam?
I deih dan banga teel a, i kizep theih hang, midangte a sukkhak dan ding i ngaihsut ding kisam hi. Midangte i hehsuaksak loh nadingin ahi thei zahin i hanciam banah, “midangte a upna uh hong khangin, mihoih hong suah theih nadingun i gamta ciat ding hi.”—Rom 15:1, 2 sim in.
3. I kizep dan in biakna manah midangte koi bangin lunglutsak thei a hiam?
Eite in a hun le a mun tawh kituak a kizep i sawm hangin, i kikhop hun ciang le taangko nasepna-ah i kihel hun ciangin i kidawp ding thupi diak hi. I kizep dan in i genkhiat a thupi mahmah thu panin mite’ lungsim a heikhiat ding i deih kei hi. Tua sangin, i kizep dan in midangte thuman lamah lunglutsak thei a, “hong Hon Pasian’ thu a hoihna a kilangsak” thei hi.—Titus 2:10.
ZON BEH INLA, MUH BEH IN
I nikten puansilh le kizep dan tawh Khristian man ihihlam i lah theih dan kan in.
I kizep dan in kumpi thuneite tungah zahtakna i neih leh neih loh lak hi. Jehovah in i lungsim hong en i cih hang, i kizep dan in zong Pasian zahtak ihihlam a lah ding kisam hi
4. Ahi sitset dinga kizepna in Jehovah i zahtaklam lakkhia hi
Kizep dan lama i kidop nading a hang a thupipen in bang a hiam? Late 47:2 sim in. Tua khit teh hih dotnate kikum un:
I nikten puansilh dan in Jehovah tunga mite’ muh dan sukha thei ahih manin koi bangin teelin kizem ding i hiam?
I kikhop hun ciang le taangko nasepna-ah i kihel hun ciangin i kizep dan i kidop ding kisam na sa hiam? Bang hang hiam?
5. Nikten puansilh le kizepna tawh kisai-in khensatna hoih i bawl theih dan
I nikten puansilh pen a man tam ahi a, ahi kei zongin siangtho sitset ding le a hun le a mun tawh kituak ahih ding thupi hi. Korin Masa 10:24 le 1 Timoti 2:9, 10 sim in. Tua khit teh a nuai-a nikten puansilhte pelh ding a kisapna a hang kikum un.
A kol lua, ahih kei leh ahi nengnang nikten puansilh.
A kigak lua, a kilang lua, ahih kei leh nulepa lunggulhna a piangsak thei nikten puansilh.
Moses’ thukham pen Khristiante in zuih ding a kisap nawn loh hang, tua in Jehovah’ ngaihsutna kilangsak hi. Thu Hilhkikna 22:5 sim in. Tua khit teh hih dotna kikum un:
Pasal in numei tawh kibang a, ahih kei leh numei in pasal tawh kibang a, nikten puansilh le kizep pen bang hang pelh ding kisam a hiam?
Korin Masa 10:32, 33 le 1 Johan 2:15, 16 sim in. Tua khit teh hih dotnate kikum un:
I kizep dan hangin veng sung ahih kei leh pawlpi sunga mi pawlkhatte’ lungsim i nawngkaisak khak loh ding bang hangin thupi a hiam?
Na tenna muna mite ii nikten puansilh le kizep dan pen koi bang a hiam?
Tuate lak pan koi bang nikten puansilh le kizep dante pen Khristiante adingin kilawm sa lo na hiam? Bang hang hiam?
I deih nikten puansilh le kizep dan tuamtuamte tawh zong Jehovah’ lungkimna i ngah thei hi
MI PAWLKHATTE’ GEN: “Ka deih bangbang silh ning, kei thu hi.”
Nangh tua bangin na ngaihsun hiam? Bang hang hiam?
TOMLAKNA
Ahi sitset dinga i kizep ciangin Jehovah le midangte i zahtaklam a lak hi hang.
Kikupkikna
I nikten puansilh le kizep dan pen Jehovah ading bang hangin thupi a hiam?
Nikten puansilh le kizep dan ding i teelna-ah bang Lai Siangtho thubulte zuih ding kisam a hiam?
I kizep dan in biakna man tunga midangte’ muh dan pen koi bangin sukha thei a hiam?
THEIH BEH NADING
Na nikten puansilh in na tungtang a pulak theihte sim in.
Ciaptehna (tattoo) na sut ma-in ngaihsut ding a thupina kan in.
“Tattoo Tawh Kisai Lai Siangtho In Bang Gen A Hiam?” (Website-a thu)
I thu khensatna hong lamlak thei Lai Siangtho thubul dangte ngaihsun in.
“Na Nikten Puansilh Dan In Pasian A Minthangsak Hiam?” (Vilnatausang, September 2016)
Lungsim man a nei numei khat in midangte’ nikten puansilh dan tawh kisai-in a kilawm a kituak muh dan koi bangin hong nei a hiam?
“Nikten Puansilh le Kizep Dan In Hong Khaktan” (Khanghlo In! Laibu)