KHENPI 3
Thu Buainate Siansak Theihna
“Itna in mawhna tampi khuhcip thei ahih manin lungsim takpi tawh khatlekhat ki-it ding thupi ngaihsut pha pen un.”—1 Peter 4:8
Na nupa un nuntak khop ding na kipat uh ciang haksatna tuamtuam hong kipan ding hi. Na ngaihsutna, lungsim le nuntakna nungthu kibatlohnate in nupa sung buaina hong piangsak ding hi. Ahih kei leh haksatna pen a pualam pan ahi zong genkholh theih loh thupiangte pan ahi zong honglut thei hi.
Haksatnate pelnuam i hih hang tua haksatnate i nawk ding Lai Siangtho in hong hanthawn hi. (Matthai 5:23, 24) Lai Siangtho lamlahnate zui-in nuntakpih lecin haksatnate a hoihpenin hemkhia zo ding hi teh.
1 HAKSATNATE KIKUM UN
LAI SIANGTHO GENNA: “Pau hun om hi.” (Thuhilhna 3:1, 7) Haksatnate hoihtaka hun pia-in kikum un. Haksatna tawh kisai nangh muhdan le na lungsim sunga om thute im loin siangtakin gen in. A tawntungin na innkuanpih tawh “thuman kigen” un. (Efesa 4:25) Na heh leh zong kitot khak loh nading na hanciam tentan in. Kamnem tawh dawnna in kitot nading pan damtaka thu hong kikumsak thei ding hi.—Paunak 15:4; 26:20.
Thu khat hangin na innkuanpih tawh na kithutuak kei leh zong damtakin dawngkik inla itna le zahtakna na lah ding mangngilh kei in. (Kolose 4:6) Ahih theih leh na haksatna uh a manlang theithei in siansak ding hanciam unla kiho loin om kei un.—Efesa 4:26.
NA SEP THEIH DING:
Haksatnate na kikup theih nading hun hoih khat teel in
Thu hong kigen ciang ngai inla a kikalah paukha kei in. Na pau ding hun ngahkik ding hi teh
2 THU NGAI INLA THEISIAM IN
LAI SIANGTHO GENNA: “Unau ki-itna lungsim nei unla, khatlekhat kizahtak bawl ding lamsang kidem un.” (Rom 12:10) Nangh koi bangin thu ngai na hi hiam cih thupi mahmah hi. “Unau ki-itna lungsim” le “kiniamkhiat” na tawh na innkuanpih ii muh dan na theihsiam nading hanciam in. (1 Peter 3:8; James 1:19) Thu ngainuam bangin kineih kei in. Ahih theih leh na nasep khawlpak inla na innkuanpih ii thugen limtakin ngai-in ahih kei leh hun dangah kikumkik ding ut maw ut lo cih dong in. Na innkuanpih pen kilangpanpihin mu kei-in la, na nuntakpih lawmin ngaihsun lecin “heh pahpah” lo ding hi teh.—Thuhilhna 7:9.
NA SEP THEIH DING:
Na lungsim tawh a kituak kei leh zong hong thugente lungsim hongin na ngai suak in
Hong gen kammalte hi loin bang thu gen nuam cih na theih nading hanciam in. Na innkuanpih ii pumpi tatzia le a aw suah dan thei in
3 NA KHENSAT BANGIN SEM UN
LAI SIANGTHO GENNA: “Gimpi-a nasepna pen hauhna hi a, kam bek pau-in tutmawkna pen zawnna ahi hi.” (Paunak 14:23) A hoih pen thu siansakna in kithukimna bek tawh kicing lo hi. Na nih un na thukimsa mah bangin na sep suak ding uh kisam hi. Tua bangin na sep suak nadingin hanciamna le thanuam kul ding a, ahih hang thaman na ngah ding hi. (Paunak 10:4) Kipawlin thanuam taka na sepkhop uh leh “thaman a tamzaw ngah” ding hi uh teh.—Thuhilhna 4:9.
NA SEP THEIH DING:
Thu buainate siansak theih nading khat ciat ii sep theih takpi ding thute khensat in
Na khensat bangin na sep uh ciang khangto maw khangto lo cih sittel zel in