A Site A’ding Bang Lametna Na Om Hiam?

1. A site a’ding bang a lungdamhuai thu na om hiam?

Jerusalem khuapi kianga Bethany khua-ah Jesuh a tun ciang a lawm Lazarus a sih zawh nili phakhin hi. Jesuh in a sipa’ sanggamte ahi Mary leh Martha tawh hanah vapai uh hi. A sawtlo-in mi honpi zong hongpai uh hi. Jesuh in Lazarus a hinkiksak ciang Mary le Martha nakpitaka a nuam na uh na mitkha tawh na mu thei hiam?—Johan 11:21-24, 38-44 na sim in.

A site tawh kisai a lungdamhuai thu Martha in a theihsa hi a, Jehovah in a site leitungah hingkiksak ding cih zong na thei hi.—Job 14:14, 15 na sim in.

2. Misite om zia, bang hi ding hiam?

Mihingte pen leivui tawh kibawl hi. (Piancilna 2:7; 3:19) I pumpi sungah a nungta kha, cih omlo hi. Ci le sa i hih manin ih sih teh bangmah nungta nawnlo hi. Mite a sih ciang ngaihsutna zong om nawnlo hi. Tua hi-a, Lazarus a sih lai-in theih theihna neilo ahih manin a gending bangmah a nei kei hi.—Late 146:4; Thuhilhna 9:5, 6, 10 na sim in.

Mihingte a sih ciang meikhuk sungah Pasian in a bawlsia ding hiam? Lai Siangtho in a site pen theihna neilo hi, ci ahih manin hellkhuk kihilhna pen Pasian a kigen siatna na hi hi. Mihingte pen meitawh kibawlsia hi, cih sanna pen Pasian in deih vet lo hi.—Jeremiah 7:31 na sim in.

Misite om zia, bang hi ding hiam? cih video en in

3. A site a pau thei uh hiam?

A site pen pau thei lo uha, zong za nawn lo uh hi. (Late 115:17) A hih hangin, dawite pen misi banga kineih khemin mihingte tawh kiho thei uh hi. (2 Peter 2:4) Misi tawh kiho ding Jehovah in khaam hi.—Thu Hilhkikna 18:10, 11 na sim in.

4. Kuate hong hingkik ding hiam?

A si awn tampi hih leitungah hong hingkik dinguh hi. Pasian thu thei kha lo-in siatna a bawlte zong hong hingkik ding uh hi.—Luka 23:43; Sawltak 24:15 na sim in.

A hingkikte’n Pasian tawh kisai thuman thutakte sinkik dinguh a, Jesuh’ thu ngai-in a upna uh lahtheihna hun ngah ding uh hi. (Maangmuhna 20:11-13) Pasian deihna bangin a om uh leh leitungah nuamtaka nungta tawntung ding uh hi.—Johan 5:28, 29 na sim in.

5. Thawhkikna in Jehovah thu bang hong theisak hiam?

Pasian in a Tapa pen a si dinga a sawlna pan, a site hingkik ding cih lametna hong pia hi. Tua ahih manin thawhkikna in Jehovah’ itna leh a hehpihna thu hong theisak hi. A site hong hinkik uh ciang kua na muh ding lunggulh peen na hiam?—Johan 3:16; Rom 6:23 na sim in.