Aprann avek legzanp bann Gibeonnit

1-2. Akoz nou devret enterese avek sa ki Labib i dir konsernan bann Gibeonnit?

I LANNEN 1473 avan Kris e nasyon Izrael i fek konmans lager pour konkerir Later Promiz. Bann Izraelit ti’n ranport laviktwar lo lavil Zeriko ek Ay. Me pli tar en keksoz ki zot pa ti ekspekte ti arive. En group vwayazer ti vin kot zot e dir ki zot sorti dan en pei byen lwen e ki zot anvi fer en lalyans lape avek pep Bondye.

² Sa bann vwayazer ti bann Gibeonnit. Sa i sa premye fwa ki bann Gibeonnit i ganny mansyonnen dan Labib. Me i pa sa dernyen fwa. Dan Labib, i annan bann resi ki montre ki bann Gibeonnit ti reste parmi bann Izraelit pour plizyer santenn lannen apre sa. Sa bann resi i kapab ansenny nou en kantite leson enportan e i osi ansenny nou en kantite keksoz konsernan Zeova.

DEMONTRE LAFWA EK LIMILITE

3. (a) Lekel bann Gibeonnit? (b) Akoz zot ti esey fer lape avek bann Izraelit?

³ Ler bann Izraelit ti konmans konkerir pei Kanaan, bann Gibeonnit ti pe reste dan lavil Gibeonn, ki ti en lavil ki ti ganny proteze par bann gro miray. Zot ti form parti bann Ivit, enn parmi sa set nasyon Kananeen ki ti “pli for . . . e ki pli bokou” ki bann Izraelit. (Det. 7:1) Bann Gibeonnit ti annan en kantite solda e zot ti for. (Zoz. 10:2) Zot pa ti fer parey bann lezot Kananeen parski zot ti realize ki i pa ti vo lapenn pour lager kont bann Izraelit. Zot ti kapab vwar ki Zeova ti pe lager pour son pep e zot ti konnen ki Zeova ti’n promet pour tir bann Kananeen dan sa pei. (Egz. 34:11; Zoz. 9:24) Alor apre ki bann Izraelit ti’n konkerir Zeriko ek Ay, bann Gibeonnit ti anvoy en delegasyona Gilgal kot Zozye pour fer lape avek bann Izraelit.

4. (a) Dapre Zozye 9:8-13, ki mannyer bann Gibeonnit ti trik bann Izraelit pour fer en lalyans lape avek zot? (Vwar portre.) (b) Ki ti arive ler bann Izraelit ti dekouver ki bann Gibeonnit ti’n koz manti avek zot?

⁴ Lir Zozye 9:8-13. Bann Gibeonnit ti fer krwar ki zot ti sorti dan en pei byen lwen. Zot ti rekonnet ki Zeova ti’n ed bann Izraelit ranport laviktwar lo Lezip e lo Lerwa Sionn ek Og, bann lerwa Amorit. Me zot ti saz e zot pa ti mansyonn sa ki ti’n arive Zeriko ek Ay, vi ki zot ti’n dir ki zot sorti dan en “pei byen lwen” e dimoun dan zot pei pa ti pou’n ankor tann sa nouvel. Zozye ek bann Izraelit ti aksepte sa ki bann Gibeonnit ti’n dir e san demann Zeova ki pour fer, zot ti fer lalyans lape avek zot. (Zoz. 9:14, 15) Pa bokou letan apre sa, bann Izraelit ti dekouver ki bann Gibeonnit ti’n koz manti avek zot me zot ti gard sa lalyans ki zot ti’n fer avek bann Gibeonnit parski zot ti’n “fer en serman devan Zeova.” (Zoz. 9:16-19) Zot ti dir bann Gibeonnit ki zot ti kapab reste parmi zot e ki zot ti bezwen fer travay bann lesklav setadir “anmas dibwa e al sers delo pour pep Izrael e pour lotel Zeova.”—Zoz. 9:27.

5. Ki mannyer bann Gibeonnit ti demontre lafwa dan Zeova?

⁵ Ler senk lerwa Amorit ti tande ki bann Gibeonnit ti’n fer lalyans lape avek Izrael, zot ti zwenn ansanm pour atak Gibeonn. Bann Gibeonnit ti al rod led avek Zozye. (Zoz. 10:3-7) Zozye ek son larme ti al sov bann Gibeonnit e Zeova ti ed zot ranport laviktwar. Zeova ti menm fer bann gro lagrel tonm lo bann larme Amorit e i ti fer en mirak pour fer soley kontinyen tape ziska ler bann Izraelit ti ranport laviktwar. (Zoz. 10:9-14) Par fer lalyans lape avek Izrael e par rod led Zozye ler bann lennmi ti menas zot, bann Gibeonnit ti montre ki zot ti annan lafwa dan Zeova, lafwa ki i ti pou gard son parol e protez zot.

6. Ki nou aprann lo Zeova avek lafason ki i ti tret bann Gibeonnit pandan sa letan ki bann Izraelit ti pe konkerir Later Promiz?

⁶ Ki sa resi i ansenny nou lo Zeova? Zeova i annan limilite e i pran pitye pour bann ki annan lafwa dan li. Oparavan, i ti’n dir bann Izraelit “pous tou bann zabitan sa pei” e sa ti enkli bann Gibeonnit. (Nom. 33:51, 52) Me Zeova ti siport sa lalyans lape ki Izrael ti’n fer avek bann Gibeonnit. I ti pran pitye pour bann Gibeonnit e les zot viv. Zeova ti fer sa menm si bann Izraelit pa ti rod son gidans avan zot ti fer sa lalyans lape. Apre sa, i ti ed bann Izraelit pour gard zot promes e i ti fer en mirak pour sov bann Gibeonnit.—Zoz. 9:26; 11:19.

7. Ki mannyer nou kapab swiv legzanp bann Gibeonnit e demontre lafwa ek limilite? (Vwar portre.)

⁷ Ki mannyer nou kapab swiv legzanp bann Gibeonnit? Nou bezwen devlop en lafwa for dan Zeova. Vi ki nou konn bokou plis lo Zeova ki bann Gibeonnit, nou annan bokou plis rezon pour annan konfyans total dan Zeova. (Ps. 40:4, 5) Nou kapab osi swiv legzanp bann Gibeonnit par pare pour fer bann travay dan servis Zeova ki kapab ganny konsidere konman pa enportan. (Zoz. 9:23, 27) En zenn frer ki apel Luke pa pou zanmen oubliy en moman kot i ti vwar en frer aze dan Betel fer sa. Menm si sa frer ti annan bann responsabilite enportan dan Betel, i ti volonter pour gardyen kot en sit konstriksyon Lasal Rwayonm aswar. Luke i dir: “Mon’n aprann ki limilite pa zis en santiman. Nou montre ki nou annan limilite par sa ki nou swazir pour fer oubyen pa fer.” Annou demontre nou lafwa dan Zeova toulezour par depan lo li ler nou fer fas avek bann sityasyon difisil e par demontre limilite e pare pour fer okenn travay ki nou ganny donnen pour fer dan servis Zeova.

ESPER ZEOVA ANMENN LAZISTIS

8. Ki krim Lerwa Sail ti fer kont bann Gibeonnit?

⁸ Laprosenn fwa ki Labib i mansyonn bann Gibeonnit i plizyer santenn lannen pli tar, ler Lerwa Sail ti vir kont bann Gibeonnit ki ti pe reste Izrael. I ti esey touy tou Gibeonnit akoz i ti “vreman zalou pour pep Izrael ek pep Zida.”b Sa i fer ki en kantite Gibeonnit ti ganny touye. (2 Sam. 21:2, 5, 6) Sa ti en lenzistis. Sail ti kas sa lalyans lape ki ti’n egziste pandan en kantite letan ant bann Izraelit ek bann Gibeonnit.

9. Kan ki sa lenzistis kont bann Gibeonnit ti ganny adrese?

⁹ Sa lenzistis kont bann Gibeonnit pa ti ganny adrese deswit. Anfet, i ti pandan renny Lerwa David ki Zeova ti adres sa sityasyon pour anmenn en lafanmin ki ti dire pour trwa-z-an. Ler David ti demann Zeova akoz i ti annan sa lafanmin, Zeova ti dir ki i ti ankoler parski Sail ek son fanmir ti’n fer pese ler zot ti touy bann Gibeonnit.—2 Sam. 21:1.

10. Dapre 2 Samyel 21:3-6, ki mannyer sa ki bann Gibeonnit ti dir David ti montre ki zot ti annan respe pour Lalwa Bondye?

¹⁰ Lir 2 Samyel 21:3-6. David ti koz avek bann Gibeonnit pour gete si i annan keksoz ki kapab ganny fer pour ki sa krim ki Sail in komet i kapab ganny pardonnen. Eski zot ti pou esey vin ris par fer David pey zot pour lefet ki i pa’n azir pli boner? Bann Gibeonnit ti reponn ki zot “pa pe rod larzan oubyen lor” parski dapre Lalwa, zot pa ti devret aksepte en ranson pour sov lavi en mertriye. (Nom. 35:30, 31) Zot ti osi rekonnet ki zot pa ti kapab touy en dimoun san permisyon lerwa. Alor David ti donn permisyon pour touy set parmi bann zonm dan fanmir Sail ki petet ti’n ed Sail pour touy bann Gibeonnit. En pe letan apre lapli ti tonbe e sa lafanmin ti terminen. Sa ti montre ki Zeova ti nepli ankoler avek bann Izraelit akoz lafason ki zot ti’n tret bann Gibeonnit.—2 Sam. 21:9, 10, 14.

11. Ki nou kapab aprann lo Zeova dan sa resi?

¹¹ Ki sa resi i ansenny nou lo Zeova? Nou vwar levidans ki Zeova i toultan demontre lazistis. (Ps. 37:28) En kantite dimoun pa ganny trete byen akoz zot sorti dan en lot pei oubyen akoz zot diferan. Me Zeova i anvi ki tou dimoun i ganny trete dan en fason zis. Dan sa moman ki i’n swazir, Zeova pou anmenn lazistis pour tou son bann serviter. Sa resi i osi ansenny nou ki Zeova i ekspekte nou gard nou bann promes zis parey i ti ekspekte ki bann Izraelit i gard zot promes pour gard lape avek bann Gibeonnit.—Konpar Amos 1:9.

12. Ki mannyer nou kapab swiv legzanp bann Gibeonnit ler nou ganny trete dan en fason enzis?

¹² Ki mannyer nou kapab swiv legzanp bann Gibeonnit? Ler nou bann frer ek ser pa tret nou byen, demontre pasyans e esper Zeova azir. Ler nou fer sa, nou montre ki nou annan konfyans ki Zeova pou azir dan sa bon moman. Annou vwar sa ki ti arive avek en ser ki apel Laura French. I ti konmans servi dan Betel Kanada an 1926. Apepre di-z-an pli tar, i ti fer fas avek en sityasyon enzis. I ti ganny akize konmkwa i form parti en group aposta dan Betel. Menm si sa pa ti vre, i ti bezwen kit Betel. Ki i ti pou fer? Menm si i ti sagren, i pa ti zanmen konplent. I ti pas sa prosenn kat-r-an konman en pionye. An 1940, i ti sirprann e kontan pour ganny envite pour retourn Betel kot i ti kontinyen servi Zeova fidelman pour apepre 50 an ziska son lanmor. Parey Ser French, ler nou ganny trete dan en fason enzis, nou kapab kontinyen fer sa ki byen e esper Zeova anmenn lazistis dan sa moman ki i’n swazir.—Iza. 26:3, 4.

FIDELMAN SIPORT VRE LADORASYON

13. Lekel bann Netinim e ki zot ti fer apre ki zot ti sorti an egzil Babilonn?

¹³ Bann Gibeonnit i ganny mansyonnen ankor dan Labib apepre 500 an apre renny Lerwa David. Sa 70 lannen ki bann Izraelit ti’n an egzil Babilonn ti’n fini. An 537 avan Kris, sa premye group Zwif ti retourn Zerizalenm avek Gouverner Zeroubabel. (Ezra 2:1, 2, 58) An 468 avan Kris, en lot group ti retourn Zerizalenm avek Ezra, ki ti en dimoun ki ti kopye Parol Bondye. (Ezra 7:1-7) Dan sa de pti group dimoun ki ti retourn Zerizalenm, i ti annan bann fanmir “Netinim.” (Vwar not anba lo paz pour Ezra 2:58 ek 7:7.) Lekel bann Netinim? Zot ti “bann dimoun ki pa ti Izraelit ki ti travay kot tanp” e i paret ki bokou zot ti desandans bann Gibeonnit.—Vwar Leksplikasyon bann mo “Netinim.”

14. Ki mannyer bann Gibeonnit ti montre ki zot ti fidel avek Zeova? (1 Kronik 9:2 ek not anba lo paz.)

¹⁴ Lir 1 Kronik 9:2 ek not anba lo paz. “Bann serviter tanp” ti parmi bann premye dimoun ki ti retourn Izrael. Sa i enteresan parski pa tou Zwif ki ti’n ganny anmennen an egzil ki ti retournen. San dout, en kantite Zwif ti pe prospere Babilonn e zot pa ti pare pour fer bann sakrifis neseser pour zot retournen e ede rekonstrir zot pei ki ti’n ganny detrir. Me bann ki ti fidel, enkli serten ki ti probableman desandans bann Gibeonnit, ti anvi vwar vre ladorasyon ganny retablir kot tanp Zerizalenm e zot ti fer tou sa ki zot ti kapab pour retournen. Me kontrerman avek bann Zwif ki ti annan later konman leritaz, bann Gibeonnit ti napa leritaz Izrael. Kantmenm sa, zot ti retournen pour travay kot tanp Zeova e zot ti menm ede pour repar miray Zerizalenm.—Nee. 3:26.

15. Ki sa resi konsernan bann Gibeonnit i ansenny nou lo Zeova?

¹⁵ Ki sa resi i ansenny nou lo Zeova? Nou aprann ki nou Bondye i vreman apresye son bann serviter fidel e i toultan pran swen avek zot. Ler sa 70 an ki bann Izraelit ti an egzil ti terminen, i ti fer preski 1,000 an depi ki Zeova ti’n sov bann Gibeonnit pandan ki bann Izraelit ti pe konkerir Later Promiz. Me Zeova ti kontinyen beni zot. Desandans bann Gibeonnit ti sirviv destriksyon Zida ek Zerizalenm an 607 avan Kris. Apre ki zot ti’n retourn Zerizalenm, zot ti kontinyen partisip dan vre ladorasyon e travay avek bann Levit kot tanp. I paret ki serten ti reste pre avek tanp. (Ezra 2:70; Nee. 11:21) Osi, vi ki zot ti travay kot tanp, zot pa ti bezwen pey okenn taks, taks lo marsandiz oubyen taks lo semen.—Ezra 7:24.

16. Ki mannyer nou kapab swiv legzanp bann Gibeonnit ler i annan pour fer avek nou ladorasyon?

¹⁶ Ki mannyer nou kapab swiv legzanp bann Gibeonnit? Nou osi nou anvi fer tou sa ki nou kapab pour siport vre ladorasyon. Nou volonterman fer bann sakrifis pour servi Zeova parski nou kontan li e nou anvi fer li plezir. Sanmenm sa ki en frer ki apel Alwin ki reste Filipin ti fer. I ti annan en travay ki pey byen dan en lakonpannyen petrol. Me i ti anvi fer plis dan servis Zeova. Sak fwa sirveyan rezyonal ti vizit son kongregasyon, Alwin ti pran konze pour li kapab fer plis dan kongregasyon e sa ti fer li zwaye. Alwin ti priy en kantite e apre en serten letan, i ti deside pour kit son travay e pour rod enn ki ti pou permet li pour fer pionye ordiner. Sa ti vedir ki i pa ti pou ganny menm kantite larzan ki i ti pe gannyen oparavan. Me kantmenm sa, i ti atenn son lobzektif. Son madanm ti vin fer pionye ansanm avek li e konman en koup, zot in kapab ed 21 dimoun pour aprann laverite e batize. Nou kapab asire ki Zeova i apresye zefor ki sa koup in fer. Nou osi nou kapab asire ki Zeova i apresye okenn sakrifis ki nou fer dan son servis e sa i fer ki i pou toultan donn nou sa ki nou bezwen.—Mat. 6:33.

17. Ki nou’n aprann ler nou’n etidye bann resi konsernan bann Gibeonnit?

¹⁷ Bann resi Labib lo bann Gibeonnit i montre nou konsernan bann zoli kalite ki Zeova i annan. Zeova i annan limilite, i pran pitye, i demontre lazistis e i fidel. I toultan rekonpans son bann serviter fidel. Nou osi kapab aprann en kantite leson avek bann Gibeonnit. Parey bann Gibeonnit, nou anvi annan en lafwa for dan Zeova e depan lo li ler nou fer fas avek bann sityasyon ki fer per. Sa kalite lafwa pou osi motiv nou pour demontre limilite e pour fer nenport keksoz ki Zeova i demann nou pour fer dan son servis. Ler nou ganny trete dan en fason enzis, nou anvi demontre pasyans e esper Zeova e annan konfyans ki i pou anmenn lazistis dan sa bon moman. Nou anvi devoue dan nou servis e siport vre ladorasyon fidelman. Anmezir ki nou fer sa, nou pou montre ki nou’n aprann bann bon leson avek legzanp bann Gibeonnit.