Ed ou zanfan fer fas avek bann nouvel enkyetan

Bann nouvel enkyetan ki fer per, ki souvan vin avek bann portre vyolan i disponib 24 lo 24 lo televizyon, telefonn, tablet oubyen konpiter.

Souvandfwa zanfan pe gete.

Ki mannyer ou kapab ed ou zanfan pour ki sa bann keksoz pa afekte zot tro bokou?

• Ki mannyer nouvel i afekte zanfan?

• Ki mannyer ou kapab ed ou zanfan fer fas avek bann nouvel enkyetan?

• Ki mannyer pour ed ou zanfan si i’n pas atraver en leksperyans ki’n fer li per?

Ki mannyer nouvel i afekte zanfan?

• Bokou zanfan i ganny afekte avek bann problenm ki zot vwar dan nouvel. Serten zanfan pa pou koze pour dir zot santiman, me ler zot tann en move nouvel, sa i kapab fatig zot en kantite.a Zot kapab vin pli enkyet si zot paran pe enkyet pour en keksoz ki pa sitan grav.

• Zanfan i kapab mal enterpret sa ki zot vwar dan nouvel. Par egzanp, serten i krwar ki sa ki zot in vwar pou ariv avek zot fanmir. Tandis ki bann pti zanfan, si zot kontinyen reget sa nouvel, zot kapab krwar ki sa levennman pe kontinyelman arive.

• Zanfan i kapab vwar li difisil pour konpran sa ki pe arive dan nouvel. Zot pa realize ki bann lazans nouvel i bann biznes ki fer larzan ler en kantite dimoun i swiv zot progranm. Alor, zot prezant bann nouvel dan en fason ki pou atir latansyon dimoun akoz zot enkyet.

Ki mannyer ou kapab ed ou zanfan fer fas avek bann nouvel enkyetan?

• Limit lakantite nouvel ki zot tande oubyen ekoute. Sa pa vedir ki ou zanfan pa devret konnen ki pe pase dan lemonn. Me i pa pou fer zot dibyen si zot kontinyen tann oubyen get menm nouvel enkyetan zanmen fini.

  “Parfwa nou koz lo bann detay en nouvel, san realize ki nou zanfan pe tann nou e sa i fatig zot.”​—Maria.

  Prensip Labib: “Ler nou enkyet, sa i vin en fardo.”​—Proverb 12:25, Contemporary English Version.

• Ekout avek pasyans, reponn dan en fason ki montre ou konpran son santiman. Si i difisil pour ou zanfan koz lo sa ki’n arive, esey fer li desinen. Ler ou koz avek ou zanfan lo sa ki pe trakas li, servi bann mo ki i pou konpran, me veye ki ou pa koz lo bann detay sa levennman ki pa neseser.

  “I paret ki nou fiy i santi li pli byen apre ki nou’n asiz avek li e ekout li. I pa ede pour dir li: Keksoz i koumsa aprezan, nou pou bezwen adapte.”​—Sarahi.

  Prensip Labib: ‘Pare pour ekoute, me pran letan avan koze.’​—Zak 1:19.

• Ed ou zanfan konpran sa bann nouvel dan en fason global. Par egzanp, en reportaz lo en kidnaping i kapab donn lenpresyon ki sa bann tel krim i kapab ariv pli souvan ki larealite. Eksplik ou zanfan ki bann prekosyon ki ou’n pran pour gard zot an sekirite. Apre osi, gard antet ki sa bann trazedi i ganny konsidere en nouvel akoz rar zot arive, pa akoz i bann keksoz ki ariv souvan.

  “Ed ou bann zanfan pour fer fas avek zot santiman. Souvandfwa nou santiman i annan pour fer avek sa ki nou’n mazin lo la, alor ed nou bann zanfan pour konsantre lo bann keksoz ki pozitif, koumsa zot a kapab santi zot pli byen.”​—Lourdes.

  Prensip Labib: “Sa enn ki saz i reflesi avan koze; konmsa, i kapab konvenk dimoun par son bann parol.”​—Proverb 16:23.