Ki mannyer nou kapab reste fidel ler nou lafwa i ganny teste?

1-2. Ki ti arive ler Zezi ti pe ansennyen Kapernaoum?

EN ZOUR, Zezi ti pe ansenny en group dimoun Kapernaoum. I ti dir zot: “Si zot pa manz laser Garson zonm e bwar son disan, zot pa pou ganny lavi.” I ti osi dir: “Sa ki manz mon laser e bwar mon disan pou ganny lavi eternel e mon pou resisit li dernyen zour.” (Zan 6:53, 54) En kantite son bann disip pa ti dakor avek sa ki Zezi ti’n dir. Zot ti dir: “Sa lansennyman i sokan, lekel ki kapab ekout sa?”—Zan 6:60.

² Bann ki ti’n ofanse par sa ki Zezi ti’n dir, ti aret swiv li. Eski zot ti fer sa akoz zot ti napa okenn lafwa dan Zezi? Anfet avan sa, serten, enkli bann disip Zezi ti’n sitan enpresyonnen par sa ki Zezi ti’n fer ki zot ti dir: “Li menm sa Profet ki devret vin dan lemonn.” (Zan 6:14) Alor, i kler ki sa bann disip ti annan en pe lafwa. Me ler zot lafwa ti ganny teste, zot pa ti reste fidel avek li.

3. Ki mannyer bann zapot ti reakte anver sa ki Zezi ti dir e akoz? (Vwar portre.)

³ Bann zapot pa ti reakte parey bann disip. Ler Zezi ti demann zot si zot osi zot anvi kit li, Pyer ti reponn: “Senyer, kot lekel nou pou ale? Ou annan parol lavi eternel. Nou krwar e nou konnen ki ou sa Enn ki Sen sorti kot Bondye.” (Zan 6:68, 69) Remarke ki Pyer pa ti dir ki li ek lezot zapot ti’n konpran sinifikasyon sa ki Zezi ti dir konsernan lefet ki zot bezwen manz son laser e bwar son disan. Nenport kwa ki zot ti’n konpran, zot ti swazir pour reste fidel avek Zezi. Akoz? Parski zot lafwa ti baze lo en laverite ki kler setadir, ki Zezi ti sa “Kris ki Bondye in anvoye.”—Lik 9:20, 35.

4. Kwa ki kapab teste nou fidelite anver Zeova?

⁴ I annan diferan sityasyon ki kapab teste nou fidelite anver Zeova. Par egzanp, ki mannyer nou reazir ler i annan en azisteman dan lafason ki nou konpran en verse Labib oubyen ler i annan en sanzman dan lafason ki sa travay predikasyon i ganny organize? Oubyen ki mannyer nou reazir ler nou vwar li difisil pour konpran akoz Zeova in les en keksoz arive avek nou ki fer nou soufer? Nou lafwa i kapab osi ganny reste si en zanmi pros i bles nou oubyen si en dimoun ki nou respekte i tret nou dan en fason enzis.

5. Akoz nou bezwen annan en lafwa for? Donn en legzanp. (Kolosyen 1:23)

⁵ Annou vwar en legzanp ki pou ed nou konpran akoz i enportan pour annan en lafwa for. Mazin en batiman ki’n ganny konstri dan en landrwa ki abitye annan tranblemandter. Sa batiman i bezwen annan en fondasyon for pour li pa tonbe ler i annan en tranblemandter. Dan menm fason, pour nou kapab reste fidel ler nou pas dan problenm parey bann ki’n ganny mansyonnen dan paragraf avan, nou bezwen annan en lafwa for. Si nou kontinyen fer nou lafwa vin pli for, nou pou kapab reste ferm e kontinyen servi Zeova nenport kwa ki arive.—1 Kor. 15:58; lir Kolosyen 1:23.

6. Kwa ki ti ed bann zapot pour reste fidel avek Zezi?

⁶ Kwa ki ti ed bann zapot pour reste fidel avek Zezi ler lezot ti abandonn li? Bann zapot ti asire ki Zeova ti merite ganny adore parski i Kreater tou keksoz, ki Zezi i Garson Bondye ki annan “parol lavi eternel” e ki Zezi ti annan sipor Zeova. I annan bokou sityasyon ki kapab teste nou lafwa. Olye koz lo sa bann sityasyon, annou vwar trwa laverite ki kapab ed nou reste ferm nenport problenm ki nou fer fas avek. Sa i: (1) Zeova i Kreater tou keksoz. (2) Labib in ganny enspire par Zeova. (3) Zeova pe siport son pep ozordi. Si nou vreman konvenki konsernan sa trwa laverite, nou pou reste fidel avek Zeova ler nou fer fas avek bann sityasyon ki teste nou lafwa.

ZEOVA I KREATER

7. Ki Revelasyon 4:11 i fer nou rapel me ki i kapab arive ler nou pas dan bann sityasyon ki teste nou lafwa?

⁷ Lir Revelasyon 4:11. Sa verse i fer nou rapel ki Zeova in kree tou keksoz. Sa i en rezon enportan akoz i merite ganny adore. Ler nou medit lo son pwisans ekstraordiner, nou konvenki ki i kapab ed nou dan tou sityasyon difisil. Par kont, Satan in fann mansonz partou dan lemonn pour fer dimoun annan dout konsernan si Bondye i egziste. Bann syantis i kapab menm dir ki lavi in konmanse san ki personn in kree li. Si nou pa konvenki ki Zeova i Kreater e ki i kontan nou, nou kapab konmans annan dout konsernan si i egziste e si i pou ed nou ler nou pas dan bann sityasyon ki teste nou lafwa.—Ebr. 11:6.

8-9. Ki ou devret fer si ou konmans annan dout konsernan si Zeova i Kreater? (Vwar portre.)

⁸ Si ou konmans annan dout konsernan si Zeova i Kreater, azir deswit. Fer resers dan nou bann piblikasyon pour trouv sa kantite laprev ki montre ki Zeova in kree tou keksoz. Ou kapab trouv en kantite lenformasyon lo sa size ki pou ranforsi ou lafwa dan sa brosir Was Life Created? ek The Origin of Life—Five Questions Worth Asking. Ou kapab trouv lezot levidans dan sa seri “Was It Designed?” ki lo jw.org an Angle. En zenn ser ki sorti Leta-z-ini ki apel Jessica i dir: “Apre ki mon ti’n lir sa brosir Origin of Life, mon ti asire ki levidans ti montre ki i ti annan en Personnaz entelizan ki ti’n kree tou keksoz. Mon ti deza konn sa. Me apre ki mon ti’n revwar bann lenformasyon dan sa brosir, mon ti pli asire ankor.” Osi, en kantite dimoun in ganny bann byenfe ler zot in revwar sa liv Is There a Creator Who Cares About You? Petet ou’n deza lir sa liv. Akoz ou pa relir li ankor?

⁹ Petet dan ou prosenn letid personnel ou kapab etidye bann levidans ki montre ki Bondye i egziste. Ou resers pou ed ou pli asire ki Bondye i egziste e i pou osi ed ou konn Bondye pli byen. (Rom. 1:20) Osi, ou pou kapab servi sa ki ou’n aprann pour ed lezot ki kapab annan dout konsernan si Bondye i egziste. I kler alor ki Zeova in donn nou en kantite levidans ki montre ki i nou Kreater.

Nebula: IAC/RGO/David Malin Images; fish and car: Mercedes-Benz USA; plane: Kristen Bartlett/University of Florida

LABIB IN GANNY ENSPIRE PAR ZEOVA

10. Akoz Labib i vreman enportan pour nou? (2 Timote 3:16, 17)

¹⁰ Lir 2 Timote 3:16, 17. Labib i en mesaz sorti kot Zeova pour bann imen. I donn nou larepons pour bann kestyon enportan dan lavi, i dir nou kisisa lavolonte Zeova e ki Zeova i anvi nou fer. Nou krwar ki Zeova i Loter Labib e sa i fer Labib sa liv pli enportan dan nou lavi. Nou anvi fer sir ki nou konpran son Parol e nou fer nou mye pour aplik sa ki nou lir.

11. Kwa ki konvenk ou ki Labib in ganny enspire par Bondye?

¹¹ Akoz nou konvenki ki Labib in ganny enspire par Zeova? I annan plizyer rezon. Labib i egzakt ler i koz lo bann keksoz ki’n arive dan lepase. (Lik 3:1, 2) I osi egzakt ler i koz lo bann keksoz ki annan pour fer avek lanatir. (Zob 26:7) Menm si Satan in fer tou sa ki i kapab pour li detrir Labib, Labib i sa liv ki’n ganny distribye plis ki okenn lezot liv. Bondye in enspir 40 zonm pour ekri Labib pandan en peryod letan apepre 1,600 an me sa ki zot in ekrir i an armoni avek kanmarad. Menm si Labib in ganny ekrir depi kontan, i annan bann konsey ki ankor pe ed plizyer milyon dimoun ozordi. (Prov. 13:20; 15:21; Mat. 7:12 ) Dan Labib i osi annan plizyer profesi ki’n vin vre e sa i en lot laprev akoz nou kapab annan konfyans dan Labib. (Zoz. 23:14) Alor nou asire ki Labib in ganny enspire par Bondye.

12. Ki nou devret fer si nou konmans annan dout konsernan si Labib in ganny enspire par Bondye?

¹² Ki nou devret fer si nou konmans annan dout konsernan si Labib in ganny enspire par Bondye? Nou devret priy Zeova konsernan sa e apre fer resers. Remark sa ki en frer ki apel Jordan ki ti grandi dan laverite i dir: “Mon pa krwar en keksoz zis akoz mon paran oubyen lezot dimoun i dir mwan. Mon bezwen reflesir lo la pour mwan menm. Parfwa mon pa tro asire konsernan sa ki mon tande oubyen lir me ler mon santi koumsa mon fer resers dan nou bann piblikasyon pour ganny larepons pour mon bann kestyon e retir mon bann dout.” Anmezir nou vin pli konvenki ki Labib in ganny enspire par Zeova, nou lafwa pou vin pli for.—1 Kor. 3:12, 13.

ZEOVA PE SIPORT SON PEP OZORDI

13. Ki nou devret fer si nou konmans annan dout konsernan lekel ki pep Bondye ozordi?

¹³ Si nou konmans annan dout konsernan si bann Temwen Zeova i sa pep ki Bondye pe siporte ozordi, nou devret azir deswit. Nou kapab retir nou bann dout par demann nou lekor bann kestyon parey: ‘Lekel ki pe fer zot mye pour viv zot lavi dapre bann standar Labib? Lekel ki baz zot krwayans lo sa ki Labib i dir?’ (2 Tim. 4:3, 4) ‘Lekel ki pe fer lavolonte Zeova ozordi?’—Mat. 7:20, 21.

14. Ki mannyer Temwen Zeova pe ganny servi pour akonpli sa ki ganny dir dan Matye 24:14?

¹⁴ Ler nou pe reflesir konsernan lekel ki pe fer lavolonte Bondye ozordi, nou kapab demann nou lekor: ‘Lekel ki pe fer sa travay predikasyon ki Zezi ti predir pou ganny fer dan bann dernyen zour?’ (Mat. 24:14) Larepons i kler. Bondye pe servi son pep setadir, bann Temwen Zeova pour fer sa travay predikasyon. Zis nou ki pe anons sa bonn nouvel konsernan Rwayonm Bondye dan plis ki 240 pei. I fer plis ki 100 an depi ki nou pe fer sa travay anba gidans Rwayonm Bondye. Sa travay predikasyon in toultan sa travay pli enportan pour pep Bondye.—Mat. 28:19, 20.

15. Ki mannyer Temwen Zeova i ede pour sanktifye non Bondye ozordi? (Matye 6:9; Izai 43:10)

¹⁵ Lir Matye 6:9 ek Izai 43:10. Dimoun i konn nou konman en pep ki port non Bondye e nou fyer pour ganny apele Temwen Zeova. Dan en letan kot laplipar dimoun pa konnen ki Bondye i apel Zeova, nou’n travay dir pour prodwir en Labib kot non Bondye in ganny mete dan bann landrwa kot i ti ete dan bann langaz ki Labib in ganny ekrir. Non Bondye i ganny trouve plis ki 7,000 fwa dan Labib–Tradiksyon nouvo lemonn.

16. Akoz nou kapab dir ki Temwen Zeova pe obeir sa komannman ki dan Zan 13:34, 35? (Vwar portre.)

¹⁶ Lir Zan 13:34, 35. Ozordi dimoun pa kapab tonm dakor avek kanmarad e zot ay kanmarad. Me pep Zeova pa koumsa. Zot senserman kontan kanmarad e zot ini. Nou sorti partou dan lemonn e nou annan diferan kiltir ek fason grandi me kantmenm sa nou fer nou mye pour gard lape ek lanmour. Eski ou’n deza vizit en kongregasyon dan en lot landrwa? Laprosenn fwa ki ou al dan en lot kongregasyon, reflesir lo sa lanmour ek linite ki i annan parmi nou bann frer ek ser. Ou pou vwar ki Zeova pe sirman servi son bann Temwen pour akonpli son lavolonte ozordi. Si nou gard sa antet, sa pou kapab ed nou pour reste fidel avek Zeova ler nou pas dan problenm ki teste nou lafwa.

PA ZANMEN KIT ZEOVA

17-18. Ki bann sityasyon difisil nou kapab fer fas avek me ki nou kapab dir avek konfidans?

¹⁷ Nou pe viv dan en letan ki vreman difisil alor nou pou annan problenm. (2 Tim. 3:1, 13) Petet nou pou fer fas avek bann sityasyon ki fer nou enkyet. I kapab ki lorganizasyon Bondye i fer bann desizyon ki nou pa vreman konpran. Oubyen nou kapab santi ki lezot pa konpran nou ouswa en frer oubyen en ser i kapab bles nou santiman. I kapab ki nou pa trouv en solisyon pour nou problenm deswit oubyen nou kapab pa konpran akoz en keksoz pe arive.

¹⁸ Menm si nou kapab sagren e enkyet akoz bann keksoz ki pe arive avek nou, nou kapab reste fidel avek Zeova si nou konvenki ki i Kreater, ki Labib i son Parol e ki Temwen Zeova i son pep. Zis parey Pyer ti dir Zezi, nou osi nou kapab dir Zeova: “Kot lekel nou pou ale? Ou annan parol lavi eternel.”