“Annou touzour demontre rekonesans”
1 Kan Zezi ti geri dis lepre, zis enn parmi zot ki ti retournen pour remersi li. Zezi ti demande: “Eski tou le dis pa’n geri? Oli lezot nef?” (Lik 17:11-19) I vreman enportan pour nou demontre lapresyasyon ek rekonesans pour tou don ekselan ek kado parfe ki nou Papa dan lesyel, Zeova in donn nou parski i zenere e i kontan nou.—Kol. 3:15; Zak. 1:17.
2 Ki serten keksoz ki devret pous nou pour demontre rekonesans? Nou rekonesan pour sakrifis Zezi, sa pli gro kado ki Bondye in donn limanite. (Zan 3:16) Nou osi rekonesan anver Zeova parski in atir nou kot li. (Zan 6:44) En lot rezon ki nou annan pour demontre rekonesans se pour sa linite ki egziste parmi nou lasosyasyon frer ek ser dan lemonn antye. (Ps. 133:1-3) San dout ou kapab mazin bokou lezot kado ki Zeova in donn nou. Nou pa zanmen anvi mank rekonesans parey sa bann Izraelit ki ti oubliy tou sa ki Zeova ti’n fer pour zot.—Ps. 106:12, 13.
3 Demontre rekonesans: Menm si tou le dis lepre ti apresye sa ki Zezi ti’n fer pour zot, zis enn ki ti demontre rekonesans. (Lik 17:15) Dan sa menm fason nou demontre rekonnesans kan nou partisip avek devouman dan nou minister. Si nou vreman rekonesan pour tou sa ki nou Papa dan lesyel ki kontan nou in fer pour nou, nou leker pou pous nou pour imit son lanmour ek son zenerozite par koz avek lezot lo li. (Lik 6:45) Kan nou koz avek lezot lo Zeova ek ‘son bann travay merveye e son bann panse anver nou,’ an retour nou lanmour ek lapresyasyon pour Zeova pou vin pli for.—Ps. 40:5.
4 Motiv lezot pour demontre lapresyasyon: Nou bezwen rod bann fason pour ed nou zanfan ek bann etidyan Labib pour devlop lapresyasyon. Paran i ganny bokou loportinite pour fer sa, par egzanp ler zot koz lo bann keksoz ki Zeova in kree avek zot zanfan. (Rom. 1:20) Kan nou pe kondwir en letid Labib nou kapab demann nou etidyan: “Ki sa i dir nou konsernan personnalite Zeova?” An mezir ki sa etidyan i devlop lapresyasyon, son lanmour ek son determinasyon pour fer Bondye plezir pou osi vin pli for.
5 Dan sa bann dernyen zour bokou dimoun i mank lapresyasyon ek rekonesans. (2 Tim. 3:1, 2) I vreman fer Zeova plezir pour vwar son bann serviter demontre rekonesans par partisip avek devouman dan minister.—Zak 1:22-25.