37 DANYEL
I pa ti “vin enpir”
DANYEL ti lwen avek son lakour. Bann Babilonnyen ti’n vin Zida e pran son fanmir ek lezot fanmir e anmenn zot Babilonn. I kapab ki zot ti pran apepre kat mwan pour zot ariv laba. Parmi sa bann dimoun ki ti’n ganny anmennen an egzil, Danyel ek lezot zenn ti ganny separe avek zot fanmir e zot ti ganny anmennen dan lavil prensipal. Danyel ti vin zanmi avek trwa lezot Ebre: Ananya, Misael ek Azarya. Apre sa, bann zenn ti konpran ki bann Babilonnyen ti anvi ki zot vin parey zot.
Lwen avek son lakour ek fanmir, Danyel ti fer fas avek en kantite presyon me i ti reste fidel avek Zeova
Pour konmanse, Neboukadnezar, lerwa Babilonn ti demann son sef zofisye lakour rwayal Aspenaz pour sanz zot non. En kantite non Ebre ti loue sa vre Bondye. Par egzanp sa non “Danyel” i vedir “Bondye i mon ziz.” Me non bann Babilonnyen ti loue bann bondye sa pei. Alor Danyel ti ganny donnen sa non Babilonnyen, Beltesazar, ki aparaman ti form parti en lapriyer kot zot ti demann sa fo bondye Bel pour protez lavi lerwa. Lerwa ti osi anvi fer sa bann zenn garson konmans reflesir e azir parey bann Babilonnyen. I ti donn lord son bann serviter pour montre sa bann zenn pour koz e ekri sa langaz Kaldeen pour ki zot kapab servi li dan son pale rwayal. Sa ti zis konmansman.
Lerwa ti apwent Aspenaz pour diriz formasyon sa bann zenn prizonnyen. Zot ti pou manz bann bon manze lerwa, bann pli bon manze e bwar son pli bon diven. Petet serten zenn ti santi zot onore akoz zot ti pe ganny trete dan en fason spesyal. Me Danyel ti vwar sa bann privilez konman en danze pour li ek son trwa zanmi Ebre. Me kwa ki ti pe trakas li?
Petet Danyel ti pe mazin koumsa: ‘Sa bann dimoun ki’n pran nou konman prizonnyen i konnen ki nou pa manz serten manze akoz Lalwa Zeova. Eski zot pou sey fer nou dezobeir Zeova par donn nou bann manze ki Bondye in dir i enpir? Si zot donn nou lavyann, eski zot pou fer sir ki sa lavyann in byen sennyen oubyen eski zot pou esey anbet nou pour ki nou kas lalwa Zeova konsernan manz disan? Oubyen si nou manz sa manze, eski sa pou ganny konsidere konman ladorasyon en fo bondye? Si zot donn nou en kantite diven pour bwar, eski sa pou fer li difisil pour nou gard nou bon sans?’a
Sirman Danyel ti priy en kantite e koz avek son trwa zanmi. I ti “determinen dan son leker” pour fer sa ki ti pou fer plezir Zeova. Apre sa, i ti al koz avek Aspenaz. Avek bon zizman, Danyel ti demande ki li ek son bann zanmi pa manz sa manze ki ti kapab fer zot vin enpir. Zeova ti avek Danyel e I ti fer sef zofisye lakour rwayal demontre labonte anver Danyel. Me sa sef zofisye ti trakase an ka zot lasante i ganny afekte vi ki zot pa ti pe manz sa ki zot ti pe ganny donnen. I ti konnen ki i ti pou bezwen rann kont avek Neboukadnezar. Alor, Danyel pa ti argimante. Me pli tar, avek kouraz, Danyel ti koz avek sa dimoun ki Aspenaz ti’n met ansarz sa bann garson: I ti demande pour les zot manz zis legim e bwar zis delo pandan dis zour e apre sa, pour konpar zot kat avek lezot zenn. Sa zonm ki ti ansarz zot ti dakor pour fer en lesey!
Dis zour pli tar, i ti evidan ki sa kat zenn ti paret pli byen ki tou lezot zenn! Anfet sa lesey ti pas telman byen ki depi sa, zot ti ganny permisyon pour manz zis legim. I kler ki Zeova ti beni lafwa ek kouraz Danyel ek son bann zanmi. Sa ti en leson ki zot pa ti zanmen oubliye!
Parey nou pou vwar dan sa sapit ki swiv, sa trwa zanmi Danyel ti fer fas avek en sityasyon ki ti vreman fer per e zot ti bezwen demontre kouraz. Danyel li, i ti viv ziska laz 100 an e li osi son kouraz ti ganny teste. I ti bezwen enterpret bann rev ki Zeova ti fer Neboukadnezar gannyen, menm si sa bann rev ti pe predir bann move keksoz ki ti pou arive avek sa lerwa ki ti fyer ek son rwayonm. Plizyer deseni pli tar, Danyel ti enterpret en lekritir ki Bondye ti’n ekrir lo en miray, menm si sa mesaz ti kondann Belsazar, sa lerwa ki ti pe dirize sa letan. Osi, ler Danyel ti vreman aze, i ti ganny zete dan en trou ki ti ranpli avek bann lyon ki ti lafen. Dan sak sa bann sityasyon, i ti demontre sanmenm kouraz ki i ti annan ler i ti zenn. I pa drol alor ki enn bann lanz Zeova ti dir Danyel ki i ti “en zonm vreman presye”!
Lir sa resi dan Labib
Pour diskit lo la:
Ki mannyer Danyel ti demontre kouraz?
Al pli o profon
1. Eski Danyel 1:1 i kontredir Zeremi 25:1? (dp-E 18-19 ¶14-15)
2. Ki mannyer en lekritir lo en ros ki’n ganny trouve Babilonn i konfirm legzistans “lasanm trezor bondye [Neboukadnezar]”? (Dan. 1:2; it-E “Treasury” ¶3) A
© The Trustees of the British Museum. Licensed under CC BY-NC-SA 4.0. Source. Modifications: Box added
Portre A: En lekritir kot Neboukadnezar pe koz lo “lasanm trezor” dan tanp Merodak
3. Ki “bann pret mazisyen” ti fer? (Dan. 1:20; it-E “Magic and Sorcery” ¶2-6) B
Portre B: En plak Babilonnyen ki pe eksplike ki mannyer pour “geri” en dimoun ki zot ti krwar i ti’n ganny atake avek en fantonm
4. Petet ki kalite legim Danyel ek son trwa zanmi ti manze? (Dan. 1:12; dp-E 40 ¶25)
Reflesir lo sa bann leson
Ki bann zenn i kapab aprann avek Danyel konsernan reste fidel avek Zeova, menm ler zot pa avek zot fanmir?
Vi ki Danyel ti “determinen dan son leker” pour obeir Zeova davans, ki mannyer sa ti ed li pour demontre kouraz? (Dan. 1:8) Ki mannyer nou kapab imit Ii? C
Portre C
Ki lezot fason ou kapab imit kouraz Danyel dan ou lavi?
Reflesir lo Zeova ek son plan
Ki sa resi Labib i ansenny mwan lo Zeova?
Ki mannyer sa resi i relye avek plan Zeova?
Ki mon ti pou kontan demann Danyel ler i resisite?
Aprann plis
Get sa video ki montre sa ki ti arive dan sa resi Labib.
Danyel: I ti demontre lafwa tou son lavi—Parti 1—Ekstre (13:07)
Ki mannyer bann zenn ozordi i kapab imit kouraz ek fidelite Danyel?