I ti ed lepep pour retourn kot Zeova

ZOSYA ti annan zis si-z-an ler son granpapa Lerwa Manase ti mor. I tre probab ki Zosya ti konnen ki son granpapa ti’n fer en kantite sanzman e konmans servi Zeova. I posib ki Zosya pa ti zanmen bliy sa bann sanzman ki i ti fer. Me son papa Amonn ki ti vin lerwa apre sa. Amonn ti en move dimoun e i ti ankouraz lepep pour rekonmans ador zidol e fer en kantite move keksoz. I ti dirize pandan de-z-an e apre sa i ti mor. Zosya ti vin lerwa a laz wit-an.

I tre probab ki profet Zefanya, Zeremi, Oulda ek Granpret Ilkiya ti annan en bon lenfliyans lo Zosya anmezir i ti grandir. Labib i dir sa lo Zosya: “Ler i ti ankor en zenn garson, [apepre 16 an] i ti konmans rod Bondye David son zanset.” Ler i ti apepre 20 an, i ti fer bann gran sanzman Zida. Zeova ti servi sa zenn lerwa ki ti annan kouraz ek lafors pour ed lepep pour aret ador bann zidol e aret fer bann move keksoz.

Zosya ti menm al dan sa pei dan nor kot sa dis tribi rwayonm Izrael ti reste avan sa. Laplipar Izraelit ki ti reste la ti’n fini ganny anmennen an egzil e aprezan dan sa pei i ti annan plis etranze. Me kantmenm sa, Zosya ti detrir tou bann landrwa kot i ti annan zidol.

Detrwa lannen pli tar, Zosya ti ganny en benediksyon ki i pa ti pe ekspekte. Ler bann travay reparasyon ti pe ganny fer lo tanp sakre Zeova, Granpret Ilkiya ti dekouver en keksoz: en roulo ki ti annan Lalwa ki Zeova ti donn Moiz. I ti en vye roulo ki posibleman ti’n ganny ekrir par Moiz li menm! Sa roulo ti ganny anmennen kot Zosya e i ti ekout atantivman ler i ti pe ganny lir avek li aotvwa. Sa ki i ti tande ti fer son leker fermal! Aprezan, i ti konpran pli byen ki mannyer lepep ti’n vreman elwannyen avek Lalwa Bondye. Zosya ti realize ki Zeova ti vreman ankoler avek Son pep. Eski Zosya ti pou annan kouraz pour azir dapre sa ki i ti’n tande?

Deswit, Zosya ti anvoy en delegasyon senk zonm pour rod pwennvi Zeova. Sa bann zonm ti al kot Oulda, en madanm profet, ki ti dir zot ki Zeova ti vreman ankoler avek pep Zida ki ti’n rebel kont li pandan tou sa letan. Zida ek Zerizalenm ti pou ganny detrir. Me Zeova ti’n vwar bon leker Zosya ek son kouraz pour fer sanzman, alor, sa bann zizman pa ti pou ariv pandan sa letan ki lerwa ti ankor vivan.

Kantmenm sa, Zosya ti fer tou sa ki i kapab pour ed lepep retourn kot Zeova. Zosya ek son pep ti fer en lalyans an piblik pour swiv tou sa ki dan Lalwa Bondye. Apre sa, i ti konmans en kanpanny pour detrir tou bann zidol e anpes dimoun ador zidol. Pour promot vre ladorasyon, lerwa ti organiz en gran lafet Lapak. Zosya ek son bann prens ti kontribye en kantite zannimo ki ti pou ganny ofer konman sakrifis pour Zeova. Bann santer ti osi loue Zeova avek bann kantik sakre. Sa lafet ti enn parmi bann pli gran lafet Lapak ki pep Bondye ti’n deza organize.

Zosya ti kontinyen demontre en kantite kouraz ek lafwa anmezir i ti lager kont fo ladorasyon. Dan en landrwa, i ti akonplir en profesi ki ti’n ganny predir 300 an avan sa, ki i ti pou bril lezo lo lotel bann payen e detrir sa lotel akoz fo ladorasyon. (1 Rwa. 13:2) Dan pei Zida, Zosya ti menm detrir bann landrwa fo ladorasyon ki ti egziste depi lepok Lerwa Salomon, ler i ti abandonn Zeova. Malerezman, pli tar Zosya ti fer en move desizyon. I ti al lager avek Neko en Faraon Ezipsyen. Atraver Neko, Zeova ti averti Zosya pour pa al lager. Me i paret ki Zosya pa ti rod konsey avek bann profet Zeova pour gete si Zeova ti’n vreman servi Neko pour averti li. Zosya pa ti ekoute e i ti zis al lager! I kapab paret ki Zosya ti annan kouraz pour al lager kont Neko ek son larme, me an realite i ti enpridan e bet. Sa desizyon ti kout li son lavi ler i ti annan selman 39 an.

Eski Zeova ti bliy tou bann bon keksoz ki Zosya ti’n fer? Pa ditou! Profet Zeremi ti sant en kantik dey pour sa lerwa. I paret ki pour plizyer zenerasyon, pep Bondye ti sant sa kantik tris. Petet en zour, Zosya pou lir son listwar ler i ti lerwa ek bann kantik dey ki ti ganny sante pour li. I kler ki Zeova ti kontan Zosya e i pa’n zanmen bliy son lafwa ek kouraz.

Lir sa resi dan Labib:

• 2 Lerwa 22:1–23:30

• 2 Kronik 33:21–35:27

Pour diskit lo la:

Ki mannyer Zosya ti demontre kouraz?

StockStudio/Alamy Stock Photo

1. 4. Oulda ti predir ki Zosya ti pou ganny “antere anpe.” Vi ki Zosya ti mor dan lager, ki mannyer sa profesi ti ganny akonplir? (2 Rwa. 22:20; w00-E 15/9 30 ¶2-3)

   Ou larepons

Reflesir lo sa bann leson

• Serten Kretyen in ganny en move lanfans. Ki leson zot kapab aprann avek Zosya ki son papa ti’n vin en aposta?

  Ou larepons

• Zosya ti fer zefor pour konpran Labib. (2 Kron. 34:21) Ki mannyer nou kapab imit li? B

  Ou larepons

  

• Ki lezot fason ki ou kapab imit kouraz Zosya?

  Ou larepons

Reflesir lo Zeova ek son plan

• Ki sa resi i ansenny mwan lo Zeova?

  Ou larepons

• Ki mannyer sa resi i relye avek plan Zeova?

  Ou larepons

• Ki mon ti pou kontan demann Zosya ler i resisite?

  Ou larepons

Aprann plis

Gete ki ou kapab aprann avek desizyon Zosya ek de lezot zenn ki ti vin lerwa Zida.

“Zenn, ki ou anvi fer avek ou lavi?” (w23.09 8-13)

Eski Zosya ti detrir bann zidol dan pei avek son prop lafors? Vwar larepons dan sa video.

Zistwar Zosya: Kontan Zeova e deteste sa ki mal—Dezyenm parti—Ekstre (3:43)