Paradi i pros!

Bann move keksoz ki pe arive lo later konmela i montre ki Paradi i pros. Labib ti dir ki nou ti pou war bann peryod terib zis avan ki Paradi i vini. Nou pe viv dan sa peryod la konmela! Vwala serten keksoz ki Labib i dir ti pou arive:

Bann gran lager. “Nasyon pou lager kont nasyon, rwayonm kont rwayonm.” (Matye 24:7) Sa profesi in vin vre. Depi 1914, i’n annan de lager mondyal ek bokou lezot pli pti lager. Plizyer milyon dimoun in mor dan sa bann lager.

Maladi partou. “Dan plizyer landrwa pou annan . . . lepidemi.” (Lik 21:11) Eski sa in vin vre? Wi. Kanser, malad leker, tiberkiloz, malarya, SIDA, ek lezot maladi in touy plizyer milyon dimoun.

En mankman manze. Partou lo later i annan dimoun ki napa ase nouritir pour manze. Plizyer milyon dimoun i mor lafen tou le-z-an. Sa i lot siny ki Paradi pou byento la. “Pou annan lafamin,” Labib i dir.—Mark 13:8.

Tranbleman-d-ter. “Pou annan . . . tranblemandeter dan plizyer landrwa.” (Matye 24:7) Sa osi in vin vre dan nou letan. Depi 1914, plis ki en milyon dimoun in mor dan bann tranbleman-d-ter.

Dimoun mesan. Dimoun pou “kontan larzan” e “pou vin egois.” Zot pou “kontan plezir plis ki Bondye.” Bann zanfan pou vin “dezobeisan anver zot paran.” (2 Timote 3:1-5) Eski ou pa dakor ki i annan plizyer dimoun ki koumsa ozordi? Zot napa respe pour Bondye e zot kree problenm pour bann ki esey aprann konn Bondye.

Krim. Pou osi annan en “ogmantasyon bann aksyon ilegal.” (Matye 24:12, NW) Probableman ou pou dakor ki krim i pli pir ki i ti ete oparavan. Dimoun partou i dan risk ganny vole, tronpe, oubyen blese.

Tou sa bann keksoz i montre ki Rwayonm Bondye i pros. Labib i dir: “Kan zot war tou sa bann keksoz pe arive, konnen ki Rwayonm Bondye i pros.” (Lik 21:31) Kisisa Rwayonm Bondye? I gouvernman Bondye dan lesyel, ki pou anmenn Paradi lo sa later. Rwayonm Bondye pou ranplas bann gouvernman imen.—Danyel 2:44.