SAPIT 3

Ki Sennla Vre Bondye?

1. Akoz bokou dimoun i dakor avek premye parol dan Labib?

LER ou get lesyel pandan en lannwit kler, eski ou pa sirprann pour vwar sitan en kantite zetwal? Konman ou eksplik zot legzistans? E ki ou panse lo bann keksoz vivan lo later—bann fler kolore, bann zwazo avek zot bann zoli sanson, bann balenn pwisan ki plonze dan losean? Lalis i kontinyen. Tousala pa’n kapab vin la par azar. I pa etonnan ki bokou dimoun i dakor avek premye parol Labib: “Okonmansman Bondye ti kree bann lesyel ek later”!—Zenez 1:1.

2. Ki Labib i dir konsernan Bondye, e ki i ankouraz nou pour fer?

² Limanite i vreman divize lo kestyon Bondye. Serten i panse ki Bondye i en lafors me pa en personn. Plizyer milyon dimoun i ador zot zanset ki’n mor, akoz zot krwar ki Bondye i tro lwen pour kapab apros li. Me Labib i revele ki vre Bondye i en personn reel ki vreman enterese avek nou endividyelman. Se pour sa rezon ki i ankouraz nou pour “rod li,” an dizan: “I pa lwen avek sakenn parmi nou.”—Akt 17:27.

3. Akoz ki i enposib pour fer en zimaz Bondye?

³ Ki laparans Bondye i annan? Detrwa son bann serviter in vwar bann vizyon son prezans glorye. Dan sa bann vizyon, i’n prezant li menm dan en fason senbolik, konman enn ki pe asiz lo en tronn, avek en laklerte enpresyonan ki reyonnen toultour li. Sepandan, bann ki ti ganny bann tel vizyon pa’n zanmen dekrir en vizaz partikilye. (Danyel 7:9, 10; Revelasyon 4:2, 3) Sa i akoz “Bondye i [en, NW] Lespri”; i napa en lekor fizik. (Zan 4:24) An realite, i enposib pour fer en zimaz fizik egzakt nou Kreater, akoz “personn pa’n deza war Bondye.” (Zan 1:18; Egzod 33:20) Toutfwa, Labib i ansenny nou bokou keksoz lo Bondye.

VRE BONDYE I ANNAN EN NON

4. Nonm detrwa tit ki aplikab pour Bondye dan Labib?

⁴ Dan Labib, vre Bondye i ganny idantifye par bann lekspresyon tel ki “Bondye Tou Pwisan,” “Tre O,” “Gran Kreater,” “Gran Ansenyan,” “Met,” ek “Lerwa eternel.” (Zenez 17:1; Psonm 50:14; Eklezyast 12:1; Izai 30:20; Akt 4:24; 1 Timote 1:17) Kan nou medit lo sa bann tit, i kapab ed nou pour grandi dan konnesans Bondye.

5. Lekel non Bondye, e konbyen fwa i aparet dan Lekritir Ebre?

⁵ Sepandan, Bondye i annan en non inik ki aparet plis ki 7,000 fwa zis dan Lekritir Ebre—pli souvan ki okenn son bann tit. Anviron 1,900 an pase, bann Zwif ti aret pronons sa non divin pour rezon siperstisyon. Lalang Ebre dan Labib ti ganny ekrir san servi vwayel. Se pour sa rezon ki i difisil pour presize konman ki Moiz, David, oubyen lezot dan letan pase ti pronons sa kat konsonn (יהוה) ki konpoz non divin. Serten spesyalis Labib i sizere ki non Bondye ti petet ganny prononse “Yahweh,” me zot pa asire. Prononsyasyon Angle “Jehovah” (Zeova an Kreol) in ganny rekonnet depi byen lontan, e i ankor pe ganny servi ozordi dan diferan langaz.—Vwar Egzod 3:6 e Izai 26:4 dan King James Version.

AKOZ OU DEVRET SERVI NON BONDYE

6. Ki Psonm 83:18 i dir lo Bondye, e akoz ki nou devret servi son non?

⁶ Non inik Bondye, Zeova, i permet pour disteng li avek tou lezot bondye. Se pour sa rezon ki i aparet si souvan dan Labib, sirtou dan teks Ebre. Plizyer tradikter pa’n servi sa non divin, pourtan Psonm 83:18 i dir klerman: “Ou, ki ou non i Zeova, se ou tousel ki Tre O lo tou later.” Alors i toutafe normal pour servi non personnel Bondye ler nou koz lo li.

7. Ki sinifikasyon non Zeova i ansenny nou lo li?

⁷ Non Zeova i en form en verb Ebre ki vedir “devenir.” Alors, non Bondye i vedir “I Fer Arive.” Atraver sa non, Zeova i prezant li konman en Bondye ki annan en Gran Plan. I touzour fer ki son bann plan i arive vin realite. Zis vre Bondye ki annan tou drwa pour port sa non, akoz imen pa zanmen kapab asire ki zot plan pou realize. (Zak 4:13, 14) Zis Zeova ki kapab dir: “Demenm mon parol ki sorti dan mon labous pou vin vre. . . . I pou annan en sikse serten dan sa ki mon’n anvoy li.”—Izai 55:11.

8. Ki plan ki Zeova ti anonse atraver Moiz?

⁸ Bann patriars Ebre—Abraam, Izaak, ek Zakob—ti sakenn “apel lo non Zeova,” me zot pa ti antyerman konn sinifikasyon sa non divin. (Zenez 21:33; 26:25; 32:9; Egzod 6:3) Plitar, ler Zeova ti revel son plan pour delivre zot desandans, bann Izraelit, dan lesklavaz an Lezip e pour donn zot “en pei kot i koul dile ek dimyel,” sa ti sanble petet enposib. (Egzod 3:17) Sepandan, Bondye ti fer resortir sinifikasyon eternel son non an dizan avek son profet Moiz: “Vwala sa ki ou pou dir avek bann garson Izrael, ‘Zeova Bondye zot zanset, Bondye Abraam, Bondye Izaak e Bondye Zakob, in anvoy mwan ver zot.’ Sa i mon non pour letan endefini, e sa i mon memoryal pour zenerasyon apre zenerasyon.”—Egzod 3:15.

9. Konman Faraon ti konsider Zeova?

⁹ Moiz ti demann Faraon, lerwa Lezip, pour les bann Izraelit al ador Zeova dan dezer. Me Faraon li menm, ki ti ganny regarde konman en bondye, e ki ti osi ador lezot bondye Ezipsyen, ti reponn, “Lekel li Zeova, ki mon bezwen obeir son lavwa e ranvoy Izrael? Mon pa konn ditou Zeova, e deplis, mon pa pou ranvoy Izrael.”—Egzod 5:1, 2.

10. Dan ansyen Lezip, ki aksyon Zeova ti pran pour akonpli son plan konsernan bann Izraelit?

¹⁰ Zeova ti alor konmans pran aksyon progresif pour akonpli son plan, an azisan an armoni avek sinifikasyon son non. I ti anvoy dis ple lo bann Ezipsyen. Dernyen ple ti touy tou bann premye ne Lezip, menm garson Faraon. Bann Ezipsyen ti enpasyan pour vwar pep Izrael ale. Toutfwa, serten Ezipsyen ti telman enpresyonnen par pwisans Zeova ki zot ti kit Lezip ansanm avek bann Izraelit.—Egzod 12:35-38.

11. Ki mirak Zeova ti akonpli kot Lanmer Rouz, e ki son bann lennmi ti oblize rekonnet?

¹¹ Faraon ti ensiste, i ti sorti avek son larme ek plizyer santenn saret lager pour al rekaptir son bann lesklav. Letan ki bann Ezipsyen ti pe aprose, Bondye ti mirakilezman ouver Lanmer Rouz pour ki bann Izraelit ti kapab travers lo later sek. Ler bann Ezipsyen ki ti pe pourswiv bann Izraelit e ti antre omilye Lanmer Rouz, Zeova “ti kontinyelman tir larou zot saret, ki fer ki zot ti pe kondwir zot [saret] avek difikilte.” Bann gerye Ezipsyen ti kriye: “Annou sove e pa annan okenn kontak avek Izrael, akoz Zeova i sertennman konbat pour zot kont bann Ezipsyen.” Me ti tro tar. Bann miray delo imans ti kraze e “ti kouver bann saret lager ek bann kavalye ki ti apartenir pour tou lafors militer Faraon.” (Egzod 14:22-25, 28) Ensi, Zeova ti fer en gran non pour li menm, e sa levennman pa’n ganny oubliye ziska ozordi.—Zozye 2:9-11.

12, 13. (a) Ki sinifikasyon non Bondye i annan pour nou konmela? (b) Ki bann dimoun i bezwen aprann, e akoz?

¹² Non ki Bondye in fer pour li menm, i annan en gran sinifikasyon pour nou ozordi. Son non, Zeova, i la konman en garanti ki tou sa ki i’n planifye i pou realize. Sa i osi enplik akonpli son plan orizinal pour fer later vin en paradi. (Zenez 1:28; 2:8) Pour realiz sa, Bondye pou elimin tou bann ki opoz son dominasyon konmela, akoz i’n deklare: “Zot pou bezwen konnen ki mwan mon Zeova.” (Ezekyel 38:23) Bondye pou alor akonpli son promes pour delivre son bann adorater e anmenn zot dan en nouvo monn zis.—2 Pyer 3:13.

¹³ Tou sa ki anvi ganny faver Bondye i bezwen aprann apel lo son non avek lafwa. Labib i promet: “Tou sa ki envok non Senyer [Zeova, NW] pou ganny sove.” (Romen 10:13) Wi, non Zeova i annan en sinifikasyon tre enportan. Envok Zeova konman ou Bondye e Liberater i kapab anmenn ou ver boner eternel.

BANN KALITE VRE BONDYE

14. Lekel bann kalite debaz Bondye ki Labib i met an evidans?

¹⁴ En letid lo delivrans Izrael an Lezip, i met an evidans kat kalite debaz ki Bondye i posede avek en lekilib parfe. Son mannyer azir avek Faraon i revel son pwisans enpresyonan. (Egzod 9:16) Fason ekstraordiner ki Bondye ti tret sa sitiasyon konplike, i demontre son sazes enkonparab. (Romen 11:33) I ti manifeste son lazistis kan i ti pini bann ki ti persiste pour opoz e oprim son pep. (Deterononm 32:4) En kalite dominan Bondye se lanmour. Zeova ti demontre son lanmour remarkab an realizan son promes konsernan bann desandans Abraam. (Deterononm 7:8) I ti osi demontre son lanmour kan i ti permet serten Ezipsyen pour abandonn bann fo bondye e resevwar bokou byenfe an prenan pozisyon pour sa sel vre Bondye.

15, 16. Ki mannyer Bondye i demontre son lanmour?

¹⁵ Kan ou lir Labib, ou pou remarke ki lanmour i kalite prensipal Bondye, e i manifeste li dan bokou fason. Par egzanp, se par lanmour ki i ti vin en Kreater e konmans partaz sa lazwa viv avek bann kreatir spirityel. Sa santenn milyon lanz i kontan Bondye e donn li louanz. (Zob 38:4, 7; Danyel 7:10) Bondye in osi manifeste lanmour kan i ti kree later e prepar li pour bann imen viv ere lo la.—Zenez 1:1, 26-28; Psonm 115:16.

¹⁶ Bann benefis ki lanmour Bondye i aport nou i tro bokou pour mansyonnen. Zis pour pran en legzanp, avek lanmour Bondye in fer nou lekor dan en fason merveye ki nou kapab rezwir lavi. (Psonm 139:14) I osi montre nou son lanmour ler i donn nou ‘son lapli sorti dan lesyel, ek bann rekolt, sakenn son sezon. I’n donn nou manze e i’n ranpli nou leker avek lazwa.’ (Akt 14:17) Bondye i menm “fer leve son soley lo bann ki move parey lo bann ki bon, e i fer tonbe lapli lo bann ki fer dibyen parey lo bann ki fer dimal.” (Matye 5:45) Lanmour i osi pous nou Kreater pour ed nou konn li pli byen e servi li dan lazwa konman son bann adorater. Vreman, “Bondye i lanmour.” (1 Zan 4:8) Me son personnalite i annan ankor bokou plis laspe.

“EN BONDYE MIZERIKORD E KONPASYON”

17. Ki nou aprann lo Bondye dan Egzod 34:6, 7?

¹⁷ Apre ki zot ti travers Lanmer Rouz, bann Izraelit ti bezwen aprann konn Bondye pli byen ankor. Moiz ti santi sa nesesite, e i ti priye: “Silvouple, si mon’n trouv faver dan ou lizye, fer mwan konn ou bann semen, silvouple, pour ki mon ava konn ou, afen ki mon kapab trouv faver dan ou lizye.” (Egzod 33:13) Moiz ti arive konn Bondye pli byen ler i ti antann Bondye li menm dir: “Zeova, Zeova, en Bondye mizerikord e konpasyon, pa ankoler vitman, ris an bonte leker e an-verite, prezerv bonte leker pour plizyer milye, pardonn fot ek transgresyon ek pese, me dan okenn ka i pa pou akord gras pour pinisyon.” (Egzod 34:6, 7) Bondye i balans son lanmour avek lazistis, setadir i pa protez bann ki pese volonterman kont konsekans zot move aksyon.

18. Konman Zeova in montre li mizerikord?

¹⁸ Parey Moiz ti aprann, Zeova i demontre mizerikord. En dimoun mizerikord i annan pitye pour bann ki pe soufer e i esey anmenn en soulazman pour zot. Pareyman, Bondye in montre konpasyon pour limanite an fezan en provizyon pour liber nou definitivman dan soufrans, maladi ek lanmor. (Revelasyon 21:3-5) Bann adorater Bondye i kapab sibir maler akoz bann kondisyon ki rennyen dan sa monn mesan, oubyen zot kapab mal azir e par laswit rankontre serten difikilte. Me si zot imilye zot e tourn ver Zeova pour led, i pou rekonfort e soutenir zot. Akoz? Parske son mizerikord i pous li pour tandreman pret latansyon avek son bann adorater.—Psonm 86:15; 1 Pyer 5:6, 7.

19. Akoz nou kapab dir ki Bondye i konpasyon?

¹⁹ Souvan, bokou ki annan lotorite i maltret lezot. An kontras, Zeova i vreman montre konpasyon anver son bann serviter ki annan limilite! Menm si se li lotorite pli o dan liniver, dan en fason zeneral, i demontre en bonte remarkab anver tou limanite. (Psonm 8:3, 4; Lik 6:35) Zeova i osi montre konpasyon anver bann endividi, i reponn zot siplikasyon pour ganny son faver. (Egzod 22:26, 27; Lik 18:13, 14) Byensir, Bondye pa oblize demontre faver oubyen konpasyon pour personn. (Egzod 33:19) Alors, nou bezwen montre en profon rekonesans anver Bondye pour son mizerikord ek son konpasyon.—Psonm 145:1, 8.

PA ANKOLER VITMAN, ENPARSYAL E ZIS

20. Kwa ki montre ki Zeova pa ankoler vitman e i pa fer lapreferans?

²⁰ Zeova pa ankoler vitman. Me sa pa vedir ki i pa azir, se sa ki i ti fer kan i ti detrir Faraon ek son larme dan Lanmer Rouz. Zeova pa fer lapreferans. Par egzanp, son pep swazir, bann Izraelit, ti finalman perdi son faver akoz zot ti kontinyelman pratik lemal. Bondye i aksepte konman son bann adorater, dimoun sorti dan tou nasyon me akondisyon ki zot konform zot avek son bann prensip zis.—Akt 10:34, 35.

21. (a) Ki Revelasyon 15:2-4 i ansenny nou lo Bondye? (b) Kwa ki pou fer li pli fasil pour nou fer sa ki Bondye i dir i byen?

²¹ Liv Revelasyon dan Labib i souliny lenportans pour aprann bann ‘lalwa zis Bondye.’ I dir nou ki bann kreatir dan lesyel i sante: “Senyer Bondye Toupisan! Ou travay i gran e merveye. Lerwa bann nasyon! Tou ou bann plan i zis e vre. Senyer, lekel ki pa pou respekte ou? Lekel ki pou refize rann ou glwar? Zis ou tousel ki sen. Tou nasyon pou vin ador ou, akoz ou zizman in ganny revele.” (Revelasyon 15:2-4) Nou manifeste en respe pour Zeova ler nou konform nou avek sa ki li i dir i byen. I pou pli fasil si nou mazin sazes ek lanmour ki Bondye i annan. Tou son bann komannman i pour nou prop byen.—Izai 48:17, 18.

“ZEOVA NOU BONDYE I EN SEL”

22. Akoz ki sa bann ki aksepte Labib pa ador en Trinite?

²² Bann Ezipsyen dan lantikite ti ador plizyer bondye, me Zeova i “en Bondye ki egziz en latasman eksklizif.” (Egzod 20:5) Moiz ti rapel bann Izraelit ki “Zeova nou Bondye i en sel Zeova.” (Deterononm 6:4) Zezi Kri ti repet sa bann parol. (Mark 12:28, 29) Alors, bann ki aksepte Labib konman Parol Bondye pa ador en Trinite ki konpri trwa personn oubyen plizyer bondye dan enn. Annefe, sa mo “Trinite” pa ni menm aparet dan Labib. Vre Bondye i en sel Personn, separe avek Zezi Kri. (Zan 14:28; 1 Korentyen 15:28) Lespri sen Bondye pa en personn. I lafors aktif Zeova, ki Tou Pwisan i servi pour akonpli son plan.—Zenez 1:2; Akt 2:1-4, 32, 33; 2 Pyer 1:20, 21.

23. (a) Konman ou lanmour pour Bondye pou grandi? (b) Ki Zezi ti dir konsernan lanmour pour Bondye, e ki nou bezwen aprann lo Kris?

²³ Ler ou realize ki Zeova i en Bondye sitan merveye, eski ou pa dakor ki i merite ganny ou ladorasyon? An etidyan son Parol, Labib, ou pou arive konn li pli byen e ou pou aprann sa ki i ekspekte ou fer pour ou byennet ek boner eternel. (Matye 5:3, 6) Deplis, ou lanmour pour Bondye pou grandi. Sa i toutafe normal, akoz Zezi ti dir ki ou bezwen “kontan Senyer Bondye avek tou ou leker, tou ou lam, tou ou lespri e avek tou ou lafors.” (Mark 12:30) I evidan ki Zezi ti annan en tel lanmour pour Bondye. Me ki Labib i revele lo Zezi Kri? Ki rol i annan dan plan Zeova?

TESTE OU KONNESANS

Lekel non Bondye, e konbyen fwa i ganny itilize dan Lekritir Ebre?

Akoz ou devret servi non Bondye?

Ki bann kalite Zeova Bondye ki atir ou partikilyerman?

[Portre lo paz 29]

Eski ou vreman konn byen Kreater tou keksoz?