En Let Sorti Kot Konsey Direkter

Anmezir ki nou pe konmans sa venteentyenm syek, i en plezir pour ekrir zot, “tou lasosyasyon bann frer” otour lemonn, e felisit zot pour zot travay. (1 Pyer 2:17, NW ) Preski 2,000 an pase, Zezi ti demande: “Ler Fis-de-Lonm pou vini, eski i pou trouv lafwa lo later?” (Lik 18:8) Zot aktivite zele pandan sa lannen servis ki’n pase i reponn kestyon Zezi avek en gran wi! Serten parmi zot in ganny meprize e ridikilize akoz zot lafwa. Dan en kantite landrwa, zot in fer fas avek lager, dezas, maladi oubyen lafen. (Lik 21:10, 11) Akoz zot zel pour bann bon travay, Zezi i ankor kapab “trouv lafwa lo later.” Sirman i annan lazwa dan lesyel akoz sa!

Nou konnen ki pour andire i pa fasil. Konsider leprev nou bann frer dan en pei was Lazi. Vyolans kont Temwen Zeova i komen dan sa pei. Tou resaman, lapolis ti enteronp en lasanble ki 700 dimoun ti pe asiste trankilman. Bann baraz lo semen ti anpes 1,300 dimoun asiste sa lasanble. En group dimoun ki ti’n kasyet zot figir, serten parmi zot ti lapolis, ti ravaz sa landrwa kot lasanble ti pe deroule, zot ti bat en kantite delege, e met dife avek sa landrwa ki ti pou ganny servi pour sa lasanble. Lo en lot lokazyon, bann ekstremis relizye in bat nou bann frer britalman avek bann baton ki annan bann klou avek.

Bann tel latak i sokan me i pa sirprann nou. Zapot Pol ti ganny enspire pour ekrir: “Tou sa ki oule viv en lavi fidel dan Kris Zezi pou ganny persekite.” (2 Tim. 3:12) Dan premye syek, bann Kretyen ti fer fas avek bann persekisyon verbal e fizik, e serten ti menm ganny touye. (Akt 5:40; 12:2; 16:22-24; 19:9) Menm keksoz ti arive dan ventyenm syek, e san dout i pou kontinyen dan venteentyenm syek. Kantmenm sa, Zeova i dir nou: “Nenport ki zarm ki pou ganny formen kont ou pa pou reisi.” (Iza. 54:17) En lasirans merveye! Annefe, nou sitan presye pour Zeova ki atraver son profet Zekarya, i ti dir: “Sa ki tous ou i pe tous mon kannet lizye.” (Zeka. 2:8) Lennmi bann adorater Zeova napa okenn sans ranport laviktwar final. Ladorasyon pir pou ranport laviktwar!

Par egzanp, dan sa pei ki’n ganny mansyonnen pli boner, Temwen Zeova in rezwir de nouvo rikord dan lakantite proklanmater pandan lannen servis 2001. Wi, nou bann frer in persevere dan sa pei malgre zot in rankontre difikilte, parey zot rankontre partou. Pandan sa lannen servis ki’n pase, 5,066 dimoun dan lemonn antye in batize sak semenn an senbol zot dedikasyon avek Zeova. Aprezan sa bann nouvo ansanm avek nou i determinen pour ‘reste ferm dan tou lavolonte Bondye.’—Kol. 4:12, NW.

Osi, konsider bann devlopman ki’n arive resaman Lagres. Malgre bann lopozisyon entans pour plizyer lannen par Legliz Ortodoks Lagres, Temwen Zeova in aprezan ganny rekonnet par gouvernman konman en ‘larelizyon ofisyel.’ Sa dokiman ki ti permet ki Temwen Zeova i ganny rekonnet ti apre dir ki Betel Lagres i “en landrwa sakre, ki’n ganny dedye avek ladorasyon Bondye.” Nou osi kontan pour dir zot ki pandan lannen servis ki’n pase, bann lakour in pran bann desizyon ki favorab ki ti pe afekte nou ladorasyon an Bilgari, Kanada, Lalmanny, Zapon, Larisi e Lanmerik. Nou remersi Zeova pour kit laport pour aktivite ouver dan sa bann pei.

Anmezir ki nou konsider bann fason ki Zeova i siport son pep pandan bann dernyen zour, nou vwar ki i sa pli bon Zanmi ki nou kapab annan. Nou pran plezir dan nou relasyon avek li, nou konnen ki i kontan nou, ansenny nou e koriz nou. Wi, nou lafwa pou kontinyen ganny teste. Me en lafwa solid dan Zeova pou soutenir nou. Zak ti ekrir: “Mon bann frer, konsider konman en lazwa, tou bann leprev ki zot bezwen pas ladan, parski zot konnen ki si zot lafwa i reste ferm dan bann leprev, sa i prodwi pasyans.” (Zak 1:2, 3) Anplis ki sa, nou landirans i montre nou lanmour pour Zeova, e sa i fer nou zwaye! Zot kapab asire, ser frer ek ser, ki Zeova pou siport nou tou endividyelman. Si nou reste fidel, san fot i pou ed nou pour antre dan sa nouvo monn. Zeova i oule ki nou reisi.

Alors, nou enplor zot frer ek ser, zenn ek vye, pour kit antet sa bann benediksyon merveye ki devan nou. Fotespere ki nou annan menm latitid avek zapot Pol, ki ti ekrir: “Mon annan sa lasirans ki sa ki nou pe soufer konmela i san konparezon avek laglwar ki Bondye pou revel nou dan lavenir.” (Rom. 8:18) Depan lo Zeova kan zot rankontre nenport difikilte. Andire, e refize pour abandonnen. Zot pa pou zanmen, zanmen regrete. Parol Bondye i asir nou: “Me pour sa enn ki drwat, par son fidelite i pou kontinyen viv.”—Aba. 2:4.

Zot frer,

Konsey Direkter Temwen Zeova