Led pour bann madanm ki pa pe ganny trete byen

Sa i lafason ki sa lartik ki annan pour tit “Sekirite bann madanm—Sa ki Labib i dir” ki lo jw.org, i konmanse. A lafen sa lartik, i annan en link ki permet ou download sa lartik an form PDF, ki ou kapab enprimen e ploye pour fer li vin en trak ki annan kat paz. En ser ki apel Stacy, ki reste Leta-z-ini i dir: “Mon ti enprim plizyer kopi e apre, mwan ek en lot ser, nou ti anmenn sa bann kopi kot en landrwa dan nou teritwar kot bann madanm ki zot lavi i an danze i reste.”

En travayer dan sa landrwa ti demande si i ti kapab ganny plis kopi pour li donn bann madanm ki pe reste dan sa landrwa. Alor, de ser ti anmenn 40 kopi sa trak ansanm avek 30 kart kontak jw.org pour zot. Pli tar, sa dimoun ki ansarz sa landrwa ti anvi ki Temwen Zeova i montre bann madanm ki ti reste dan sa landrwa ki mannyer pour etidye Labib.

Stacy ansanm avek de lezot ser ti osi annan bann bon leksperyans dan en lot landrwa parey. Laba, bann dimoun ti aksepte senk kopi sa trak e demande ki sa bann ser ti anmenn plis kopi sa trak. Enn bann dimoun ki travay dan sa landrwa ti dir: “Sa bann pti liv pou ed bann madanm ki reste isi.” I ti osi dir: “Nou bezwen sa.” Ler sa bann ser ti retournen pli tar, serten parmi bann madanm ki reste dan sa landrwa ti anvi vwar ki i pase dan en letid Labib e de parmi zot ti dir ki zot anvi asiste renyon kot Lasal Rwayonm son wikenn.

Stacy i dir: “Nou vreman sirprann par lafason ki dimoun in reazir anver sa zoli lartik. Ler ou enprim e ploy li, sa i en zoli fason pour partaz sa mesaz Rwayonm avek bann madanm ki’n ganny abize. Nou ti kontan pour vwar ki dimoun i vreman kontan sa lenformasyon e nou vreman eksite pour vwar lafason ki Zeova pou beni nou zefor anmezir ki nou kontinyen anons sa bon nouvel avek sa bann madanm.”