Eski ou kapab partisip dan predikasyon dan Dimans?
1. Ki nou kapab aprann avek aksyon Pol ek son bann konpanyon dan lavil Filip?
1 I ti zour Saba, en zour kot laplipar Zwif dan lavil Filip ti repoze. Pol ek son bann konpanyon ti pe vizit sa lavil pandan enn zot bann vwayaz misyonner. Personn pa ti pou kritik zot si zot osi zot ti al repoze dan plas prese akoz zot ti byen merit en repo. Me zot, zot ti konnen ki bann Zwif i zwenn an deor lavil pour al fer lapriyer, alor zot ti sezi sa loportinite pour al pres avek sa bann dimoun. Zis mazin sa lakontantman ki Pol ek son bann konpanyon ti’n bezwen gannyen kan Lidi ti ekout zot e tou dimoun kot li ti batize! (Akt 16:13-15) Vi ki konmela i annan bokou dimoun ki repoze dan Dimans, akoz ou pa servi sa letan pour pres avek zot?
2. Ki bann defi ki pep Zeova in bezwen sirmonte pour zot kapab pres dan Dimans sa okenn difikilte?
2 Lite pour pres dan Dimans: An 1927, pep Zeova ti ganny ankouraze pour servi en serten kantite letan dan Dimans pour al prese. Zot ti ganny bokou lopozisyon dek ki zot ti konmanse. Bokou ti ganny arete avek lapolis dan Leta-z-ini pour vyolasyon lalwa Saba Dimans, briz lape e pour vann san en laysenns. Me pep Zeova pa ti aret prese. Dan bann lannen 1930, zot ti organiz bann kanpanny kot bann proklanmater dan diferan kongregasyon dan zalantour ti zwenn ansanm par group pour kouver en teritwar spesifik. Ler lapolis ti aret bann proklanmater, parfwa telman ti annan bokou zot, lapolis pa ti kapab anpes zot fer sa travay. Eski ou vreman apresye bann sakrifis ki sa bann frer ti fer pour ki ozordi nou kapab pres dan Dimans san okenn difikilte?
3. Kwa ki fer Dimans en bon zour pour partisip dan predikasyon?
3 En bon zour pour prese: Bokou dimoun i kot lakour dan Dimans. Zot pli kalm e alez. Serten dimoun ki al legliz pou pli pare pour koz lo Bondye sa zour. Si nou al renyon dan Dimans, nou deza dan en lenz ki konvenab pour al prese. Alor, akoz ou pa aranze pour fer predikasyon avan oubyen apre renyon? Si i neseser, prepar en dezennen senp pour anmenn avek ou.
4. Ki lazwa ki nou kapab gannyen si nou al prese dan Dimans?
4 Si nou servi en serten kantite letan dan Dimans pour fer predikasyon, i pou reste nou ankor letan pour repoze. Nou pou al repoze avek sa satisfaksyon ki nou gannyen ler nou partisip dan predikasyon. (Prov. 19:23) Nou menm kapab eksperyans sa lazwa pour zwenn en dimoun parey Lidi!