Prepar bann nouvo pour fer fas avek lopozisyon
1 Ler bann dimoun i konmans etidye Labib e devlop sa dezir pour ‘viv en lavi fidel’ avek Bondye, zot vin bann target spesyal pour Satan. (2 Tim. 3:12) Lopozisyon i kapab vin atraver koleg travay, kanmarad lekol oubyen vwazen. I kapab difisil sirtou kan bann manm fanmir ki napa move lentansyon i opoz bann nouvo.—Mat. 10:21; Mark 3:21.
2 Lopozisyon ki’n ganny predir: Bann nouvo i bezwen konpran ki nou espekte ganny persekite e sa i endike ki zot in vin bann vre disip Kris. (Zan 15:20) Parfwa, lezot i kapab persekit nou akoz zot annan bann fo pwennvi lo Temwen Zeova. Gard antet ki nou devret rezwir menm si nou ganny maltrete akoz nou pe obeir Bondye e nou en disip Zezi. (Akt 5:27-29, 40, 41) Asir bann nouvo ki Zeova pou donn zot son sipor ranpli avek lanmour. (Ps. 27:10; Mark 10:29, 30) Kan zot gard zot fidelite zot pe reponn sa kestyon konsernan drwa Zeova pour dirize e sa i demontre ki zot lo son kote.—Prov. 27:11.
3 Lenportans pour annan konnesans egzakt: Montre ou bann etidyan Labib lenportans pour kontinyen pran sa konnesans egzakt malgre difikilte ki zot kapab pe fer fas avek. Par servi lopozisyon, Satan i esey anpes sa ki zot pe aprann pran rasin dan zot leker. (Prov. 4:23; Lik 8:13) Zot bezwen kontinyen pran sa konnesans egzakt lo Parol Bondye pour zot byen anrasinen dan lafwa.—Ps. 1:2, 3; Kol. 2:6, 7.
4 Lenportans pour andire: Dan nenport sityasyon difisil, landirans i vreman esansyel e i kapab anmenn bon rezilta. (Lik 21:16-19) Ler bann nouvo i andir lopozisyon, sa i benefisye zot menm e lezot. Zot eksperyans sa abilite ki Zeova i annan pour beni bann ki fidelman andire.—Zak 1:12.
5 Vi ki son bann frer ki enkli bann ki i ti’n ede dan laverite an Tesalonik ti pe fer progre, zapot Pol ti rezwir e remersye Bondye. (2 Tesa. 1:3-5) Nou osi nou kapab eksperyans sa menm lazwa ek satisfaksyon si nou prepar nou bann etidyan Labib pour fer fas avek lopozisyon e andire.