‘Kontinyen swiv mwan’
1 Bokou dimoun i konsantre lo fer plezir zot lekor, me souvannfwa zot pa zwaye. Me Zezi ti koz lo en fason donnen ki anmenn vre lazwa. (Akt 20:35) I ti dir: “Si en dimoun i oule swiv mwan, i bezwen aret mazin son lekor . . . e [kontinyen] swiv mwan.” (Mark 8:34) Sa pa zis enplik pa fer serten keksoz ki fer nou plezir tanzantan. I enplik fer plezir Zeova sak zour, pa zis nou lekor.—Rom. 14:8; 15:3.
2 Annou vwar legzanp zapot Pol. Akoz “sa valer bokou pli siperyer ki annan dan konnesans . . . Kris Zezi,” Pol ti aret pourswiv son prop dezir e i ti dedye son lavi pour fer avanse bann lentere Rwayonm. (Fili. 3:7, 8) I ti dir: “Mwan mon pare pour depans tou [sa ki mon annan], menm depans mwan menm” pour servi lezot. (2 Kor. 12:15) Nou tou nou devret demann nou lekor: ‘Konman mon pe servi mon letan, lenerzi, abilite, ek resours? Eski mon konsantre plis lo mon prop lentere, oubyen eski mon pe rod fer plezir Zeova?’
3 Loportinite pour donnen: Pep Bondye i dedye plis ki en bilyon er-d-tan sak lannen dan travay predikasyon ki sov lavi. Dan kongregasyon, zenn konman vye i akonpli diferan responsabilite ki benefisye lezot. I annan bokou travay ki ganny fer ki relye avek bann lasanble osi byen ki konstriksyon ek reparasyon bann batiman ki ganny servi pour siport vre ladorasyon. Mazin led ki bann frer ki servi lo Comité de liaison hospitalier ek bann ki vizit bann dimoun malad i donnen avek lanmour. Tou sa bann zefor i en benediksyon pour nou bann frer ek ser!—Ps. 110:3.
4 Nou kapab ganny plis loportinite pour ed lezot dan diferan fason ler i annan en dezas oubyen en ka irzan. Me pli souvan, nou kapab rekonnet ki en konpanyon Kretyen i bezwen led oubyen lankourazman. (Prov. 17:17) Kan nou pare pour ed lezot e pour fer avanse lentere Rwayonm, nou pe swiv legzanp Zezi. (Fili. 2:5-8) Annou fer zefor pour kontinyen fer li.