Konman pour gard nou Devouman
1 Devouman ki Apolos ti annan pour akonpli son minister i fer nou mazin bann Kretyen ozordi ki vreman devoue dan predikasyon. (Akt 18:24-28) Me nou tou nou ganny sa konsey: “Pa fer pares, me travay avek lenerzi. Pouse par Lespri.” (Rom. 12:11) Kwa ki kapab ed nou annan e osi gard nou devouman dan minister Kretyen?
2 Ogmant nou Konnesans: Apre ki Zezi ti’n aparet avek de parmi son bann disip e “eksplik zot sa ki Lekritir in dir lo son size,” zot ti dir: “Pa i vre ki ou ti a krwar ki ti annan en dife ki ti pe brile anndan nou ler i ti pe koz avek nou lo semen?” (Lik 24:27, 32) Nou osi, pa nou santi anndan nou brile avek leksitasyon ler nou pli byen konpran Parol Bondye? Wi, konnesans i fer nou lafwa vin pli for. Romen 10:17 i eksplike: “Lafwa i vin par mesaz ki nou tande.” Ler nou leker i ranpli avek konfyans dan bann promes Zeova, nou pa kapab aret koz lo bann keksoz ki nou’n aprann!—Ps. 145:7; Akt 4:20.
3 Pour nou kontinyen annan gran lanmour pour Bondye e devoue dan son servis, nou pa kapab depan zis lo konnesans ki nou’n gannyen atraver letid ki nou’n deza fer. Nou devret kontinyen ogmant nou konprenezon lo laverite e aprofondi nou lanmour pour Zeova. Sansan, nou servis pou ptit-a-pti vin en routin. (Rev. 2:4) Parol Bondye i ankouraz nou pour ‘kontinyen . . . progrese dan konnesans Bondye.’—Kol. 1:9, 10.
4 Nou Labitid pour etidye: I byen alor, pour egzamin nou labitid pour etidye. Par egzanp, nou kapab souliny larepons dan en lartik Latour Veyer e donn bann bon komanter. Me eski nou get bann verse Labib e reflesir konman nou kapab aplik sa lenformasyon? Eski nou fer zefor pour fer plis resers si nou kapab ler nou pe fer lektir Labib pour lasemenn e reflesir oprofon lo bann leson nou kapab tire ladan? (Ps. 77:11, 12; Prov. 2:1-5) Nou benefisye ler nou reflesir e met tou nou zefor dan Parol Bondye! (1 Tim. 4:15, 16) En tel letid oprofon pou nouri nou leker e donn nou plis lafors pour ‘devoue pour fer dibyen.’—Tit 2:14.