Montre Lentere senser—par demontre Labonte
1 En madanm ki ti’n mal ganny enformen lo bann Temwen Zeova ti rapel premye fwa ki i ti rankontre en Temwen. I ti dir: “Mon pa vreman rapel ki nou ti koz lo la, me sa ki mon rapel, se ki i ti zantiy avek mwan, i ti demontre lospitalite ek limilite. Son personnalite ti vreman atir mwan.” Sa komanter i montre nesesite pour demontre lentere senser dan bann dimoun ki nou pres avek.—Fili. 2:4.
2 Lanmour i bon: Demontre labonte i en fason ki nou kapab montre lanmour pour lezot. (1 Kor. 13:4) En dimoun ki annan labonte i pran en gran lentere dan byennet lezot, i fer bann keksoz pour ed zot. Byensir, travay predikasyon i en fason pour demontre labonte. Me nou lentere senser pour bann dimoun i pa ganny reflekte zis ler nou pres avek zot. Dan nenport fason ki nou azir avek dimoun—par montre nou zantity, nou bon konportman, lapolites, lafason ki nou ekoute, sa ki nou dir e lafason ki nou dir li, menm lafason ki nou get lezot—i montre ki nou vreman enterese avek zot.—Mat. 8:2, 3.
3 Lentere senser pour dimoun pou pous nou pour ofer nou led dan bann fason pratik. Ler en frer pionye ti pe pres port-an-port, en vev aze ti byen mekontan apre ki i ti konnen ki sa frer i en Temwen. Sa madanm ti dir ki i ti lo en lesel dan lakwizin pe sey sanz en glob ler sa frer ti tap laport. Sa frer ti demann li: “I pa danzere pour ou fer sa ou tousel?” Sa madanm ti envit sa frer anndan. Sa frer ti sanz sa glob apre i ti ale. Ler garson sa madanm ti pase en pti pe letan plitar pour gete ki mannyer i ete, i ti rakont li sa ki ti’n arive. I ti telman enpresyonnen ki i ti rod sa frer pour eksprim son lapresyasyon. Zot ti ganny en bon konversasyon, e sa msye ti aksepte en letid Labib.
4 Par demontre labonte, nou reflekte lanmour ki Zeova i annan pour dimoun e i pou fer sa mesaz Rwayonm pli atiran. Alors, annou toultan “fer tou nou posib pour viv konman bann serviter Bondye . . . par nou labonte.”—2 Kor. 6:4, 6.