Tou kalite Dimoun pou ganny sove
1. Nou pozisyon devan Bondye i depan lo kwa?
1 Labonte ki Bondye i demontre in ouver semen pour delivrans. I lavolonte Zeova ki “tou [kalite, NW] dimoun i ganny sove e ganny konnesans laverite.” (1 Tim. 2:3, 4) Nou pozisyon devan Bondye pa depan lo nou ras, pozisyon dan lasosyete, abilite, oubyen laparans, me i depan lo lafwa ki nou demontre dan sakrifis Zezi. (Zan 3:16, 36) Konman bann konpanyon travay Bondye, nou devret zefor pour pa fer okenn preferans ki kapab enfliyans nou pour rezet bann dimoun ki Zeova i pare pour aksepte.
2, 3. Kwa ki kapab ed nou pour pa ziz dimoun par zot laparans?
2 Evite zize: Zeova i get sa ki en dimoun i ete anndan. I pa fer sa avek okenn move lentansyon oubyen preferans. (1 Sam. 16:7) I osi vwar kwa ki en dimoun i kapab vini. I apresye bann ki anvi fer li plezir. (Aga. 2:7) Eski nou vwar lezot parey Bondye i vwar zot?
3 Serten dimoun ki nou zwenn dan predikasyon i kapab sok nou par zot laparans. Petet zot resanz i an dezord oubyen endesan, zot labarb i an dezord oubyen zot met zanno lo nennen oubyen lalev. Serten i kapab reste lo semen. Petet lezot i tret nou dan en fason brit. Olye ki ziz sa bann dimoun konmsi zot pa pou zanmen vin bann adorater Zeova, nou devret annan en latitid pozitif, “parski nou osi, dan lepase, nou ti bet, dezobeisan e dan lerer.” (Tit 3:3) Ler nou realiz sa, nou pou anvi pres avek tou dimoun, menm avek sa bann ki zot laparans i kapab paret zot pa merit tann sa bon nouvel.
4, 5. Ki nou aprann atraver legzanp Zezi ek Pol?
4 Legzanp dan premye Syek: Zezi Kri ti pran letan pour ed bann ki lezot dimoun ti krwar zot pa pou kapab sanze. (Lik 8:26-39) Menm si i pa ti zanmen toler bann move aksyon, Zezi ti konnen ki en dimoun i kapab ganny enfliyanse pour annan en move lavi. (Lik 7:37, 38, 44-48) Se pour sa ki i ti demontre konprenezon, i ti “pran pitye pour zot, akoz zot ti parey bann mouton ki napa berze.” (Mark 6:34) Eski nou kapab imit son legzanp pli byen ankor?
5 Zapot Pol ti ganny saboule avek ros, bate, e ganny anprizonnen. (Akt 14:19; 16:22, 23) Eski sa bann move leksperyans ti fer li ankoler e dir ki i ti pe gaspiy son letan avek serten nasyon ek group etnik? Ditou. I ti konnen ki bann dimoun ki annan leker senser ti pou kapab ganny trouve dan tou bann group etnik, e i ti determinen pour rod zot. Eski koumsa nou vwar bann dimoun ki sorti dan diferan lorizin ek kiltir dan nou teritwar?
6. Ki lefe nou latitid i kapab annan lo bann nouvo ki asiste bann renyon?
6 Akey lezot ozordi: Bokou serviter Bondye i kontan ki zot ti ganny akeyir dan kongregasyon par bann frer ek ser ki pa ti get laparans. En zonm avek en labarb an dezord ek gran seve ki bat lo zepol, dan en lenz sal, ti ariv kot en Lasal Rwayonm Lalmanny. I ti annan en move repitasyon. Kantmenm sa, i ti ganny byen akeyir kot Lasal. I ti telman enpresyonnen ki i ti retournen en semenn apre. Dan en pti lespas letan, i ti okip son lekor, aret fimen, e marye avek son bouldou. Pa bokou letan apre, ansanm avek zot zanfan zot ti konmans servi Zeova konman en fanmiy ini.
7. Ki mannyer nou kapab imit nou Bondye ki pa fer preferans?
7 Parey nou Bondye ki pa fer preferans, annou ofer sa lenvitasyon pour benefisye avek labonte Bondye avek tou dimoun.
[Ekstre lo paz 3]
“Bondye pa fer preferans pour personn, me dan nenport ki nasyon tou dimoun ki annan respe pour li e ki fer sa ki byen Bondye i kontan li.”—Akt 10:34, 35.