Ranpli en Bezwen irzan pour Lasal Rwayonm
1-2. Ki lobzektif nouvo progranm konstriksyon e ki bann kongregasyon i devret gard antet?
1 Dan bokou pei, konstri bann Lasal Rwayonm ti prezant bokou difikilte e konstriksyon ti dir pour bokou letan. Serten kongregasyon ti bezwen zwenn dan bann landrwa lwe pour plizyer mwan oubyen pour plizyer lannen, pandan ki konstriksyon ti pe deroule. Ozordi, gras a en nouvo progranm konstriksyon remarkab, bann Lasal Rwayonm pe ganny konplete dan en lespas letan enkrwayab.
2 Bann kongregasyon i bezwen gard antet laspe pli gran sa progranm—90 pei i bezwen plizyer milye Lasal Rwayonm. Se pour sa rezon ki i enportan pour byen servi bann kontribisyon. Lobzektif se pour konstri bann Lasal Rwayonm ki senp, ki pa ser me ki onor nou Bondye.
3. Ki sitiasyon aktyel bann landrwa renyon Moris ek Sesel?
3 Ozordi dan Moris ek Sesel bokou pti kongregasyon ki annan anviron 25 a 40 proklanmater i bezwen rankontre dan lakour bann frer oubyen dan landrwa lwe. Akoz problenm transpor osi byen distans i fer li difisil pour bann frer ek ser zwenn bann pli gran kongregasyon ki rasanble dan bann Lasal Rwayonm. Ki mannyer sa progranm pou ede rezourd sa bann sitiasyon?
4-7. Ki bi Biro Konstriksyon Lasal Rwayonm?
4 Lobzektif Biro Konstriksyon Lasal Rwayonm: En Biro Konstriksyon Lasal Rwayonm in ganny etablir dan biro brans Moris pour kordin travay konstriksyon dan nou teritwar. Sa biro i annan responsabilite pour organiz e diriz sa progranm anba Komite Brans.
5 Sa biro pou devlop bann plan ki standar e osi detaye pour tou Lasal Rwayonm ki senp, adapte avek sa landrwa, e ki reflekte metod ek materyo lokal. Sa pou ede redwir lakantite travay, ki pou fer sa proze pli bon marse.
6 Sa Biro i kapab osi rankontre bann konsey ansyen dan sa pei. I osi ed bann kongregasyon ler zot pe swazir e aste en propriyete. I pou ede fer sir ki laprouvasyon pour planing ek konstriksyon i ganny obtenir.
7 Sa biro pou donn formasyon bann ansyen pour kapab pran swen e repar zot Lasal Rwayonm alafen konstriksyon.
8. Ki mannyer en dimoun i kapab vin en serviter konstriksyon Lasal Rwayonm oubyen en volonter konstriksyon Lasal Rwayonm?
8 Group Konstriksyon Lasal Rwayonm: En group dimoun i travay aplentan anba gidans Biro Konstriksyon Lasal Rwayonm. I ed kongregasyon avek zot proze konstriksyon. I prepar e siperviz sak laspe sa proze e vey byen bann depans. Dan sa group i annan:
◼ Serviter konstriksyon Lasal Rwayonm (laplikasyon A-12). Sa i bann zonm (preferableman bann ki annan konnesans dan konstriksyon) ek madanm (ser marye) spirityel. Zot devret disponib pour servi pour en gran peryod letan e annan ant 19 a 55 an. Zot devret an bonn sante e kapab fer bann gro louvraz. Zot devret osi batize pour omwen en lannen. Zot ganny trete parey lezot serviter aplentan.
◼ Volonter konstriksyon Lasal Rwayonm (laplikasyon A-25). Zot prensipalman bann frer e zot disponib pour en pti gin letan (2 semen ziska 3 mwan). Zeneralman, zot annan ant 19 a 55 an e zot an bonn sante. Zot devret kapab fer bann gro louvraz e batize pour omwen en lannen. Pour kapab redwir depans akomodasyon ek transportasyon, i pli bon swazir bann aplikan (A-25) dan sa rezyon kot en proze pe deroule. Me si i neseser, biro brans i kapab ed finansyerman bann volonter letan ki zot ganny anvoye lo en proze konstriksyon.
9-10. Ki bann volonter kongregasyon i kapab fer pour siport proze Lasal Rwayonm e ki zot kalifikasyon?
9 Volonter Kongregasyon: Tou dimoun dan kongregasyon i ganny ankouraze pour donn tou zot sipor zot proze Lasal Rwayonm. Petet ou pa dan en pozisyon pour partisip aktivman dan konstriksyon, me eski ou kapab ede dan lezot fason? Par egzanp, eski ou kapab volonter pour prepar manze, ede okip lakour bann frer ek ser ki dan group konstriksyon? Bann volonter kongregasyon i travay anba sipervizyon Group Konstriksyon Lasal Rwayonm.
10 Kongregasyon i ganny enformen davans dat pour proze konmanse. Zot osi ganny enformen ki kantite volonter pou bezwen e kan. Bann ansyen i devret konn bann abilite ki disponib e batir lantouzyasm pour sa proze. Bann manm kongregasyon ki anvi volonter pa bezwen ranpli en form laplikasyon. Bann proklanmater i devret annan en bon repitasyon e annan 17 an oubyen plis.
11. Ki nou tou nou ganny envite pour fer?
11 Nou tou nou ganny envite pour partisip dan sa progranm konstriksyon Lasal Rwayonm. Donn tou ou korporasyon anver sa laranzman teokratik. Swiv byen bann plan e soumet avek sa bann ki pe dirize.—Ebre 13:17, 1 Korentyen 14:40.
Diferan Pa pour konstri en nouvo Lasal Rwayonm
◼ Kongregasyon i ekrir biro brans pour lasistans. Dekrir kondisyon aktyel landrwa renyon, kantite proklanmater. Enkli portre. Eski i egziste en bezwen irzan oubyen zis en dezir pour amelyor oubyen sanz landrwa fasilite ki ankor apropriye?
◼ Bann reprezantan Biro Konstriksyon Lasal Rwayonm i organiz renyon avek konsey ansyen ek sirveyan rezyonal.
◼ En serve lo sitiasyon finansyel sa kongregasyon i ganny fer. Eski kongregasyon i kapab pey pour Lasal Rwayonm dan 10, 15, oubyen menm 20 an? Si non, eski zot pou pare pour kontribye sak mwan tou sa ki zot kapab pour konstriksyon ek reparasyon?
◼ Group Konstriksyon Lasal Rwayonm i ed kongregasyon pour trouv propriyete e konplet Property Evaluation Checklist (CN-13).
◼ Kongregasyon i aprouv landrwa rekomande ek plan ki standar. Fer bann rezolisyon neseser.
◼ Biro brans i donn laprouvasyon final pour propriyete ki ganny swazir ek bidze pour proze. Aste propriyete e anrezistre lo non biro brans. Proze i ganny progranmen.
◼ Kongregasyon i donn proze Lasal Rwayonm ek son reparasyon tou zot sipor.